Nos últimos días estase  procedendo o limpado das máis de 20 marquesiñas situadas ó longo de todo o municipio, co obxectivo de mellorar a  imaxe destas e da contorna na que se sitúan,  retirando a cartelería e lavando as cristaleiras e bancos. Ademais disto, na modificación de crédito aprobada en pleno o pasado xoves incluiase unha partida para proceder a substitución de varias das marquesiñas máis antigas, que no seu día se realizaron en chapa ondulada, e que co paso dos anos van presentando problemas como goteiras ou partes oxidadas, e xa é momento de renovalas.

   Estase procedendo tamén a colocacións en cada marquesiña dun aviso de prohibido fixar cartéis para evitar a mala imaxe que xera a súa acumulación.

   Enrique Oubiña, responsable da área de urbanismo  recordábanos estes días  que ” cando chegamos  ó goberno, máis da metade das marquesiñas presentaban cristais danados, así como outros defectos froito do desgaste, e do total abandono no que o PP tiña estes espazos, que non debemos esquecer que son usados maiormente por nenos e nenas, e solucionar todos eses defectos supuxo unha  inversión de case 5.000€. Coa prohibición de pegar carteis nas marquesiñas aforraremos en traballos de limpeza, pero sobre todo, e o máis importante ,  melloraremos a súa imaxe, e por extensión a imaxe do noso concello.”

 

Máis e mellores tableiros de anuncios.

   Por outra banda nas últimas semanas tamén se procedeu ó cambio dalgúns dos máis de 50 tabolerios de anuncios que temos no concello, debido ó seu deterioro, e a colocación de varios máis, dando resposta así a distintas demandas veciñais. Ante a limitada durabilidade dos taboleiros de madeira, optouse por mudar de modelo, mantendo a  estética pero cambiando o material do que están feitos,  que pasa a ser de aluminio,  máis resistente ó clima, e de mantemento máis sinxelo. O resto de taboleiros, iranse substituindo polo novo modelo según se vaian deteriorando.

 A Comisión Executiva de Somos Ribadumia ven de convocar unha xuntanza extraordinaria para este próximo xoves 13 de setembro, no centro social de Barrantes  a partir das 20:30 horas.

  Os obxectivos desta xuntanza son, por un lado,  definir o xeito no que a plataforma se presentará ás próximas eleccións municipais, ben en solitario ben reunidos con outras forzas, en cuxo caso haberá que definir de que xeito e en que condicións.

   Por outra banda, tamén se definirá a formula para a escolla de candidato ou candidata, e se darán os primeiros pasos para ir traballando o proxecto político co que presentarse as eleccións, así como outras cuestión de cara a  organización da campaña electoral.

   Este encontro, como todos os demais será aberto á cidadanía, á que convidamos a participar nun proceso que nos levará a presentar, un proxecto de futuro para Ribadumia baseado na necesidades da nosa veciñanza e na experiencia de goberno.

•  a nova ordenanza xeral de recadación, así como o calendario fiscal de 2019, presentan importantes novidades que buscan facilitar aos veciños e veciñas o pagamento dos tributos municipais.

   O Equipo de Goberno presentaba durante a última Sesión Ordinaria do Pleno Municipal unha proposta que permitirá o fraccionamento de tributos e un plan personalizado de pagos dos impostos municipais, ampliando así as posibilidades de veciños e veciñas para realizar os correspondentes abonos máis alá da norma xeral en vigor.

   No primeiro caso, todo aquel que o desexe terá a posibilidade de fraccionar calquera dos impostos recadados polo Concello en dous prazos, sempre que se cumpran as seguintes condicións: o importe do recibo debe ser igual ou superior a 120€; os pagamentos teñen que ser domiciliados e o servizo solicitado polo titular da conta; non poden estar incluídos nun plan de pago personalizado, ter sancións pendentes co Consistorio ou estar en período executivo. Así mesmo, desempregados sen prestación, beneficiarios de pensións non contributivas ou contributivas ou de viuvez por baixo do salario mínimo interprofesional e perceptores de axudas de emerxencia social como o RISGA ou semellantes, poderán realizar o ingreso ata en catro prazos. En calquera dos casos, non se cargarán intereses.

   En canto ao plan personalizado de pago, recollerá todos os tributos municipais a excepción do de auga e poderá ser solicitado por calquera veciño ou veciña que non se adhira ao fraccionamento, que non teña débedas co Concello e que teña o pagamento domiciliado. Neste caso, realizarase una suma de tódalas taxas do exercicio fiscal anterior, que poderá ser dividida en de dous a seis prazos, pagando sempre o primeiro recibo o 1 de marzo e o último o 1 de outubro. Ademais, poderá solicitarse e suspenderse en calquera momento, sempre que se atope en período de pago voluntario. Non obstante, a súa entrada en vigor terá lugar no exercicio fiscal seguinte ao do momento de pedilo se esta solicitude se realiza con posterioridade ao 31 de xaneiro.

   Con estas propostas, tal como explicaba Oubiña á saída do pleno, “damoslle unha importante volta ó servizo de recadación, mellorando e moito as restriccións que os nosos veciños  veciñas tiñan cando a xestión a levaba o ORAL. Ademais modificamos o calendario para adecualo á realidade da nosa veciñanza, evitando que os prazos de pagamento coincidan coas epocas de máis carga económica, como o inicio do colexio ou o nadal.”

O Concello de Ribadumia informa de que a Xuntanza dos Nosos Maiores, celebrada o pasado sábado , e que este ano contaba a súa viseximoquinta edición, foi todo un éxito en canto a participación e disfrute dos participantes.

O tempo acompañou nunha xornada cuxo eixe central era o xantar de confraternidade que comezou pasadas as 14:00 horas –logo da misa de campaña- e que congregou a preto de dous centenares de persoas, unha cifra que subiu con respecto ó ano pasado, o cal é indicativo da boa saúde que goza esta xuntanza anual.

Xa de tarde, ademais dos habituais xogos de mesa -que repartiron varios premios entre o público-, e doutros agasallos entregados ás persoas máis maiores presentes, houbo baile e troula ata ben caída a tarde, acompañado por un trío musical, cun photocall, animación…

Tamén puideron os asistentes divertirse durante toda a xornada coa presencia do famoso actor e humorista televisivo “Isi”, un todoterreo que o mesmo guiaba o bingo, que daba un monologo ou se paseaba por entre o público amenizando a tarde coas súas dotes humorísticas, e asinando autógrafos, a maioría deles nos abanicos ou sombreiros que para combater o sol e a calor, se repartiron dende a organización, que como sempre correu a cargo do departamento de servizos sociais e da concellería de terceira idade.

A boa aceptación deste evento, tal como explica Enrique Oubiña, concelleiro de terceira idade, tivo tamén unha repercusión moi positiva no Club Senior municipal, que segue aumentando o número de socios e socias con cada actividade”. Esta xornada de confraternidade ademais serviu para darlle un impulso a este club creado a raíz da modificación da norma do fogar dos maiores, pois ofreceu un desconto dun 50% as persoas que tiveran o carnét ou aproveitaran a ocasión para realizalo. Deste xeito, grazas a esta campaña o Club Senior subiu ata case o centenar de usuarios, un dato moi importante para Oubiña por que “canto maior sexa o numero de persoas que integran este club, mais posiblidade teremos de organizar máis actividades e de maior calidade. E de feito, os próximos obxectivos serán a organización dunha axenda de actividades de cara o outono e inverno, que axuden a dinamizar a vida dese importante sector da poboación.”

Enrique Oubiña quixo “unha vez máis agradecer o traballo dos profesionais do departamento de servizos sociais, Santi e Elena, pola súa gran labor organizando este evento e esforzándose por que todo saíra ben e sen percances, así como á dinamizadora do fogar dos maiores e as voluntarias que axudaron a que a xornada transcorrera con moito dinamismo. “