O equipo de goberno do Concello de Ribadumia vén de celebrar, con data 05/11/2015, un pleno no que entre outros asuntos informou que o estado no que se encontran os parques infantís  que hai no Concello de Ribadumia é deficiente e, nalgún caso, de abandono.

Este equipo de goberno pon en duda a xestión de Salomé Peña e o seu equipo, pois durante estes últimos anos enténdese que non  houbo ningún tipo de mantemento. Esta conclusión está perfectamente documentada, pois vén avalada por un informe do técnico municipal no que se indican as graves deficiencias existentes e o conseguinte perigo para os usuarios, cuestión gravísima tratándose de nenos.

Entre o mantemento que hai que levar a cabo nos parques infantís inclúense aspectos como: valado deteriorado, pezas soltas, rotas ou astilladas, manifestacións de óxido e corrosión nas pezas metálicas, as pezas de unión como anclaxes ou  parafusos están soltas e frouxas, as rampas dos tobogáns deterioradas, etc.

Este equipo de goberno solicitou presupostos a distintas empresas para levar a cabo a reparación dos parques infantís. O custo das actuacións está valorado nuns 32.000 euros.

Denunciamos e lamentamos a falta de previsión por parte da exalcaldesa Salomé Peña, pois a partida económica que deixou para o mantemento dos parques infantís é de 3.906,79 euros a 30/09/2015, e a partida inicial que tiñan era de 6.000 euros, necesitándose 5 veces máis do que tiñan previsto presupostariamente. Ao PP parece que lle importaban máis as grandes obras que o benestar e a seguridade dos nenos de Ribadumia.

Dende o concello temos claro que, por esta falta de interese e previsión, nos vemos obrigados a actuar de xeito rápido e urxente e a facer un importante esforzo económico para levar a cabo a reparación dos danos que hai nos distintos parques infantís, pois nestas condicións supoñen un perigo para os nenos que os utilizan.

Os informes técnicos que xustifican a necesidade deste investimento están a disposición dos veciños nas oficinas municipais.

Á parte destas reparacións, de cara ós próximos anos, o equipo de goberno ten previsto realizar un calendario de revisión e mantemento de todas estas instalacións, para conseguir que estean en mellores condicións de uso, alongar a súa vida e un aforro para as arcas municipais, pois entendemos que o investimento que agora se vai facer para solucionar as graves deficiencias que existen é moi superior ó que suporía realizar un mantemento anual.

Este equipo de goberno, despois de informar no pleno, nos próximos días vai adxudicar a obra valorando os presupostos dos que xa dispoñemos, para poñer en marcha  as reparacións dos distintos parques infantís que ten este concello en cada unha das parroquias  e tamén no colexio de Barrantes.

Xa podedes acceder á acta do pleno do 30/9/2015, ver todo o que se tratou nese pleno como a aprobación das contas municipais do 2014 ou a designación dos festivos locais para o ano 2016, asi como diferentes cuestións plantexadas polos concelleiros dos diferentes grupos.

Aumentáronse as bonificacións e exencións nas ordeanzas reguladoras do acceso a piscina municipal e as instalacións deportivas.

De todas as taxas, só se revisou á alza a da Escola de Verán, para axustala proporcionalmente ao aumento do número de horas e período de apertura da mesma, tal e como demandaron os usuarios do servizo.

 

No Pleno da Corporación Municipal do Concello de Ribadumia que tivo lugar o xoves pasado, abordouse a adaptación de varias ordenanzas fiscais, a fin de poder publicalas e que entren en vigor no período 2016.

Na maioría dos casos tratouse simplemente de adaptar as ordeanzas á actualidade e á lexislación vixente, sen aplicar ningún tipo de incremento nas mesmas. Así, en palabras do alcalde David Castro: “algunhas das taxas estaban aínda en pesetas; o que se fai é adaptalas á lexislación e pasalas a euros, unha cousa por certo, que tiña que haber feito no seu día o anterior equipo de goberno e por deixadez non fixo”.   A reforma destas taxas mereceu a aprobación unánime de toda a corporación.

AUMENTO DAS BONIFICACIÓNS E EXENCIÓNS NAS ORDANANZAS DA PISCINA MUNICIPAL E NA DE ACCESO AOS CAMPOS DE FUTBOL:

O equipo de goberno decidiu propor varias modificacións nas ordenanzas reguladoras de acceso ás instalacións deportivas municipais e á piscina municipal de Cabanelas, coa finalidade de facilitar o acceso ás mesmas.

Así no caso da piscina amplíase a posibilidade de aplicar as exencións de pago das que disfrutan xa na actualidade os veciños empadronados aos seus familiares ata segundo grado. Esto permite rematar co problema que tiñan por exemplo aqueles veciños de Ribadumia que por motivos laborais teñen que residir fóra do noso concello e veñen de vacacións no verán e non podían acceder ao servizo…..  Tamén se inclúen no mesmo apartado para poder acceder ás bonificacións a aquelas persoas e familiares que, sen ser residentes en Ribadumia, si teñen empresas ou comercios no noso concello. Neste caso considerouse de xustiza que si están xerando emprego, servizos ou economía en Ribadumia, e pagando impostos, poidan acceder a este servizo en igualdade de condicións que os residentes no municipio.

No caso do acceso ás instalacións deportivas, acordouse estender as bonificacións que existían para poder usar os pavillóns polideportivos aos campos de fútbol de titularidade municipal.  Esto, na práctica, permite que os veciños de Ribadumia que ata agora pagaban polo uso do campo de fútbol deixen de facelo, unha medida que afecta especialmente aos equipos de fútbol veterán existentes no Concello.  Finalmente tamén se reformou a ordananza do ximnasio municipal, para incluír a posibilidade de adquirir bonos de acceso individual sen ter que abonar a cuota mensual.

TAXA POLA ESCOLA DE VERÁN:

No ámbito da conciliación familiar tamén se aprobaron melloras na taxa e no servizo. Por unha banda os usuarios do plan madruga e da escola de ocio e tempo libre terán unha rebaixa nos meses de Xuño e Setembro, que ata agora era obrigatorio pagar completos inda que solo se disfrutara do servizo unha parte do mes.

No caso da Escola de Verán, o que se levou a Pleno foi unha revisión da ordeanza para segregala da “escola de ocio e tempo libre”, e adaptar a taxa  ampliación e mellora do servizo que se vai levar a cabo a partir do 2016, cando  aumentará tanto o tempo de duración da escola, como o horario de apertura da mesma; así como as prazas.

Todas estas modificacións leváronse a cabo a demanda dos propios usuarios do servizo, e coa fin de adaptalas ao horario laboral de verán e permitir unha maior conciliación da actividade familiar e laboral, que ao fin e ao cabo é o obxectivo primordial da escola.

Así incrementarase o período de servizo da Escola de Verán dende mediados de xuño ata mediados de setembro, para facela coindicir co final e principio do curso escolar, e o seu horario de funcionamento (de 8 a 15 horas).

Finalmente xa tamén no presente ano se aumentaron as prazas da Escola de Verán para poder atender toda a demanda existente e que non quedase ninguén sen poder acceder ao servizo. Así pasouse de 50 prazas (límite que tiña o anterior equipo de goberno de Salomé Peña, aínda que o regulamento non o establecía) a atender xa no 2015 a 86 usuarios, co conseguinte aumento de persoal, e polo tanto de partida económica. Con Salomé Peña e o seu equipo este servizo mantiñase cun presuposto de 10.000 euros e co novo equipo de goberno temos que contar cunha partida duns 19.000 euros.

Todas estas melloras fixeron preciso unha modificación da taxa, que se acordou facer de xeito proporcional ao correlativo aumento de horas do servizo que se prestan (sempre baseándonos na cuota que se viña aplicando en anos anteriores) Así pásase de pagar 30 euros ao mes a pagar 45, pero tamén se pasa de prestar un servizo de 240 horas a 420 horas, entre os meses de xuño e setembro.

Este venres,  quedou aberto para disfrute do público mais novo o parque infantil, que amplía as instalacións do complexo educacional no que se circunscribe o  CPI Xulia Becerra Malvar.

  A instalación, plantexada como unha superficie de 220 metros cadrados, totalmente cuberta de caucho e con sete elementos de xogo para nenos de entre 3 e 6 anos, tiña un orzamento inicial de 50.396,50€, pero a negociación levada a cabo polo equipo de goberno con varias empresas do sector, reduciu esa cantidade en algo mais de 6.000€ ata deixala nos 44.323€, dos cales 15.019€ foron aportados polo concello, e o resto subvencionado pola Xunta de Galicia, a través do GDR. Hai que destacar, tal como explica Pepe Lede, o concelleiro responsable da área de parques e xardíns, “a axilidade coa que este equipo de goberno xestionou está obra para conseguir, a pesares das críticas do PP, por un lado  que os prazos se cumpriran, e por outro que o orzamento se vira mellorado, ademais da aposta forte por buscar formulas que conseguiran implicar a empresas locais.”

Dende o equipo de goberno recordan que para poder facer fronte á parte da obra que debe pagar o concello, debido a mala xestión e falta total de previsión do goberno anterior presidido por Salome Peña, que non incluíu ningunha partida orzamentaria para esta obra, e ademais destinou o total da partida prevista para ó colexio á obra do ximnasio, foi preciso acometer unha modificación de crédito.  O mesmo tempo hai que lamentar que o feito de coller este proxecto xa pechado, non permitiu facer o que tiña que ter feito o equipo da señora Peña e non fixo, que é  presentar a obra ós colectivos afectados, colexio, ANPA, etc, para entre todos poder corrixir posibles erros e mesmo melloralo de ser posible.

O equipo de goberno quere insistir tamén na necesidade de facer unha boa previsión orzamentaria, pero sobre todo, é moi importante tomarse o tempo necesario para desenrolar un proxecto que poña enriba da mesa qué tipo de concello se quere conseguir, cara onde se quere medrar, qué necesidades se necesitan cubrir, etc, e deixar de realizar obras por impulso ou a golpe de subvención sen unha correcta planificación.