• David Castro desautorizou a Protección Civil de Ribadumia para realizar esta función.
• Algúns nenos e nenas están sendo felicitadas pola agrupación de Protección Civil de Cambados.
• Pedimos do goberno local que acabe co escurantismo ao que ten sometida a oposición con todo o relacionado co covid-19.

  Dende Somos Ribadumia non podemos amosar máis que sorpresa ante a situación surrealista que o goberno de David Castro creou durante este confinamento, ao redor dunha iniciativa tan sinxela como a de felicitar aos nenos que cumpran anos, iniciativa que noutros concellos veciños fai xa semanas que se leva a cabo sen maior problemática.

 A iniciativa, que consiste en que a agrupación local de protección civil, nalgúns concellos como Cambados coa colaboración dunha empresa de animación infantil, se despraza ata o fogar do neno ou nena que estea de aniversario para felicitalo publicamente dende a rúa, usando a megafonía para  poñer unha canción, e dando así unha chispa de alegría  e rompendo algo coa rutina dos cativos  nestes longos días de confinamento, a priori  non presenta ningunha problemática dende o noso punto de vista a hora de poñerse en marcha no noso concello, e cónstanos que a agrupación de Protección Civil  de Ribadumia xa o propuxo no seu momento e mesmo a puxo en práctica.

Porén, tal como explicaba Oubiña, “ cal foi a nosa sorpresa cando ao enterarnos de que dende a alcaldía desautorizaron esta iniciativa e obrigaron a Protección Civil a detela, cando xa habería en lista de garda varias ducias de nenos e nenas, unha decisión da que descoñecemos os motivos e xustificacións”.  Esta situación provocou o enfado de  nais e pais, enfado que foi a  máis ante a falta de información aportada polo concello, sobre todo tendo en conta que nos concellos veciños se leva a cabo sen problemas. Con todo, a situación volveuse totalmente confusa cando fai uns días algún cativo do concello foi felicitado na súa casa, pero por persoal de Protección Civil de Cambados.

  Foi a partir deste momento cando o noso voceiro se puxo en contacto coa agrupación ribadumiense de protección civil e alí lle confirmaron  que “ eles non teñen autorización para realizar estas  felicitacións, pero se unha nai ou pai  chama á  agrupación de Protección Civil de Cambados e poden facelo, eles por suposto están encantados de axudar”.

   Dende o noso punto de vista, e tal como expón Oubiña esta situación “é totalmente ridícula, máis propia das actuacións dunha comisión de festas sen experiencia que dun goberno que pretenda xestionar cun mínimo de seriedade o  concello”. Pedimos  a David Castro que se aclare, e que permita que iniciativas como esta se realicen, por suposto dentro  sempre dos parámetros de seguridade. Pedimos tamén que, ao igual que na maioría de concellos, o equipo de goberno de David Castro abandone o escurantismo e bloqueo informativo ao que ten sometida á oposición e a propia poboación, “primeiro porque vai en contra do funcionamento democrático, segundo porque el mesmo asumiu en pleno o compromiso de contar coa oposición nos temas de importancia e terceiro porque por moito que tente actuar á calada este é un concello pequeno, e sempre será mellor que a oposición coñeza as  decisións municipais polas canles establecidas e con toda a información, que non a través da veciñanza”. A este respecto, que non se teña informado nin convocado telematicamente a xunta de portavoces nin unha soa vez, nin enviado ningún tipo de información,  parécenos do máis grave, aínda que non nos sorprende nun goberno que en menos dun ano acusa xa os signos da soberbia das maiorías absolutas.

  Por suposto insistimos dende a nosa formación na nosa vontade positiva de apoiar tanto e como sexa necesario ao goberno local nesta difícil situación, pero non o podemos facer  se non se mantén un mínimo de respecto institucional e cando menos se nos informa das medidas tomadas en cada momento.

 

• Outros concellos da comarca en peores condicións económicas que o noso fai días que anunciaron medidas.
• Entre outras medidas pedimos exencións de impostos municipais, liñas económicas de axuda ao comercio e pequenas empresas e melloras no plan de axuda á contratación e autónomos.
• Pedimos medidas de carácter social, que se garanta a seguridade das persoas que traballan en Servizos Sociais e un aumento das partidas de emerxencia.

  “Estes non son momentos de mirar para outro lado ou de agardar. Compre tomar a iniciativa”. Así se expresaba esta mañá Enrique Oubiña logo de comprobar, como unha semana despois de que a crise do coronavirus paralizara o concello e o país, o goberno local aínda non tomou ningún tipo de medida de apoio ao comercio, que con esta situación, sen poder abrir salvo casos moi concretos, está sufrindo  moito. Para Oubiña “que o noso concello, que ademais goza de boa saúde económica aínda non teña anunciado medidas, cando outros en situacións máis delicadas xa o fixeron, solo demostra a falta de capacidade de reacción do noso alcalde”.

  Dende Somos Ribadumia entendemos que os gobernos deben actuar con precaución e con responsabilidade, pero tamén que en situacións difíciles é cando se debe ver capacidade de reacción e de xestión. O Concello conta segundo o  último resultado contable – do ano 2018 -, con máis dun millón de euros na caixa, e nos entendemos que unha parte deses fondos poden perfectamente destinarse a axudar as persoas do noso concello nunha situación de emerxencia como a actual, que de prolongarse vai ter consecuencia directa nos negocios e en postos de traballo. Por ese motivo esta mañá presentamos por rexistro un escrito solicitando que o concello tomara a iniciativa e aprobara de xeito urxente unha serie de medidas, que achegamos na copia adxunta. Do mesmo xeito solicitamos que nos orzamentos deste anos se inclúan , agora con máis motivo, partidas que xa solicitamos a finais do ano 2019, e que van ser moi necesarias para incentivar a economía local cando esta crise pase.

Para Oubiña “anunciar medidas como a exencións de impostos municipais neste 2020, ou unha axuda directa para facer fronte aos custes fixos dos negocios, serviría como mínimo para aportar algo de tranquilidade a todas eses negocios que hoxe están pechados ou viron reducida exponencialmente a súa clientela, do mesmo xeito que amosar que se ten un plan de continxencia para cando todo isto pase poder axudar a reactivar a economía  do noso concello tamén entendemos que sería moi positivo”.

 Tampouco deixamos de lado ao resto de veciños e veciñas, por ese motivo no mesmo escrito pedimos que se reforcen as políticas sociais, se controle e garanta o acceso a equipos de seguridade das persoas que están desenvolvendo labouras de servizos sociais, dende o SAF ao voluntariado e protección civil que estes días velan polas familias mais desfavorecidas, e se de xeito extraordinario se aumenten as partidas de emerxencia social, e previsión dun aumento de familias en risco de exclusión se a  situación se prolonga.

   Para Oubiña “agora mesmo, máis que nunca, precisamos un gobernante que manexe o noso barco dende a alcaldía,  e tome medidas para axudar as persoas. Porque todo isto pasará máis pronto que tarde, pero todas esas persoas que están nas súa casas cos seus negocios pechados sen ingresar un euro, ou que foron despedidas dos seus traballos ou sometidas a medidas de recortes, necesitan respaldo xa agora. Nos tomamos a iniciativa, e se estiveramos no goberno estas medidas xa estarían anunciadas e tomadas. Agardamos e temos confianza en que David Castro se poña á altura”.

    Como xa expresamos en numerosas ocasións, remarcamos o noso compromiso de apoio ao goberno na toma das medidas que sirvan para axudar a nosa veciñanza nestes momentos complexos.

   Por último insistir en mandar unha mensaxe de apoio a todas as persoas que viven no noso concello. Hai que manter as medidas de precaución, e incluso reforzalas co paso dos días, sen relaxarse, para poder acelerar ao máximo o final desta situación. Somos conscientes diso, por iso tamén queremos mandar unha mensaxe de calma, pois estamos seguros de que entre todos e todas imos conseguir superar esta situación máis pronto do que pensamos, e remontar o voo unha vez pase a crise.

• Dende o primeiro momento amosamos o noso apoio ao goberno nestes momentos difíciles, pero tamén pedimos que as actuacións do goberno foran, ademais de legais, exemplares.
• É totalmente inadmisible que se teña proposto coller estes días como vacacións, como tamén que haxa persoas na casa que  descoñezan se van poder gozar das súas vacacións no seu momento  ou as están perdendo.
• Pedimos medidas locais de apoio aos autónomos e pequenas empresas.

 

  Dende que a mediados da semana pasada a crise do corona virus provocou o inicio da paralización do país, dende Somos Ribadumia estivemos atentos a que decisións se tomaban dende os ámbitos políticos, amosando publicamente e en privado todo o noso apoio neste aspecto ao goberno municipal e tamén aos traballadores e traballadoras do concello, que son as pezas fundamentais para o funcionamento do concello calquera día do ano, pero moito máis nestas circunstancias.

  Amosamos o noso apoio, pero como explicaba esta maña Enrique Oubiña,  “ tamén expresamos que nestes momentos de moita incerteza, o goberno local debía ser modelo de exemplo a seguir en todos os aspectos, dende a prevención aos mecanismos laborais que garantan que ningún traballador  pague as consecuencias dunha situación sobrevida”.

  E todo isto expresámolo  a semana pasada, indo por diante do goberno local que como ven sendo habitual dende que non nos teñen con eles carece de calquera iniciativa propia, algo que  tamén tivemos que denunciar cando vimos que todos os concellos levaban días informando a cidadanía en duro contraste co goberno silencioso  de David Castro. E mentres nos dicíamos que había que ser exemplares  e , naquel momento onde inda non se decretara o estado de crise, pediamos ao concello que facilítase a conciliación familiar dos traballadores, tal como explica Oubiña “ o goberno local dedicábase , digamos,  augurar  a algunhas persoas a formalización dun ERTE se non collían vacacións. Co resultado de que varias persoas solicitaron vacacións forzosas  o pasado venres.”

   O pasado luns presentamos un escrito por rexistro – que ata hoxe non habíamos feito público pois esperabamos que o goberno collera o recado e non fixera falta dicir máis – pedindo xa de xeito formal responsabilidade e exemplaridade, que se informará correctamente a cidadanía,  que se fóra moi coidadoso coa xestión laboral desta crise, e se nos trasladara en que situación quedaban os traballadores do concello, algo polo que seguimos agardando. Enrique Oubiña “xa tiña coñecemento de que había persoas na casa de vacacións, así como da xuntanza do goberno do domingo á tarde para analizar a cuestión e da xuntanza mantida cos traballadores do concello a media mañá do luns. Pero debo dicir que para min foi unha sorpresa de que non se rectificara a situación das persoas que están de vacacións forzosas”.

   A diferencia deste goberno co anterior, é que no anterior Somos Ribadumia exercía de palanca e evitaba certos desmáns, como cando Oubiña bloqueou as intencións de IR de aprobar en pleno unha RPT sen consensuar con ninguén , que ademais era pouco menos que escravista. Agora hai unha maioría absoluta dun partido moi  amigo de usar as ameazas veladas – ou non – como ferramenta para atar en curto aos traballadores, e así se está vendo o que se está vendo, algo que nos preocupa especialmente.

   Ademais,  o goberno utiliza como argumentos para xustificar a súa actuación, primeiro a descalificación cara a nosa formación, e logo afirma que está agardando que estancias superiores decreten cómo actuar, cando iso significa precisamente confirmar a situación que nega, e  actuar cunha total falta de conciencia social, nun momento onde moita xente se enfronta a  unha situación laboral complexa e cando o  goberno local debería ser un referente neste aspecto.

   Para Oubiña “é totalmente inadmisible que os traballadores e traballadoras deste país paguen as consecuencias dunha crise que nos chegou forzosamente, e que o noso goberno local actúe deste xeito, non ten xustificación ningunha. Un concello non é unha empresa que da noite para a maña se quede sen carga de traballo e ingresos económicos, e se actúa como tal, é a mala fe e con clara intencionalidade. E que  logo  saian as ventás a aplaudir non é un eximente”.

   Dende Somos Ribadumia lamentamos que o noso goberno se comporte como á peor das empresas. Imos analizar moi detidamente todo o que acontece no concello, e tamén as accións políticas, e chegado o caso legais,  que se poidan derivar de determinadas actuacións. Tamén temos a confianza de que, logo do balbordo creado, o goberno local rectifique a situación das persoas que traballan no concello, e garanta que ninguén se vaia ver prexudicado por esta situación, que non sabemos canto vai durar.

   Mentres tanto, insistimos en pedir á veciñanza calma e paciencia. Non saír da casa se non é imprescindible, para entre todas e todos controlar e limitar a propagación do coronavirus, e poder recuperar a normalidade canto antes.

   Pola nosa banda, máis alá do exposto, solicitamos ao goberno local que tome medidas de reforzo das políticas sociais, sobre todo se a situación de prolonga , e tamén de carácter económico para apoiar as empresas, especialmente aos pequenos autónomos, como a bonificación completa dos tributos locais neste ano e posteriormente medidas de reforzo. Nós, estamos coas persoas, agora máis que nunca.

• Os actos ao redor do Día da Muller limítanse ao mínimo establecido pola concellería de Enrique Oubiña na pasada lexislatura.
  • Apenas se lles da repercusión e o goberno mantén un perfil baixo, sen medidas políticas.
  • A algúns actos ou xestos, como a postal conmemorativa, rebaixouselle o perfil feminista.
  • Vergoñenta situación durante s Gala de Homenaxe as Mulleres do noso concello.

   Dende Somos Ribadumia seguimos moi de preto as actuacións do goberno municipal, o cal nos permite comprobar como, tristemente, cuestións onde o noso concello era pioneiro e punta de lanza comarcal, como a loita feminista ou contra a violencia de xénero, perden peso na acción de goberno, que pouco a pouco vai recuperando as vellas posturas das dereita, moi reacia a recoñecer o movemento feminista.

   O primeiro exemplo tivémolo cando o goberno local puxo en dubida o punto morado contra a violencia de xénero implantado por Oubiña na Festa do Tinto do ano 2019, con criticas a ese servizo – que durante os tres dias de festa non visitaron nin unha sola vez – e mesmo poñendo trabas ao pago das facturas.

   Coa chegada do Dia da Muller, celebrado o pasado 8 de marzo, puidemos comprobar como efectivamente, o feminismo do goberno local se nos volve, en palabras de Enrique Oubiña, “un feminismo de garrafón cada día máis augado, cun descurso que se vai asentando pouco a pouco, tentando que non nos deamos conta, nos argumentos da extrema dereita.”

  A dinámica de actos e actividades que se estableceu na pasada lexislatura, na cal a área de Oubiña multiplicou os investimentos e converteu o noso concello nun referente, é o claro exemplo do que estamos a dicir. Non se veu na axenda de actividades deste 2020 o máis mínimo interese de innovar nin de darlle un peso especifico nin relevancia, que fixera ir a máis o movemento creado en anos anteriores. Para comezar a comunicación e promoción de todos os eventos reduciuse ao mínimo. A lectura do manifesto foi disimulado na presentación dunha exposición, tan interesante como oculta, pois así como Oubiña traia ese tipo de exposicións e actos á casa consistorial, para que as vira o maior numero de xente posible, o goberno actual colocouna no auditorio, un bo lugar, pero cunha afluencia de publico mínima, o cal tamén serviu para que a lectura do manifesto pasara totalmente desapercibida, e nin sequera se subiu as redes.

   Pero o máis grave, en verbas do propio Oubiña “é o cambio no discurso. Na lexislatura pasada tomamos a iniciativa de poñer á muller no centro dos actos e actividades. E incluímos detalles de importante simbolismo, como por exemplo mandar unha postal ás mulleres do concello para recoñecerlle o seu traballo e a súa función primordial na nosa sociedade. Agora esa mesma postal perdeu todo o seu peso simbólico e xa solo é unha maneira cara de anunciar un acto, tanto que xa nin sequera se lle manda ás mulleres do concello, se non a “todos os veciños/as”. Non imaxino un discurso máis próximo ás posturas do PP e de VOX.”

Bochorno na gala de homenaxe ás mulleres de Ribadumia.

   Por se era pouco, para completar este retroceso inda nos quedaba a bochornosa situación vivida durante a Gala do pasado domingo, onde se organizou como complemento a actuación dunha cantante “ que non solo  se fixo acompañar dun home, nun xesto organizado dun xeito torpe que deturpou por completo o sentido e significado da propia gala e do propio traballo da artista dando a impresión de que precisaba o complemento masculino, se non que inda por riba tivemos que escoitar supostos chistes do tipo, cito literalmente, “cando se celebra o día do home traballador?” e todo tipo de situacións moi propias das vellas actuacións que xogaban cos roles de xénero, de certo éxito fai anos pero totalmente fóra de lugar nos tempos actuais e menos aínda nunha gala como a do pasado domingo”. Dende Somos Ribadumia a este respecto entendemos que as pouco acertadas expresións que escoitamos durante a actuación non son responsabilidade directa do goberno, pero tamén consideramos que para que iso non pase hai que coidar máis a organización deste tipo de eventos así como as actuacións que se traen.

  Lamentamos que o goberno local, que nin sequera estivo presente en algunha das concentracións que tiveron lugar na comarca neste 8M, -non falamos xa de organizar unha concentración no concello – non estea pola labor de apoiar con firmeza a loita feminista, que é a loita pola defensa dos dereitos das mulleres a ser consideradas iguais aos homes en todos os aspectos da vida, dende os laborais aos sociais, e que prefira abrazar os argumentos da dereita máis rancia no canto de manter a Ribadumia como o exemplo que foi ao longo da lexislatura pasada.

Con todo, na outra cara da moeda, queremos unha vez mais agradecer a labor do CIM comarcal, responsable das actividades realizadas en torno ao 8M, que seguen facendo unha imprescindible labor ao longo de todo o ano.