Os orzamentos da Xunta ignoran os problemas de Ribadumia e da nosa comarca co silencio cómplice de David Castro.

  • O colexio mantén importantes carencias, e seguimos sen pediatra no centro de saúde.
  • A única mención a Ribadumia é unha obra que acumula cinco anos de retraso para supostamente eliminar un punto negro de verquidos.
  • Nin rastro nin da necesaria ampliación da depuradora de Treviscoso, nin do PEF
  • David Castro, comprice silencioso do abandono da Xunta a Ribadumia.

  Os orzamentos da Xunta de Galicia, un ano máis pasan de puntillas pola comarca, limitando os investimentos a un par de actuacións no ámbito da depuración de augas e moita maquillaxe en forma de anuncios que nin sequera teñen partidas orzamentarias específicas, para actuacións claramente electoralistas..

  Dende Somos Ribadumia seguimos mantendo a posición de que hai problemas locais, como as deficiencias na atención primaria ou no CPI Xulia Becerra Malvar, onde a Xunta debe deixar de poñer parches e realizar actuacións claras e decididas, que solucionen problemas. A situación do CPI de Barrantes é clamorosa, pois 800.000€ despois dunha actuación lograda  gracias á nosa presión, segue habendo carencias sen resolverse, como o tellado de primaria, ou o illamento do edificio de infantil, obras incluídas no proxecto de reforma realizado no 2021 que inexplicablemente quedaron sen executar, pero tamén outras cuestións como os baños de todo o edificio de primaria, que dende a construcción do colexio, fai máis de cincuenta anos, só recibiron reformas parciais, e piden unha actualización a gritos. E isto sen entrar a falar de problemas máis complexos como a falta de espazo físico dentro do colexio, ou dun patio cuberto.

  Non menos grave é a situación do centro de saúde, que segue sen atención pediátrica, mentres o conselleiro de Sanidade,  o señor Júlio García Comesaña,  se dedica a visitar centros de saúde sen médicos e sen pediatras que atendan aos nosos nenos e nenas, para anunciar obras e ampliacións que ninguén pideu.

  Para Oubiña “o feito de que Ribadumia apareza como “beneficiario” dunha obra de reparación dun bombeo que acumula seis anos de retraso e que no seu día o PP comprometeu gracias á presión da esquerda de Ribadumia e Cambados, non nos parece tampouco algo como para escusar outras actuacións”.

  Máis aló do estritamente local, temos ademais outras carencias importantes. Nos, remarcamos a necesidade de ampliar a captación de auga de Treviscoso, outra obra comprometida pola Xunta da que agora Gonzalo Durán non se acorda, e cuxa necesidade se fixo evidente este verán, onde o disparado consumo de auga ocasionou diversos problemas no subministro, problemas que levan anos indo a máis.

Ademais a captación debe facer fronte a outros problemas, como o custe enerxético, que antes ou despois acabaran por repercutir na veciñanza a través do recibo da auga, mentres que o goberno Popularanten conxeladas as transferencias directas aos concellos, nun momento onde a inflación disparada encarece os servizos, máis tamén as contratacións das obras e os subministros, unha situacións que se agrava en concellos como o noso, adoecidos dunha pésima xestión municipal.

  Tamén estaba comprometida a posta en marcha dun punto de encontro familiar na comarca, un servizo moi necesario, así como o reforzo dos CIM, que no Salnés da atención xa a cinco concellos, e seguimos tendo un grave problema de comunicación a través do transporte público, ou de acceso á unha rede de Internet de calidade no rural, entre outras carencias.

David Castro,  comprice.

Tres alcaldes da nosa comarca gardan silencio ante as carencias dos orzamentos do próximo ano da Xunta: o de Sanxenxo, o de Vilanova… e David Castro.

   É lamentable que David Castro manteña unha posición tan compracente  co PP ante o evidente abandono da Xunta cara o noso Concello, “pero moito máis lamentables son os motivos, principalmente dous: por unha banda a incapacidade de David Castro para xestionar nada, que levou a Ribadumia en tres anos e medio a pasar de concello exemplar a ser vergoña e exemplo de como non se debe gobernar, e por outra  a súa necesidade de non enfadar ao PP nun intento de manter abertas as portas dese partido, mentres desfolla a margarida da integración de IR nel”.  A nós as cuitas de David Castro por encontrar unha cadeira cómoda e ben pagada traennos  sen coidado, pero non podemos aceptar que un alcalde non estea ao carón dos seus veciños e veciñas, nin que antepoña as súas aspiracións persoais aos problemas do noso concello, que xa leva perdidos máis de 1000.000 € en investimentos, unha cifra que sube mes a mes.

As leas de poder entre IR e PP fanse públicas.

  • Unha “rebelión” dentro da agrupación local do PP confirma todo o dito por Somos Ribadumia sobre as conversas entre David Castro e o PP a nivel autonómico.
  • O PP negocia por arriba con IR, ocultándolle á cidadanía e mesmo á súa propia  militancia esas negociacións.
  • Luís López e David Castro mercadean cos votos da veciñanza de Ribadumia.
  • Pedimos respecto pola veciñanza ribadumiense, unha comunicación transparente, e acabar con este  ridículo público.

  O destape a través dos medios de prensa dunha “rebelión” dentro das filas do PP local, ven de por de manifesto e confirmar, todo o que dende Somos Ribadumia levamos advertindo dende fai meses, e que ademais é “voz populi”, que non é outra cousa que dende o PP están negociando a integración de David Castro e dos Independientes nese partido, ben sexa antes das eleccións, coa integración de IR de maneira directa, ben sexa a través dun pacto post-electoral, cun goberno negociado, que para Oubiña “é a posibilidade máis plausible politicamente falando, por unha cuestión de imaxe pública, e sobre todo se temos en conta que os de IR temen pagar  a súa mala xestión e perder a maioría absoluta, sostida por un puñado de votos. Ademais, vendo as declaracións na prensa,  agora resulta evidente que no seo local do PP esas negociacións non están moi ben vistas, e que unha parte dese partido non quere ver nin en pintura  nin aos de IR nin a David Castro. Agora sae na prensa, pero tampouco isto é novidade no noso concello, demasiado pequeno como para que estas cousas non as sépamos todos”.

   Dende a nosa formación, non temos o máis mínimo interese de interferir nos procesos doutros partidos, e antes de nada queremos amosar o noso respecto pola militancia do Partido Popular e dos independientes,  pero entendemos que con independencia de cómo se fagan as cousas, algo que debe prevalecer é o respecto pola veciñanza ribadumiense, un respecto que é evidente que o PP nacional e IR, e en particular determinadas persoas dentro deses partidos, non teñen.

   Esta maneira de mercadear cadeiras e salarios públicos a cambio de alcaldías, facéndoo ademais de maneira obscurantista, ocultándolle á cidadanía e a propia militancia e agrupacións locais esas negociacións para minimizar o dano electoral, parécenos totalmente lamentable e unha completa falta de respecto polas persoas que nas eleccións do ano 2019 votaron por esas formacións, que agora descubren que todo foi un paripé.

    Para Oubiña, “ a veciñanza de Ribadumia merece respecto. Merece un alcalde que non os engane, que estea no Concello para resolver os problemas da  cidadanía, non para buscar cadeiras con moito salario e pouco traballo. David Castro é evidente que non é ese alcalde, e que so busca vivir ben da política, ademais de usar o terreo político como campo de xogo para as súas vinganzas e cuestións persoais. Pero o que non entendo é que o PP entre nese xogo cando un partido desa dimensión debería ter persoas máis que capacitadas para pelexar pola alcaldía. Está claro que no PP cando falta o poder falta todo, e que  Feijóo marchou e deixou o partido feito un páramo”.

   É evidente que Luís López, presidente provincial do PP, está moi perdido no seu posto, e que pensa que comprando alcaldes de forzas disidentes vai lograr recuperar un espazo político que cada día merma máis. Pero que unha forza política de carácter nacional entre neses xogos de reunións en bodegas e pactos de mantel, negociando a costas das agrupacións locais e da cidadanía, regalando o que sexa que lle vaian regalar a David Castro a cambio de mudar a chaqueta parécenos  algo totalmente denigrante para a imaxe da política local, e para a política en xeral, que so serve para que a cidadanía perda a confianza  no sistema democrático. A pregunta é: onde esta Alfonso Rueda? Outra pregunta interesante é : Por que David Castro non nega que IR vaia integrarse no PP?

  Dende Somos Ribadumia, so podemos pedirlle aos partidos políticos que respecten a cidadanía, a súa militancia e as persoas que os votan, que eviten dar espectáculos públicos como este e, sobre todo, que sexan transparentes coa cidadanía, e deixen de usar a política como mecanismo para lograr intereses particulares. E dende logo, se o PP quere meterse nese tipo de prácticas mafiosas, que non o faga en Ribadumia.

  Por último, temos constancia de que dentro de IR e do PP local, hai persoas que non están cómodas con esta situación, da que son parte involuntaria, e queremos transmitirlle a nosa comprensión e ánimo.

Iniciamos o proceso de elección da persoa que será cabeza de lista nas próximas eleccións.

  • Igual que sempre, o proceso de elección de candidato será aberto a cidadanía.
  • O prazo de presentación de candidaturas rematará o 15 de novembro.

  Seguindo o ditado da Asemblea de Somos Ribadumia, a Comisión Executiva iniciou o proceso de elección de cabeza de lista de cara ás eleccións municipais de 2023.

   O proceso é aberto, é permite que calquera persoa poida presentarse coas únicas condicións de aceptar os principios políticos e éticos da nosa formación. O proceso é sinxelo, e estará colgado na nosa web durante o prazo de inscrición, que vai do 15 de outubro ao 15 de novembro. Aceptando os requisitos o único que se require e cubrir a corresponde inscrición e trasladarlla  á nosa Comisión Executiva, que designou un Comité de Garantías para guiar o proceso.

  Dende Somos Ribadumia insistimos na nosa formula de traballo  aberta, baseada en principios de democracia e de transparencia, permitindo á cidadanía participar dos nosos procesos de toma de decisións. Unha formula que é a contraria doutros partidos, que ocultan á cidadanía quen son as persoas que os manexan, ou que andan moito máis preocupados polas loitas internas de poder e por garantirse unha cadeira con salario público que por resolver os problemas da cidadanía.

Somos Ribadumia somos o que comprometemos ser cando nacemos en marzo do 2015, un proxecto estable e independente, centrado en Ribadumia, formado por xente honrada que está nisto por vocación de axudar a construír un concello mellor, non por intereses persoais.

Como os obxectivos non son personalistas, o proceso de elección da persoa que nos represente na carreira electoral vaise dar, ademais de con transparencia, de xeito calmado, sen estridencias, e convidamos a toda a veciñanza a participar deste proceso.

Comunicado conxunto de Somos Ribadumia e da agrupación local do Psoe.

   Dende a agrupación local do Psoe e dende Somos Ribadumia queremos comunicar que, como non podía ser doutro xeito, sumámonos ao apoio á campaña de SOS Sanidade Pública que pretende levar ao parlamento galego unha Iniciativa Lexislativa Popular (ILP) que pide medidas urxentes e recursos para recuperar e fortalecer a atención primaria.

  Neste senso, este mércores Pepe Lede e Enrique Oubiña presentaron conxuntamente  unha moción promovida pola plataforma SOS Sanidade Pública, onde se explica a situación lamentable pola que atravesa a atención primaria, facendo fincapé na situación caótica da nosa comarca, unha zona turística que multiplica varias veces a súa poboación no verán e onde no canto de reforzar os centros de atención primaria e os PAC, se reduce de forma significativa o persoal sanitario, non se cobren as baixas nin as vacacións, provocando, ademais da sobrecarga no persoal existente, unha gran merma na  atención pola falla de recursos, e situación lamentables onde se pon en perigo a vida de persoas.

Ademais disto, en Ribadumia a situación de falta de atención  ten chegado a ser especialmente grave no referente ao persoal de urxencias no PAC de Cambados,  con xornadas nas cales non médico de garda durante moitas horas. Ademais, son recorrentes os problemas para cubrir as baixas  das dúas facultativas actuais, sendo dende fai anos unha constante que nos meses de verán o noso centro de saúde conte cunha soa facultativa para atender a nosa veciñanza ou,  demasiadas veces, ningunha. A isto hai que engadir  os problemas derivados da ausencia de pediatra, obrigando a acudir ao centro de saúde de Cambados, onde tampouco se adecuou a plantilla as necesidades do servizo, que esta totalmente sobrecargado.

 Recollida de sinaturas e manifestación 14 O.

  Ademais de presentar a moción, que temos a confianza de que sairá adiante no próximo pleno, tamén puxemos esta semana pregos para a recollida de sinaturas a favor da ILP no concello, no centro de saúde e nas dúas farmacias que hai no concello, e non descartamos poñer outros puntos nos próximos días para favorecer á veciñanza sumarse a esta iniciativa.  Dende aquí queremos pedir da veciñanza de Ribadumia a tan necesaria implicación nesta campaña, aportando a súa sinatura, e acudindo á manifestación prevista para o próximo día 14 de outubro en Vilagarcia. Ter unha sanidade pública de calidade non é so un dereito, senón tamén algo vital nas nosas vidas, e debemos como cidadáns sumar esforzos para lograr que a Xunta de Galicia mude a súa política sanitaria e dote os centros de atención primaria dos recursos necesarios.