• O actual equipo de goberno logra unha importante axuda do  IDAE , gracias á cal o  alumeado público de Ribadumia será un 60% máis eficiente.

   O Instituto para a Diversificación e Aforro da Enerxía (IDAE), dependente do Ministerio de Transición Tecnolóxica, aprobou a concesión dunha axuda por valor do 80% do orzamento presentado polo actual equipo de goberno para o Proxecto de Renovación, Mellora e Adaptación ao Réxime de Eficiencia Enerxética. Este programa, no marco do Programa Operativo  FEDER (Fondo Europeo de Desenvolvemento Rexional), resolveu conceder a subvención máxima de 569.381,12 euros dos 711.726,40 euros  orzados polo  Concello para a renovación das instalacións de iluminación e sinalización exterior. Unha cifra que supón un dos maiores investimentos de toda a provincia de Pontevedra neste tipo de obras. Calcúlase que unha redución do 60% na iluminación pública pode traducirse nun aforro superior ao 80% na factura da luz, así como unha  importantísima redución das emisións de CO2 á   atmosfera.

  Lograr unha reducción da factura eléctrica, que actualmente conta cunha partida do 221.000€, o 5% do orzamento, pero que en anos anteriores ten arrastrado entre  o 8% e o 10% do orzamento municipal, era un dos principais obxectivos de Somos Ribadumia cando nos presentamos as eleccións.  E lograr esta liña de axuda económica vai permitir que o equipo de goberno consiga, ademais do obxectivo de rebaixar os custes en enerxia, cun aforro importante para as arcas municipais que permitira afrontar outras inversións en beneficio da veciñanza,  ter un sistema de alumeado máis respectuoso co medio ambiente e cunha maior eficiencia.

   Para Enrique Oubiña este “é un paso importante. Algúns estivemos  anos pedíndolle a Salomé Peña que tomara medidas serias para frear a escalada na partida para consumo eléctrico, e conseguimos, a base de presionar, algunhas  medidas puntuais, pero que tiveron un efecto máis ben discreto na factura eléctrica, debido a  que os gobernos do PP se empeñaron en subir o custe da luz dunha maneira exponencial nos últimos anos. Agora, con este paso imos poder minimizar o golpe que unha nova escalada de prezos podería ter sobre os orzamentos, se o goberno do Psoe non  actua de xeito distinto  ó  PP”.

30 meses para converter a Ribadumia no único concello galego co 100% do alumeado público de baixo consumo.

   Desde o momento da aprobación da subvención do  IDAE, ábrese un prazo de seis meses para a contratación das subministracións, obras e servizos; seis meses máis ata un total dun ano para a formalización dos contratacións precisas para a execución; e un límite máximo de trinta meses para a finalización das mesmas.

    Cando o proxecto estea executado, a   iluminación pública de todos os núcleos urbanos e parroquias de Ribadumia contará con tecnoloxía  LED, moito máis eficiente que a actual. O proceso pasa por substituír as luminarias xa existentes, lámpadas e equipos por tecnoloxías máis eficientes; que permitan as diminución do fluxo emitido ata un 60%; a substitución de interruptores ou programadores tradicionais; a eliminación de puntos de luz innecesarios e a adecuación dos contratos de subministro.

 Un logro conseguido gracias a inestimable axuda e profesionalidade dos persoal municipal. 

   A formula que o estado usou para a concesión destas axudas, denominada “Concorrencia non competitiva”, ou sexa, que se conceden por orde de entrada, obrigou a realizar un importante esforzo por parte do persoal do concello, que debemos agradecer. Para Enrique Oubiña  “conseguir esta axuda foi posible gracias o esforzo de varias persoas, por un lado a empresa que nos leva a xestión eléctrica, e por outro lado as traballadoras do concello, neste caso Vanessa Jorge e Dolores Franco, que se deixaron os dedos e os ollos diante do ordenaor nunha maratón de máis de 36 horas continuadas, que foi o tempo que lles levou conseguir que o proxecto entrara na plataforma dixital, un tempo que dedicaron de xeito voluntario, e un esforzo que eu agradezo enormemente.”

   Dende Somos Ribadumia queremos sumarnos a este agradecemento e poñer en valor a boa vontade e capacidade do persoal municipal, que no seu conxunto xa leva demostrado en varias ocasións, que son un equipo moi profesional, e sempre disposto a facer máis do que lle corresponde polo seu cargo. Unha sorte que no teñen todos os concellos.

  Pero tamén queremos poñer o foco nun procedemento de reparto de subvencións que pretende usar mecanismos  que non están preparados, que se bloquean continuamente e que deixan fora a miudo  bos proxectos solo porque os concellos non dispoñen do persoal necesario,  ou dos mecanismos informáticos adecuados, cando directamente non hai trato de favor. Dende Somos Ribadumia xa puxemos as nosas queixas, que son as de moitos concellos, en coñecemento de En Marea, para que use os seus mecanismos a nivel autonómico e estatal para conseguir que o reparto de subvencións se faga dun xeito xusto e equitativo.

• Foi a única persoa que presentou candidatura ao proceso de elección de candidato, sendo ratificado pola Comisión Executiva de Somos Ribadumia do día de 31 de Outubro de 2018.
• Enrique Oubiña leva 7 anos de Concelleiro na corporación municipal de Ribadumia, os últimos 4 formando parte do goberno municipal, asumindo responsabilidades nas áreas de Servizos Sociais, Sanidade, 3ª Idade, Obras e Urbanismo.

   A Comisión Executiva de SOMOS RIBADUMIA celebrou unha xuntanza o pasado 31 de Outubro para, entre outros puntos, avaliar o proceso aberto para a designación de cabeza de lista de Somos Ribadumia para as eleccións municipais do próximo ano 2019.

   Na Asemblea Xeral celebrada o 13 de Setembro, aprobábanse as bases e calendario do proceso, establecéndose un prazo de mes e medio para que todos aqueles colaboradores de SOMOS RIBADUMIA que quixesen postularse para encabezar a candidatura electoral o fixeran, baixo as únicas condicións de asinar o cumprimento dos estatutos e código ético. Tamén se estableceu que no caso de existir unha única candidatura quedaría automaticamente esta proclamada. Rematado o prazo, os secretarios de garantías informaron que só se presentara a candidatura de JOSE ENRIQUE OUBIÑA LAGO, polo que quedou proclamado candidato e cabeza de lista de SOMOS RIBADUMIA.

  Dende a Comisión Executiva valoramos esta candidatura e o feito de que non se presentaran outras, como un refrendo dos colaboradores e colaboradoras de SOMOS RIBADUMIA á persoa de Enrique, sendo considerado como o candidato ideal para encabezar a lista tanto pola súa traxectoria, como pola valoración positiva do traballo realizado nestes últimos  anos no equipo de goberno do Concello de Ribadumia.

   Con está designación de candidato, e coa recente sinatura do acordo de colaboración con EN MAREA, para que Somos Ribadumia forme parte da estrutura das mareas municipalistas que se están a organizar ao longo de toda Galicia para optar as alcaldías, a Comisión Executiva tamén inicia os traballos de cara a conformación da candidatura e elaboración dun Programa Electoral. Para esta última cuestión está previsto un proceso participativo, para o que se prevé contar coas aportacións das asociacións e entidades do Concello, así como de todos aqueles veciños e veciñas que desexen participar para deseñar un proxecto político para mellorar Ribadumia. A idea final é establecer un programa de goberno, unificado e cohesionado, que non se limite a unha suma de propostas, se non que sexa a guía do goberno para próxima lexislatura municipal, onde estamos seguros de que Somos Ribadumia vai ter un papel relevante.

 

JOSÉ ENRIQUE OUBIÑA LAGO.

   José Enrique Oubiña Lago é natural de Ribadumia e residente en Barrantes. Leva 8 anos de Concelleiro, dende o 2011, data na que entrou na corporación encabezando unha candidatura e converténdose no líder da oposición fronte ao goberno popular de Salomé Peña, cunha maneira de traballar que destacou polo alto grao de propostas e pola busca de acordos nas cuestións municipais máis importantes. Logo das eleccións de 2015, nas que encabezou a candidatura de Somos Ribadumia, forma parte do goberno municipal, como Tenente alcalde e asumindo responsabilidades en áreas como Servizos Sociais, Sanidade, 3ª Idade, Obras ou Urbanismo. En todas estas áreas son de destacar no político o seu carácter resolutivo, a súa implicación e traballo, e a súa lealdade tanto os principios de Somos Ribadumia e as decisións da súa asemblea como ao pacto asinado coas outras forzas coas que Somos Ribadumia comparte o goberno. Tamén participou na fundación e é membro activo de EN MAREA.

   No ámbito social destaca pola súa implicación e colaboración con diversas asociacións e actividades que se organizan en Ribadumia. Na actualidade é membro da directiva da Asociación Herminio Barreiro. Esta implicación e traballo valeulle tamén o recoñecemento da Asociación ESMAR contra a violencia de xénero, que o nomeou Presidente de Honra.

   Por todo isto, dende a executiva de Somos Ribadumia compartimos a idea das nosas bases de que é o candidato ideal a alcaldía de Ribadumia e que verá recoñecida a súa labor cun considerable aumento do apoio cidadá.

   Ademais de participar no acto de sinatura, Luís Villares pasou a tarde do venres en Ribadumia, acompañado do Concelleiro de Servizos Sociais, Enrique Oubiña, coñecendo o plan Conta Comigo Ribadumia, pioneiro na loita contra o maltrato de xénero. Ao longo da tarde, ademais de coñecer o plan de man do concelleiro e da psicologa responsable da formación do voluntariado e comerciantes, Villares visitou a varios dos comercios participantes e conversou coas súas responsables, que lle transmitiron o positivo e necesario da experiencia. Tamén coñeceu a algunha das persoas que forman parte do voluntariado e tomou nota da ausencia de axudas públicas para actividades de prevención neste eido, así como das trabas existentes para poder acceder as poucas liñas de axuda que hai para igualdade.

   Por outra banda, logo do acto de sinatura, Luis Villares tivo a amabilidade de reunirse con representantes de ESMAR, que lle transmitiron a súa loita por conseguir un punto de encontro familiar. Logo de escoitar as explicacións e os motivos polos cales están inmersas nesta pelexa, Villares comprometeuse a propoñer nas enmendas ó orzamento do próximo 2019 unha partida especifica para a creación dese punto de encontro tan necesario na nosa comarca, así como a falar co resto de forzas parlamentarias para conseguir que neste caso as diferencias políticas non sexan un impedimento.

   Dende Somos Ribadumia queremos agradecer a En Marea o seu apoio nas demandas da xente do noso concello, xa antes da sinatura do convenio de colaboración, pero que estamos seguros que agora será máis firme, e a Luís Villares, que non debemos esquecer que é o lider da oposición e único voceiro político que ata o de agora visitou o noso concello, a súa humanidade, humildade e boa vontade para tratar con todo o mundo e atender as demandas dos colectivos do noso concello.

   Onte á tarde, Somos Ribadumia asinou, no Centro Social de Barrantes, o acordo de colaboración con En Marea que dará cobertura e apoio ao espazo do Salnés para as municipais de 2019, respectando sempre a súa independencia.

O acto foi aberto por Ramón Mouriño, membro da Comisión Executiva de Somos Ribadumia, que incideu en que  “Somos Ribadumia no 2015 fomos determinantes para sacar ó Partido Popular do goberno e, en contra do que algunhas persoas auguraban, no pasou nada malo, nin se acabou o mundo nin o concello foi a pique. Ao contrario, agora as cousas, con acertos e con erros como é normal cando se goberna, fanse doutra maneira, e con independencia das ideas de cada quen, esta claro que a xestión do concello é outra cousa, e mellorou enormemente”.

 “Este acordo favorece o traballo conxunto co obxectivo de poñer fin ás políticas de recortes do PP nos concellos e mudalas por políticas para as maiorías sociais. Hoxe sumamos unha nova pinga e, pinga a pinga lograremos botar ao PP das institucións”, dixo Elena Cores, concelleira de Somos Vilanova e integrante da Coordinadora de EM nun acto no que mareantes de todo o país e da comarca felicitaron a Somos Ribadumia por dar este importante paso, e que no seu día xa deron Marea Veciñal de Culleredo, Marea Pontevedra, Somos En Marea Sanxenxo, Somos Cambados, Marea Ponte Caldelas, Lugonovo, Asamblea Cidadá de Bueu, Somos Cabanas, Xente de Rois, Son de Trives e Son de Manzaneda.

“Somos Ribadumia conseguimos ser aquelo que desexabamos, unha forza local, transversal e centrada nos problemas da nosa veciñanza, co ollo posto na visión política da esquerda e cun funcionamento horizontal e transparente, e conseguimos que a nosa maneira de entender a política se notara nas medidas e decisións tomadas neste tempo no goberno local” afondou Enrique Oubiña, voceiro de Somos Ribadumia. Tamén incidiu en que “ gracias a ese traballo, somos o referente da esquerda neste concello. Pero o ser unha forza local  necesitamos apoios noutras institucións onde non estamos representados, e nese senso  En Marea é a nosa voz no parlamento, a nosa voz e a única forza que se preocupou polos problemas da nosa veciñanza, como cando tivemos que sufrir os recorte de persoal no centro de saúde ou cando denunciamos que veciños e veciñas nosas tardaban tres anos en conseguir un grao de discapacidade que lle permitira acceder as axudas do estado. E este acordo faranos aínda máis visibles, e reforzará a nosa posición no 2019, xa non só no concello senón tamén na mancomunidade, nas Deputacións e no Parlamento”. Pola súa banda, e tralos parabéns dos representantes das mareas de todo o país, a voceira do espazo do cambio, Ana Seijas, destacou a importancia de que “hoxe, Somos Ribadumia se sume ao mar, a un mar de persoas, a un mar de ilusións para facer das nosas vilas, dos nosos pobos e das nosas cidades lugares máis habitables con políticas feitas con e para a xente, porque Hai Marea! e Hai Mareas!”, dixo antes de oficializar a sinatura do acordo.

Luís Villares, voceiro de En Marea pechou o acto apelando ao proxecto republicano de En Marea, baseado nos principios de igualdade, fraternidade e liberdade. “Un proxecto transformador que nos fai distintos ao resto das formacións. Porque o que importa é o que temos en común e xuntarnos para rematar coas inxustizas que sofren a maioría das persoas deste país”, concluiu.