O orzamento de Ribadumia (II): ingresos pola vía das multas, recortes en cultura e política social, mínimas axudas ás empresas e todo para obras.

  (Nota aclaratoria: este artigo contén capturas do documento orzamentario aprobado en pleno, así como datos dos orzamentos do 2019 e 2020 . Todos os datos son reais e públicos).

  • O goberno local aumenta os ingresos pola vía das multas de tráfico e  róubanos do orzamento deste ano 30.000€ das achegas do goberno central.
  • Pobre  liña de axudas a comerciantes e hostaleiros, metidas en plans de axuda que non chegan a eses sectores.

Se deixamos de lado todo o dito no artigo anterior (accede a el premendo aquí) sobre a redacción do documento, en canto ao resto de partidas, en resume podemos facer a seguinte valoración:

  • A redución na factura eléctrica dun 70% que prometera David para este ano con respecto a 2019, de momento quedase nun 20%. Todo aforro esta ben, pero pensamos que o noso alcalde non está facendo todo o que pode, porque non era todo poñer farolas de baixo consumo.

  • A mala xestión do mantemento de parques, xardíns e espazos públicos pásalle factura ao alcalde, que se ve obrigado a disparar este ano as partidas para estas cuestións, ata o punto de que onde se mantiña todo por 3.000€ ao ano, agora fan falta 30.000€.
  • E desaparece a partida para a  compra estrela do goberno o ano pasado: a máquina de limpeza de equipos fitosanitarios, que queda no caixón.
  • A cultura baixa e o deporte queda conxelado. David Castro negouse incluso a engadir os sobrantes das partidas do ano anterior como nos lle propuxemos. É máis, desprazou 31.000€ de cultura a obras.   Volve deixar tirada á escola de música,
  • e nin sequera dotou partida suficiente para facer fronte ao descenso do Umia, nin quixo reforzar o apoio aos clubs deportivos, sabendo os problemas derivados da covid aos que teñen que facer fronte.
  • A mes e medio da festa do tinto, David Castro non sabe , ou non quere dicir,  se se vai celebrar, e bloquea 50.000€ do orzamento que poderían dedicarse a outras cuestións. Este é un exemplo claro de que o alcalde está máis preocupado polo que diga a veciñanza del que non da saúde desa veciñanza.

  • Baixan os investimentos de política social, . O goberno de David Castro reduce un 61% a partida de emerxencia social, un 50% o convenio con BATA, e a partida do CIM que tamén ve reducido o seu importe un 15%. Lamentable.

Un asunto que ocupou tempo no debate foi o reparto das axudas ás empresas e promoción económica. En Ribadumia este ano haberá tres liñas principais de axudas. Unha de apoio a empresas e emprendedores aprobada na lexislatura anterior, á que en tres anos só nos consta que se presentara unha empresa.  Pero no canto de facer modificacións, o goberno recortalle 10.000€, deixándoa en 20.000 €. En identica situación de inviabilidade está a  liña de axudas á actividade económica aprobadas no 202, que non solicitou ningunha empresa. Pero a pesar diso, sen cambiar nada nas bases de adxudicación, nin facer o máis mínimo esforzo por adaptarse aos problemas das empresas, o goberno colle os 10.000 euros que sacou da liña anterior, e sumallos a esta, para poder anunciar que pon 40.000€.  Oubiña pideulle ao goberno que deixara de enganar aos hostaleiros e comerciantes con programas de axudas que non axudan, e que sumara todos os fondos. 50.000€, á terceira liña, a de axudas da  Deputación, que so recibe 14.700€, e gracias as condición de uso exclusivo impostas polo goberno de Carmela Silva, e que son a única liña que pode ser interesante para os empresarios.

Algo que hai que remarcar é o bo traballo de recadación do goberno, que este ano ten previsto ingresar  polo concepto de multas e recargos varios 25.000€ . Só en concepto de multas o goberno ten previsto ingresar máis do dobre que no 2019.  Para Oubiña,

“Unha de dúas, ou en dous anos nos volvemos o dobre de delincuentes, ou o goberno local ten previsto colarnos un imposto revolucionario facendo  moitas chamadas ao cuartelillo. Porque esta subida normal non é”.

 Somos Ribadumia estamos dispostos sempre a colaborar e a apoiar ao goberno. Pero non podemos apoiar uns orzamentos dun goberno que engana con falsas promesas aos comerciantes, hostaleiros e empresarios do noso concello, que recorta as partidas en política social e cultura,  que so gasta cartos en obras e maquinaria e que lle rouba cartos á veciñanza. Así o expuxemos e así votamos.

O orzamento de Ribadumia (I): partidas falsas, incorrectas e un roubo á veciñanza de 30.000€.

(Nota aclaratoria: este artigo contén capturas do documento orzamentario aprobado en pleno, así como datos dos orzamentos do 2019 e 2020 e outros publicados na web do ministerio de facenda. Todos os datos son reais e públicos).

  • O documento ten erros de bulto, como a ausencia da partida para a loita contra a violencia de xénero, ou a existencia de diversas partidas para o mantemento do centro médico, tres anos despois de que a Xunta se fixera cargo.

  No pleno do pasado martes o punto central na orde do día era a aprobación do orzamento. De partida, por fin puidemos entender os motivos polos cales o goberno de David Castro nos poñía tantos impedimentos para acceder á documentación: a desastrosa redacción do orzamento, pragada de erros de todo tipo como puxo de relevancia  Oubiña “xa  no primeiro momento, pedindo que se retirara o orzamento para proceder a corrección dos erros, pero David Castro non quixo aceptar a nosa solicitude, co cal ao final aprobou, cos seus únicos votos uns orzamentos que, por mal elaborados, acabaran por estudarse nas escolas de economía”.

    O texto inclúe, e así se aprobou, erros de transcrición, como por exemplo unha partida de 16.000€ para pagar a factura eléctrica do local de protección civil, que habitualmente anda nos 1.500€,

partidas que non son reais como varias de mantemento para o centro de saúde, cando fai tres anos que o Sergas se fixo cargo del.

Do documento tamén desapareceu a partida para axuda as vítimas de violencia de xénero, 15.000€ subvencionados pola Xunta que deberían aparecer.

Con todo, o mais grave é o roubo intencionado que o goberno local fai de 30.000€  á veciñanza. No apartado de ingresos, onde deberían aparecer  os 954.505,57€ que ao longo deste ano vai aportar o goberno central, e que xa están aprobados e publicados, aparecen unicamente 924.000€. Ao recortar esta cifra na correspondente partida, o que vai pasar é que o goberno central so nos vai ingresar o consignado no orzamento municipal, e o resto pasara a engordar o remanente, quedando así fora do uso deste ano. “E podemos chamarlle como queiramos, pero isto é un roubo á veciñanza en toda regra”.

   Ademais, esta foi a partida que puxo de exemplo Oubiña para demostrar as mentiras que o goberno local usa para non incluír as nosas propostas, que para este ano suporían 28 cambios no orzamento, a maioría axustes de partidas existentes, unha modificación orzamentaria que, sen mover o total do orzamento salvo a inclusión do que o goberno local nos rouba, repercutiría en axudas reais aos sectores máis afectados pola pandemia, pero tamén en investimentos en cultura, deporte  e xuventude, a gran abandonada deste goberno. “O pasado xoves pola mañá o goberno central ía ingresarnos – segundo previsión orzamentaria –  915.000€, e logo pola tarde xa resultou que o goberno central en realidade ía ingresarnos  924.000€, 9.000 € que se moveron apertando un botón”. Este cambio, xunto á eliminación de varias partidas que eran imprescindibles as nove da maña e innecesarias as tres da tarde, foi motivado por unha reclamación dos sindicatos, que o goberno se viu obrigado a aceptar. O asunto serviu para demostrar que “David canto menos poida pagar mellor, e so sube salarios – salvo o del – se o obriga a lei”, e que os orzamentos non están escritos en pedra.

(Podedes seguir lendo sobre os orzamentos no segundo artigo publicado na nosa web)

Inaceptable comportamento de IR, atacando o dereito á intimidade de Enrique Oubiña.

  • Persoas do entorno de IR recolleron en foto ou vídeo momentos e detalles da vida privada de Enrique Oubiña e da súa familia, que logo a concelleira Pilar Martínez usou como argumento no pleno.
  • Non podemos aceptar que un partido político faga un seguimento a ningunha persoa no seu ámbito privado.
  • Todo o noso apoio  a Enrique Oubiña, que abandonou o pleno en sinal de protesta.

   No pleno celebrado este pasado martes a concelleira de IR Pilar Martínez e o resto da agrupación de IR, alcalde incluído, traspasaron todas as liñas vermellas existentes na separación entre ámbito político e privado.

Foi durante a réplica por parte da Concelleira de contas no punto principal da xornada, que era o debate do orzamento municipal. Nun momento determinado, a concelleira pretendeu acusar a Enrique Oubiña de atender a outras cuestións no canto de atender as súas responsabilidades políticas, poñendo como exemplo que no momento de celebrarse a Comisión Informativa días antes do pleno Enrique Oubiña estaba paseando por unha senda fluvial, e que ademais “tiña probas”.

   Con respecto á cuestión da Comisión Informativa mencionada, nada que dicir pois dende Somos Ribadumia xa habiamos informado que non participaríamos na mesma por que aínda non tiveramos tempo a valorar a documentación. O que é totalmente inaudito e inaceptable, e así o explica Oubiñaé que dende IR se dediquen  andar detrás miña, e refírome ao meu ámbito privado, para facerme fotos ou gravar vídeos ou o que a eles lles pareza, e despois levar iso aos plenos para usalo como arma arroxadiza”.

   Á vista do comentario,  sobre o que a concelleira aínda se reafirmou unha segunda vez no expresado , que ademais acompañou dunha serie de faltas de respecto e referencias á vida privada do noso voceiro ao longo do pleno, Enrique Oubiña optou, como medida de protesta e de defensa do respecto e da dignidade tanto da súa persoa como da propia política, por abandonar o pleno unha vez rematados os tres puntos que se sometían a debate e votación.

   Dende Somos Ribadumia queremos amosar todo o noso apoio tanto a Oubiña como ao seu entorno máis próximo, e xa adiantamos que estamos realizando as consultas legais pertinentes para ver como enfocar este caso en cuxa gravidade insistimos, pois a súa consecuencia máis inmediata é “a sensación de que non podo saír da casa sen saber se me estarán seguindo, ou se me farán unha foto falando con calquera veciño. E se os de IR teñen este comportamento comigo, e tan alegremente como para facelo público nun pleno, poden telo con calquera outro concelleiro, ou calquera veciño ou veciña”.

Cacicada de David Castro co reparto de axudas covid ás empresas.

  • Pretende aprobar unhas bases de adxudicación que implican repartir os fondos directamente  a dedo.
  • Non hai criterios de reparto obxectivos de ningún tipo para os fondos, so de acceso a liña de axudas,  e a decisión quedaría en mans de cargos políticos, algo inadmisible.
  • O voceiro de Somos Ribadumia adianta que  en ningún caso votará en contra  de conceder axudas a ningunha das empresas que cumpran cos requisitos e a soliciten.

   No medio da documentación que o goberno local pretendía manter oculta ata o último minuto, para que  dende Somos Ribadumia non puideramos facer unha valoración, e que este próximo martes van ir a pleno, encóntranse as bases para o reparto da liña de fondos covid disposta pola Deputación, que debe xestionarse a través dos Concellos, e que no caso de Ribadumia ascende a 14.700€.

   Dende Somos Ribadumia insistimos en apoiar ao goberno en todas as cuestións que repercutan en beneficio da veciñanza, e dende logo estaremos a favor de calquera liña de apoio aos sectores máis afectados pola crise derivada da pandemia, polo que tal e como Explica Oubiña, aínda que estas axudas chegan tarde, mal e arrastro, nós ímolas apoiar. É máis, pensamos que a partida – aportada integramente pola Deputación, o Concello non pon nada –  debería complementarse con fondos municipais. Por dous motivos: o primeiro porque 14.700€ para todas as empresas afectadas é unha cantidade que da para moi pouco, e en segundo lugar porque economicamente é posible, e ademais é posible sen afectar a ningunha outra partida orzamentaria”.

   Pero unha cousa é apoiar que se dean liñas de axuda como neste caso a hostaleira, pequeno comercio, axencias de viaxe, ximnasios ou outros negocios similares, que é a quen está dirixida, e outra aceptar que os cartos se repartan de calquera maneira.

  E aquí é onde temos que por de relevancia “a cacicada que o goberno de David Castro pretende levar a cabo, ademais coa falsa imaxe de transparencia, ao pretender que os partidos da oposición formemos parte do seu xogo, cousa que pola nosa banda non vai pasar”.

    O texto que o goberno local pretende aprobar, de partida establece un prazo de so vinte días para presentar as solicitudes, cando esta liña a Deputación tena aberta ata o 31 de decembro, o cal obrigará ás empresas que queira beneficiarse delas a andar apurados para reunir a documentación. que o reparto de fondos, que permitirán subvencionar os custes de alugueres, subministros, seguros de responsabilidade civil e accidentes, compra de mercadorías relacionadas coa actividade, gastos derivados dos salarios do persoal  ou gastos financeiros directamente relacionados coa actividade, se realizará a través dunha “Comisión de Valoración”, que se pretende estea formada polo Alcalde, a concelleira  de Contas, a  concelleira de Promoción Económica, os voceiros dos grupos políticos da Corporación municipal- o cal deixa fora ou ao concelleiro do Psoe ou ao concelleiro de Somos, pois ambos forman o grupo mixto – , e un técnico municipal do departamento económico, ademais da secretaría municipal que sería a única persoa da mesa sen voto.

  O problema, explica Oubiña, “non reside tanto na fórmula, de partida pouco democrática, como no propio proceso de reparto. Non hai un mecanismo de avaliación obxectiva das axudas, nin ningún tipo de limitación á cantidade que as empresas poden solicitar e recibir, salvo o teito económico da partida. Isto significa que calquera das empresas que cumpra os requisitos, que non son moi esixentes, pode presentar facturas ata un total de 14.700 €. E logo será a Comisión de Valoración, ou sexa os políticos,  os que decidan que cantidade de fondos se lle entrega a cada empresa de maneira totalmente arbitraria”.

  Na práctica, o goberno local pretende repartir os cartos a dedo. Ademais, o propio documento inclúe dous puntos que son o colmo da tomadura de pelo ás empresas  e aos concelleiros da oposición. Por un lado o ditame da Comisión de Valoración so ten valor propositivo, e deberá ser a Xunta de Goberno, formada unicamente por membros de IR,  quen dea a aprobación definitiva ou modifique se o considera  o reparto, ou sexa que en realidade a Comisión de Valoración non vale para nada máis que para aparentar. O outro punto é que no caso difícil de non haber acordo maioritario nesa comisión, onde IR ten catro votos de sete posibles, será a Xunta de Goberno quen tome a decisión, que xa a ía tomar de todos xeitos. “Mírese como se mire, van ser os membros de IR os que decidan cantos cartos e a quen se lle entregan. Obviamente, non podemos estar de acordo con esta maneira de distribuír fondos municipais”.

 A legalidade destas bases está claramente en entretido ao non cumprirse os criterios de igualdade de oportunidade nin de transparencia no proceso de adxudicación dos fondos. Polo que  dende Somos Ribadumia facemos un chamamento ao goberno local para que rectifique o documento, antes de aprobar algo en pleno que non é legal, nin é igualitario para as empresas.

Podedes acceder ao borrador as bases que o goberno propón para a súa aprobación neste enlace , pero tede en conta que de momento é un borrador, non o texto definitivo, que será o que se aprobe o martes en pleno, que pode ser – agardamos que sexa – distinto, e que nos publicaremos no seu momento.