Estes días, os fogares ribadumienses estades recibindo un boletín de Somos Ribadumia que condensa o traballo destes dous anos de goberno. Nese boletín incluimos unha entrevista ó tenente de alcalde e Concelleiro de Somos Ribadumia Enrique Oubiña. Por falta de espazo no boletín, condensamos esa  entrevista, polo que agora  colgamola aquí completa:

As obras do Plan Concellos están en marcha. Deberiamos decir “Por fin”? Non, en absoluto. Todo se está facendo dentro dos prazos e das nosas planificacións. Se queremos ter o control sobre as obras temos que facer as cousas organizadamente.

Estivo o Concello paralizado como denuncia o PP? Rotundamente NON. E calquera que se dera unha volta por Ribadumia puido comprobalo. De feito nestes dous anos  realizáronse dúas grandes obras, ximnasio e finalización do campo de A Senra, varias intermedias, como a nova sede de Servizos Sociais, e innumerables obras máis pequenas, Delas, destacaron as reparacións de instalacións municipais, que supuxeron 100.000€ de custo, precisamente por culpa da deixadez dunha alcaldesa que durante anos non se preocupou máis que de inaugurar e saír nas fotos.

Cales son os próximos proxectos? Nos estamos apostando por atender as necesidades dos veciños e veciñas do noso concello, o mesmo tempo que damos cumprimento aos compromisos do pacto de goberno. Neste sentido a maior parte das obras van encamiñadas a mellora dos servizos públicos, saneamento, auga, etc. E inda quedan reparacións en edificios municipais por facer. Por non falar de cuestións como a LEGALIZACIÓN de máis da metade do alumeado público.

Iso en euros? Solo para este ano temos orzamentados case 800.000€ en inversións de todo tipo, dos cales máis de 700.000€ irán a obras  de servizos  municipais.

Destácanos algunha desas obras. A ampliación do novo centro de Servizos Sociais e a LEGALIZACIÓN do alumeado público, un exemplo da incompetencia do PP que nos vai custar case 70.000€. Pero vai haber moitas pequenas actuacións que inda que non queden ben nos almanaques axudarán a mellorar a calidade de vida das xente de Ribadumia. Esas son as verdadeiramente importantes.

Di o PP que este equipo de goberno sae caro. Cara saenos Salomé, que cobra 24.000€  como deputada e o único que fai é ir a Pontevedra a cobrar dietas. E isto é unha realidade: a día de hoxe na Deputación a deputada de Ribadumia, Salomé Peña, inda non presentou nin defendeu unha sola iniciativa en defensa dos veciños de Ribadumia. Se te  refires a ese panfleto que o PP mandou as casas, están demostrando unha total falta de respecto polos veciños e veciñas de Ribadumia, mentindo a propósito, e tentando enganar.

Explícanos iso… Non imaxino nada mais rastreiro que mentir dicindo  que un traballador municipal  é un cargo político solo para poder engordar uns  números que total xa todos coñecemos.  Eu a única comisaria política que recordo no Concello de Ribadumia foi Lidia, que estivo contratada pola Deputación, con despacho no Concello,  e que según Martín Serantes afirmou en pleno municipal,  era a “secretaria persoal” de Salomé Peña, pero que todos sabemos que a súa función era a de controlar politicamente o que pasaba no Concello.  E despois estaban outros traballadores da Deputación, como Manolo Mougan, aos que Louzán destinaba especificamente a Ribadumia, para facer o traballo que os concelleiros do PP non eran capaces ou non querían facer. E ninguén do PP traballou gratis, todos tiñan nómina. O cal nos leva a outra diferencia: o PP pode falar dos nosos salarios porque son públicos, pero nos non podemos saber canto ganan os políticos do PP porque non o queren decir, e dende logo descoñecemos canto cobraba Lidia no Concello.

Entón o equipo de goberno sae caro ou non sae caro?  Non, nin sequera facendo as contas que fai o PP, pois agora temos liberado a un concelleiro e medio, pero que  non cobramos polos plenos, nin as xuntas de goberno nin as comisións, e eles tiñan a catro persoas cobrando salarios públicos, a parte dos concelleiros que cobraban por asistencias a comisións e plenos. Por certo que nos reducimos os importes das comisións á metade, e tamén o número de comisións, e tentamos  reducir as convocatorias e solo facer as necesarias, polo que o final estamos aforrando no custe dos plenos unha cantidade moi importante.

  A realidade, por moito que ó PP lle pese, é que equipo de goberno actual non sae caro. Obviamente ten un custe, incluídas por certo as   dietas da oposición, que tamén cobra do Concello;  o  PP é precisamente  o partido que máis fondos municipais ingresa, máis de 2.000 €/ano, a parte das dietas dos seus  concelleiros que suman outros 4.000€/ano de media. Cada concelleiro do PP percibe de media 150€ por cada pleno.  Se foran serios e estiveran realmente tan preocupados polo custe municipal dos políticos, renunciarían a cobrar a súa parte. Ribadumia por certo ten o menor custe político  da comarca. E Salomé esquece na conta, como xa dixen, que con ela había tres persoas contratadas a dedo pola deputación para facer o traballo que os seus concelleiros non eran capaces a facer.

  En todo caso, ese  debate ó que continuamente nos leva o PP sobre os salarios faise xa cansino. Toda esa historia solo lle serve ó PP para desviar  a atención do importante, que é precisamente do que non queren falar por que saben que o estamos facendo ben: a nosa xestión como goberno.

  A  realidade é que co anterior equipo de goberno o prezo final das obras multiplicábase en moitos casos por 2, e nos reducímolo de media un 15%, co cal facemos máis obra con menos cartos. A realidade é que Salomé peña tiña o departamento de Servizo Sociais apretado  nunha esquina, sen sitio case nin para moverse, totalmente ignorados, pero  no edificio municipal para así ter controladas as persoas que pasaban por el, e nos dispuxémoslle dun espazo moito máis amplo, comodo e discreto, onde os veciños poidan ser atendidos con tranquilidade. A realidade é que pasaba o mesmo co técnico municipal, que solo atendía un par de días á semana e estaba apretado dun despacho demasiado pequeno, mentres que agora dispoñen dun despacho amplo, e temos tres técnicos que atenden todos os días da semana.  E esa maneira de xestionar estámola levando a todos os ámbitos municipais, racionalizando os recursos.  Ó final, cun orzamento similar ó de anos anteriores, facemos moito máis. Esas son as contas reais.

Ese boletín (o do PP) foi moi crítico..  Ese panfleto minte, engana e difama, pero non propón nada. E os veciños queren propostas e  solucións, non pataletas infantís. Iso si, a páxina final do panfleto do PP resume moi ben  o seu  traballo dende fai dous anos: ir de festa e atacar a deputación.

Como está traballando o PP na oposición?  Pois iso, solo aparecen para atacar á Deputación.  Medidas para axudar os veciños non propuxeron  inda ningunha.  O PP nin esta nin se lle espera, salvo para cobrar a asistencia aos plenos.

E que tal nos plenos? nos plenos hai  moita demagoxia por parte do PP. Pero o final debemos  de estar facendo as cousas  moi ben, porque o PP non vota en contra de case nada. E podédelo ver na web do concello, onde colgamos todas as gravacións dos plenos.  E é nos plenos onde se debate o traballo e as decisións políticas importantes; por lóxica, cando unha oposición non encontra motivos  para votar en contra  das iniciativas do goberno, entón é que ese goberno esta traballando moi ben. Bagoa que o PP, en lugar de admitir publicamente o que si admite nos plenos, se dedique a enlamar o panorama.

Logo do acontecido co Concello de Sanxenxo hai quen pregunta se en Ribadumia pode pasar algo similar. Ribadumia non é Sanxenxo. Nos establecemos un pacto de goberno ben negociado, poñendo os intereses dos  veciños por enriba de cuestións partidistas, e o resultado de facer as cousas ben salta á vista. Se por algo destacamos en Ribadumia,  é precisamente pola estabilidade do noso goberno, polo que  non estamos preocupados por ese tema.

Para rematar, que destacarías destes dous anos de goberno? Máis alo do traballo feito, que foi moito e moi intenso, eu destacaría precisamente a estabilidade do noso goberno, que xa quixeran moitos concellos, porque nace dun esforzo conxunto e honrado onde todos poñemos da nosa parte para lograr obxectivos que son comúns. E por suposto a xente de SOMOS Ribadumia, que me apoian no día a día, e se sentan comigo cada semana para axudarme, orientarme cando é preciso e en xeral para axudarme a sacar adiante o traballo; están facendo un traballo enorme que inda que as veces non se vexa está presente en todo canto se fai e se aproba. É moi importante para que un proxecto político como o noso saia a diante contar cun equipo como este, e eu estou moi orgulloso da xente que me acompaña nesta aventura.

 

O Concello de Ribadumia informou en días pasados de que se vai a levar a cabo o proxecto de legalización dos subministros de electricidade da rede de alumeado público, que vai supor unha inversión de 66.550€ . Logo da rolda de prensa do pasado martes na que o alcalde David Castro explicaba esta cuestión, e   dada a importancia e a gravidade da situación que evidencia, entrevistamos a Enrique Oubiña, para que nos aclare un pouco máis este tema.

A primeira pregunta é obrigada, o alumeado do concello está nunha situación de ilegalidade? Unha parte si. Concretamente 42 dos 66 cadros eléctricos que hai repartidos por todo o Concello están en situación irregular. O 63% do alumeado público, máis da metade.

Como chegáchedes  a esa conclusión?  Co obxectivo de coñecer a situación da rede eléctrica municipal, para poder plantexar medidas de aforro enerxético que foran efectivas, realizaronse  estudos completos das instalacións municipais e do  alumeado público . Eses estudos foron levados a cabo por técnicos municipais e por unha empresa externa especializada, contratada co obxectivo de mellorar a xestión das instalacións eléctricas. Nas auditorías realizadas púxose en evidencia a situación na que se encontra o alumeado público, entre outras cuestións.

Ou sexa, que non é algo que digades os políticos do goberno con ánimo de desprestixiar ó PP? En absoluto. A situación está definida por informes técnicos e profesionais, que son os que din o que hai e o que non hai. Os políticos, polo menos os deste goberno,  temos a obriga de mostrarlle aos nosos veciños e veciñas a situación na que esta o seu concello, e das medidas que tomamos para solucionar os problemas que hai.

Podes resumirnos cal é  a situación real do alumeado público? Según todos os informes, a realidade é que dos 66 cadros que hai instalados por todo o Concello, 42 están nunha situación irregular.

Porque a situación é tan grave? Por que máis aló de que os concellos deben ser os primeiros en cumprir coa lei en absolutamente todos os ámbitos, os cadros eléctricos non solo serven para ter contadores, tamén inclúen os elementos de seguridade que garanten que ante un problema non vai haber risco para a saúde das persoas.

Como pode ser posible que un Concello estea nesta situación? Iso teredes que preguntarllo a Salomé Peña. Para min é evidente que durante os anos do seu mandato, a anterior alcaldesa limitouse a cumprir co trámite, servíndose do apoio que Louzán lle

brindaba dende a Deputación para poder inaugurar obras que fixeran bonito na prensa  e nos almanaques, pero sen mover nada por ela mesma para mellorar o noso Concello, e polo que se ve, nin siquera se preocupou de que o que houbera, moito ou pouco, estivera dentro da lei.

En concreto, que se vai facer?   Legalizar todos os subministros e optimizar a instalación conectando circuítos a cadros existentes e noutros casos a novos. Vaise actuar sobre os 42 cadros en estado ilegal do seguinte xeito:

• En 4 destes subministros xa se está a tramitar a legalización solicitando a Unión Fenosa o correspondente Cups para cada un.

• 26 dos 42 subministros uniranse a cadros xa existentes, que contan cos correspondentes Cups.

• 16 dos 42 subministros necesitan novos Cups de Unión Fenosa e o seu correspondente contrato.

Falamos pois de traballo técnico e administrativo. Como podemos saber se un cadro eléctrico está nas condicións correctas? Existe un rexistro de cadros, denominado CUPS, que é o documento oficial que garante que as instalacións cumpren con todas as garantías. Sen ese documento a empresa sumistradora da enerxia non pode realizar un contrato correcto e cobrar  de xeito regular. Os cadros que non están así figuran pois como se foran o que na construción chamamos “cadros de obra”, onde a enerxia se cobra a tanto alzado, aplicando un criterio a ollo  en lugar de medir o consumo real de enerxia.

Vai afectar entón economicamente as contas municipais? Económicamente o prexuizo está en ter que afrontar unha inversión de case 70.000€ para legalizar a situación. Máis alo desa parte, que afortunadamente podemos afrontar con cargo ó Plan Concellos  da Deputación  polo que non será preciso dispor de fondos municipais, vainos afectar porque ata o de agora non podiamos afrontar plans de aforro enerxético con garantías de que foran a ser efectivos. E logo evidentemente, non é o mesmo pagar o kilowatio a 0,21€, que a 0,14€, que é a diferencia de media entre o que poden chegar a cobrar a tanto alzado e o prezo que se pode pagar coa facturación regulada.

Pero o PP xa fixo inversións en aforro enerxético … Si, pero a cousa vai máis alo de poñer luces de baixo consumo, hai que adecuar os contratos dos subministros ó que realmente se consume, analizar cales son os puntos de maior consumo para actuar onde realmente fai falta… Moitas cousas, que sen unha auditoría como a que realizamos nos non se poden plantexar.

A parte desta regularización, estanse facendo máis accións para controlar o gasto enerxético?  Fixéronse cousas en todos os niveis, pero algo limitados pola situación que encontramos. Algunhas inversións en tramos de alumeado público na rúa, pero traballamos especialmente a nivel administrativo, onde a deixadez do anterior equipo de goberno era tamén completa. A contratación dunha empresa especializada na xestión eléctrica deu froitos case de xeito inmediato, pois solo con realizar unha serie de tramites administrativos, revisións de facturas e axustes nas contratacións de potencia, o concello aforrou mais de 20.000€.

20.000€ de aforro son moitos cartos… E falamos de catro tramites administrativos. Se o anterior goberno fora algo serio, o Concello solo na última lexislatura podería ter aforrado mais de 100.000€ en enerxia eléctrica. Isto demostra que  tiñamos razón cando dende a oposición algúns pediamos un plan de eficiencia enerxética para o Concello.  En todo caso, fixemos moito, pero  o traballo importante está por facer; unha vez regulada a situación  en toda  a rede eléctrica do Concello, poderemos plantexar outras cuestións de máis calado.

  O Concello de Ribadumia informa que esta semana deron comezo os traballos de mantemento e reparación que de xeito anual se realizan  nos 11 parques infantís ó longo de todo o Concello, de cara a manter nas mellores condicións os mesmos e favorecer o xogo e diversións dos nenos ribadumienses, así como a súa seguridade.

Explica Enrique Oubiña que “despois de 2 anos, ó longo dos cales foi preciso realizar unha importante inversión de máis de 50.000 € debido ó estado de abandono no que se atopaban todos os parques infantís do Concello cando chegamos ó goberno, por fin puidemos normalizar a situación, e  agora facer fronte as labores de mantemento resulta moito máis económico .”

Os traballos que comezaron  estes días, centraranse na reparación de pezas gastadas polo uso dos diferentes elementos de xogo ou ornamento, así como o arranxo de varias zonas de caucho, e  supoñen unha inversión de preto de 3.000 €, unha cantidade sensiblemente inferior as que foi preciso investir anteriormente.

  A estas actuacións que o actual equipo de goberno realiza de xeito anual, para as que foi preciso contratar unha empresa externa especializada nesta área, añade  Oubiña que “hai que sumar os pequenos traballos que ó longo do ano van realizando os traballadores municipais, para garantir que os parques, as prazas, as  zonas verdes e todas as instalacións municipais estean nas mellores condicións, un obxectivo que penso que estamos cumprindo. Ademais coas recentes inversións en maquinaria non solo estamos mellorando os traballos de mantemento, se non que estamos xestionando moito mellor o tempo que leva realizar esas tarefas, e tamen mellorando as condicións de traballo dos empregados municipais”.

  O Concello de Ribadumia informa que continua levando a cabo as obras plantexadas no Plan Concellos da Deputación de Pontevedra. Obras coas que o equipo de goberno  busca a mellora das infraestruturas e servizos para os nosos veciños.

Neste caso as obras a mencionar son as levadas a cabo en A Bouza, Besomaño, onde se realizou un tramo da rede de saneamento para permitir  os veciños desta zona acceder a estes servizo municipal.

Por outra banda, estase realizando en Lois, concretamente na estrada EP-9508 dende a Rúa Casal ata o Río Cañón, un tramo de 290 metros de lonxitude ó longo dos cales se esta colocando a  rede de pluviais e  beirarrúas  dun 1,80m de ancho.

O importe destas obras e de 60.400,40 €, que dan resposta a diversas demandas  veciñais, ademais de complementar os servizos existentes.

Esta maña, Enrique Oubiña, concelleiro de urbanismo explicaba que “seguimos co noso plan, executando as obras previstas dentro dos prazos que nos marcamos para levalas a cabo, obras que sempre poñen por diante os intereses dos nosos veciños.

Tamén añadiu, en referencia unha publicación do PP nas Redes Sociais, que “por iso me resulta curioso ver como o PP, no canto de felicitarnos por estar facendo un bo traballo, se dedica a ir mirando onde temos posto cada cartel , e ver se  hai obreiros debaixo, cando lles sería máis fácil vir ó Concello e preguntarnos a nos cales son as obras en marcha e cales inda non se iniciaron.  Cando fagan outro boletín   terán que poñer as fotos cos carteis e decir que durante máis de dous anos o unico que o PP fixo, a parte de ir as verbenas,  foi mirar carteles, os deles uns días, e os nosos os outros”.