O Concello de Ribadumia informa de que ven de rematar o proxecto de prevención do acoso escolar organizado polo propio Concello, en colaboración co CPI Julia Becerra Malvar.

Durante os pasados meses, o Concello e o centro escolar de Ribadumia puxeron en marcha un novidoso programa dirixido aos nenos e nenas de 5º e 6º de Educación Primaria e 1º de Secundaria. Mediante esta actividade, intentouse achegar ás rapazas e rapaces conceptos e ferramentas para mellorar a súa educación emocional, as habilidades sociais e a mediación e resolución de conflitos, dun xeito adecuado a cada una das idades e procurando que as actividades realizadas foran entretidas para eles.

  En doce sesións guiadas por unha educadora social, alumnas e alumnos profundaron no propio coñecemento, así como na empatía e a comunicación asertiva, capacidades que os poden axudar a mellorar as súas relacións interpersoais e de grupo, tanto dentro como fora da escola. Así mesmo, adquiriron ferramentas que lles permitirán lidar coas súas propias emocións e coas dos demais, na procura de solucionar os conflitos que no día a día poden xurdir.

Trátase, polo tanto, dun proxecto que pretende loitar con problemas como o acoso ou a violencia escolar, principalmente dende o ámbito da prevención en lugar do castigo a posteriori, e que centra os seu esforzos na procura de capacitar aos rapaces para enfrontarse de xeito positivo ao seu día a día.

Unha vez finalizado esta iniciativa, tanto o centro educativo como as persoas encargadas de desenvolver as actividades coinciden en sinalar os bos resultados e a grande acollida acadada entre os rapaces e rapazas. Por todo isto, Concello e centro pretenden no só  repetir a experiencia o vindeiro ano escolar, senón tamén ampliala, de ser posible, a alumnas e alumnos doutros cursos.

   Na tarde de  onte Enrique Oubiña amosabase “moi satisfeito co resultado do programa; este tipo de accións teñen unha importante influencia na formación dos nenos, nun momento determinante da súa vida, polo que temos que seguir apostando por esta liña de traballo, baseada na prevención de condutas inadecuadas ou violentas”.

   A semana pasada asinouse o convenio coa Deputación de Pontevedra que vai permitir acometer unha importante obra de urbanización na rúa A Torre, en Barrantes, entre a rotonda dos castaños e o pazo de Barrantes.  Sobre esta importante obra fixemoslle unhas preguntas a Enrique Oubiña, na súa calidade de  Concelleiro de Obras:

Xa tardaba a sinatura do convenio,non? Non, en absoluto. As cousas non sempre van todo o rápido que un quere, e pode parecer que se tardou moito, pero é o que pasa cando te atopas o que atopamos nos con esta obra.

E que atopachedes ? Un desastre en todos os aspectos. As presas traizoaron a Louzán e a Salomé, e aprobaron a cegas un proxecto que nin sequera estaba rematado de elaborar. Pero ademais disto, as cesións que dicían ter acordadas cos veciños eran máis unha proposta de idea que outra cousa, sen nada escrito nin acordado.

Entón o proxecto anterior tiña carencias?  Si, pero iso por desgracia xa non sorprende. Foi un caso similar ó acontecido coa última fase da obra do campo de fútbol de A Senra, inda que neste caso non había tres planos distintos, solo un, pero estaba incompleto. O máis salientable neste caso era que, por exemplo, a liña de aparcadoiros que se supoñía ía quedar entre a beirarrúa e a estrada, sorprendentemente aparecía en terra, sen asfaltar nin delimitar as prazas. Cousiñas así…

O novo proxecto entón está máis completo? Está como debe estar un proxecto: completo, con todas as unidades de obra ben especificadas e as medicións correctas e non a ollo, e sen deixar áreas en branco no plano.

 Polo demais, é unha obra que medra con respecto o anterior proxecto, pasando dos 245 metros a algo máis de 400, debido o retranqueo do muro do pazo. Ademais disto, as beirarrúas medran ata ter un fondo de 2,50 metros, contra os escasos 1,90 metros debuxados polo PP,  inclúense maiores medidas de seguridade viaría, todas as redes de subministro municipal, alumeados, etc,  e unha liña de aparcadoiros, agora si, rematada e ben feita.

Por certo ,que hai que agradecerlle a Deputación que aceptara realizar este novo proxecto, moito maior que o inicial, que supuxo aumentar a partida de 190.000€ ata os 225.000 €. Algo que o PP non di.

Resúmenos como foi o proceso. O primeiro, pouco despois de chegar ó goberno, foi reunirnos coa deputación, que nos explicou cal era a situación, e que a solución pasaba por elaborar un novo proxecto. Déronnos por certo a oportunidade de investir os 190.000€ noutra obra, pero consideramos que o proxecto, ben realizado, podía ser un bo investimento para  Ribadumia. O seguinte, que foi o que máis tempo levou, foi consensuar un novo proxecto. Estabamos de acordo con que queriamos un proxecto que mellorara a accesibilidade ás dúas sendas fluviais que nacen nese punto, e comunicara dun xeito cómodo para os viandantes esa zona co centro de Barrantes, e crear unha bolsa de aparcadoiros, moi necesaria. Unha vez elaborado un borrador presentámosllo ós veciños, que nos propuxeron o máis lóxico: ampliar o trazado ata enlazar co seguinte tramo de beirarrúas, o cal implicaba retranquear o muro do pazo de barrantes. A verdade é que esta proposta por parte deles era o empuxe que nos faltaba para decidirnos , pois a solución prevista para ese tramo, unha senda sen beirarrúa,  non nos convencía, e tamén viamos mellor gastar algo máis e solucionar todo de vez. Pero cando os cartos non son de un hai que darlle ás cousas moitas voltas, por iso non acababamos de decidirnos. Gracias os veciños afectados e a súa lóxica demos ese paso. Aceptada a proposta e falado cos propietarios dese muro, redactouse o proxecto definitivo, asináronse as cesións dos terreos por parte dos veciños e solicitouse apoio económico a traves do Plan Concellos para pagar os retranqueos.

Retranqueos que son maiores que os previstos anterioremente. O PP vendéralle ós veciños que había que retranquear sobre medio metro. Non era así, e ter que explicalo case nos deu vergoña, pero ademais nos entendiamos que o mellor era retranquear un pouco mais e deixar unhas beirarrúas e uns aparcadoiros en condicións. E non volver tocar. Aproveito para  agradecer a boa vontade dos veciños e veciñas afectadas, que se mostraron colaboradores durante todo o proceso, e gracias os cales foi posible sacar adiante este proxecto. Un exemplo por certo do que pasa cando  as cousas se fan pola vía do dialogo e da transparencia, e non da mentira e da imposición.

O PP di que esa obra a eles non lles ía custar nada.  A Salomé pregunteille no último pleno se iso era así quen  ía  pagar os peches dos muros, e ficou calada. Claro que o concello ía ter que pagar cartos, que o PP non o tivera recollido nin valorado debese á súa habitual desidia.  Entón, por suposto que ó Concello esa obra lle ía custar cartos, según os nosos cálculos,  con aquel proxecto na man, sobre 45.000€. Nos imos pagar 22.000€ máis, pero vendo o resultado final entendemos que vale a pena o investimento.

O PP aumenta o custe para o Concello ata os 120.000€.  Por que o papel aguántao todo. E o falar non ten cancelas. O custe da obra é público, esta correctamente incluído no orzamento e calquera  pode corroboralo. O proxecto sae en 225.000€, dos cales o Concello aboa o 30%, 67.000€ en números redondos. E estes cartos páganse efectivamente con fondos propios. Logo os peches das fincas son outros 67.000€. Pero non os paga o Concello, fináncianse a través do Plan Concellos, que e un plan da Deputación. Ou sexa, que paga a Deputación. E eses son os números, sen máis.

Non pareces moi contento coa posición do PP. Non podo estar contento cun partido que durante todo este proceso, o único que fixo, mentres outros traballabamos, foi poñer paus nas rodas. Sacaron notas de prensa mentindo e atacándonos, colgaron carteis e presentaron mocións que buscaban sacar rédito político, e tentar forzar un enfrontamento entre o noso goberno e a Deputación. Pero nin unha soa vez se ofreceron para vir a Deputación a ver en que punto estaba o proxecto; nin unha soa vez  Salomé Peña se reuniu con este concelleiro de obras para poñerse ó día de como ía o asunto, ou facer algunha aportación positiva, e sabe ben onde encontrarme. E como deputada  nin unha soa vez tomou a palabra nos plenos da deputación para defender os intereses do noso concello, e  menos este proxecto. No PP solo se dedican a política de baratillo, e agora que o proxecto esta por fin encamiñado, seguen mentindo e enganado. Non, non estou contento co PP, pero afortunadamente en política os nosos feitos falan por nos.

 

   Dende a Comisión Executiva de Somos Ribadumia informamos de que o pasado venres celebramos a asemblea ordinaria prevista, onde se chegou a diferentes acordos.

   O primeiro deles foi o da renovación da Comisión Executiva, que vai manter, logo da pertinente análise e avaliación do seu traballo, a mesma conformación que mantiña.

   Un importante acordo foi o de establecerse como forza propia. Nas pasadas eleccións Somos Ribadumia concorreu baixo o paraugas do partido instrumental “Participación Democrática Directa de Galicia”(PDDdeG), denominación “legal” que seguimos mantendo. O acordo do venres significa que se darán os pasos para que a nosa denominación legal a todos os efectos sexa “Somos Ribadumia”. Con esta medida completase un ciclo iniciado no ano 2015, e garántese a nosa autonomía como plataforma veciñal, aberta e transversal, onde calquera persoa do noso concello poida sentirse cómoda.

   De cara as próximas eleccións municipais tomáronse dúas decisións. Unha delas que a Comisión Executiva quedou responsabilizada de estudar a posibilidade de chegar a acordos con outras forzas próximas. Outra decisión, moi importante, foi a de abrir, aínda máis se cabe, o espazo para ó longo dos próximos meses seguir acumulando forzas, co obxectivo de establecer un grupo de persoas que conformen a lista e tamén escoller á persoa que nos represente nas próximas eleccións.

   En resumo, Somos Ribadumia demos un importante paso para fortalecernos como forza local, autónoma e totalmente independente, garantindo así que imos seguir sendo unha plataforma transversal e aberta, que pon as persoas que viven en Ribadumia por diante de calquera outra cuestión, e onde a nosa veciñanza, máis alo das ideas de cada quen, non solo pode sentirse identificada e apoiada, se non que ademais pode participar con nos tanto no noso traballo como na toma de decisións dun xeito libre, sen os compromisos e “marcas de auga” dos partidos tradicionais.

   Dende a Comisión Executiva queremos aproveitar para agradecer publicamente a valoración que a asemblea fixo do noso traballo e a confianza depositada en nos.

  As próximas eleccións municipais están xa á vista, e en Somos Ribadumia consideramos que hai que ir xa poñendo os alicerces do noso futuro.

 Por ese motivo a nosa xuntanza ordinaria este ano vai ter unha importante compoñente preelectoral, pois temos que decidir algunhas cuestións internas, e ir avanzando no proceso para elaborar  a próxima candidatura.

Este ano a asemblea vai ter lugar o

20 de abril,

ás 20:30 horas,

no centro social de Barrantes

e contara coa seguinte orde do día:

• traballo municipal e contas.
• renovación Comisón Executiva.
• eleccións 2019:

                                a) formula de presentación ás eleccións.

                                b) alizanzas electorais.

                                c) elección de candidato e lista.

• proposta de modificación estatutaria.
• varios.

 

Convidamoste a participar e axudarnos a tomar as decisións correctas que nos permitan encarar o noso futuro. A  fin de contas nos solo temos a forza das persoas.