• Temos constancia de que a Estación Depuradora de Augas Residuais de Barrantes leva semanas emitindo cheiros, que afectan a veciños de Cambados e Ribadumia, e as persoas que pasan pola senda fluvial.
• O goberno local, a o tanto da situación dende o primeiro momento, declarou ter realizado xestións, preguntámonos cales, pois de momento o problema persiste.
• Pedimos a intervención de Augas de Galicia.

   A situación de cheiros na contorna da Estación Depuradora de Augas Residuais de Barrantes, que se ven mantendo dende fai semanas e afectan a un radio de mais de 300 metros da mesma, o cal inclue vivendas de ambos lados do río Umia e gran parte da senda entre Barrantes e Cabanelas, chegou a un punto inaceptable. Dende Somos Ribadumia eramos conscientes de que se estaban producindo estes cheiros, pero tiñamos constancia de que xa varias persoas da contorna se habían posto en contacto co Concello. Tamén somos coñecedores de que o goberno de David Castro informou a esas persoas de que xa se habían feito as xestións pertinentes para resolver este problema. Pero semanas despois, os cheiros seguen presentes.

   Chegados a este punto, e logo de neste tempo darlle un voto de confianza ao goberno local e á propia adxudicataria da xestión da EDAR, non nos queda mais remedio que tomar cartas no asunto. Esta mesma maña mandamos un escrito a Augas de Galicia solicitándolle , como explica Oubiña “que interveña e se ocupe de que se poña solución inmediata a un problemas que salta a vista que está relacionado coa xestión da depuradora, e tamén que mellore as medidas de control dos diferentes parámetros ambientais e de calidade do aire, para minimizar estes problemas”.

Que fixo o goberno de David Castro?

  Para Oubiña “eu tiven que tratar coa adxudicataria da EDAR na lexislatura pasada e enfrontar varios problemas similares, e algún de gravidade, como un verquido no verán do 2018, sempre con bo trato e colaboración por ambas partes, e moita dilixencia e axilidade por parte da adxudicataria. Por iso que non entendo que se dende o concello se fixeron as xestións correctas, este problema persista, e nin sequera se teña comunicado, no caso de ser algo grave e que coste tempo resolver”. Por ese motivo está mañá presentamos tamén un escrito dirixido á alcaldía solicitando copias dos escritos dirixidos as entidades con responsabilidades neste asunto así como das xestións realizadas, “porque non tería ningunha gracia que o primeiro escrito presentado ante Augas de Galicia fora o enviado onte polo goberno de Cambados, e o segundo o noso desta mañá, cando David Castro leva meses dicindo que xa se está ocupando el do problema. De ser así sería lamentable, máis aínda porque recordamos que non fai nin quince días David andaba co delegado da Xunta facéndose fotos ao lado do bombeo de Cabanelas moi preocupado segundo el polo medio ambiente.”

   En calquera caso agardamos que este problema se solucione á maior brevidade posible. Os cheiros, que supoñen un tipo de contaminación medioambiental non so afectan á veciñanza que vive na contorna e persoas que pasan pola senda fluvial, turistas e pregrinos incluídos, tamén afectan á  contorna natural, e non debemos esquecer que esta EDAR encontrase e verque no último tramo do Rio Umia, a escasos metros do limite de protección medioambiental do Complexo Intermareal Umia-Ogrove, a zona húmida máis importante de Galicia, protexida por varias figuras administrativas e cun valor ambiental incalculable.

• Temos constancia de que o Colexio Oficial de Traballo Social presentou un escrito esta semana debido a como se cubriu a baixa da traballadora social.
• Existe unha lexislación para este tipo de contratacións, que o propio David Castro admitiu en pleno que non se cumpriu.
• A baixa do educador familiar, que xa acumula tres semanas, aínda non foi cuberta nin se realizou proceso de selección.

   O estado dramático que atravesa o departamento de servizos sociais do noso concello, non so non mellora, senón que empeora, e faino gracias á lamentable xestión do equipo de goberno de David Castro. Á situación xa denunciada de abandono das instalacións, de perda de axudas económicas importantes  e de inxerencias políticas na función do departamento ata puntos de puro populismo como a entrega a domicilio de material e alimentos por parte da concelleira da área,  que nos  levou a pedir a dimisión de Sofía Núñez, agora hai que sumar a mala xestión do persoal profesional, á hora de cubrir as baixas, tanto da traballadora social como do educador familiar.

   No pasado pleno, que tivo lugar o 4 de marzo, o noso voceiro preguntou polo proceso de selección da persoa que está cubrindo a baixa da traballadora social. Tal como explica Oubiña, “o primeiro que respondeu a concelleira foi “non se puxo a dedo”, pero logo cando a concelleira de contas explicou o proceso resultou que contrariamente ao expresado por Sofía Núñez,  si foi escollida de maneira directa, o cal ademais é  ilegal”.

  E non é algo que digamos dende Somos Ribadumia. Esta semana tivemos constancia de que o Colexio Oficial de Traballo Social presentou un escrito no concello preguntando por como se realizou a contratación desa persoa, que xa leva no concello dous meses. Non é unha cuestión menor. “A selección de todo o persoal, sexa funcionario ou laboral, debe realizarse de acordo coa oferta de emprego público, mediante convocatoria pública e a través do sistema de concurso, e cando corresponda oposición ou concurso-oposición libre nos que se garantan, en todo caso, os principios constitucionais de igualdade, mérito e capacidade, así como o de publicidade. Ningunha destes principios se cumpriu na contratación da persoa que suple á traballadora social”.

Mentiras e malas escusas.

Ademais,  a suposta urxencia de non paralizar o servizo nin un día – como se ao longo do ano non se deran períodos de varios días sen todo o persoal presente, ben por outras baixas ou vacacións-  escusa coa que o goberno de David Castro xustificou  no pleno esta contratación irregular, non se sostén, nin sequera co suposto dun caso concreto que segundo o goberno houbo que atender de urxencia pola falta da traballadora social, algo que ademais resultou ser unha falsidade. “Si foi certo que ANTES  de que a traballadora social caera de baixa, houbo un caso que o goberno local , a través – oh casualidade – da secretaria do alcalde,  xestionou puenteando o departamento local de servizos sociais,  e pedindo axuda aos servizos sociais doutros concellos da comarca, axuda que rematou logrando gracias a intercesión de Gonzalo Durán en Vilanova, algo que hoxe sabemos gracias ao entorno da  propia familia afectada”. Pero se xa ese feito tal como aconteceu  é grave polo que da a entender da xestión de David Castro, tamén  resulta totalmente inaceptable como escusa. Non se pode de ningunha maneira nin con ningunha escusa  xustificar unha actuación ilegal, algo que o alcalde e encirra en non entender, á vista destes feitos e doutros denunciados en días pasados.

  A realidade, con todo, é que xa van dous meses dende que a traballadora social colleu baixa, e o proceso para cubrila de maneira correcta e, sobre todo, legal, non se realizou, estando ese posto ocupado por unha persoa designada a dedo, o cal coloca ao goberno local na ilegalidade. Se a iso sumamos que a praza de educador familiar tampouco se cubriu ,e que o departamento de servizos sociais está baixo mínimos, faise evidente  unha vez máis  que David Castro está totalmente desbordado polo goberno, e é incapaz de xestionar as cuestións máis sinxelas.

  Dende Somos Ribadumia imos seguir moi de preto este asunto, por se fora preciso tomar outro tipo de medidas. Pero “o noso ánimo e construtivo, por iso  pedimos a David Castro que se deixe de comportamentos infantís e de formatos políticos doutra época xa caducada, e asuma a xestión do concello atendendo a legalidade e aos principios de transparencia e igualdade imprescindibles na sociedade actual e que foron condición para que o apoiaramos no  seu momento. Ademais, non precisa da nosa axuda neste tema, o persoal municipal está perfectamente capacitado para xestionar correctamente as contratacións, e en caso necesario o propio Colexio de Traballo Social presta asesoramento e mesmo se ofrece a facilitar un modelo de bases de selección para facer un proceso garantista, público e transparente, que é como debe facerse, con máis razón nunha entidade pública”.

• Detectamos que hai moitos elementos de madeira deteriorados e nalgún caso con puntas metálicas ou aristas que poden provocar cortes e feridas.
• Ante a proximidade da Semana Santa pedimos que se proceda de xeito inmediato á reparación e condicionamento do noso maior expoñente turístico.
• Agradecemos á Marta Xiraldez a corrección dos taboleiros informativos colocados pola Mancomunidade.

   En vésperas da Semana Santa, dende Somos Ribadumia realizamos un chequeo das nosas sendas fluviais, tanto da Ruta da Pedra e da Auga, como da senda fluvial do río Umia, que transcorre entre Barrantes e Pontearnelas. 

  A situación na que se encontran lamentablemente non é moi distinta da que denunciamos en xullo de 2019, fai máis de ano e medio, nin se nota que dende aquela se realizaran moitas labores de  mantemento, salvo cortes de herba e podas esaxeradas e innecesarias. De feito, parte do mobiliario deteriorado segue no mesmo punto que cando o denunciamos por escrito, aínda que en peor situación, e outra parte unicamente foi retirado, sen ser substituído por material novo. En verbas do noso voceiro “David Castro no canto de atender ao necesario fai perder o tempo dos traballadores municipais en accións innecesarias e negativas para o entorno, empeorando a mala imaxe que estes espazos acumulan dende o verán do 2019”.

Deste xeito, tal e como vimos denunciando ao longo destes meses, percorrendo todas as sendas encontramos elementos de madeira e taboleiros informativos rotos, vallas, papeleiras, mesas… algúns tirados de calquera maneira, outros supoñendo un perigo pola presenza de puntas descubertas ou bordes cortantes,  e en xeral unha falta de coidado do mobiliario urbano moi evidente para calquera que pase por esas sendas. “E pasa moita xente, pois o bo tempo está favorecendo a práctica do deporte ao aire libre entre a nosa veciñanza, así como a visita de persoas doutras concellos da contorna e do resto de Galicia, que xa esta pasada fin de semana deron moita vida tanto á ruta da pedra e da auga como a senda fluvial do Umia”.

 Mala imaxe para o turismo.

  Chama a atención que a pesar disto, David Castro “pretende dar unha imaxe irreal do noso concello, chegando a situacións algo surrealistas, como cando este pasado lúns o goberno local subiu ás redes do Concello unha foto da ruta da pedra e da auga feita fai anos, recén aberta ao público, e tan mal escollida que houbo veciñas que pensaron que se instalara mobiliario novo”. Detalles quizais sen importancia para os que vivimos en Ribadumia, pero que deixan mal sabor de boca na xente que nos visita, que agarda encontrar unha ruta bucólica, con espazos para o esparcemento coidados, pero encontra algo moi distinto, con evidentes signos non xa de abandono, senon de moi mal coidado, o cal é aínda peor.

  Resulta lamentable que ante o inicio da tempada turística, e sendo coñecedores da alta carga de visitas que reciben estas sendas dende o inicio da primaveira calquera ano,  o goberno local aínda non mobilizara as cuadrillas municipais para darlle unha revisión e poñer a punto o noso espazo máis turístico.

Por todo o exposto, pedimos a David Castro que se dea unha volta pola ruta da pedra e da auga, comprobe por si mesmo a situación na que se encontra, para que non lle pase como no pasado pleno que estivo mais de media hora dicindo que se habían retirado todos os restos de poda ata que Oubiña lle amosou fotos desa mesma tarde obrigándoo a rectificar, e que dedique recursos e persoal de maneira inmediata a por en valor o noso  ben turístico mais visitado.

Agradecemento á Marta Xiraldez.

  A quen debemos agradecer a súa boa actuación é á presidenta da Mancomunidade, Marta Xiraldez. Fai unhas semanas denunciabamos que un dos paneis colocados recentemente pola Mancomunidade non incluían a lingua galega. Vimos de comprobar como en días pasados o taboleiro foi cambiado por outro que si inclúe a lingua galega, ademais do castelán e o inglés.

Polo tanto debemos agradecerlle non so a corrección, senón a premura a hora de realizala e o coidado amosado polo uso da nosa lingua no taboleiro, non so nos textos, se non usando correctamente as denominacións tradicionais onde corresponde, axudando así á conservación da nosa cultura tradicional.

Deixamos aquí unhas escolma de fotos feitas o pasado martes, 23 de marzo de 2021, que deixan ben claro cal é a situación das nosas sendas fluviais.

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• 

• Mentres o resto de nais e pais debe pagar un taxi para poder desprazarse entre o CRA e os servizos de conciliación, David Castro dálle ese servizo a unha familia por  conta do Concello.
• Irresponsabilidade manifesta do goberno local ao usar un vehículo do concello para cuestións que non están autorizadas nin cubertas por ningún seguro.
• A mesma familia xa foi favorecida ao incluírse á nena na escola de verán sen cumprir os requisitos para participar, mentres outros nas mesmas circunstancias quedaron fora.

   Dende o inicio do curso escolar, unha furgoneta do Concello, conducida por persoal municipal, está dando servizos particulares a unha familia, levando cada día a un neno a unha das aulas do CRA. O servizo ademais é personalizado, pois uns días recólleo na casa e lévao ao CRA, outros días recólleo antes e lévao primeiro ao plan madruga, e despois vai levalo ao CRA, segundo  as circunstancias da familia dese neno.

   Mentres isto acontece, outros pais e nais están pagando un taxi para poder usar os servizos de conciliación, ou non poden facer uso deles. Polo tanto, o primeiro que hai que dicir, e así o expuxo Oubiña no pasado pleno, “estase creando un agravio comparativo co resto de nais que pagan ese taxi para poder facer uso do servizo de conciliación, centralizado en Barrantes, e tamén cos que non poden permitirse o luxo de pagar un taxi e teñen que buscar outras solución mentres a un neno, por decisión do alcalde, o colle un coche municipal na porta da casa todos os días e o leva a escola”.

  As mentiras de David Castro no pleno.

   Dáse a circunstancia de que a nena referida, este verán pasado estivo asistindo á escola de verán sen reunir as condicións para facelo. Compre recordar a este respecto que en pleno municipal o pasado 5 de novembro cando eu mesmo lle preguntei ao alcalde , cito literalmente: aceptouse ou non se aceptou algún neno ou nena na escola de verán que non cumprirá cos requisitos establecidos para todos os demais?,  a resposta do alcalde foi taxante e contundente: Dixo que NON. Polo que o noso alcalde non so actúa dunha maneira totalmente censurable, senón que ademais ten a desfachatez de mentir nos plenos municipais”.

   E non foi a única mentira sobre este tema. Para tratar de xustificar o inxustificable, David Castro asegurou que as nais e pais do CRA estaban de acordo con esta maneira de actuar, cando a realidade é que a directiva da ANPA do  CRA, e a maioría de nais e pais non tiña coñecemento de que se estivera dando este servizo a unha familia. Non so non tiñan coñecemento, senon que nos expresaron o seu malestar por esta actuación, que ademais, segundo o propio alcalde declarou no pleno, xa se realizou o curso anterior con outra familia . A ANPA do CRA leva dende a súa fundación solicitando poder dispor dun servizo de transporte para poder usar os servizos de conciliación municipal, ou algunha outra alternativa que os igualase en condicións cos nenos que viven en Barrantes, e cuxos pais teñen a posibilidade de deixar os nenos atendidos toda a xornada laboral.

Tal como explicou Oubiña no pleno “non se pode poñer, por cuestións legais, unha furgoneta calquera a trasladar nenos. Pero é que para o caso, se David Castro fixera público que estaba disposto a dar un servizo de transporte gratuíto aos nenos matriculados na aula de Lois, non tería problemas para encontrar seis ou sete familias dispostas, ademais de actuar dun xeito transparente e igualitario. Sen embargo, optou pola cacicada e o trato de favor”.

A incompetencia de David Castro.

“Cando deixamos o goberno en 2019, enriba da mesa do alcalde quedou  un informe de viabilidade e custes de dar os servizos de conciliación familiar nas aulas do CRA, e evitar ter que trasladar nenos, que resulta máis complexo de xestionar e caro que dar os servizos nos propios centros”. Dito informe deixaba claro que era asumible economicamente e posible de xeito inmediato , que  en todas as aulas do CRA, salvo Ribadumia que precisaría realizar unha pequena obra de adecuación –aínda que hai alternativas temporais – , ofrecer os servizos de conciliación. De feito, dispor ese servizo dende o inicio do curso 2019/20, era un dos compromisos de Somos Ribadumia, e tamén unha das cuestións que vimos pedindo incluír nos orzamentos cada ano.

  Porén, David Castro decidiu demostrar a súa incapacidade para xestionar recursos públicos, e gobernar de maneira completamente irresponsable, actuando como se o Concello fora a súa casa e non unha institución pública, e comprometendo a unha traballadora municipal e á propia administración local. De feito, dubidamos que a furgoneta que se está utilizando teña tan sequera os amarres  isofix requiridos para transportar nenos, e dende logo non está autorizada para o transporte de persoas alleas ao Concello, nin moito menos para ofrecer un servizo de taxi,  cuestión que no caso dun accidente ou de ter calquera problema ese neno mentres está dentro desa furgoneta, pode ter  consecuencias legais e económicas para o concello moi graves. Ademais, dentro ou fora da furgoneta, en caso dun susto ou dunha desgracia ao recoller e deixar a nena, a persoa que realiza esa función quedaría coa carga moral, pero tamén sen protección legal, pois esas funcións non están recollidas nas fichas de traballo, nin están autorizadas ou cubertas polas aseguradoras.

   Esta maneira de actuar é totalmente inaceptable e non pode ter cabida nun goberno municipal, por ese motivo no pasado pleno pedimos ao alcalde que de xeito inmediato deixase de dar este servizo, cando menos do xeito que se está dando, que cumprira a legalidade, e que deixara de favorecer a unhas familias por enriba das demais, pois “os nenos que se inscriben nas aulas do CRA teñen todos os mesmos dereitos, e vale tanto o que primeiro se anota como o último”.

    Tamén pedímoslle a David Castro que emita un comunicado desculpándose por esta actuación, que non so presenta problemas legais, senón que supón un agravio comparativo inaceptable entre as familias que favorece o alcalde e o resto de familias, moitas das cales teñen moi difícil conciliar a súa vida laboral e familiar e agardan das institucións solucións que sexan  igualitarias, non que favorezan a quen teña a casa con máis votos que meter na furna.