• Unha inspección o pasado mes de maio confirmou o que xa denunciamos dende Somos Ribadumia: a depuradora de Lois verte de maneira constante ao río Cañón.
• O Concello non se molestou nin en alegar ou presentar solucións para mitigar ou evitar a sanción económica.
• A Xunta multa ao Concello pola incompetencia de David Castro, pero quen pagan son o veciños e veciñas de Ribadumia, e con recargo a veciñanza de Lois.
• A nosa proposta para  que se busque unha solución negociando unha actuación  conxunta con Meis, gardada nun caixón.

    “O Concello de Ribadumia ten un problema moi grande coa EDAR de Lois, e David Castro está máis preocupado de ocultar o problema que de darlle solución”. Isto foi o que dixemos o pasado 5 de maio, cando fixemos pública, logo de que David Castro intentase ocultala, a preocupante situación da estación depuradora de augas residuais sita na parroquia de Lois, con vertidos  continuos ao río Cañón durante nove meses dos doce que ten o ano.

  Por se os informes da empresa que xestiona esa EDAR non foran bastante claros, vimos de ter constancia de que o 7 de maio deste ano Augas de Galicia procedeu a realizar unha inspección nesa depuradora, dando como resultado a corroboración do que dixemos no seu momento, e ademais interpoñendo ao Concello de Ribadumia unha multa de 5.000 € “por vertidos de augas residuais urbanas sen tratamento ao río Cañon”.

  E o máis grave non é tanto a cantidade da multa, que tamén, senón a desidia e o pasotismo do goberno do señor Castro. Xa non é que Augas de Galicia lle pillara a estación depuradora con filtracións e cun bombeo avariado dende fai meses ou anos, senón que o señor Castro nin sequera se preocupou de poñer solución ao problema ou cando menos minimizar as fugas continuas que padece a depuradora, deixando pasar o prazo dado por Augas de Galicia para alegar ante a multa ou para aportar probas de ter feito algo nese espazo de tempo. O resultado disto é que a veciñanza de Ribadumia ten que enfrontar cos seus impostos esta multa, e outras que poderan vir, pois se non se resolve o problema Augas de Galicia terá que seguir multando, e non descartemos que nalgún momento algún outro estamento tome tamén medidas.

   Deixar de mirar para outro lado e actuar con sentido.

Dende Somos Ribadumia presentamos o pasado mes de maio unha moción propoñendo que o Concello fixera fronte aos problemas da EDAR colaborando co Concello de Meis, habida conta dun convenio de colaboración asinado para compartir conexións –  cuxa existencia David Castro chegou a negar en Pleno – co obxectivo de  ampliar a EDAR ou construír unha de maior tamaño e con vistas de futuro nun lugar axeitado. A proposta era seria, por suposto moi sensata, rigorosa no contido e por suposto  realizable.  E ata o día de hoxe segue sendo  a única solución posta enriba da mesa por un partido político para rematar coa saturación que padece a EDAR de Lois e cos vertidos ao río Cañón.

   Por desgraza, David Castro, un dos responsables políticos do fiasco de 900.000 € nunha obra no bombeo de Cabanelas que provocou un aumento dos vertidos cando os tiña que eliminar, e que vai permitir a enésima desfeita no río Umia coa construción dunha represa que vai ocupar máis de 1.200 metros cadrados de canle fluvial tamén en Cabanelas,  gardou a nosa proposta nun caixón, ao lado doutras – de momento – sete mocións que se nega a levar a Pleno, e decidiu pasar de todo, tamén con isto.

  Dende Somos Ribadumia debemos lamentar esta maneira de actuar e instamos ao señor Castro a que deixe de tirar os cartos da veciñanza en multas, que ademais de ser unha irresponsabilidade e unha falta de respecto cara a veciñanza  tampouco ten as contas locais como para darse esas alegrías, e  se poña a traballar por solucionar problemas, neste caso para rematar cos vertidos da EDAR de Lois, que supoñen un atentado ambiental de primeira orde,  e ampliar a depuradora para dar cabida as necesidades da veciñanza, da presente e da futura.

• Insistimos en que o Concello debería terse feito con esa parcela. 
• Alégranos que adquira a nave unha empresa ribadumiense, pero chama a atención o proceso.
• Imos velar por un cumprimento rigoroso da legalidade vixente.

   Dende Somos Ribadumia levamos meses defendendo que o Concello debería adquirir a parcela onde está a nave da antiga Alfageme, e de feito presentamos unha moción e varios escritos dirixidos a alcaldía neste senso. Os motivos eran moitos, ben xustificados e supoñían unha oportunidade enorme e tamén única de dotar un espazo público nunha zona de máximo interese ambiental, e xerar un punto de atracción turística.

   Porén, o único que foi capaz de facer David Castro foi indignarse por que a idea a tiveramos nós, bloquear o debate da moción e negarse en redondo no medio dos seus habituais espaventos e faltas de respecto, perdendo así esta oportunidade, que gracias a incompetencia e aos prexuízos do señor Castor dificilmente se vai repetir.

  Agora encontrámonos coa sorpresa de que logo de anos de bloqueo, e  xusto despois de que  nós propuxemos que o Concello adquirirse esa parcela,  aparece unha empresa ribadumiense que se fai coa parcela. Dende Somos Ribadumia non temos nada que obxectar, ao contrario, pero chámanos moito a atención que as dúas empresas que puxaron a ultima hora non optasen por facer unha oferta un mes antes, cando a poderían ter levado por case a metade do prezo, entre outras cousas. 

 Dende Somos Ribadumia todo o noso apoio aos negocios que prosperen en Ribadumia, pero como dicimos isto tamén dicimos que imos velar por que a legalidade se cumpra, o espazo natural fique protexido como corresponde, e a empresa poida desenvolver a súa actividade con garantías legais. E non o dicimos por dicir.  Temos  exemplos sobrados do mal vicio do noso alcalde de mal axudar a determinadas empresas e persoas,  mentres a outros veciños “de menos categoría”  lles obriga, directamente ou a través da APLU, a derribar galpóns e galiñeiros.  E para mostra , en Cabanelas  temos unha  nave ilegal nunha parcela onde non se pode edificar, levantada e traballando igual que o resto de naves que si actuaron legalmente e pagan os seus impostos, co silencio cómplice do alcalde que mesmo chegou  a xestionar unha modificación do PXOM pagada con cargo á veciñanza, para intentar legalizar o ilegalizable, un intento no que polo visto insiste, gastando máis cartos da veciñanza só por contentar a unha empresa que actúa fora da lei.

• A obra, unha chapuza mal feita.
• Un cadro eléctrico, sen permiso e ocupando un vial nunha zona fora do contrato de cesión.
• David Castro renuncia ao crecemento ordenado do nucleo de Ribadumia-Barrantes e ao crecemento de viviendas.
• Ano e medio despois de ceder o espazo, os puntos de recarga non seu puxeron en marcha.

   O grao de chapucerismo ao que é capaz de chegar o goberno de David Castro, supérase a cada intervención. Meses despois de supostamente rematar a obra de instalación dos dous puntos de recarga que en virtude a un acordo coa Mancomunidade se puxeron na rúa Espadeiro de Ribadumia, demóstrase con outro exemplo esta afirmación que vimos de facer.

  De partida, o Concello, en acordo Plenario en marzo de 2024,  cedeu dúas prazas de aparcadoiro nesa rúa para a instalación  deses dous puntos de recarga, que meses despois de colocarse, seguen sen dar servizo. O acordo recolle moi pormenorizadamente o espazo que se cedeu para esta actuación, limitado ao oco que ocupaban esas dúas prazas e nada máis, nin sequera se cedeu espazo na beirarúa.

  Pois ben, feita a intervención, encontrámonos en primeiro lugar  con que a propia obra é unha chapuza mal feita, cos puntos invadindo en exceso as prazas de aparcadoiro sobre unha  cimentación de  formigon de dubidosa feitura e resistencia, e nulo coidado estético.

   Por outra banda, da nada apareceu un cadro eléctrico dun tamaño importante, dentro dunha armazón de obra, que non figura en ningún lado, separado varios metros dos puntos de recarga e fora por completo do espazo cedido á mancomunidade,  sin autorización que conste por que  ademais non a pode ter por que por se fora  pouco, resulta que tal cadro está ocupando de cheo a vía pública.

  Dende Somos Ribadumia queremos recordar que o PXOM recolle o vial onde está colocado ese cadro eléctrico, un vial  agora pechado en falso, pero que nun futuro  debe completar a seguinte mazá urbanizada desa zona, razón pola cal quedou  o encabezado da vía aberto, como pode comprobar  calquera que pase por alí. De feito, existe hoxe a estrutura dun edifico de vivendas que quedou sen rematar no seu momento do que corren rumores de que pronto se vai retomar a obra, dando así continuidade ao desenvolvemento desa zona,  ou cando menos rematando esa parte.

  É completamente inadmisible que David Castro permita a construción de elementos deste tipo, en lugares prohibidos, pois non esquezamos que o propio PXOM prohibe expresamente a construción de calquera tipo de estrutura nos viais públicos  a excepción de paradas de bus.

E é totalmente inadmisible que a Mancomunide, presidida precisamente polo señor Castro, non tivera presentado un proxecto mellor redactado e máis completo, definindo ben o espazo necesario para incluír todos os elementos necesarios. Dende Somos Ribadumia íamos apoiar do mesmo xeito ceder dúas prazas de aparcadoiro que tres, se ían ser necesarias, ou outro espazo máis amplo noutro emprazamento chegado o caso. O que non podemos  é aceptar este  grao de improvisación.  

Aínda que o mais lamentable  é a falta de visión de futuro de David Castro, que con estas actuacións – das que é perfectamente consciente pois a parte de estar ben á vista foi facerse fotos ao seu carón –  deixa claro que non prevé nin que se constrúa máis vivenda  nin o crecemento ordenado do núcleo Ribadumia-Barrantes, nin outra cousa que non sexa aguantarse el na cadeira. Lamentamos esta actitude. Lamentamos que David Castro converta Ribadumia nun Concello sen lei no que calquera que convite a xantar ao alcalde poida construír calquera cousa en calquera lado, legal ou non,  mentres o resto da veciñanza, especialmente aqueles veciños e veciñas  que o señor Castro ten sinaladas como “dos outros”, ten que pedir permisos ata para respirar e soportar un control exhaustivo de todo canto fai.

• Unha vintena de representantes de Agrupacións Municipalistas de toda Galicia participou na xornada.
• Política Local pragmática,  de nivel, e pegada á veciñanza en Ribadumia.

   Dende Somos Ribadumia queremos amosar a nosa satisfacción ante o máis que positivo resultado da I Xornada Municipalista que tivo lugar está semana en Ribadumia, impulsada e organizada pola nosa agrupación coa colaboración con Agora Galicia e Somos Cambados.

 A xornada, prevista entre as 10:00 da mañá e as 18:00 horas e que  rematou alongándose un par de horas, contou con representantes  de Concellos de entre 400 e 13.000 habitantes, e había dende agrupacións como a de Salceda que ten a alcaldía a outras que son primeira forza da oposición, como Campo Lameiro ou Chantada. Unha variedade de realidades que resultou moi enriquecedora.

 A xornada, guiada por Noelia Fabello, Concelleira de Somos Cambados, tiña un  carácter técnico e abarcaba dúas areas principais. Por unha banda cuestións de dereitos fundamentais que afectan aos Concelleiros e Concelleiras e as fórmulas adecuadas  para exercelos e defendelos correctamente  ante os abusos de certos gobernos locais  absolutistas, impartida pola abogada Tania Varela, que leva temas legais de varias agrupacións. A segunda  parte, impartida polos membros de Somos Ribadumia Patricia Oubiña, Enrique Oubiña e Sergio Soutelo,  buscaba clarificar conceptos no relativo ás Contas Municipais dende Orzamentos a Contas xerais pasando polas distintas  formas de modificación de crédito existentes, ao tratamento da documentación relativa a estas cuestións, a veces complexa de interpretar, e  xa con todos os participantes expor diferentes enfoques a hora de construír estratexias, partindo do Modelo Ribadumia, para desenvolverse no día a día ao longo do mandato dunha maneira achegada á veciñanza, e ao tempo  elaborar e levar á práctica proxectos políticos pegados á veciñanza e á realidade local.

   Dende Somos Ribadumia a nosa satisfacción coa acollida e desenvolvemento da xornada é completa, confirma que a nosa aposta por este tipo de actividade foi acertada, e tamén unha realidade que expresou moi ben o noso Concelleiro “ a política real está no movemento  municipalista. Unha política seria, práctica, apegada aos problemas da veciñanza e que busca e propón solucións dende o pragmatismo e as situacións reais, en contraposición co tacticismo e as estratexias dos “grandes” partidos, con fórmulas ocas de titular e foto que o único que buscan son os votos para acceder aos centros de poder, pero que non buscan realmente solucións aos problemas da nosa veciñanza, e aí temos a financiación local como exemplo. Durante décadas os grandes partidos preferiron manter un sistema no que os concellos dependesen das deputacións, da Xunta e do Estado, en lugar de garantir unha verdadeira autonomía local, económica e política. Así poden seguir controlando os recursos e, con eles, os tempos e os silencios de moitos alcaldes e alcaldesas”. Visto o resultado positivo,  anunciamos a nosa intención de volver repetir experiencia dentro dun ano, e traballar por asentar estas xornadas municipalistas no tempo.

   Para rematar, amosar o noso agradecemento en primeiro lugar ás persoas participantes, que ademais coa súa implicación fixeron  posible que a xornada fora no ambiente constructivo que tivemos. A Agora Galicia e a Somos Cambados pola súa colaboración, e as relatoras e relatores da xornada, polo seu esforzo e dedicación.