• Persoas do entorno de IR recolleron en foto ou vídeo momentos e detalles da vida privada de Enrique Oubiña e da súa familia, que logo a concelleira Pilar Martínez usou como argumento no pleno.
• Non podemos aceptar que un partido político faga un seguimento a ningunha persoa no seu ámbito privado.
• Todo o noso apoio  a Enrique Oubiña, que abandonou o pleno en sinal de protesta.

   No pleno celebrado este pasado martes a concelleira de IR Pilar Martínez e o resto da agrupación de IR, alcalde incluído, traspasaron todas as liñas vermellas existentes na separación entre ámbito político e privado.

Foi durante a réplica por parte da Concelleira de contas no punto principal da xornada, que era o debate do orzamento municipal. Nun momento determinado, a concelleira pretendeu acusar a Enrique Oubiña de atender a outras cuestións no canto de atender as súas responsabilidades políticas, poñendo como exemplo que no momento de celebrarse a Comisión Informativa días antes do pleno Enrique Oubiña estaba paseando por unha senda fluvial, e que ademais “tiña probas”.

   Con respecto á cuestión da Comisión Informativa mencionada, nada que dicir pois dende Somos Ribadumia xa habiamos informado que non participaríamos na mesma por que aínda non tiveramos tempo a valorar a documentación. O que é totalmente inaudito e inaceptable, e así o explica Oubiña “é que dende IR se dediquen  andar detrás miña, e refírome ao meu ámbito privado, para facerme fotos ou gravar vídeos ou o que a eles lles pareza, e despois levar iso aos plenos para usalo como arma arroxadiza”.

   Á vista do comentario,  sobre o que a concelleira aínda se reafirmou unha segunda vez no expresado , que ademais acompañou dunha serie de faltas de respecto e referencias á vida privada do noso voceiro ao longo do pleno, Enrique Oubiña optou, como medida de protesta e de defensa do respecto e da dignidade tanto da súa persoa como da propia política, por abandonar o pleno unha vez rematados os tres puntos que se sometían a debate e votación.

   Dende Somos Ribadumia queremos amosar todo o noso apoio tanto a Oubiña como ao seu entorno máis próximo, e xa adiantamos que estamos realizando as consultas legais pertinentes para ver como enfocar este caso en cuxa gravidade insistimos, pois a súa consecuencia máis inmediata é “a sensación de que non podo saír da casa sen saber se me estarán seguindo, ou se me farán unha foto falando con calquera veciño. E se os de IR teñen este comportamento comigo, e tan alegremente como para facelo público nun pleno, poden telo con calquera outro concelleiro, ou calquera veciño ou veciña”.

• Pretende aprobar unhas bases de adxudicación que implican repartir os fondos directamente  a dedo.
• Non hai criterios de reparto obxectivos de ningún tipo para os fondos, so de acceso a liña de axudas,  e a decisión quedaría en mans de cargos políticos, algo inadmisible.
• O voceiro de Somos Ribadumia adianta que  en ningún caso votará en contra  de conceder axudas a ningunha das empresas que cumpran cos requisitos e a soliciten.

   No medio da documentación que o goberno local pretendía manter oculta ata o último minuto, para que  dende Somos Ribadumia non puideramos facer unha valoración, e que este próximo martes van ir a pleno, encóntranse as bases para o reparto da liña de fondos covid disposta pola Deputación, que debe xestionarse a través dos Concellos, e que no caso de Ribadumia ascende a 14.700€.

   Dende Somos Ribadumia insistimos en apoiar ao goberno en todas as cuestións que repercutan en beneficio da veciñanza, e dende logo estaremos a favor de calquera liña de apoio aos sectores máis afectados pola crise derivada da pandemia, polo que tal e como Explica Oubiña, “aínda que estas axudas chegan tarde, mal e arrastro, nós ímolas apoiar. É máis, pensamos que a partida – aportada integramente pola Deputación, o Concello non pon nada –  debería complementarse con fondos municipais. Por dous motivos: o primeiro porque 14.700€ para todas as empresas afectadas é unha cantidade que da para moi pouco, e en segundo lugar porque economicamente é posible, e ademais é posible sen afectar a ningunha outra partida orzamentaria”.

   Pero unha cousa é apoiar que se dean liñas de axuda como neste caso a hostaleira, pequeno comercio, axencias de viaxe, ximnasios ou outros negocios similares, que é a quen está dirixida, e outra aceptar que os cartos se repartan de calquera maneira.

  E aquí é onde temos que por de relevancia “a cacicada que o goberno de David Castro pretende levar a cabo, ademais coa falsa imaxe de transparencia, ao pretender que os partidos da oposición formemos parte do seu xogo, cousa que pola nosa banda non vai pasar”.

    O texto que o goberno local pretende aprobar, de partida establece un prazo de so vinte días para presentar as solicitudes, cando esta liña a Deputación tena aberta ata o 31 de decembro, o cal obrigará ás empresas que queira beneficiarse delas a andar apurados para reunir a documentación. que o reparto de fondos, que permitirán subvencionar os custes de alugueres, subministros, seguros de responsabilidade civil e accidentes, compra de mercadorías relacionadas coa actividade, gastos derivados dos salarios do persoal  ou gastos financeiros directamente relacionados coa actividade, se realizará a través dunha “Comisión de Valoración”, que se pretende estea formada polo Alcalde, a concelleira  de Contas, a  concelleira de Promoción Económica, os voceiros dos grupos políticos da Corporación municipal- o cal deixa fora ou ao concelleiro do Psoe ou ao concelleiro de Somos, pois ambos forman o grupo mixto – , e un técnico municipal do departamento económico, ademais da secretaría municipal que sería a única persoa da mesa sen voto.

  O problema, explica Oubiña, “non reside tanto na fórmula, de partida pouco democrática, como no propio proceso de reparto. Non hai un mecanismo de avaliación obxectiva das axudas, nin ningún tipo de limitación á cantidade que as empresas poden solicitar e recibir, salvo o teito económico da partida. Isto significa que calquera das empresas que cumpra os requisitos, que non son moi esixentes, pode presentar facturas ata un total de 14.700 €. E logo será a Comisión de Valoración, ou sexa os políticos,  os que decidan que cantidade de fondos se lle entrega a cada empresa de maneira totalmente arbitraria”.

  Na práctica, o goberno local pretende repartir os cartos a dedo. Ademais, o propio documento inclúe dous puntos que son o colmo da tomadura de pelo ás empresas  e aos concelleiros da oposición. Por un lado o ditame da Comisión de Valoración so ten valor propositivo, e deberá ser a Xunta de Goberno, formada unicamente por membros de IR,  quen dea a aprobación definitiva ou modifique se o considera  o reparto, ou sexa que en realidade a Comisión de Valoración non vale para nada máis que para aparentar. O outro punto é que no caso difícil de non haber acordo maioritario nesa comisión, onde IR ten catro votos de sete posibles, será a Xunta de Goberno quen tome a decisión, que xa a ía tomar de todos xeitos. “Mírese como se mire, van ser os membros de IR os que decidan cantos cartos e a quen se lle entregan. Obviamente, non podemos estar de acordo con esta maneira de distribuír fondos municipais”.

 A legalidade destas bases está claramente en entretido ao non cumprirse os criterios de igualdade de oportunidade nin de transparencia no proceso de adxudicación dos fondos. Polo que  dende Somos Ribadumia facemos un chamamento ao goberno local para que rectifique o documento, antes de aprobar algo en pleno que non é legal, nin é igualitario para as empresas.

Podedes acceder ao borrador as bases que o goberno propón para a súa aprobación neste enlace , pero tede en conta que de momento é un borrador, non o texto definitivo, que será o que se aprobe o martes en pleno, que pode ser – agardamos que sexa – distinto, e que nos publicaremos no seu momento.

• Novo bloqueo institucional de David Castro a Somos Ribadumia, entorpecendo o acceso a documentación de pleno e impedíndonos realizar o noso traballo. Neste caso ademais documentación importante, relativa ao orzamento e a liñas de axudas a empresas que levamos pedindo meses dende Somos Ribadumia.
• Actitudes obstrucionistas e provocacións nas que non imos caer.
• Facemos un chamamento ao entendemento,ao dialogo, e ao respecto insitucional.

Esta semana dende Somos Ribadumia vivimos asombrados un novo, e certamente retorcido, episodio na táctica do equipo de David Castro centrada en evitar a toda costa que poidamos ter acceso correcto a documentación, neste caso ademais documentación importante: o documento do orzamento e bases de axudas a empresas do concello.

Tal como expoñía Oubiña esta mañá, “as ansias de David Castro por adxudicarse medallas e ocultar de cara ao pleno municipal e a opinión pública que dende Somos Ribadumia levamos meses pedindo axudas para os diferentes colectivos do concello, para os comerciantes e para a hostaleria, levanlle a actuar das maneiras máis absurdas. Pero tanto da o que faga, a realidade é que agora vai ter que aprobar unhas axudas obrigado pola presión que levamos meses exercendo sobre o goberno e porque a Deputación de Carmela Silva non lle permite meter parte dos fondos que se perciben dende a Deputación en obras nin en farolas“. Dende a nosa formación non imos valorar estes últimos feitos, porque nos producen vergoña allea, pero temos claro que o que non imos facer tampouco é entrar en determinadas provocacións nin xogos políticos. Tampouco imos aceptar que dende o goberno local se poñan trabas á nosa labor nin se conculquen os nosos dereitos como formación política, un xogo que xa provocou tiróns de orellas de varias entidades da administración, como a Valedora do Pobo, a David Castro.

Insistimos na nosa vontade de traballar de xeito construtivo, asumindo a nosa posición, apoiando ao goberno en todo o que consideremos positivo para a cidadania, e buscando o dialogo en todo aquilo no que as diferentes forzas teñamos visións distintas, algo que levamos facendo dende o inicio da lexislatura, porque a pesar que de que David Castro o oculta e centra os plenos municipais en atacar a Somos Ribadumia, a realidade é que apoiamos ao goberno no 90% das cuestións que levou a pleno.

Para aclararlle ao goberno a nosa posición, esta mañá puxemos fin ao episodio iniciado o venres cando o goberno modificou o procedemento de actuación con respecto á documentación dos plenos sen informar nin avisar, provocando que non puideramos acceder a esa documentación e polo tanto valorala antes da Comisión Informativa que terá lugar hoxe, presentando un escrito, que transcribimos aquí, onde se explica meridianamente os feitos aos que nos referimos e as actuacións do concello.

No escrito, dende Somos Ribadumia expuxemos o seguinte:

•  O pasado venres 9 de abril tivo lugar unha xunta de voceiros onde se lle trasladaron aos voceiros da  oposición os diferentes puntos do próximo pleno, de carácter extraordinario e a celebrar segundo se nos transmitiu na semana do 19 ao 25 de abril.  Enrique Oubiña, por motivos laborais non puido acudir, cuestión da que informou  por mensaxe á concelleira de Contas ao mesmo tempo que lle solicitou que transmitira se era posible calquera cuestión que se falase nesa xunta. A única resposta da concelleira foi unha foto dun papel cos puntos a tratar no pleno, sen aportar ningunha outra información.

•  Ese mesmo venres 9 de abril,  como ven sendo habitual dende inicio da lexislatura remitíusenos a través dun correo electrónico, nun arquivo pdf unha convocatoria para este martes 13 de abril, as 21:00 horas co obxecto de celebrar sesión Extraordinaria de CI Contas, Economía, Facenda, Persoal e Réxime Interno, para o estudio e resolución dos seguintes asuntos comprendidos na Orde do Día:  Aprobación Orzamento Municipal para 2021,  Modificación bases axudas COVID 19  e  Aprobación bases axudas directas Deputación a sectores afectados pola pandemia. Nin no corpo do correo electrónico nin na propia convocatoria se incluía ningún tipo de información adicional relativa á documentación, que de maneira habitual viñase mandando xunto ao documento da convocatoria ou en correos posteriores. Certamente no corpo do correo electrónico aparecia o seguinte texto  “Recordámoslle que ten unha notificación pendente de ler no Sistema de Notificacións do Concello de Ribadumia- seguido dun enlace-”. Ao non facerse mención a ningunha documentación complementaria á que acompañaba o correo electrónico, non había motivo para pensar que ese enlace dera acceso a outra documentación diferente da xa incluída no correo, pero en todo caso seguindo o enlace, este levaba á páxina de presentación dun portal dentro do programa de xestión municipal, non a ningunha carpeta nin apartado que dera a entender que había algún tipo de documentación, ou como acceder a ela.

•  Dende Somos Ribadumia contactamos co resto de forzas da oposición o venres  9 á tarde e o luns 12 de marzo  ao longo do día, para consultar se lles había chegado a documentación que botabamos en falta, e confirmáronnos que eles tampouco tiñan esa documentación.

•  O martes 13, a primeira hora da maña presentamos un escrito por rexistro con número de entrada 2021 000000786 solicitando o adiamento da Comisión Informativa prevista para esa mesma tarde, debido a que non tiñamos a documentación, pedindo que se nos entregara e tiveramos tempo suficiente para analizala.

•  Esa mesma maña a secretaria municipal informou ao noso voceiro  de que a documentación estaba aloxada no programa de xestión do Concello, e que para acceder a ela necesitábamos buscar un acceso a un espazo persoal nese programa, que ninguén nos informara que dispoñíamos, e ademais que para abrir a carpeta precisábamos dispoñer de certificados dixitais. O noso voceiro explicoulle a secretaría que efectivamente tiña certificados dixitais solicitados anos atrás, pero que non sabía se eran válidos pois levaba tempo sen usalos, e de que en calquera caso esa maneira de actuar non era en absoluto correcta, pois o mínimo, cando se cambia un procedemento, é avisar con tempo, sobre todo se, como neste caso, o cambio de procedemento  precisa dispor de ferramentas como certificados dixitais actualizados, que requiren de trámites burocráticos e tempo. O propio concelleiro tamén lle informou de que cando menos unha das outras forza políticas tampouco puidera acceder á documentación, polo que a situación era totalmente irregular. Nesa mesma mañá a secretaria volveu chamar ao noso voceiro para informarlle que se estaba valorando trasladar a Comisión Informativa a este xoves 15 de marzo, ao cal non puxo pegas, pero advertindo que estaba pendente de dispor da documentación, sempre recordando que hai que cumprir os prazos legais establecidos, como mínimo.

•  Ese mesmo martes, as 14:20, corenta minutos antes do peche do Concello, o noso voceiro recibiu un correo electrónico, que non puido leer ata logo de rematar a súa xornada laboral, onde se lle informaba do adiamento da Comisión Informativa ao xoves 15. No mesmo correo electrónico, enviado dende alcaldía, insistíase na ruta para acceder a documentación aloxada no programa de xestión  do Concello, pero sen confirmar en ningún momento se os diferentes concelleiros puideran acceder á documentación, ou se esta estaba dispoñible dun xeito que non requirira ter realizado ningún proceso coa administración.

•  O noso voceiro comprobou a última hora do martes que non era así e que a documentación seguía estando protexida pola condición de estar en posesión de certificados dixitais. Tamén comprobou que  os seus certificados non lle permitían acceder á documentación. O mércores a primeira hora da maña púxose en contacto coa secretaria para informarlle de que non puidera acceder a documentación. A secretaría comprometeuse a transmitirlla por correo electrónico, como así fixo a media maña.

  Este é o relato dos feitos que deron como resultado que o representante de Somos Ribadumia non puidera ter a súa disposición a documentación ata 24 horas antes da comisión informativa, polo que o primeiro que hai que expoñer é que ao non entregarse a documentación en tempo e forma, de manter a convocatoria da Comisión Informativa estarase incumprindo o lexislación establecida  en canto a prazos.

  Chámanos poderosamente a atención que o goberno municipal decidira modificar os protocolos de actuación en canto á xestión dos documentos precisamente de cara ao pleno – segundo se nos informou extraordinario – que vai incluír os temas a tratar máis importantes do ano: o orzamento municipal e diferentes liñas de axudas aos colectivos afectados pola crise derivada da pandemia da covid-19.

  Sexa casualidade ou non, é totalmente inaceptable esta falta de respecto cara as forzas políticas, que teñen representación gracias a un proceso democrático e que representan á veciñanza tanto como o partido que ostenta o goberno. Os cambios no funcionamento nos protocolos de actuación débense comunicar correctamente, e en tempo e forma. E dende logo, se estaba previsto que a xestión requirira de particularidades como ter certificados dixitais, deberíase informar das datas a partir das cales se ían realizar os cambios, para que os concelleiros e concelleiras puideran realizar os trámites necesarios para dispor das ferramentas dun xeito adecuado.

   É totalmente inadmisible que logo de informar de que non se puido acceder á  documentación, a resposta sexa un correo electrónico insistindo nuns mecanismos que non aportaban garantías suficientes de que todos os concelleiros e concelleiras ían poder acceder sen problemas a documentación.

  E dende logo, as formas que  o goberno mantén cara a  nosa formación e en particular cara o noso voceiro  están totalmente fora de lugar. E aínda que Somos Ribadumia estamos moi acostumados ao bloqueo continuo ao que nos somete o goberno municipal, negándonos acceso a diversa documentación,  privándonos do nosos dereito a expoñer os nosos argumentos nos plenos municipais e en xeral poñendo todo tipo de trabas á nosa labor como forza política, non podemos admitir que se nos trate con desprezo, nin moito menos que se nos falte ao respecto debido como representantes da nosa veciñanza.

   Quizais nos tempos nos que o presidente dos Independientes por Ribadumia e  David Castro militaban no que hoxe é o Partido Popular as formas políticas foran as da imposición pola forza e ninguneo á oposición, e  que incluíran como mecanismos de xestión municipal  os  desprezos, ameazas, insultos, faltas de respecto e imposición política, pero xa non vivimos nese tempo, a pesar de que haxa forzas no panorama político estatal que desexen volver a el. Pola nosa banda, como xa advertimos, non imos entrar nese xogo. Non imos entrar nin en provocacións, nin imos participar no proceso de degradación política ao que o goberno actual de Ribadumia quere levar ao noso concello. O noso camiño é o do respecto as persoas, incluídas as que non teñen a nosa visión política. Nese aspecto, entendemos e asumimos que as diferentes forzas non poidamos poñernos de acordo en algúns asuntos, pero as discrepancias e as diferencias políticas deben amosarse, e pola nosa banda amosaranse, sempre dende o respecto as posicións dos demais e  o diálogo. Como afirmamos moitas veces , e está demostrado, sempre que Somos Ribadumia nos sentamos a dialogar con outra forza política, chegamos a acordos. E ese é o noso  camiño: o do diálogo. Aínda que, por suposto, ese camiño non implica ceder os nosos dereitos fundamentais como formación política, algo que tampouco imos facer, por moito que outras forzas políticas se encirren.

  Recordámoslle, unha vez máis, ao goberno que todas as forzas políticas que teñen representación municipal teñen os mesmos dereitos e deben ser tratadas con arranxo aos funcionamentos democráticos establecidos, e ao señor David Castro que gobernar non consiste en impoñer, e que precisamente o papel principal da figura do alcalde  inclúe a  responsabilidade de velar porque os dereitos de todas as concelleiras e concelleiros se respecten por igual, sexan os do seu partido ou os de calquera outro.

  Á vista das circunstancias, imos obviar a falta de respecto institucional demostrada en todo este proceso, pero  ante o limitado do de tempo material do que dispoñemos para poder analizar a documentación, que volvemos recordar inclúe a proposta de orzamento para o ano 2021 e varias bases de adxudicación de diferentes liñas de axuda económica para combater os efectos da pandemia,  e polo tanto son documentos complexos e da máxima importancia, poñemos en coñecemento da alcaldía que por responsabilidade non imos gastar os cartos da veciñanza nin sacarlle  tempo ao resto de membros da Comisión Informativa participando nunha xuntanza onde non nos encontramos neste momento en condicións de aportar nada. Se o goberno recapacita e decide corrixir a súa actuación buscando puntos de encontro e acordo con respecto a estes documentos antes de levalos a pleno, estaremos encantados de colaborar, aportar o noso punto de vista e acadar pola vía da negociación e do diálogo acordos en beneficio da veciñanza do noso concello. Se o goberno insiste na imposición, nos seguiremos como ata o de agora no noso lugar, que é ao lado da veciñanza, dende onde analizaremos a documentación e propostas do goberno local e faremos publicas as nosas posicións e todo aquelo que consideremos, a través do mecanismos que dispoñamos para elo.

Ademais do exposto, en nome da formación Somos Ribadumia SOLICITAMOS:

• Seriedade no funcionamento municipal, en particular no que respecta aos funcionamentos democráticos.

• Que en adiante, calquera modificacións dos funcionamentos municipais que afecten aos partidos políticos, se comuniquen adecuadamente, e con tempo e marxe suficiente para, se fora o caso, realizar as adecuacións necesarias.

• Dado que é evidente que o goberno local non ten o máis mínimo interese en manter unha relación de colaboración coas forzas da oposición, cando menos cumpra coa lexislación en canto a dereitos e obrigas, e moi concretamente en todo o referido aos dereitos fundamentais das concelleiras e concelleiros.

• Que, por favor, se  abandone a estratexia da confrontación, e se opte por unha relación baseada na defensa de principios e propostas de carácter político, e non en cuestións de carácter persoal.

• Que, por favor, se retome a senda do diálogo establecida entre o 2015 e 2019, que foi innegablemente positiva para o  concello de Ribadumia e por extensión para a súa veciñanza.

Sen outro particular, reciba un cordial saúdo,

Comisión Executiva de Somos Ribadumia.

• Na aprobación definitiva das axudas do 2020 ao redor do 15% dos fondos para entidades culturais quedaron sen distribuír polo parón da pandemia.
• Pedimos que eses fondos se reinvistan nas partidas deste ano.
• Dous meses despois de que a Deputación dotase 14.700€ para apoiar de deito inmediato ao comercio e hostalería, David Castro aínda non dispuxo ningún plan de axuda.

   No pasado pleno municipal, o goberno local levou para a súa aprobación o tramo final das axudas a entidades e clubs correspondentes ao ano 2020. Un mero trámite que puxo de manifesto o  evidente, que a paralización motivada pola covid impiden que a maioría das entidades desenvolveran a súa actividade con normalidade. A consecuencia disto varias das entidades, en particular as de carácter cultural viron reducida a axuda que percibiron do Concello ao non poder xustificar a realización das actividades previstas.

   Esta parálise, e así o expuxo o noso voceiro Enrique Oubiña no pleno “que non é responsabilidade de ninguén, só da situación que vivimos, pode ter consecuencias negativas para estas entidades. Todas elas existen é funcionan gracias ao traballo altruísta das persoas que as xestionan, e unha parada  nas actividades tan prolongada como a que estamos vivindo é posible que poña fin a algunha desas entidades, e dende logo, a vista da situación que temos, comentado con algunhas desas entidades,  vai costar recuperar o ritmo de actividade”.

   Dende Somos Ribadumia, que levamos anos pedindo un aumento das partidas para colectivos culturais e sociais e para as entidades deportivas conscientes de que son moi necesarias, entendemos que os cartos que no 2020 non se entregaron debido a falta de actividade, se deben repercutir na partida deste 2021, dando así un certo estímulo a reactivación das entidades cando a situación o permita.

   E iso foi o que propuxemos ao goberno no pasado pleno. Ademais eses fondos están dispoñibles pois había que telos dotados ata a aprobación final das axudas, que tivo lugar xa dentro deste ano 2021 e polo tanto non se puideron derivar a outras cuestións. Agardamos que máis aló desta cuestión, que tería case máis un valor simbólico que económico -falamos de pouco máis de 3.000€ – o goberno de David Castro, que se nega sistematicamente a aumentar as partidas as entidades deportivas, sexa comprensivo coa situación á que se enfrontan na actualidade e corrixa a súa postura nos próximos orzamentos, pois se xa antes eran necesario ampliar a axuda a eses colectivos, agora faise case imprescindible.

Axudas ao comercio e hostalería.

Tamén agardamos que no documento do orzamento, que supostamente está previsto que se aprobe na próxima semana pero ao que aínda non tivemos acceso, se inclúa por fin un plan de axudas directas aos comerciantes, a hostalería e as pequenas empresas. Non podemos esquecer que dende o inicio da pandemia o goberno de David Castro non foi capaz de presentar, nin moito menos desenvolver ningún plan de acción concreto, salvo unha liña de crédito que, tal como advertimos dende Somos Ribadumia que pasaría, non tivo repercusión , mentres os concellos da contorna destinaban miles de euros a paliar a situación dos seus negocios con plans específicos, inmediatos e, sobre todo, efectivos. Que dous meses despois de aprobarse, aínda non se mobilizaran os 14.700€ que a Deputación dispuxo para empregar no noso concello nestas cuestións, deixa moi claro que o noso goberno é calquera cousa menos áxil, e que non ten o máis mínimo aprecio polos problemas de ducias de familias que viven unha situación complicada, que posiblemente se alongue no tempo. Dende Somos Ribadumia “volvemos insistir en que este non é ano de poñer farolas nin de andar á facer o parvo polos camiños. Temos un concello de 5.000 habitantes, enfrontados a unha situación  extraordinaria que require dunha xestión á altura das circunstancias. Débense dispor axudas, axudas efectivas, para as empresas do noso concello”.