• Cunha partida de 20.000€ para o alumeado de nadal, agora resulta que so usa a metade desa partida, a propósito. O resto gástase noutras cuestións.
• O alumeado contrátase a cegas, sen pedir orzamentos nin valorar os diferentes tipos de decoración. Todo queda na man dunha empresa designada a dedo.
• Temos o alumeado máis cutre por desidia de David Castro, non por falta de recursos ou posibilidades.

As críticas xeralizadas, e que nós fixemos públicas, ao alumeado de nadal ao final lograron que David Castro, nun intento por minimizar esas críticas, encontrara as facturas e respondera, por primeira vez máis de dous anos, a un escrito noso pedindo as facturas, os orzamentos previos e todo o relativo á contratación dese alumeado nos últimos anos. E con iso destapouse a realidade da xestión do goberno local nesta cuestión, pero extensible a outras moitas. Bágoa que David Castro optara de paso polo teatro no pleno e na prensa, a descalificación e a falta de respecto, e por facer de novo oposición á oposición, esquecendo unha vez máis que o que goberna é el, ou cando menos o seu partido.

   Resulta que David Castro leva anos enganando á veciñanza co orzamento e a xestión económica do Concello.  E aínda ten a cara dura de ofrecernos un exemplo claro. No relativo ao alumeado de nadal, as partidas recollidas no orzamentos foron de 13.500 € (2019) , 15.000 € (2020) e 20.000 € (2021 e 2022). Iso foi o que David Castro dixo que ia gastar nestes anos no alumeado de nadal. Porén, o gasto real nesas partidas, foi de 21.034,50 € no ano 2019, de 22.606,37 € no 2020 e  de 22.470,71 € no ano 2021. Eses son os números oficiais. Agora a eles hai que incluírlles que David Castro por fin deunos acceso ás facturas, que demostran que a maior parte deses cartos non se dedicou ao alumeado de nadal, que so se levou 12.705€ no 2019, 13.310 € no 2020 e  13.915 € no 2021.  David Castro pretende tratarnos de mentireiros, pero nós limitámonos a traballar cos números oficiais, se resulta que o goberno local entrampa os números non é responsabilidade nosa, pero alégranos que se faga público.

Cos números na man, David Castro gastou no concepto de alumeado de nadal entre o 2019 e o 2021 66.111,58 €, pero en realidade o alumeado so custou 39.930€. O resto escorréuselle a David Castro entre os dedos, seguramente en facturas doutras cuestións de nadal que non quixo ou non foi capaz de orzamentar correctamente.

   David Castro amosou as facturas do alumeado dos últimos anos, e amosou un suposto orzamento da empresa co custe do alumeado para este nadal, cun custe de case 15.500 €, 2.700 € máis do que declarou o propio alcalde. Un orzamento que non entrou por rexistro como correspondería, polo que sempre quedara a dúbida de que fora feito a medida logo de que as criticas forzaran a David Castro a actuar facendo públicos os números. O que David Castro non aportou foron  orzamentos doutras empresas, nin deste ano nin dos anteriores, nos cales tampouco consta nada máis que as facturas, o cal demostra o que dicimos: David Castro non negocia o alumeado de nadal. Nin negocia nin busca alternativas mellores. Tal como explica Oubiña é que “de  feito, nin sequera se molesta en pedir orzamento á empresa antes de concederlle o traballo, non digamos xa pedir varios orzamentos. E iso tamén o contan os documentos. Ten razón David, os papeis din a verdade do goberno local, pero esa verdade non é a que el pensa que traslada, é a verdade dun goberno que non está máis que a cobrar liberacións.”

   A realidade pois é que cos papeis de David Castro na man, resulta “ que o goberno local ven de demostrar que leva catro anos gastando a partida do alumeado de nadal en cousas que non son o alumeado de nadal. Ou sexa, que move os cartos para outras cuestións diferentes ás estipuladas na partida   orzamentaria. Isto é como que súa nai lle dea cartos para dúas bolas de pan, e el compre unha e gaste o resto en cervexas. E aínda pretende que a veciñanza estea tranquila coa súa xestión económica”.

   Dende Somos Ribadumia non podemos amosar máis que sorpresa pola resposta e actitude de David Castro. Á vista das críticas que recibiu polo lamentable alumeado de nadal decidiu, para tentar desactivar esas críticas,  facer públicas as trampas contables que realiza. E ao facelo demostrou que a realidade  é aínda peor da que nós expuxemos. No económico porque demostra que David Castro non ten control sobre os números, e que ademais fai trampa dotando cartos para cousas distintas ás que pretende pagar. E neste caso concreto porque ademais nós  facíamos idea de que había desidia no trato coa empresa do alumeado, pero non pensamos que chegara a este nivel tan baixo. Porque o peor de todo isto é que no orzamento dota cartos, polo tanto non é un problema económico, o que nos leva a ter este alumeado tan pobre e cutre, é sinxelamente a vagancia dun alcalde que ten ao concello completamente abandonado, “ata o punto de que que nalgo como o alumeado de nadal, que non é o dunha verbena,  non se molesta nin  en falar coa empresa do alumeado e ver opcións dispoñibles para tratar de ter un concello decorado acorde aos tempos. Limítase a dicirlle á empresa que ten os mesmos cartos que o ano anterior e que fagan o que consideren. E a empresa así fai, e así nos tocan os restos dos alumeados que ninguén quere. Pouco pagas, menos levas, di o refrán.”

    Dende Somos Ribadumia non podemos aceptar que como neste caso  se dean contratos a empresas  de xeito directo sen nin tan sequera pedir  un orzamento previo que explique en que  se van gastar os cartos. 

 David Castro xoga ao despiste.

David Castro saíunos o outro día falando de falta de respecto ao persoal voluntario que participa nas actividades de nadal e aos comerciantes. “ E fai esas declaracións o mesmo alcalde que engana dicindo que ten 20.000 € para o alumeado cando so pensa gastar 13.000 €. O mesmo alcalde cuxa única idea que ten de promover a actividade comercial en nadal é regalarlle aos comerciantes un anaco de felpa vermello para poñer nas portas dos comercios”.

    De David Castro non se pode a estas alturas agardar outra cousa, pero pretender mezclar as cousas desta maneira  e tentar desviar a atención usando a terceiras persoas ou colectivos é vergoñento. Pola nosa banda temos claro que nese argumentario tan absurdo e infantil non imos entrar. Dende Somos Ribadumia valoramos sempre as accións políticas e a xestión do goberno, non entrarmos nin no traballos de persoas voluntarias nin no que poida facer calquera colectivo alleo á política. Ao contrario, sempre amosamos todo o noso apoio a calquera iniciativa que se tome dende outros ámbitos diferentes ao político, e esa é outra verdade que David Castro non pode tapar cos seus contos.