• Propoñemos que se bonifique a taxa do coche nas persoas que teñen dependentes ao seu cargo.
• Unha mellora sen apenas  efectos nas arcas municipais pero que sería unha axuda para esas veciñas.

   Dende Somos Ribadumia, seguindo a nosa axenda propositiva, vimos de presentar unha moción encamiñada a mellorar a través de descontos no Imposto de Vehículos de Tracción Mecánica, unha taxa municipal,  a vida diaria das persoas que teñen ao seu cargo a unha persoa con discapacidade.

  Dende a nosa formación consideramos que o  coidado dunha persoa con discapacidade implica, na maioría dos casos, unha carga física, emocional e económica notable para as familias. As persoas coidadoras – sexa no ámbito familiar, de convivencia ou de apoio permanente – asumen habitualmente gastos adicionais derivados de desprazamentos a centros de saúde, centros de día, terapias, actividades de apoio, xestións administrativas ou servizos sociais.

   Compré remarcar que a normativa tributaria municipal permite aos concellos establecer bonificacións potestativas no Imposto sobre Vehículos de Tracción Mecánica (IVTM) ao abeiro do disposto no artigo 95.6 do Real Decreto Lexislativo 2/2004, polo que se aproba o Texto Refundido da Lei Reguladora das Facendas Locais (TRLRFL). Esta mesma normativa permite deseñar ordenanzas fiscais que incorporen criterios sociais, sempre que se respecten os principios de igualdade e capacidade económica.

   A día de hoxe en Ribadumia  contémplanse  bonificacións para as persoas con grao de discapacidade recoñecido, pero  ningunha medida específica dirixida ás persoas coidadoras, a pesar de que representan un colectivo cuxo esforzo sostén o benestar doutras persoas e supón un aforro notable para o sistema público de atención. No caso que nos ocupa, a do IVTM, o problema radica en que as bonificacións se aplican unicamente aos vehículos propiedade das persoas con grao de discapacidade recoñecido, e non se aplican aos vehículos das persoas coidadoras, cando en moitos casos as persoas con discapacidade, sobre todo as moi maiores ou as que non chegaron a maioría de idade e polo tanto carecen de permiso  de conducir, non teñen coche ou incluso tendo, son trasladadas nos coches das persoas coidadoras, na gran  maioría dos casos familiares que residen no mesmo fogar.

 Tal como expón na moción o noso Concelleiro, Sergio Soutelo, “  O apoio ás persoas con discapacidade debe ser integral, pero tamén o apoio a quen lles presta coidados. A mobilidade é un elemento esencial para garantir unha vida digna, a asistencia recorrente a recursos sociosanitarios e a conciliación. Con máis razón nun concello das características do noso, onde o coche resulta imprescindible no día a día das persoas coidadoras.  Por iso, establecer bonificacións no IVTM ás persoas coidadoras supón unha medida xusta, factible e plenamente acorde coa normativa vixente”.

En base ao exposto, dende Somos Ribadumia “presentamos unha proposta que  consideramos que supón unha  oportunidade de avanzar cara a unha fiscalidade máis xusta, solidaria e coherente coa realidade social do municipio”. As persoas coidadoras sosteñen a vida doutros; o mínimo é que a administración lles facilite a súa. Unha proposta legalmente encadrada  nas competencias municipais previstas nos artigos 25 e 106 da Lei reguladora das Facendas Locais, así como no principio de autonomía local recollido na Constitución Española e na Lei 7/1985, reguladora das bases de réxime local e que polo tanto conta cos parabéns legais necesarios e tampouco suporía unha merma significativa dos ingresos por este imposto, cuxa previsión en 2025 é  de recadar  256.000 €,  e aínda que segundo datos da Xunta de Galicia en Ribadumia hai ao redor de  700 persoas con algún grao de discapacidade (726 en 2024), desa cifra cumpriría descontar as persoas que teñen coche xa bonificado, as que non teñen persoa coidadora ou que se desenvolven por si mesmas, e as que conviven na unidade familiar, polo que a cifra de vehículos afectados sería moi inferior.

Polo  tanto,  o único impedimento é unha posición política contraria a apoiar a este colectivo.

A  moción proposta, que debería debaterse en Pleno, recolle os seguintes acordos:

1. Iniciar o procedemento de modificación da Ordenanza Fiscal reguladora do Imposto sobre Vehículos de Tracción Mecánica, coa finalidade de introducir unha bonificación do 100% dirixida ás persoas coidadoras de persoas con discapacidade.

2. Terán dereito á bonificación aquelas persoas que cumpran os seguintes requisitos:

a) Figurar como persoa coidadora non profesional recoñecida no Programa Individual de Atención (PIA) da dependencia ou acreditar documentalmente a convivencia e/ou coidado efectivo dunha persoa con discapacidade igual ou superior ao 33%.

b) Estar empadroada no Concello e ser titular do vehículo para o que se solicita a bonificación.

c) O vehículo deberá estar afecto ao uso habitual para o traslado da persoa con discapacidade e non poderá estar afecto a actividades económicas.

3. Establecer que a bonificación se aplicará a:

– Un único vehículo por unidade familiar ou unidade de convivencia e por persoa coidadora.

4. Encomendar aos servizos técnicos e económicos municipais  a redacción da modificación da ordenanza fiscal correspondente e posteriormente sometela á decisión da Corporación en Pleno.

5. Publicar , unha vez aprobada en Pleno, a modificación no BOP e someter o expediente ao período de información pública, de conformidade co previsto no TRLRFL e demais normativa aplicable.

6. Estudar, no seo da Comisión Informativa correspondente, a ampliación futura desta bonificación a outras situacións socialmente protexibles.

• Propoñemos rematar co trato desigual entre AF7 e os eventos dos clubs locais.
• Propoñemos subscribir convenios específicos para cada evento.
• Garantir un financiamento económico do Concello estable.

     Dende Somos Ribadumia temos claro que o deporte é, sen dúbida, un dos piares fundamentais da vida comunitaria e un motor de desenvolvemento social, educativo e económico nos concellos galegos. En Ribadumia, contamos cun tecido deportivo local vivo e diverso en entidades e disciplinas deportivas, que veñen organizando nos últimos anos torneos, competicións, actividades formativas e eventos deportivos que enriquecen o noso municipio, atraen visitantes e fomentan hábitos de vida saudables entre todas as idades.

  Neste  2025, en Ribadumia tiveron lugar, ademáis doutros eventos, a Copa Ribadumia organizada polo CD Ribadumia, a Mini BTT Concello de Ribadumia organizado polo Club Ciclista Ribadumia, o Rallie Mix organizado pola escudería Tino Racing, o Descenso do Umia organizado polo Club Naútico o Muiño. A todas estas actividades organizadas por entidades locais, súmase o AF7, o único do que o señor Castro fala.

   Somos  conscientes da complexidade de organizar este tipo  eventos, e tamén do papel fundamental que debe facer o Concello a hora de apoialos. E non imos dicir que o goberno do señor Castro non apoie estes eventos deportivos, pero a maneira que ten de dar ese apoio resulta moi desigual, e dende logo as formas políticas están moi lonxe de ser correctas, como comprobamos no último Pleno.

   Con independencia das formas do señor alcalde, a realidade actual amosa que o sistema de axudas xerais ou subvencións concorrentes non cobre con eficacia as necesidades específicas de cada entidade, e no caso das bases para as axudas municipais, estas non valoran suficientemente o impacto dos eventos deportivos que se organizan, pois na realidade estes eventos fican fora  destas axudas regradas. Ademais, a falta dun marco estable de colaboración entre o Concello e os clubs dificulta a continuidade e calidade das actividades deportivas, e pode provocar desigualdades ou sensación de trato desigual entre entidades.

  Ademais das entidades locais, outras entidades de fora do noso Concello veñen tamén nos últimos anos desenvolvendo eventos nas instalacións municipais ou en espazos do noso Concello, sen que exista un mínimo ordenamento ou criterio a hora de validar a axuda que dende o Concello se deba dar a uns eventos ou outros, máis aló dos criterios estritamente subxectivos ou mesmo políticos do goberno local. E dende logo, temos eventos que se están apoiando con cantidades económicas importantes, sen que tan sequera exista unha partida económica específica que lle dea amparo orzamentario, por non falar de concesións de uso de instalacións de xeito prioritario,  mesmo desprazando ás entidades locais, e apoio loxístico moi superior ao que se da a outros eventos organizados por entidades ribadumienses, unha situación que crea un inaceptable agravio comparativo con respecto aos eventos organizados por entidades locais, que dende a nosa formación levamos anos denunciando.

  En conxunto, a cuestión económica pon de manifesto o caótico da xestión. David Castro pretendía ocultar os datos, pero gracias ao traballo de Sergio Soutelo agora sabemos que no que levamos de ano 2025 o apoio económico aos cinco eventos eventos deportivos máis relevantes organizados por entidades do noso Concello e de fora del superou os 50.000 €, unha cifra moi superior aos 12.000 € que figuran no orzamento de 2024, e tamén moi superior aos 38.000 orzamentados neste 2025. Nestes dous últimos anos as partidas orzamentadas non foron suficientes e foi preciso acudir a Modificacións de Crédito para facer fronte aos desfases de gasto. Dende a nosa formación consideramos que o financiamento dos eventos deportivos debe estar recollido no orzamento, do mesmo xeito que debe figurar cales son eses eventos e que cantidades se aporta a cada un deles,  e que non é aceptable que se acuda ao remanente de crédito para cubrir este tipo de cuestións, e menos que aconteza como nos últimos anos de maneira reiterada. Tampouco é de recibo empregar  o Remanente como unha extensión do Orzamento. O Concello o que debe facer e recoller economicamente unhas previsións axeitadas á realidade do noso Concello.

   Por todo isto, consideramos necesario e urxente que o Concello de Ribadumia, a través do seu Goberno municipal, impulse o ordenamento desta situación. E dende a nosa perspectiva o mellor camiño é o de crear convenios individualizados con cada entidade deportiva que organice eventos de interese local, co obxectivo de fortalecer economicamente os proxectos locais dende a igualdade de trato, recoñecer o labor dos clubs e garantir a continuidade das actividades deportivas no municipio, sen con isto deixar de lado os eventos organizados por entidades de fora de Ribadumia, pero si establecendo claramente as prioridades para as entidades locais.

   Dende unha perspectiva de bo goberno, transparencia e eficiencia, os convenios individualizados son unha ferramenta legal e práctica que permite axustar o apoio público á realidade e dimensión de cada evento, evitando a arbitrariedade e promovendo a equidade entre entidades. Tamén serven para concretar e prever con tempo o apoio económico e poder realizar unha correcta xestión dos recursos públicos.

   Os convenios permitirían recoller de forma clara os compromisos e aportacións de ambas partes, establecer criterios obxectivos para a distribución dos recursos e recoñecer institucionalmente o esforzo organizativo dos colectivos locais e tamén dos de fora do noso Concello que organizan eventos en Ribadumia. Estes acordos poden incluír achegas económicas directas,  apoio na promoción e difusión, cobertura loxística ou técnica, e calquera outra forma de colaboración axeitada ao evento en cuestión.

 Por todo o anterior, vimos de presentar  unha moción que propón os seguintes  acordos:

1. O Pleno do Concello de Ribadumia insta ao Goberno municipal a establecer convenios individualizados coas entidades deportivas que organicen eventos deportivos de interese municipal, coa finalidade de apoiar e fortalecer a súa actividade.

2. Estes convenios deberán:

–         Definir con claridade os compromisos de ambas partes.

–         Incluír achegas económicas axeitadas á dimensión e impacto do evento,  pero partindo do seguinte criterio de reparto: ningún evento organizado por entidades non rexistradas en Ribadumia e/ou que non formen parte do deporte federado recibirá unha cuantía superior á que reciba  o evento con maior apoio de entre os organizados por entidades locais.

–         Contemplar outras formas de colaboración municipal (infraestruturas, promoción, apoio técnico ou loxístico, datas exactas).

–         Ter vixencia anual ou plurianual, segundo a natureza do evento .

3.  Crearase unha comisión técnica municipal, formada por persoal técnico e representantes de todos os partidos  políticos con representación, que elaborara e proporá un regulamento ou protocolo interno que estableza os criterios obxectivos para a sinatura destes convenios, garantindo a igualdade de oportunidades, a transparencia e a rendición de contas, máis tamén o carácter prioritario para as entidades locais. Dito regulamento deberá aprobarse en Pleno.

4. A Comisión técnica nomeada no punto anterior tamén tera a función avaliar en base ao regulamento aprobrado as propostas de convenio,  facer seguimento da súa execución e valorar o impacto dos eventos apoiados, para o cal se dotara dun regulamento interno de funcionamento.

5. De xeito especifico, recolleranse nos orzamentos anuais as partidas económicas necesarias para enfrontar cada un dos eventos aos que se dea apoio económico, para cumprir cos principios de transparencia.

6. Esta moción será trasladada á Alcaldía-Presidencia, á Concellería de Deportes e á Secretaría-Intervención para os efectos oportunos.

•   O Orzamento chega tarde, mal e arrastro.
• Toda a oposición critica as formas e a xestión do goberno local.
• Dispáranse os gastos na Festa do Tinto e os eventos deportivos .
• Conxeladas de novo as axudas a colectivos e entidades deportivas, culturais e sociais.
• David Castro  súbese o salario de liberado; o del, o da Concelleira de Contas e o do Concelleiro de Obras. Ilegal e indigno.

   O goberno aprobou este pasado luns , a  24 de novembro, cando debería aprobar os orzamentos de 2026, e cando a conta xeral do ano 2024 xa debería tamén estar aprobada, os orzamentos para este ano 2025.

   De partida, antes de entrar en materia, queremos remarcar o despropósito que supón que un goberno con maioría  absoluta sexa incapaz de aprobar en tempo en forma o Orzamento, que é o documento mais importante dun Concello.

   Despois encontrámonos cun orzamento presentado  aos quince días de presentar unha modificación de créditos e despois de aprobar as obras que se incluen nel por separado.

   Resumindo, como explicou Sergio Soutelo no Pleno, “o mundo ao revés:

• Primeiro o goberno gasta os cartos que ten e os que non ten por non aprobar un orzamento e por non ter coidado co gasto.
• despois convoca varios Plenos, que saen a máis de 1.000€ por  Pleno para aprobar  obras para as que non ten cartos por que non ten o orzamento aprobado.
• Despois trae unha modificación de crédito que en parte é para pagar a chapuza do 2024,  pero noutra parte é para pagar cousas para as que tampouco ten cartos porque non ten aprobado o orzamento…  e por que, o máis grave, o orzamento que segundo a Concelleira está no caixón dende marzo, que xa viña tarde, non lle chega e non pode meterlle máis fondos.
• E cando xa gastou o que tiña e o que non tiña, trae o orzamento a todo correr a un Pleno extraordinario.

Por que motivo o Concello non trouxo este Orzamento ao Pleno Ordinario fai quince días? Total estaba feito, ou non?

Por que motivo os cartos da modificación de crédito non se incluíron no Orzamento?

As respostas están na propia documentación, nesta e na anterior.”

   O primeiro dato a remarcar é que o  Concello non vai gastar este 2025 os 6.762.665,38 € que recolle o Orzamento O goberno neste 2025 vai gastar esa cantidade máis os 370.672,43 € que xa meteu nunha modificación de crédito aprobada fai quince días.

“En total 7.133.337, 81 €.Máis de 7 millóns de euros, que se di pronto. O orzamento máis grande dende que temos democracia para un concello que está peor que no ano 2016, cando o orzamento  era de menos de 3 millóns.”.

   Ao longo do debate Sergio Soutelo sacou a relocer varias partidas orzamentarias que debido á chapuza do orzamento 2024 neste 2025 víronse incrementadas  de maneira importante, como a do SAF, que en 2024 tiña orzamentados 320.000 € , e neste ano subiu ata os 745.000 €. No 2024 tíñanse que ter orzamentados en realidade 600.000 € para este servizo, que foi o que custou e ademais o goberno xa saiba xla ía ser o custe no momento de aprobar o orzamento no mes de xullo.

   Mesma situación coa Festa do Tinto que pasou no Orzamento de 120.00€ a 250.000 €. En realidade, no 2024 a Festa costou 170.000€, pero con todo, a suba  ata os 250.000€ non se xustifica.  Porén, ante a gravidade do expresado onte polo goberno, referirémonos en próximos días a esta Festa mais polo miúdo.

  O único que diremos é o mesmo que décimos con outras partidas, como as dedicadas ao deporte. Se se poden subir os gastos en eventos deportivos de 27.000 a 63.000€ , e a da festa do Tinto de 120.000€ a 250.000 €, ten que poderse subir as partidas para entidades, clubs, festas parroquiais e cultura.

   Soutelo puxo de manifesto outras “curiosidades” do orzamento, como  que conste un aumento dos ingresos pola taxa do lixo do 40%, Unha cifra chamativa nun Concello sen apenas vivenda nova, menos aínda empresas, e  que  tendo en conta que as taxas están de momento conxeladas, ten moi difícil explicación. Ou que se aumente de 9.000 € a 12.000 € a partida para a EDAR de Lois cando os problemas que ten seguen sen resolverse, ou que se manteña unha partida para o mantemento do punto limpo que leva dous anos pechado.

  Xa na parte final, Soutelo puxo de manifesto a suba do custe de liberacións políticas, de 70.420 € a 72.128,72 €. Está suba resulta de partida  ilegal, pois cando se aprobaron liberacións concretas, non se incluíron actualizacións de ningún tipo.

   Ademais de ilegal, resulta indecente. A Concelleira de Contas cuxa xestión é claramente deficiente e leva ao Concello camiño da intervención do estado, en vez de dimitir, súbese o salario. O mesmo o alcalde e o Concelleiro de obras. E non é pola cantidade económica, é pola falta de ética política que hai detrás deste comportamento.

   Dende Somos Ribadumia  agardamos que  os tres renuncien a ese aumento e devolvan todo o cobrado de máis.

   Resumindo, nun Pleno novamente enlameado pola actitude do señor Castro e do seu equipo, que unha vez máis  confundiu o Pleno cunha feira, cun comportamento impropio dun partido serio e sensato ata o punto de que o resto de partidos da oposición protestaron ante os continuos ataques ao noso Concelleiro durante a súa única intervención – David Castro volveu negarle o dereito de replica- , o goberno sacou adiante sen apoio nin valoración minimamente positiva de  ningunha outra forza política, uns orzamentos que son a demostración documentada da incompetencia do goberno do señor Castro. E que ademais corren o perigo de ser impugnados por incumprimentos legais.

   Dende Somos Ribadumia volvemos insistir en pedir a dimisión da Concelleira de Contas. Posiblemente non haxa en toda a comarca unha Concelleira tan preparada e con tanta experiencia na xestión económica dun Concello como  Vanesa Jorge, por ese motivo é totalmente inadmisible a xestión que está levando a cabo, ademais gozando dunha liberación que lle permite estar a tempo  completo no Concello.

• As obras que se están levando a cabo supoñen un perigo durante as horas de acceso e saída do colexio e escola infantil.
• Pedimos dilixencia e que goberno inste unha mellora na seguridade.

As obras iniciadas fai uns días no pavillón de Barrantes e no acceso ao app de A Bouza están creando molestias innecesarias ademais dunhas situacións de risco que nos parecen que poderían se xestionadas doutra maneira.

  O pavillón de Barrantes está nas inmediacións da escola infantil e do Colexio. A  súa situación dende que se construiu, ocupando a estrada que daba acceso ao colexio dende o lado de Ribadumia, implicou unha limitación de espazo, complicado posteriormente coa construción dun parque infantil. O resultado deste tapón artificial foi a creación dun espazo pechado, habituado como aparcadoiro, que polas mañas se converte nun revoltixo de coches, nenos e adultos, ao ser punto coincidente do acceso ao colexio e á escola infantil.

Esta  situación caótica que se ven arrastrando anos  e que David Castro prometera solucionar cunha serie de obras  levadas a cabo máis  recentemente, coa mellora do espazo para aparcar e a  construción dunha rotonda, non se solventou, máis ben ao contrario, debido a que esas actuacións  formaban parte dun proxecto maior, que implicaba o desprazamento do pavillón e o aumento do espazo dispoñible (tamén unha dársena de autobuses), un proxecto abandonado polo señor Castro logo de perder máis de un millón de euros en axudas entre os anos 2019 e o 2022. 

  A situación actual pois, xa non resulta moi boa, e os atascos nesa zona son diarios, supoñendo unha situación de risco ao concidir  nenos e nais a pe cos que van en coche. Pero agora veuse agravada pola falta de sentido de quen xestiona o noso Concello. O goberno do señor Castro, que leva retraso en todo, tamén o leva nunhas obras das que debe ter finalizada unha parte a finais de decembro. E os retrasos agora traen presas, de tal maneira que a empresa adxudicataria non está tendo moitos miramentos coas cuestión da seguridade cara fora da obra e tira para adiante actuando como se o espazo no que traballan non estivera compartido cun colexio de primaria e secundaria e unha escola infantil.

 O resultado disto son actuacións como ocupar espazos de aparcadoiro, ou apaños como colocar pasarelas, sen as correspondentes medidas de seguridade,  invadindo a beirrarúa de acceso ao colexio e obringando a nenos e adultos a pasar polo medio dos coches.

  Dende Somos Ribadumia debemos lamentar esta falta de dilixencia, tanto pola parte da empresa como pola parte do goberno  local, que deu carta branca á empresa para actuar como considerase sen ter en conta a situación particular desa zona.

Se estás obras se tiveran desenvolto no verán, non teníamos estés problemas. Pero David Castro que pretende aprobar os orzamentos deste ano o próximo luns, tan tal nivel de descontrol que rico que aprobar as obras, don investimentos importantes en Plenos de Urxencia convocatos a todo correr para non perder outra vez as axudas concedidas.

  Dende a nosa formación esiximos que se aumenten as medidas de seguridade, e que se habilite un paso seguro para nenos, nais e mestres ao colexio, e que se faga de maneira inmediata.