• A Xunta non inclúe partidas nin sequera para cumprir os compromisos adquiridos.
• Sen novas das beirarrúas de A Costa, na parroquia de Leiro, nin do Punto de Encontro Familiar, unha demanda de toda a comarca.
• Psoe e Bng, máis preocupados polos seus intereses partidistas que polo desenvolvemento da comarca.

 Un ano máis, o borrador de orzamentos presentado fai uns dias polo goberno de Feijóo non inclúe partidas para o noso concello. E unha vez máis, a David Castro parece darlle igual. E en palabras de Oubiña “como polo visto o ano pasado fumos moi apresurados a defender os intereses da nosa veciñanza. Desta volta démoslle días a David Castro para que emitira unha opinión, pero como no caso dos recortes no pediatra, prefire calar, co cal, volvemos ser a única forza política que defende os intereses do noso concello”.

  Dende Somos Ribadumia temos claro que os orzamentos non teñen que incluír necesariamente investimentos en todos os concellos todos os anos, e en Ribadumia nese aspecto a día de hoxe e unha vez logrado – gracias á presión exercida fai xustamente un ano por  Somos Ribadumia –  o obxectivo parcial de que se acometan obras no colexio, poderíamos comprender que ante a falta de iniciativa de David Castro, o orzamento deixara a Ribadumia fora, se non fora porque, por moito que o noso alcalde o oculte, hai cuestións pendentes.

  Tamén temos moi claro que non todo son obras, e que o orzamento da Xunta, ao rebaixar as transferencias á administración local en máis dun 6% , xusto nun momento onde moitos  concellos están facendo fronte a uns importantes custes para paliar as consecuencias da covid-19, é un ataque en toda regra as administracións locais. Para Oubiña “como en Ribadumia a táctica do goberno local pasa por tirar balóns fora e non facerse cargo de nada, quizais as arcas do concello sufran menos as consecuencias dese recorte do PP de Feijóo, pero nos consideramos que non é o momento de recortarlle fondos aos concellos, nin sequera aos que como no caso do noso pasan de todo e so usan a situación creada polo covid-19  para pechar servizos e aforrar cartos”.

   E máis aló do nivel local, onde o resto de partidos parecen estar a outra cousa, tampouco vemos moito compromiso político coas cuestións que son necesarias na nosa comarca, pero si vemos moito minifundismo político, tanto no PP, como no Psoe e BNG,  centrados en mirar polas súas leiriñas, deixando de lado cuestións que son de interese xeral, co resultado de que unha vez máis a falta de entendemento entre forzas evita consolidar cuestións que son comúns a toda a comarca, e poñer enriba da mesa solucións conxuntas, algo que sería máis que posible, se houbese algún interese en facelo.

As beirarrúas de A Costa, en Leiro.

 No que respecta a Ribadumia, a  proposta de orzamento do Partido Popular no relativo a infraestruturas volve deixar fora a realización da mellora de seguridade viaria no lugar de A Costa, en Leiro. Esta actuación foi, en palabras de Enrique Oubiña “un gol que lle meteron ao noso alcalde en tres actos, ao asumir dende  o Concello o que ía ser unha parte das obras de reforzo da estrada, unha vía que é  competencia da Consellería de Infraestruturas. Dende Somos Ribadumia dende o primeiro día estivemos de acordo en colaborar, dentro duns limites, e asumir unha parte do custo desa obra, a favor da seguridade viaria. Pero o Concello de Ribadumia leva investidos  sobre 150.000€ nesa curva, facendose cargo ata das entradas da finca – cando segundo  David Castro non iamos meter máis de 40.000€ – , e a Xunta segue sen dar sinais de vida, moito menos de ir facer nada, co silencio cómplice unha vez máis  do alcalde, que tira cos nosos cartos en obras que non lle corresponden”.

  Non se entende que na pasada visita da nova Delgada Territorial, Luísa Piñeiro, Davdi Castro no canto de falar destas cuestións, dera prioridade á legalización do folla redonda, cando  é ben coñecedor de que dita legalización ten un proceso que polas súas características non se pode acurtar, tal como se explicara no seu momento dende o Servizo de Sanidade Vexetal, e que ademais é unha cuestión que supera as competencias autonómicas. Para Oubiña “o alcalde desaproveita  as xuntanzas con outras administracións pensando máis nos titulares de prensa que non en solucionar problemas”.

E o Punto de Encontro familiar (PEF)?.

  No que respecta a investimentos comarcais, un aspecto máis amplo tamén debemos lamentar o nulo interese do Partido Popular pola comarca do Salnés, e polos seus máis de preto de 110.000 habitantes, cuns investimentos 1,8 millóns, que son pura maquillaxe, a que se lle suman anuncios sen partida orzamentaria, como un centro de saude pantasma en Vilagarcia cos que se trata de disimular a liña de recortes en cuestións primordiais como a sanidade.

  Unha cuestión para nos de importancia, e moi salientable porque ademais conta co consenso político, cando menos de boquilla, de toda a comarca, é dotar ao Salnés dun Punto de Encontro familiar. Porén, nin os alcaldes do PP moveron neste último ano unha unlla por lograr este investimento, nin o resto de partidos con representación parlamentaria fixo moitos esforzos neste sentido, ata o punto de que nas diferentes valoracións do orzamento da Xunta, esta cuestión non saíu a relucir en ningunha delas.

  Pola nosa banda lamentamos as actitudes partidistas que provocan que loitas como a defensa dunha atención primaria de calidade, por poñer un exemplo claro,  se atomicen en  favor dos intereses momentáneos dos partidos. Neste aspecto queremos por de relevancia e sumar o noso apoio á actitude construtiva e responsable do concelleiro de Sanidade de Cambados Tino Cordal, ao chamar a un movemento de consenso comarcal na defensa dos nosos servizos sanitarios. Un exemplo aplicable a outras cuestións da defensa do público, pero tamén outras importantes para o desenvolvemento da nosas comarca, a todos os niveis, como un plan de industrialización, moi necesario nunha comarca que ten polígonos en todos os concellos, pero en moitos casos sen servizos e sen empresas.

• Asumimos as novas restricións, pero non podemos compartir as formas da Xunta de Galicia.
• A hostalería foi informada poucas horas antes do peche, ás portas dunha fin de semana, cos almacéns e cámaras preparadas para unha actividade normal.
• Pedimos á veciñanza que non deixe de apoiar ao sector hostaleiro, ao goberno local que faga un esforzo e abra unha liña de axudas.

As novas medidas restritivas impostas onte polo goberno autonómico do Partido Popular, pilláronnos por sorpresa, pois os poucos datos aos que conseguimos ter acceso nos últimos días indicaban unha melloría na cifra de contaxios acumulados, o que ao noso entender significa que a incidencia da enfermidade está baixando no noso concello.

  De feito, os datos feitos públicos onte pola Consellería de Sanidade, falan de que a incidencia a 14 días dende o domingo ao venres pasados baixou dos 584 casos por cada 100.000 habitantes a 543, anque no DOGA publicado pola tarde reducen esa cantidade a 316 casos por cada 100.000 habitantes. Ademais, o venres, por primeira vez en semanas, tivemos o dato exacto de persoas coa enfermidade no noso concello. 79, das cales, 38 forman parte do gromo de DomusVi. Dende Somos Ribadumia explica Oubiña que  “dende que a Xunta fai unha semana comezou a publicar os datos por concellos de novos casos nos últimos 14 días, facemos un seguimento diario, e a cifra de novos contaxiados caeu nunha semana a case a metade, de 35 a 19 novos casos (hoxe domingo), un dato que significaría, en ausencia de máis información,  unha redución paulatina de contaxios”.

  Dende Somos Ribadumia podemos asumir que de xeito solidario se nos apliquen as mesmas restricións que aos concellos veciños, anque convén remarcar que a nosa veciñanza demostrou no seu conxunto un comportamento exemplar. Neste aspecto queremos facer un chamamento a manter ese comportamento e a non baixar a garda, respectando as medidas que se apliquen, e insistimos na necesidade de coidar as medidas hixiénicas e de prevención de contaxios.

   Co que non podemos concordar, e coas formas da Xunta de Galicia, que anunciou o confinamento e o peche da hostalería dunha hora para outra. No caso da hostalaría, esta maneira de actuar, anunciando o seu peche con tantas poucas horas de marxe, ás portas dunha fin de semana, o cal implica ter cámaras, almacéns e neveiras cheas co custo que iso conleva,  supón que o golpe dado, podendo ir coa man aberta, vai co puño ben pechado”. Non nos parece de recibo que tendo os datos de evolución da pandemia de xeito diario, non se informara cando menos da posibilidade deste peche con un par de dias de antelación, para permitir a hostalería prepararse para enfrontar a situación.

  Dende Somos Ribadumia queremos amosar todo o noso apoio ao sector hostaleiro do noso concello. Queremos tamén pedir do goberno local que faga o esforzo, xa que non o fixo antes, de abrir liñas de axuda directas a este sector.  

• Ribadumia non se salva da política de recortes da calidade sanitaria do PP
• Unha vez máis non se está cubrindo a baixa dunha das dúas facultativas.
• O Sergas está procedendo ao traslado paulatino do servizo de pediatría a Cambados.
• Animamos á veciñanza a poñer reclamacións cando non os atendían correctamente, ou lles alonguen os prazos para as citas.
• David Castro segue desaparecido da función política.

   O Partido Popular non cede na súa liña política sanitaria, cuxo obxectivo claro é a degradación da calidade da atención sanitaria, en concreto a atención primaria.  O noso concello non queda fóra desa liña de actuación, coa diferencia de que en Ribadumia o PP ten o apoio tácito de David Castro, que ante os grandes problemas do noso concello ponse de perfil e garda silencio para evitar confrontar co goberno autonómico.

 O centro de saúde de Ribadumia leva días cunha das súas facultativas de baixa, baixa que non se está cubrindo provocando a saturación do servizo de atención unha vez máis co perigo que iso pode ter no caso dunha emerxencia, ademais da merma na calidade na atención á nosa veciñanza co retraso acumulado das citas médicas presenciais, unha situación que non se mitiga coa atención telefónica, un mecanismo que o goberno de Feijóo nos colou coa escusa da pandemia e que non só mantén, se non que  pretende reforzar cunha app para realizar as consultas vía telemática, vendendo como modernidade unha degradación da calidade da atención sanitaria.

  Por outra banda, o servizo de pediatría tamén está padecendo as consecuencias dos plans da Xunta. O pediatra, compartido co concello de A Illa, xa reduciu as horas de atención nestes dous concellos trasladándoas ao centro de saúde de Cambados. Un traslado de horas que o que oculta e o paso paulatino da atención pediátrica de Ribadumia e a Illa a Cambados. Algo que nos consideramos inadmisible.

  Dende Somos Ribadumia seguiremos traballando contra este recorte na calidade de atención sanitaria no noso concello, favorecendo e apoiando as medidas de protesta que se desenvolvan, insistindo  ante o Sergas para que se nos manteñan os servizos de atención primaria e en xeral plantando cara na defensa dunha sanidade pública e de calidade. Pedimos a David Castro que deixe de poñerse de lado ante os problemas da veciñanza e asuma dunha vez as responsabilidades do seu cargo.

  Por último, pedirlle á veciñanza que non renuncie aos seus dereitos, que poñan reclamacións por escrito nos centros de saúde e nas oficinas de atención ao paciente cada vez que non os atendan correctamente, lles deán prazos longos para as citas, ou calquera outra deficiencia que sufran na atención sanitaria.

• O alcalde abre o auditorio para eventos futbolísticos, pero manteno pechado para actividades culturais.
• A biblioteca pechada, e o Concello perdendo subvencións pola incapacidade do goberno local para xestionar a cultura.

No pasado pleno púxose de manifesto a incapacidade do goberno local para realizar unha correcta xestión da cultura, que para Oubiña “aínda que máis que de incapacidade, igual  habería que falar dun claro desprezo pola promoción cultural, e non sei que será peor”.

   A biblioteca leva pechada dende o inicio da pandemia, nos últimos meses cun horario limitado a un par de horas diarias para que as persoas usuarias collan ou deixen libros, sen poder acceder á instalación nin facer uso dela para ningunha cuestión das habituais, como estudar ou traballar. Esta fórmula limitada, única na comarca onde por exemplo o Concello de Meis ven de ampliar o horario da súa fai uns días, e moi rara de ver en Galicia, polo de pronto, ademais de bloquear o acceso a unha instalación pública as usuarias da biblioteca,  pode provocar a perda da subvención para a compra de libros por non cumprir os requisitos de tempo mínimo de apertura ao público, que haberá que sumar a perda, cando menos parcial, da axuda para a campaña da Xunta “ler conta moito”.

  Hai que remarcar que “o uso deste tipo de instalacións a Xunta non o prohibiu,  restrinxiuno ao 50%, e que ademais a biblioteca ribadumiense xa conta con espazos de estudo separados e establecer ese uso limitado, xunto ao resto de medidas hixiénicas resultaría sinxelo”. De feito, como diciamos  case ningunha biblioteca pública renunciou a estar aberta, unha vez pasado o período de restricións totais, do mesmo xeito que os concellos da contorna fixeron un esforzo para organizar actividades alternativas, mantendo na medida do posible as actividades de promoción da lectura.

E non so o resto de bibliotecas están abertas e traballlando en formulas alternativas de promoción da lectura. Esta semana déronse a coñecer os premios María Moliner, un concurso gubernamental de proxectos de animación á lectura para municipios de menos de 50.000 habitantes, que premia a 310 proxectos de toda España. Pois mentres en Ribadumia temos a biblioteca pechada e nin sequera figuramos entre as 30 bibliotecas galegas que se presentaron a estes premios , outras como a do Grove ou a de Catoira, reciben recoñementos, e fondos públicos.

Para Oubiña “resulta decepciónante ver como o traballo positivo de catro anos atrás se tira pola borda nuns meses  pola falta de empatía e ganas de traballar de quen forma parte do goberno local. E non hai escusa posible. É inaceptable que os xóvenes poidan ir á escola ou a universidade, pero non poidan usar a biblioteca pública para estudar ou para conectarse á rede, máis cando moitos estudantes teñen que desenvolverse á distancia; ou que o concello teña as oficinas de atención ao público abertas, algunhas delas de tamaño moi reducido, pero a biblioteca que si dispon de espazo suficiente e pode usarse con moita mais seguridade estea pechada”.

 O auditorio pechado, pero depende para que.

Situación similar é a que vive o auditorio. Permanece sen actividade segundo David Castro por cuestións sanitarias. “Unhas cuestións sanitarias que a David Castro non lle impediron dar autorización para o seu uso para a retransmisión do sorteo da Copa do Rei. Unha dobre vara de medir que nos parece lamentable, non porque nos moleste que se usara o auditorio para estas cuestións – todo o contrario: remarcamos que nos parece correcto que se usara o auditorio para transmitir o sorteo da copa do rei – , senon porque non pode ser que se poida ver un sorteo pero non se poida proxectar unha película, ou traer unha peza teatral, pretendendo que hai unha situación de risco cando está máis que demostrado que coas medidas adecuadas os  espectáculos culturais son moi seguros”. Ademais David Castro actuou con total falta de respecto cara o resto de colectivos culturais do concello, os que non se lle permite o uso de instalacións municipais dende o inicio da pandemia.

A mesma falta de respecto que mantén con outras entidades deportivas, as que ou ben non lle concede as xuntanzas que solicitan, ou ben actua con total falta de decoro institucional aparecendo, como no caso do recente Descenso do Umia – de caracter internacional – unicamente para a entrega de trofeos.

  Dende Somos Ribadumia pedímoslle ao goberno local que recapacite sobre como está actuando e volva á senda establecida na lexislatura pasada. E por suposto, que deixe de desprezar a cultura, abra a biblioteca e dea contido ao auditorio.