No pleno que tivo lugar o pasado 5 de novembro deuse conta a toda Corporación municipal de varios  expedientes que mostraban sen lugar a dúbidas a situación de deixadez, abandono e irregularidade na que se encontraban algunhas instalacións municipais cando o PP foi desaloxado do goberno logo das eleccións municipais.

  Estes expedienes están acreditados por informes realizados por tecnicos profesionais, e non dan lugar a interpretacións.

Agora queremos  informar publicamente dos mesmos, para que os veciños de Ribadumia saiban o que hai, animándoos a que se acheguen polas oficinas municipais para comprobar esta información se o consideran oportuno:

os expedientes son os seguintes:

A reparación dos parques infantís por falta de mantemento valorada en 32.000 €. (preme aqui)

O Centro de interpretación da natureza de Cabanelas absolutamente infrautilizado e nun lamentable estado de conservación.(preme aqui)

O tanatorio municipal, en situación irregular.(preme aqui)

 A rede WIFI, sen adaptar á lexislación vixente en materia de radiofrecuencia. (preme aqui)

Os dominios do Concello rexistrados a nome persoal da anterior alcaldesa, Salomé Peña.(preme aqui)

O río de Xián no Coruto, en estado de abandono logo de ser derrubado polo camión do lixo.(preme aqui)

Con todo, este equipo de goberno está traballando con total compromiso e responsabilidade para solventar todas estas situacións, tentando que o prexuicio para os veciños sexa o mínimo posible.

No Pleno do 14 de xullo, o equipo de goberno aprobou, coa abstención do PP, o reparto “provisional” de axudas a entidades e clubs para o ano 2015.

   Este reparto tiña carácter provisional debido a que as actuais bases de adxudicación  eran ineficaces á hora de facer unha valoración obxectiva do labor das entidades. Aínda así, a pesar desta provisionalidade, a aquelas asociacións que xa entregaron a documentación xustificativa xa se lles vai ingresar o 100% da axuda concedida a partir do vindeiro 23 de novembro. Pero ademais, o equipo de goberno comprometeuse a facer unha revisión do traballo das entidades e clubs para, naqueles casos onde se apreciase un aumento de actividades con relación ó ano 2014, mellorar o apoio económico, sempre dentro das marxes das diferentes partidas económicas.

 

Para poder realizar esta valoración, ademais de manter diversas xuntanzas coas diferentes entidades e clubs, solicitóuselles expresamente que presentasen a xustificación das súas actividades e gastos. Con todo, o prazo para que estas entidades presenten esta documentación está suxeito ás bases actuais de adxudicación aprobadas polo Partido Popular, polo que ata o 31 de xaneiro de 2016 non se poderá facer efectiva a revisión definitiva das subvencións a entidades e clubs.

É moi importante insistir en que este equipo de goberno está realizando un intenso labor de interactuación coas diferentes entidades que realizan actividades no noso concello, e que están frutificando nunha mellor relación e colaboración con todas elas.

O equipo de goberno do Concello de Ribadumia vén de celebrar, con data 05/11/2015, un pleno no que entre outros asuntos informou que o estado no que se encontran os parques infantís  que hai no Concello de Ribadumia é deficiente e, nalgún caso, de abandono.

Este equipo de goberno pon en duda a xestión de Salomé Peña e o seu equipo, pois durante estes últimos anos enténdese que non  houbo ningún tipo de mantemento. Esta conclusión está perfectamente documentada, pois vén avalada por un informe do técnico municipal no que se indican as graves deficiencias existentes e o conseguinte perigo para os usuarios, cuestión gravísima tratándose de nenos.

Entre o mantemento que hai que levar a cabo nos parques infantís inclúense aspectos como: valado deteriorado, pezas soltas, rotas ou astilladas, manifestacións de óxido e corrosión nas pezas metálicas, as pezas de unión como anclaxes ou  parafusos están soltas e frouxas, as rampas dos tobogáns deterioradas, etc.

Este equipo de goberno solicitou presupostos a distintas empresas para levar a cabo a reparación dos parques infantís. O custo das actuacións está valorado nuns 32.000 euros.

Denunciamos e lamentamos a falta de previsión por parte da exalcaldesa Salomé Peña, pois a partida económica que deixou para o mantemento dos parques infantís é de 3.906,79 euros a 30/09/2015, e a partida inicial que tiñan era de 6.000 euros, necesitándose 5 veces máis do que tiñan previsto presupostariamente. Ao PP parece que lle importaban máis as grandes obras que o benestar e a seguridade dos nenos de Ribadumia.

Dende o concello temos claro que, por esta falta de interese e previsión, nos vemos obrigados a actuar de xeito rápido e urxente e a facer un importante esforzo económico para levar a cabo a reparación dos danos que hai nos distintos parques infantís, pois nestas condicións supoñen un perigo para os nenos que os utilizan.

Os informes técnicos que xustifican a necesidade deste investimento están a disposición dos veciños nas oficinas municipais.

Á parte destas reparacións, de cara ós próximos anos, o equipo de goberno ten previsto realizar un calendario de revisión e mantemento de todas estas instalacións, para conseguir que estean en mellores condicións de uso, alongar a súa vida e un aforro para as arcas municipais, pois entendemos que o investimento que agora se vai facer para solucionar as graves deficiencias que existen é moi superior ó que suporía realizar un mantemento anual.

Este equipo de goberno, despois de informar no pleno, nos próximos días vai adxudicar a obra valorando os presupostos dos que xa dispoñemos, para poñer en marcha  as reparacións dos distintos parques infantís que ten este concello en cada unha das parroquias  e tamén no colexio de Barrantes.