A semana pasada Enrique Oubiña participou, en representación do Concello de Ribadumia, no III Encontro da Rede Nacional das Nenas e dos Nenos, celebrado  en Huesca.

   No encontro, diferentes concellos, universidades, asociacións… tiveron a oportunidade de coñecer as claves para a construción de cidades inclusivas, que promovan e avoguen polo benestar dos seus habitantes, especialmente nenas e nenos, pero tamén anciás, persoas con diversidade funcional, etc. Así mesmo, os participantes puideron intercambiar opinións sobre como acadar estes obxectivos e facer que as comunidades establezan como prioritaria a creación de cidades respectuosas co medio ambiente e os veciños que as habitan, accesibles e sostibles, contando coa participación activa dos nenos e nenas, futuro de toda sociedade. Para Enrique Oubiña ” a visión dalgúns  políticos e politicas é curtopracista e moi reducida, cos ollos postos nos votos máis que na solución real dos problemas, e o resultado desa maneira de ver e facer salta á vista cos gobernos anteriores, emperrados en facer obras bonitas para saír nos xornais, pero sen pensar se eran necesarias, útiles, ou se os plantexamentos e solucións cumprían  cos obxectivos marcados; participar neste tipo de eventos permítenos formarnos, aprender,  e desenvolver unha visión máis ampla destas cuestións, para así logo poder buscar mellores solucións e, en resumo, poder facer  mellor o noso traballo”.

   O proxecto da Cidade das Nenas e dos Nenos, creado e promovido polo psicopedagogo Francesco Tonucci, está en marcha desde 1991, e vense debatendo en diferentes cidades españolas dende o 2016, ano en que se produciu o primeiro encontro en Granada, relevada en 2017 por Pontevedra. Este ano, o concello de Ribadumia, representado polo concelleiro de Urbanismo e Servizos Sociais, Enrique Oubiña, participou por primeira vez no encontro, onde tivo a ocasión de entrar en contacto con esta rede, coñecer en profundidade as súas características e formulacións e analizar casos reais e concretos, como o do municipio que acollía este terceiro encontro.

Enrique Oubiña mostrouse “sorprendido con casos como o de Huesca, onde un “consello de nenas e nenos” participa activamente na proxección das actuacións urbanísticas que lles afectan directamente, como parques ou zonas peonís. Contra o que puidera parecer, o resultado final nada ten de infantil, máis ben o contrario: as áreas resultantes son moito máis inclusivas, con solucións lóxicas, efectivas, e respectuosas co seu entorno. Ademais  todo este proceso  fíxose integrado no ámbito escolar, con evidentes resultados na formación dos nenos e nenas. “

   Ribadumia busca situarse, deste xeito, entre os territorios que, a nivel nacional e internacional, avogan por un crecemento sostible, no que veciños e veciñas se vexan incluídos, un deseño de sociedade que apoie a participación infantil na vida social, participación, en definitiva, dos futuros cidadás e cidadáns.

    O pasado xoves o programa da radio Galega “Convivir”  entrevistou en directo a Enrique Oubiña, para falar do programa lanzado dende a concellería de Servizos Sociais “Conta Comigo” (contacomigoribadumia.com). Deixamosvos aquí o audio do programa, ó que tamén podedes acceder na nosa canle de youtube. 

   O programa Conta Comigo está a gañar repercusión pola súa novidosa maneira de enfocar o problema da violencia de xénero e de buscar un maior apoio para as vítimas, coa implicación da cidadanía e do comercio local.

 

 

 

 Onte presentouse no Concello de Ribadumia o programa “Conta Comigo Ribadumia”, unha iniciativa pioneira en Galicia,  que parte do departamento de Servizos Sociais do Concello de Ribadumia,   que conta co apoio da Asociación de Comerciantes de Ribadumia, e que pretende ser un chanzo máis  no apoio ás vítimas de violencia de xénero e na loita contra esta lacra.

   O programa, tal como nos explicaba na tarde de onte Enrique Oubiña, “pretende aumentar os mecanismos  de apoio ás persoas que se vexan envoltas nunha situación de maltrato de xénero, sexa fisico, psicoloxico, ou de calquera outro tipo.

  A  novidade é que pretendemos  facelo establecendo un primeiro chanzo, previo a todo o proceso de denuncia ou de busca de outra axuda máis profesional: o do apoio dun grupo  veciñas e veciños; xente de a pé que disporá das ferramentas adecuadas para enfrontarse a estas situacións e poder guiar e apoiar ás afectadas. Por outra banda, non so prepararemos ás persoas para poder enfrontar estas situacións, tamén disporemos, co apoio do comercio local, de “puntos de seguridade”, identificados un simbolo característico, a onde calquera veciña ou veciño saberá  que pode acudir en busca de información e/ou axuda.

Enrique Oubiña explicaba tamén que esta proposta baseada no apoio de persoal voluntario que a vítima poida identificar como algo máis cercano  que unha institución,  pensamos que vai supor un avance importante á hora de que unha persoa que viva nunha situación de violencia de xénero, poida achar un primeiro punto onde acudir, que sexa accesible  e non supoña aumentar o drama. Por que logo de escoitar as experiencias de varias afectadas, vimos que  as veces unha persoa que escoite e coa que se poida conversar, nun ambiente mais informal que un despacho,  pode axudar moito a vítima a dar os pasos precisos para saír da súa situación. 

  Por outra banda, a través da visualización dos puntos de seguridade,   mostraremos  dun xeito público e explicito  a repulsa da sociedade a estes comportamentos. Un rexeitamento que ten que ir moito máis alo das manifestacións oficiais, algunhas  veces tan grandilocuentes como ocas. Debemos  conseguir, e ise é outro dos obxectivos deste programa,  que sexa a propia sociedade a que tome a iniciativa dun xeito activo na loita contra a violencia de xénero.”

  O plan conta cunha partida de case 10.000€, e vai permitir formar a un grupo de dez persoas, ampliable se fora preciso,  e dispor dun mínimo de 10 puntos de seguridade. Ademais da formación, o programa  prevé outras ferramentas, como unha web ( contacomigoribadumia.com) e perfís nas redes sociais, a través dos cales se ira aportando toda a información, un mapa dos puntos seguros, etc…

   Enrique Oubiña quere “agradecer á Asociación de Comerciantes a sú predisposición a colaborar con esta iniciativa, totalmente novidosa pero que estamos seguros de que vai axudar moito na loita contra o maltrato de xénero. Tamén  animar a aquelas persoas que o desexen a participar nesta experiencia,  para o cal poden porse en contacto co Concello (986 718 491)  ou chamar ó 622 09 87 21. “

• Dende Somos Ribadumia consideramos oportunistas, pero valeiras de contido, tanto as declaracións do PP local de onte, como a moción presentada con respecto á rúa do DIA.
• Non nos parece de recibo que o PP tape a súa incapacidade con insultos.

   Onte  tivemos constancia dun comunicado do Partido Popular de Ribadumia, onde, a parte de insultos persoais dirixidos ó noso voceiro Enrique Oubiña, se expoñían unha serie de acusacións que consideramos pretenden despistar da realidade do traballo do Partido Popular neste concello, que solo se pode calificar de INEXISTENTE.

   Convén recordarlle ó Partido popular, unha vez máis, que unha das funcións dos plenos municipais non é darlle a oportunidade ós concelleiros de lucir capacidade oratoria, se non de buscar acordos e consensos que permitan avanzar solucións ós problemas que afectan ó concello e as persoas que viven nel. Nese sentido, o pasado xoves no pleno municipal puidemos comprobar como o Partido Popular daba unha imaxe moi lonxe do consenso e da busca de acordos, ó rebentar un compromiso previo co equipo de goberno co único obxectivo de lograr un titular de prensa.

  A realidade é que había un acordo para lograr un consenso con respecto a unha moción da oposición, e mostrar que todas as forzas políticas coincidían na necesidade de darlle unha solución urbanística a esa zona de Barrantes. O que aconteceu foi que o Partido Popular, logo da comisión informativa mudou de idea, desacreditando no proceso a Salomé Peña, quen aceptara a proposta do equipo de goberno, por que o que realmente buscaba non era un acordo, se non que o equipo de goberno votara en contra da súa moción. Demostrouse así que ao Partido Popular os problemas do noso concello danlle igual, e que solo busca obter rédito político de todo, sexa como sexa, inda que para iso haxa que facer relucir a falta de liderazgo de Salomé Peña, totalmente dependente dos ditames do señor Serantes.

   Dende Somos Ribadumia consideramos que o PP pretende agora cun comunicado remendar o roto provocado por eles mesmos, e facer a Somos Ribadumia responsable de todos os seus males, incluído o seu fracaso electoral, pero o único que consigue e afondar máis na súa imaxe de incapacidade  política.

   En calquera caso, o PP non é precisamente o partido mais adecuado para falar de cómo se empregan ou non as partidas económicas do orzamento. No ano 2012, no apoxeo do goberno da señora Peña, o seu executivo  deixou sen gastar 521.000€ en diferentes partidas, orzamentadas claramente “a ollo”; no 2014 orzamentou 150.000€ para un “centro de lectura e usos multiples” que despois renunciou a construir, reinvestindo a partida noutras cuestións menores, noutro claro exemplo de incapacidade política e mala xestión dos recursos. E no ano 2015 non contemplou nos orzamentos a obra do ximnasio e comedor novo, aprobada posteriormente nun claro xesto electoralista, obrigando posteriormente ó actual  goberno a sacar cartos doutros lados para facerlle fronte. No mesmo ano 2015 orzamentou en efecto unha partida para abrir a rúa Ramón Cabanillas, pero en Xuño dese ano non se había gastado nin o custe das estacas que o PP colocou en fincas privadas sen autorización nun intento de facer as cousas polas bravas.

O equipo de goberno mantén dende o 2015 unha correcta xestión das obras, con aforros importantes nas contratacións e un maior control das mesmas. Mantén tamén o compromiso de dar solución á rúa Ramón Cabanillas, cunha partida aberta no orzamento co obxectivo de, en canto se chegue a un acordo cos veciños e se teña unha solución viable enriba da mesa, poder executar o proxecto.

   Sobre os insultos e os ataques ó noso voceiro e a Somos Ribadumia, non nos imos pronunciar, pero non nos parece correcto que un partido político use termos despectivos para referirse a un cargo público, e menos un partido político que precisamente conta entre as súas filas con concelleiros investigados xudicialmente.