• Medio cento de veciños reclaman medidas de seguridade.
• O goberno admite que non fixo ningunha xestión.
• Somos Ribadumia leva a proposta ao Pleno.

Dende Somos Ribadumia presentamos unha moción para que o Concello actúe ante a petición formulada por  medio cento de veciños e veciñas da estrada da igrexa e do lugar do Casal, en Barrantes, que reclaman medidas para reducir a velocidade dos vehículos e mellorar a seguridade das persoas que transitan a pé pola zona.

A petición foi presentada no rexistro municipal o pasado 22 de xullo. Transcorrido máis dun mes sen resposta, no Pleno ordinario celebrado o 3 de setembro o noso concelleiro Sergio Soutelo preguntou expresamente ao goberno municipal que actuacións realizara o Concello en relación con esa solicitude.

A resposta do goberno deixou claro que, ata ese momento, non se dera resposta á petición veciñal nin se realizara ningunha xestión ante a Deputación de Pontevedra. Tampouco se aclarou se o goberno municipal está a favor das medidas solicitadas polos veciños e veciñas ou se considera necesario actuar para reducir a velocidade neste tramo.

Para nós, unha petición respaldada por medio cento de persoas merece algo máis que silencio. O mínimo que debe facer o Concello é escoitar, valorar tecnicamente a situación e dar unha resposta clara á veciñanza.

Ademais, non estamos falando dunha cuestión menor. Trátase dunha zona utilizada habitualmente por peóns e especialmente por persoas maiores que se desprazan camiñando cara á igrexa, ao cemiterio ou ás súas vivendas. A velocidade dos vehículos inflúe directamente na gravidade dun posible atropelo e, cando existen problemas de convivencia entre tráfico rodado e peonil, corresponde ás administracións estudar e aplicar medidas de calmado do tráfico.

Por ese motivo levamos agora a cuestión ao Pleno mediante unha moción. A proposta pide avaliar tecnicamente a seguridade viaria da zona e impulsar as medidas que resulten adecuadas, incluíndo a redución da velocidade máxima e a instalación de elementos redutores de velocidade cando sexan técnica e legalmente viables.

A moción contempla que ademais de actuar ante as Deputación para que esta aporte solucións no seu tramo,  o Concello actue na parte de vía que lle corresponde, pois a pesar das melloras realizadas na etapa na que Somos Ribadumia levamos urbanismo, segue quedando un tramo final 170 metros onde se seguridade viaria é mellorable.

E dende logo, non imos aceptar que se use a cuestión competencial como  escusa para non facer nada.

Dende Somos Ribadumia non pretendemos substituír os criterios técnicos nin decidir de antemán cal debe ser a solución concreta. O que pedimos é máis sinxelo: que se atenda a petición veciñal, que se estude o problema e que se adopten medidas para facer máis segura esta zona de Barrantes.

A veciñanza xa fixo a súa parte presentando a solicitude. Sergio Soutelo levou a cuestión ao Pleno e preguntou directamente polo que se fixera. Agora queremos que a Corporación municipal se pronuncie e que o Concello pase das explicacións á actuación.

• Propoñemos mellorar as instalacións deportivas de Leiro.

• Defendemos un reparto equilibrado dos investimentos deportivos en Ribadumia.

• O novo plan da Deputación é unha oportunidade máis para financiar estas melloras.

Dende Somos Ribadumia presentamos unha moción ao Pleno do Concello para impulsar unha mellora integral das instalacións deportivas municipais do Campo de Leiro. A iniciativa parte das necesidades concretas que presenta este recinto e enmárcase nunha cuestión máis ampla: a necesidade de planificar os investimentos deportivos municipais atendendo ao conxunto das instalacións e das entidades que desenvolven a súa actividade en Ribadumia.

A publicación do IV Plan Extraordinario de Infraestruturas Deportivas da Deputación de Pontevedra, dotado con 8 millóns de euros, abre agora unha oportunidade que o Concello pode aproveitar para financiar parte destas actuacións. Pero esta convocatoria non é o obxectivo da moción nin a única vía posible: a prioridade é definir as necesidades de Leiro, planificar as melloras e procurar os recursos necesarios, sexa a través deste plan, doutras convocatorias da Deputación, da Xunta de Galicia, de fondos propios ou doutras administracións.

Un reparto dos recursos que debe atender ao conxunto das instalacións

A revisión dos investimentos públicos documentados en infraestruturas deportivas de Ribadumia dende 2023 amosa unha concentración moi significativa nunha mesma contorna. O  total dos investimentos  nestas instalacións neste período e incluíndo  os proxectos que actualmente se están desenvolvendo  supera os 1,7 millóns de euros.

Dese volume, máis de 1,64 millóns de euros corresponden a actuacións na contorna do campo da Bouza e do pavillón de Barrantes, arredor do 95 % do investimento total identificado. Fóra desta contorna, as actuacións deportivas que puidemos documentar no mesmo período non chegan aos 75.000 euros. Estes datos reforzan a necesidade de planificar os seguintes investimentos atendendo ao conxunto das instalacións e das entidades deportivas do municipio dun xeito equilibrado e tamén igualitario.

Leiro, dentro dunha planificación deportiva para todo o municipio

A proposta sobre Leiro non pretende cuestionar os investimentos realizados noutras instalacións nin establecer unha competencia entre clubs ou entidades. Ribadumia conta con diferentes espazos e colectivos deportivos, todos eles merecedores de atención. O que propoñemos é que a planificación municipal procure un reparto equilibrado dos recursos, atendendo ao estado das instalacións, ao seu uso, ás necesidades detectadas e ás posibilidades de financiamento existentes en cada momento.

No caso concreto de Leiro, a moción propón habilitar un espazo adecuado para almacenar bicicletas e material deportivo, estudar unha zona para a preparación física, renovar o pavimento deteriorado situado nas proximidades da cantina, mellorar o saneamento dos baños e reforzar as medidas de seguridade, mantemento e control dos accesos.

Tamén propoñemos estudar novas actuacións que permitan ampliar os usos do recinto, como a posible creación dun pump track de iniciación e outros equipamentos compatibles coa práctica do ciclismo, o triatlón e outras modalidades deportivas. Estas propostas deben analizarse tecnicamente e integrarse nunha planificación que teña en conta tanto as necesidades deste recinto como as do resto das instalacións deportivas municipais.

O Campo de Leiro ten unha actividade deportiva consolidada. Segundo os datos aportados pola propia entidade, o Club Ciclista Ribadumia conta con arredor de 290 socios e socias e 190 deportistas, entre menores e adultos, participan nos seus adestramentos e actividades. A participación desta entidade na definición das necesidades de Leiro resulta lóxica polo seu uso habitual das instalacións, sen prexuízo de que o Concello manteña unha planificación global e diálogo co conxunto dos clubs e entidades deportivas do municipio.

Por iso solicitamos que o Concello elabore unha planificación das actuacións necesarias no Campo de Leiro, estableza prioridades e un calendario orientativo e determine que melloras poden acollerse ao IV Plan Extraordinario de Infraestruturas Deportivas ou a outras vías de financiamento. O obxectivo é avanzar na mellora de Leiro dentro dunha política deportiva municipal que distribúa os investimentos de forma equilibrada entre as distintas instalacións e necesidades do municipio.

·       O escenario, as vallas e mesmo o cartel de peche da estrada continúan na Carballeira máis de cinco semanas despois da Festa do Pan.

·       O recinto presenta lixo e restos espallados sen que o Concello realizase unha limpeza adecuada.

·       Detectamos outro carballo con signos visibles de enfermidade ou deterioración.

·       Esiximos unha inspección técnica urxente e un plan de conservación que evite que a Carballeira siga perdendo árbores.

Dende Somos Ribadumia queremos denunciar novamente o abandono ao que o goberno de David Castro ten sometida a Carballeira de Ribadumia.

A Festa do Pan celebrouse o pasado 8 de agosto e, máis de cinco semanas despois, o Concello aínda non foi capaz de devolver este espazo público á normalidade. O escenario continúa montado, e para o caso de que fóra utilizado para algunha outra actividade fai xa dúas semanas que na Carballeira non hai actividade municipal, nin da escola de verán nin de outro tipo. Ademais, permanecen no lugar varias vallas municipais e mesmo segue colocado o cartel que anuncia o peche da estrada pola celebración da festa.

Ao redor dos bancos e en todo o espazo   do recinto poden verse tamén papeis, envases e distintos restos de lixo acumulado. O estado actual da Carballeira evidencia unha falta absoluta de seguimento, limpeza e mantemento despois dos eventos organizados polo propio Concello.

Non estamos falando dun espazo secundario. A Carballeira é un dos lugares máis emblemáticos de Ribadumia, forma parte do noso patrimonio natural e cultural e debería recibir un coidado permanente. Porén, o goberno municipal utilízaa para celebrar actos e facer fotografías, pero despois abandónaa durante semanas.

Outro carballo con sinais de deterioro.

.  A falta de limpeza e a imaxe xeral de abandono  non é, con todo, o máis preocupante. Durante a nosa visita detectamos outro carballo afectado pola mesma enfermidade que xa levou por diante unha ducia de arboresnos últimos anos.

   Mesmo mal, e mesma solución do goberno local: non facer nada. Por iso  esiximos que este exemplar sexa inspeccionado inmediatamente por persoal técnico cualificado, que se determine o seu estado fitosanitario e estrutural e que se adopten as medidas necesarias para intentar conservalo, garantir a seguridade das persoas usuaria e establecer un plan de prevención que elimine esta praga que sen presa pero tamén sen oposición está rematando con este emblemático espazo

A realidade é que este novo caso non pode analizarse como un feito illado. En novembro de 2024 xa denunciamos que a Carballeira perdera máis do 20 % da súa masa arbórea en cinco anos. Naquel momento advertimos da existencia de árbores enfermas, da falta de tratamentos preventivos, da ausencia de reposición dos exemplares eliminados e dunha xestión baseada case exclusivamente en cortar árbores cando o seu estado xa era irreversible. E un ano antes denunciamos que preto dunha ducia de árbores foran barrios pola Praga que segue afectando á carballeira sen que tres anos despois o goberna fixera nada máis que cortar árbores.

Tamén propuxemos crear unha mesa de traballo, coa participación de persoal técnico, para elaborar unha estratexia de conservación e posta en valor da Carballeira e doutros espazos naturais do municipio. David Castro rexeitou aquela proposta e, case dous anos despois, as consecuencias están á vista: continúan aparecendo carballos con problemas e segue sen existir un plan público de conservación.

Limpar avaliar e actuar

Dende Somos Ribadumia esiximos ao alcalde que no último Pleno presumía doarabillosa carballeira de Ribadumia que se deixe de descursos e actue:  proceda ao ordear a retirada inmediata do escenario, das vallas, e do resto do material empregado na Festa do Pan, unha limpeza integral da Carballeira e o establecemento dun protocolo de revisión posterior a cada evento. Tamén que decrete a inspección urxente do carballo que presenta signos de deterioro e a avaliación fitosanitaria e estrutural do conxunto da masa arbórea, e seguido disto a elaboración dun plan técnico de tratamento, conservación e reposición dos exemplares, con actuacións programadas e continuidade no tempo.

 Por último esiximos  Información pública sobre o estado real da masa arbórea, sobre as revisións e actuacións realizadas na Carballeira desde a nosa denuncia de novembro de 2024.

Non podemos permitir que a Carballeira siga perdendo árbores mentres o goberno municipal se limita a negar o problema ou a actuar cando xa só queda utilizar a motoserra.

David Castro debe entender que coidar este espazo non consiste en limpalo para unha festa, utilizalo como escenario durante unhas horas e esquecerse del ao día seguinte. A Carballeira necesita mantemento, planificación e unha intervención técnica seria durante todo o ano.

Dende Somos Ribadumia seguiremos fiscalizando a súa conservación e propoñendo solucións, porque a Carballeira non pertence ao goberno de quenda: é patrimonio de toda a veciñanza de Ribadumia e temos a obriga de preservala para as xeracións futuras.

·       As obras do campo de A Bouza acumulan meses de retraso .

·       Outro curso coas instalacións do colexio empantanadas e con riscos para os nenos e nenas.

·       Promesas incumpridas , incómodos para usuarios do colexio e do campo, e risco de perda de subvencións e de que se anule a licitación da obra.

·       Que vai pasar co parque infantil?

 Dende Somos Ribadumia queremos por de manifesto a nosa incredulidade ante o retraso continuado e inxustificado das obras que se están realizando na contorna do Colexio, que afectan as instalacións do campo de A Bouza e a explanada entre o campo e o colexio, creando problemas de acceso e seguridade ao propio colexio e ás instalacións como o pavillón, o ximnasio e o local onde se realizan as actividades de conciliación e o propio campo de fútbol.

  O propio alcalde comprometeu cando lle vendeu a obra ao colectivo do colexio que a actuación  estaría rematada neste verán, e en todo caso antes de iniciarse este curso 26/27. A realidade, unha vez máis, está no lugar oposto ao que prometeu  o alcalde. A obra acumula meses de retraso e todo apunta a que o goberno quere teña rematada antes das eleccións. Unha xestión partidista que debemos criticar. Os recursos públicos deben estar ao servizo da cidadanía, non das campañas políticas do señor Castro.

  Ademais hai un evidente descontrol da xestión da obra. Descontrol ou abandono. Semanas enteiras parada, logo avances a ritmo lento,  sen apenas persoal na obra… todo síntomas de que a empresa non ten apuro ningún e de que ninguén  lle esixe.

 Pero en todo caso, o que máis nos preocupa son as consecuencias. O máis afectado é o colexio, que está sen acceso ao campo, e con accesos complicados aos edificios anexos, ao pavillón a través dunha pasarela con acceso dende a vía pública, co conseguinte risco para os nenos e benas e ao ximnasio e local onde está o comedor e os servizos de conciliación a través da propia obra e dun aparcadoiro público. Ao tempo, o campo de A Bouza vai tirando cunha instalación  precaria. 

Por outra banda está a cuestión económica. A obra ten un prezo que supera o Millón de euros, dos cales 700.000 € veñen aportados pola Deputación. Pero danse dúas circunstancias. A primeira que a licitación esta dentro do proceso xudicial pola convocatoria irregular do Pleno onde foi aprobada, polo que podería quedar anulada. Recordamos que tanto as sala do Contencioso como o TSXG nos deron a razón anulando ese Pleno e todos os acordos tomados nel, e que o goberno insistiu nun recurso de casación pendente de resolver, cando o máis efectivo e barato tería sido asumir as sentenza e axilizar o proceso para non xerar esta situación, cunha obra avanzada que ao mellor hai que paralizar. Por que podería darse a situación de que o goberno de vise obrigado a repetir o proceso de licitación, algo que resultaría nun proceso moi complexo pois parte da obra xa está realizada. Ademais poden perderse os fondos da Deputación, atados a uns prazos de execución e cousas tan básicas  como un proxecto correctamente licitado. Dende Somos Ribadumia debemos amosar a nosa preocupación ante as posibilidades de que esa obra sexa a tumba económica do noso Concello.

Que vai pasar co parque infantil e o campo?

  Unha última cuestión sobre as que o goberno mantén o escurantismo e as condicións de uso das instalacións unha vez rematada a obra. Esiximos que se aclare se o campo de fútbol vai quedar para uso exclusivo do Umia , e se o parque infantil que hai nesa zona, e que tiña moito uso pola súa cercanía ao campo e ao pavillón onde se realizan actividades polas tardes e por ser a única instalación adaptada a nenos de catro a seis anos. As nais e pais levan trasladando  estas preocupacións dende antes do inicio da obra, e cando non reciben silencio reciben respostas difusas ou mesmo falsas. Iso ten que rematar. Pos iso esiximos explicacións.