· Recuperamos a proposta para ordenar e facer máis transparente o apoio municipal aos eventos organizados polas entidades deportivas.

· Volvemos levar ao Pleno a situación do SAF, que continúa sen licitarse máis dun ano despois da primeira moción presentada por Somos Ribadumia.

· Xunto co PSdeG presentamos unha moción para avanzar cara á retirada da represa de Cabanelas e recuperar a continuidade fluvial do río Umia.

No día de onte participamos, xunto cos tres concelleiros do PSdeG-PSOE de Ribadumia, na solicitude dun novo Pleno Extraordinario no Concello. Dende Somos Ribadumia utilizamos esta convocatoria para levar a debate dúas iniciativas propias que consideramos prioritarias e unha terceira proposta presentada conxuntamente por ambas formacións.

É a segunda vez en poucos meses que a oposición ten que recorrer a este mecanismo para garantir o debate de iniciativas que non foron incorporadas ás sesións ordinarias. No noso caso, volvemos levar ao Pleno cuestións que afectan directamente ao tecido deportivo local, ao Servizo de Axuda no Fogar e á protección e recuperación do río Umia.

Queremos que estas propostas sexan debatidas publicamente, que cada grupo municipal explique a súa posición e que a Corporación poida pronunciarse sobre elas. E queremos que isto sexa aplicable ás propostas de todos os partidos. Non é de ningún xeito aceptable as posición do goberno que pretende que unicamente se debatan as cousas que se eles Lles resulten interesantes.

Ordenar e facer máis transparente o apoio aos eventos deportivos

Dende Somos Ribadumia recuperamos unha proposta presentada inicialmente en novembro de 2025 para establecer convenios individualizados coas entidades deportivas que organizan eventos de interese municipal en Ribadumia.

A proposta parte da realidade dun tecido deportivo local activo, sostido en boa medida polo traballo de clubs e asociacións que organizan competicións, torneos e actividades con repercusión deportiva, social e económica. Consideramos necesario que a colaboración municipal con estes eventos conte cun marco máis estable, previsible e transparente.

A moción propón que os convenios definan os compromisos de cada parte, as achegas económicas e as formas de colaboración municipal en materia de infraestruturas, promoción, apoio técnico ou loxístico. Tamén propoñemos criterios obxectivos para a súa concesión, prioridade para as entidades locais e que as partidas destinadas a cada evento queden recollidas de maneira específica nos orzamentos municipais.

O obxectivo é acabar cun sistema baseado en decisións puntuais e dotar as entidades dun marco que lles permita coñecer con antelación o apoio co que poden contar, ao tempo que o Concello dispón dun sistema ordenado, transparente e avaliable para distribuír os recursos públicos.

O SAF de Ribadumia segue sen licitarse

Tamén volvemos levar ao Pleno a situación do Servizo de Axuda no Fogar. Somos Ribadumia presentou esta moción por primeira vez o 20 de agosto de 2025, pero non chegou a ser debatida. Máis dun ano despois presentámola novamente, actualizada cos cambios producidos no financiamento e na regulación da dependencia e coas reivindicacións das entidades e colectivos afectados.

A principal cuestión local permanece sen resolver: o SAF de Ribadumia segue sen licitarse. Por iso reclamamos que se tramite de forma inmediata un novo procedemento que dea estabilidade ao servizo, que o goberno municipal informe á Corporación das actuacións realizadas e do calendario previsto e que se garanta que ningunha persoa usuaria quede sen atención por cuestións administrativas ou contractuais.

A proposta inclúe tamén estudar seriamente a posible municipalización do servizo, de forma temporal ou definitiva, incorporar cláusulas sociais e laborais estritas e aplicar medidas de protección para as traballadoras. Ao mesmo tempo, reclamamos ás administracións autonómica e estatal un financiamento suficiente da dependencia e que os incrementos aprobados se traduzan nunha mellora efectiva da atención e das condicións nas que se presta o SAF.

Para Somos Ribadumia non é aceptable que un servizo esencial para persoas dependentes e para as súas familias continúe nunha situación de incerteza contractual. Cada administración debe asumir as súas responsabilidades, pero o Concello tamén debe resolver aquilo que lle corresponde e garantir a continuidade e estabilidade do servizo.

Unha proposta conxunta para retirar a represa de Cabanelas

A terceira iniciativa na que participamos é unha moción presentada conxuntamente polo PSdeG-PSOE e Somos Ribadumia sobre a represa construída no río Umia á altura de Cabanelas durante o verán de 2026.

A proposta solicita á Xunta de Galicia e a Augas de Galicia que impulsen as actuacións necesarias para a retirada definitiva da actual represa e a recuperación da continuidade fluvial e ambiental do tramo afectado.

A moción lembra que en marzo de 2016 o Parlamento de Galicia aprobou por unanimidade instar á procura de alternativas para a subministración de auga á illa da Toxa no caso de que a rede pública resultase insuficiente. Dez anos despois as solución da Xunta foi a contraria ao acordado e  no canto de dar unha alternativa autorizou a  construcción da represa. Dende a nosa formación consideramos necesario converter aquel acordo nunha solución efectiva e, sobre todo, retirar a represa sobre o Umia.

A iniciativa inclúe ademais unha petición directa ao go;verbo local de Ribadumia para que clarifique a situación legal desa obra a nivel municipal, determine o réxime urbanístico aplicable á sctuación, verifique a existencia e suficiencia do título habilitante que corresponda, comprobe a compatibilidade da actuación co planeamento municipal e dea resposta ao escrito presentado o pasado 14 de agosto pola nosa formación.

Ademais propoñemos que as Corporación se opoña formalmente a   esa represa  e inste ao goberno local a tomar as medidas necesarias para revertir a situación devolvendo o río ao seu estado anterior.

Tres propostas que queremos ver debatidas e votadas

Estas son as cuestións que Somos Ribadumia leva a este novo Pleno Extraordinario: un sistema máis xusto e transparente de apoio aos eventos deportivos, unha solución estable para o Servizo de Axuda no Fogar e unha posición clara para avanzar cara á retirada da represa de Cabanelas e a recuperación do río Umia.

Non presentamos estas iniciativas e outras anteriores e posteriores para que queden rexistradas e esquecidas. Presentámolas para que se debatan, para que cada grupo explique diante da veciñanza cal é a súa posición e para que o Pleno adopte unha decisión. E como vemos que o goberno non quere, obrigámolo. Agardemos que sexa a última vez. Pero que lle quede claro ao goberno local que se para conseguir levar as nosas propostas a Pleno  temos que recorrer aos mecanismos que a lei pon á disposición da oposición, farémolo. Por que para nós o importante é que os asuntos que afectan a Ribadumia cheguen ao Pleno e que a veciñanza poida coñecer as propostas e as posicións de todos os grupos municipais.

• Medio cento de veciños reclaman medidas de seguridade.
• O goberno admite que non fixo ningunha xestión.
• Somos Ribadumia leva a proposta ao Pleno.

Dende Somos Ribadumia presentamos unha moción para que o Concello actúe ante a petición formulada por  medio cento de veciños e veciñas da estrada da igrexa e do lugar do Casal, en Barrantes, que reclaman medidas para reducir a velocidade dos vehículos e mellorar a seguridade das persoas que transitan a pé pola zona.

A petición foi presentada no rexistro municipal o pasado 22 de xullo. Transcorrido máis dun mes sen resposta, no Pleno ordinario celebrado o 3 de setembro o noso concelleiro Sergio Soutelo preguntou expresamente ao goberno municipal que actuacións realizara o Concello en relación con esa solicitude.

A resposta do goberno deixou claro que, ata ese momento, non se dera resposta á petición veciñal nin se realizara ningunha xestión ante a Deputación de Pontevedra. Tampouco se aclarou se o goberno municipal está a favor das medidas solicitadas polos veciños e veciñas ou se considera necesario actuar para reducir a velocidade neste tramo.

Para nós, unha petición respaldada por medio cento de persoas merece algo máis que silencio. O mínimo que debe facer o Concello é escoitar, valorar tecnicamente a situación e dar unha resposta clara á veciñanza.

Ademais, non estamos falando dunha cuestión menor. Trátase dunha zona utilizada habitualmente por peóns e especialmente por persoas maiores que se desprazan camiñando cara á igrexa, ao cemiterio ou ás súas vivendas. A velocidade dos vehículos inflúe directamente na gravidade dun posible atropelo e, cando existen problemas de convivencia entre tráfico rodado e peonil, corresponde ás administracións estudar e aplicar medidas de calmado do tráfico.

Por ese motivo levamos agora a cuestión ao Pleno mediante unha moción. A proposta pide avaliar tecnicamente a seguridade viaria da zona e impulsar as medidas que resulten adecuadas, incluíndo a redución da velocidade máxima e a instalación de elementos redutores de velocidade cando sexan técnica e legalmente viables.

A moción contempla que ademais de actuar ante as Deputación para que esta aporte solucións no seu tramo,  o Concello actue na parte de vía que lle corresponde, pois a pesar das melloras realizadas na etapa na que Somos Ribadumia levamos urbanismo, segue quedando un tramo final 170 metros onde se seguridade viaria é mellorable.

E dende logo, non imos aceptar que se use a cuestión competencial como  escusa para non facer nada.

Dende Somos Ribadumia non pretendemos substituír os criterios técnicos nin decidir de antemán cal debe ser a solución concreta. O que pedimos é máis sinxelo: que se atenda a petición veciñal, que se estude o problema e que se adopten medidas para facer máis segura esta zona de Barrantes.

A veciñanza xa fixo a súa parte presentando a solicitude. Sergio Soutelo levou a cuestión ao Pleno e preguntou directamente polo que se fixera. Agora queremos que a Corporación municipal se pronuncie e que o Concello pase das explicacións á actuación.

• Propoñemos mellorar as instalacións deportivas de Leiro.

• Defendemos un reparto equilibrado dos investimentos deportivos en Ribadumia.

• O novo plan da Deputación é unha oportunidade máis para financiar estas melloras.

Dende Somos Ribadumia presentamos unha moción ao Pleno do Concello para impulsar unha mellora integral das instalacións deportivas municipais do Campo de Leiro. A iniciativa parte das necesidades concretas que presenta este recinto e enmárcase nunha cuestión máis ampla: a necesidade de planificar os investimentos deportivos municipais atendendo ao conxunto das instalacións e das entidades que desenvolven a súa actividade en Ribadumia.

A publicación do IV Plan Extraordinario de Infraestruturas Deportivas da Deputación de Pontevedra, dotado con 8 millóns de euros, abre agora unha oportunidade que o Concello pode aproveitar para financiar parte destas actuacións. Pero esta convocatoria non é o obxectivo da moción nin a única vía posible: a prioridade é definir as necesidades de Leiro, planificar as melloras e procurar os recursos necesarios, sexa a través deste plan, doutras convocatorias da Deputación, da Xunta de Galicia, de fondos propios ou doutras administracións.

Un reparto dos recursos que debe atender ao conxunto das instalacións

A revisión dos investimentos públicos documentados en infraestruturas deportivas de Ribadumia dende 2023 amosa unha concentración moi significativa nunha mesma contorna. O  total dos investimentos  nestas instalacións neste período e incluíndo  os proxectos que actualmente se están desenvolvendo  supera os 1,7 millóns de euros.

Dese volume, máis de 1,64 millóns de euros corresponden a actuacións na contorna do campo da Bouza e do pavillón de Barrantes, arredor do 95 % do investimento total identificado. Fóra desta contorna, as actuacións deportivas que puidemos documentar no mesmo período non chegan aos 75.000 euros. Estes datos reforzan a necesidade de planificar os seguintes investimentos atendendo ao conxunto das instalacións e das entidades deportivas do municipio dun xeito equilibrado e tamén igualitario.

Leiro, dentro dunha planificación deportiva para todo o municipio

A proposta sobre Leiro non pretende cuestionar os investimentos realizados noutras instalacións nin establecer unha competencia entre clubs ou entidades. Ribadumia conta con diferentes espazos e colectivos deportivos, todos eles merecedores de atención. O que propoñemos é que a planificación municipal procure un reparto equilibrado dos recursos, atendendo ao estado das instalacións, ao seu uso, ás necesidades detectadas e ás posibilidades de financiamento existentes en cada momento.

No caso concreto de Leiro, a moción propón habilitar un espazo adecuado para almacenar bicicletas e material deportivo, estudar unha zona para a preparación física, renovar o pavimento deteriorado situado nas proximidades da cantina, mellorar o saneamento dos baños e reforzar as medidas de seguridade, mantemento e control dos accesos.

Tamén propoñemos estudar novas actuacións que permitan ampliar os usos do recinto, como a posible creación dun pump track de iniciación e outros equipamentos compatibles coa práctica do ciclismo, o triatlón e outras modalidades deportivas. Estas propostas deben analizarse tecnicamente e integrarse nunha planificación que teña en conta tanto as necesidades deste recinto como as do resto das instalacións deportivas municipais.

O Campo de Leiro ten unha actividade deportiva consolidada. Segundo os datos aportados pola propia entidade, o Club Ciclista Ribadumia conta con arredor de 290 socios e socias e 190 deportistas, entre menores e adultos, participan nos seus adestramentos e actividades. A participación desta entidade na definición das necesidades de Leiro resulta lóxica polo seu uso habitual das instalacións, sen prexuízo de que o Concello manteña unha planificación global e diálogo co conxunto dos clubs e entidades deportivas do municipio.

Por iso solicitamos que o Concello elabore unha planificación das actuacións necesarias no Campo de Leiro, estableza prioridades e un calendario orientativo e determine que melloras poden acollerse ao IV Plan Extraordinario de Infraestruturas Deportivas ou a outras vías de financiamento. O obxectivo é avanzar na mellora de Leiro dentro dunha política deportiva municipal que distribúa os investimentos de forma equilibrada entre as distintas instalacións e necesidades do municipio.

·       O escenario, as vallas e mesmo o cartel de peche da estrada continúan na Carballeira máis de cinco semanas despois da Festa do Pan.

·       O recinto presenta lixo e restos espallados sen que o Concello realizase unha limpeza adecuada.

·       Detectamos outro carballo con signos visibles de enfermidade ou deterioración.

·       Esiximos unha inspección técnica urxente e un plan de conservación que evite que a Carballeira siga perdendo árbores.

Dende Somos Ribadumia queremos denunciar novamente o abandono ao que o goberno de David Castro ten sometida a Carballeira de Ribadumia.

A Festa do Pan celebrouse o pasado 8 de agosto e, máis de cinco semanas despois, o Concello aínda non foi capaz de devolver este espazo público á normalidade. O escenario continúa montado, e para o caso de que fóra utilizado para algunha outra actividade fai xa dúas semanas que na Carballeira non hai actividade municipal, nin da escola de verán nin de outro tipo. Ademais, permanecen no lugar varias vallas municipais e mesmo segue colocado o cartel que anuncia o peche da estrada pola celebración da festa.

Ao redor dos bancos e en todo o espazo   do recinto poden verse tamén papeis, envases e distintos restos de lixo acumulado. O estado actual da Carballeira evidencia unha falta absoluta de seguimento, limpeza e mantemento despois dos eventos organizados polo propio Concello.

Non estamos falando dun espazo secundario. A Carballeira é un dos lugares máis emblemáticos de Ribadumia, forma parte do noso patrimonio natural e cultural e debería recibir un coidado permanente. Porén, o goberno municipal utilízaa para celebrar actos e facer fotografías, pero despois abandónaa durante semanas.

Outro carballo con sinais de deterioro.

.  A falta de limpeza e a imaxe xeral de abandono  non é, con todo, o máis preocupante. Durante a nosa visita detectamos outro carballo afectado pola mesma enfermidade que xa levou por diante unha ducia de arboresnos últimos anos.

   Mesmo mal, e mesma solución do goberno local: non facer nada. Por iso  esiximos que este exemplar sexa inspeccionado inmediatamente por persoal técnico cualificado, que se determine o seu estado fitosanitario e estrutural e que se adopten as medidas necesarias para intentar conservalo, garantir a seguridade das persoas usuaria e establecer un plan de prevención que elimine esta praga que sen presa pero tamén sen oposición está rematando con este emblemático espazo

A realidade é que este novo caso non pode analizarse como un feito illado. En novembro de 2024 xa denunciamos que a Carballeira perdera máis do 20 % da súa masa arbórea en cinco anos. Naquel momento advertimos da existencia de árbores enfermas, da falta de tratamentos preventivos, da ausencia de reposición dos exemplares eliminados e dunha xestión baseada case exclusivamente en cortar árbores cando o seu estado xa era irreversible. E un ano antes denunciamos que preto dunha ducia de árbores foran barrios pola Praga que segue afectando á carballeira sen que tres anos despois o goberna fixera nada máis que cortar árbores.

Tamén propuxemos crear unha mesa de traballo, coa participación de persoal técnico, para elaborar unha estratexia de conservación e posta en valor da Carballeira e doutros espazos naturais do municipio. David Castro rexeitou aquela proposta e, case dous anos despois, as consecuencias están á vista: continúan aparecendo carballos con problemas e segue sen existir un plan público de conservación.

Limpar avaliar e actuar

Dende Somos Ribadumia esiximos ao alcalde que no último Pleno presumía doarabillosa carballeira de Ribadumia que se deixe de descursos e actue:  proceda ao ordear a retirada inmediata do escenario, das vallas, e do resto do material empregado na Festa do Pan, unha limpeza integral da Carballeira e o establecemento dun protocolo de revisión posterior a cada evento. Tamén que decrete a inspección urxente do carballo que presenta signos de deterioro e a avaliación fitosanitaria e estrutural do conxunto da masa arbórea, e seguido disto a elaboración dun plan técnico de tratamento, conservación e reposición dos exemplares, con actuacións programadas e continuidade no tempo.

 Por último esiximos  Información pública sobre o estado real da masa arbórea, sobre as revisións e actuacións realizadas na Carballeira desde a nosa denuncia de novembro de 2024.

Non podemos permitir que a Carballeira siga perdendo árbores mentres o goberno municipal se limita a negar o problema ou a actuar cando xa só queda utilizar a motoserra.

David Castro debe entender que coidar este espazo non consiste en limpalo para unha festa, utilizalo como escenario durante unhas horas e esquecerse del ao día seguinte. A Carballeira necesita mantemento, planificación e unha intervención técnica seria durante todo o ano.

Dende Somos Ribadumia seguiremos fiscalizando a súa conservación e propoñendo solucións, porque a Carballeira non pertence ao goberno de quenda: é patrimonio de toda a veciñanza de Ribadumia e temos a obriga de preservala para as xeracións futuras.