• Ribadumia conta con escudo propio, mais non con bandeira, a pesar de constar o seu rexistro na Deputación.
• O libro de estilo é unha ferramenta moi útil para adecuar as comunicacións municipais as redes sociais e para dar coherencia á imaxe pública do Concello.
• Tamén propoñemos un libro de estilo para a Festa do Viño Tinto e que se protexa legalmente  a iconografía propia desta Festa.

  Dende Somos Ribadumia temos constatado que hai cuestións relativas a imaxe institucional do Concello que requiren actualizarse, por moitos motivos, polo que pesentamos nas últimas semanas dúas mocións relacionadas con esta cuestión.

  Por unha banda está a cuestión da bandeira do Concello. Ribadumia conta cun escudo heráldico oficial aprobado pola Xunta de Galicia o 5 de setembro de 1991 e publicado no DOGA o 16 de setembro dese mesmo ano. Porén, a pesar de que no arquivo da Deputación figura que o Concello aprobou unha bandeira  no Pleno Municipal o 23 de febreiro de 1990, onde figura a seguinte descripción, “De azur (azul) con un bezante de oro y seis estrellas de plata dispuestas cuatro en jefe y dos a los lados del bezante”, non encontramos constancia no DOGA da súa aprobación pola Xunta de Galicia nin consta o seu uso en ningún momento.

  Dende Somos Ribadumia consideramos que un Concello debe contar cun escudo, máis tamén cunha bandeira oficial que sosteña ese escudo ou que, como no caso da suposta bandeira aprobada no seu momento, recolla o esencial dese escudo e da identidade do noso Concello, que poida figurar nos edificios públicos e no Salón de Plenos como espazo onde reside a vontade popular, e usarse en eventos e en xeral en todo tipo de actos protocolarios.

  Consideramos pois,  que sería  do mais interesante que o Concello se dotara dunha bandeira oficial. No caso de contar con unha, que se oficialice o seu uso, e en caso de que o suposto proceso de aprobación non quedara completado, que se recupere e se leve a cabo para que Ribadumia poida dispor dunha bandeira oficial, aproveitando incluso para renovar e actualizar se se considerase o deseño desa bandeira, que debe ser representativa do noso concello. E esa foi a proposta que presentamos co obxectivo de que se debata en Pleno Municipal.

Por outra banda está a cuestión da imaxe institucional do propio Concello e das comunicacións públicas do mesmo. Anos atrás esta comunicación limitábase aos bandos municipais, anuncios en prensa ou nos Boletíns Oficiais, e pouco máis. Hoxe en día, ademais de todo iso,  a paxina web do concello e as súas  redes sociais convertéronse   mecanismos de continuo diálogo entre a administración local e a cidadanía. E nese aspecto as persoas que xestionan eses espazos dixitais deben entender cal é a posición do Concello, a súa seriedade e formalidade en tanto que falamos dunha institución pública, e ter uns mecanismos de comunicación que garantan esa corrección, que ademais deben ser independentes dos vaivéns da política. Tamén debe terse moi claro que cousas se deben publicar nas redes do Concello e que cousas non se deben permitir neses espazos, como comentarios ofensivos ou ataques persoais ou á propia institución.

    É evidente a pouco que se miren as redes sociais do Concello que a ausencia dun manual de identidade institucional así como a carencia dunhas indicacións básicas para o uso da imaxe oficial do Concello e para comunicarse a través das redes, tendo en conta que as persoas responsables das áreas que afectan a isto, dende a elaboración de carteis ata as comunicacións do día a día nas redes,  moitas veces son persoas con contrato eventual, ou sen formación en comunicación,  impide  transmitir unha imaxe institucional homoxénea  do noso Concello, co correcto e necesario coidado nas comunicacións, e supón un obstáculo na mellora da comunicación coa cidadanía, que as veces non sabe se está lendo unha mensaxe dunha institución pública ou de alguén pasaba por diante o ordenador e escribiu o que lle pareceu.

   Por todo o exposto, consideramos que a  renovación da imaxe institucional, co seu conseguinte manual de comunicación, é imprescindible para avanzarmos cara unha administración pública actualizada aos tempos, que aposte na mellora das comunicacións e faga un esforzo maior na transparencia activa de cara á veciñanza. Por este motivo outra proposta que trasladamos a alcaldía para que a someta a debate plenario, é a creación dese libro de estilo, que dea homoxeneidade a imaxe pública do Concello de Ribadumia, e incluso que actualice a simboloxía oficial. Unha proposta ademais que tampouco e nada novidosa, pois moitos son os Concellos que contan cun libro de estilo que facilita enormemente o traballo das persoas que traballan tanto cuestións de deseño como na comunicación deses concellos, por exemplo o de Pontevedra, o de Boiro ou o de Negreira, que ademais de actualizar a súa imaxe corporativa recentemente teñen na súa web un completo manual de identidade corporativa e incluso un deseño oficial para a cartelería de obras, e do mesmo xeito outros concellos de Galicia como o de Santiago  de Compostela ou Tomiño,  pero tamén de fora de Galicia como por exemplo o de Collado Villalva, apostan por establecer guías  de comunicación moi completas, que son de gran axuda.

  Ademais do anterior, a proposta fixémola  de maneira extensiva á Festa do Viño Tinto do Salnés e Exaltación de Variedades Autóctonas. A Festa xa ten protexido o seu nome na Oficina de Patentes e Marcas, pero tendo en conta a importancia deste evento, moi asentado no noso Concello e na comarca, e que conta coas súas peculiaridades, consideramos que sería interesante establecer sobre o papel esas peculiaridades, dende a simboloxía que se usa no etiquetado das botellas que se presentan ao concurso a paleta de cores e tipos de letra que se usa para a cartelería e elementos promocionais, e no seu caso protexer legalmente aquilo que se queira manter como parte da imaxe propia da festa.

• David Castro ordenou o derribo do local onde se encontra Protección Civil, e como alternativa mandaos para a Casa de Cultura de Besomaño, que non está adaptado nin conta cos servizos mínimos.
• Dende Protección Civil opóñense á medida por non contar cunha alternativa viable, e advirten de que se pode disolver a agrupación.
• David Castro consuma a súa vinganza logo de anos reténdolles cartos, e manténdoos nun local en pésimas condicións.
• A veciñanza de Besomaño, quedará sen local social ao quedar este ocupado por Protección Civil.

En silencio, sen levar a decisión a Pleno e ocultándollo á oposición e a opinión pública, David Castro está a punto de culminar coa, escusa dunha obra a súa vinganza contra o colectivo de Protección Civil, e rematar de liquidar á unha das agrupacións máis numerosas da comarca, só dous anos despois de irse facer fotos con eles no seu 25 aniversario, e só nove meses despois de saír na entrega de novos carnés do colectivo dicindo, citamos literalmente “O mínimo que podemos facer dende as administracións é recoñecer o voso esforzo e valentía e poñer todos os medios á vosa disposición”.

Pois para David Castro, “poñer todos os medios á vosa disposición” significa expulsar á agrupación da súa sede, sen darlles unha alternativa viable, condenadoos á súa disolución.

Esta semana o goberno “pasou recado” , pois nin sequera houbo unha comunicación formal, á agrupación de Protección Civil de que foran sacando as cousas da sede actual. Anteriormente houbera unha reunión onde se lles propuxo o traslado ao local social de Besomaño, pero dende a agrupación, segundo lle comunicaron a Sérgio Soutelo na reunión que mantivo onte con eles, non aceptaron a proposta, non porque non queiran moverse, senón porque o local proposto nin está ben situado nin reúne as condicións mínimas para ser usado por unha agrupación destas características.

Dende a nosa formación entendemos que antes de sacar a un colectivo como este da súa sede, cómpre dispor dunha alternativa viable, isto é, un local que estea adecuado para esa función. A este respecto hai que recordar que o local que se construíu para acoller ao banco de alimentos e o ropeiro municipal foi deseñado, e no concello constan os planos, para dotar nun primeiro andar a sede de protección Civil, esa si deseñada contando coa colaboración e posterior aprobación da directiva da agrupación de Protección Civil. De feito o tellado desa instalación está realizado de maneira provisional pensando na súa retirada para dar lugar ao andar que falta. A obra estaba prevista para o ano 2019, pero David Castro destinou os cartos a outras cuestións e desistiu de facer a parte que falta e dotar a esta agrupación dun espazo en condicións adecuadas.

Se a proposta do goberno é levar a agrupación para Besomaño, antes terán que adecuar o local, e explicarllo aos veciños e veciñas desa parroquia, a primeira de Ribadumia que perde un local social.

A escusa é a construción dun aparcadoiro, que conlevará o peche do actual entre o colexio e o campo de fútbol déixando ao Umia cun espazo de aparcadoiro ridículo onde dificilmente entrará ducia e media de coches. Este derrube do único local propio que ao Concello lle queda no centro de Barrantes, e a posterior adecuación do espazo non estaba prevista no proxecto das obras que se están realizando na rúa Condesa, polo que vai supor un aumento, outro máis, do custe para o Concello, que terá que pagalo con fondos propios gracias á falta de previsión e ao estado de improvisación continua na que vive o goberno local. Ademais vaise facer o aparcadoiro nunha contorna educacional, pois o ximnasio que está na mesma parcela, ademais de que o usa o colexio, alberga o Plan Madruga, o comedor escolar e a Escola de Ocio, así como outras actividades municipais, co cal David Castro pretende alonxar o perigo para nenos e nenas en horario lectivo dun punto e achegalo no outro, en horario lectivo pois o ximnasio úsao o colexio , e cando se realizan actividades municipais, a maioría con nenos. Un despropósito absoluto.

Outro colectivo díscolo que David Castro intenta sacar do medio.

Pero no fondo isto non deixa de ser unha escusa pagada con fondos públicos para que o señor Castro poida cumprir as súas vinganzas persoais. Porque o que pretende realmente é que o colectivo de Protección Civil desapareza ou marche de Ribadumia, como xa fixo antes e sigue facendo con outras entidades como ESMAR, á que lle negou o mesmo local no que agora di que quere albergar a Protección Civil, por non falar da guerra aberta contra o departamento de servizos sociais ou os ataques xudiciais a unha traballadora do concello, a veciños particulares e mesmo ao noso partido e ao noso voceiro Enrique Oubiña.

Neste caso concreto resulta que esta non é a primeira xogada que lles fai. Anteriormente castigounos sen acceso a auga pública nas instalacións durante dous anos, tamén lles retivo a axuda do ano 2022 e 2023, e como explicaron dende a propia agrupación dende o 2021 tiveron que limitar as actuacións nas que participan no noso Concello porque David Castro incumpre a normativa pola cal a agrupación debe ingresar o que se lle cobra polo servizo ás aseguradoras dos vehículos en caso de accidentes ou a outros concellos cando solicitan a participación desta agrupación ante calquera cuestión ou evento.

O que nos traslada este colectivo é o seu cansanzo ante as actitudes de David Castro, e advirten de que se pode disolver a agrupación se o trato non se corrixe, se lle dota dunhas instalacións adecuadas antes de sacalos de onde están, e se lles dan un mínimo deses recursos que David Castro tanto alardeou de que era o mínimo que había que darlle.

Pola nosa banda só podemos lamentar a actitude chulesca, absolutista e demagóxica de David Castro, que excede calquera medida no comportamento que debe ter un alcalde. E dende logo non podemos aceptar que sen comunicalo, sen levalo a pleno, sen falalo coas partes afectadas, non só Protección Civil, tamén a veciñanza de Besomaño que queda sen local social, e os colectivos que de cando en cando facían uso dese local, decida de maneira unilateral e totalitaria usar un local público para un fin para o que non está preparado, deixando á veciñanza desa parroquia sen ese local, e enterrando alí á agrupación de Protección Civil, sen ter preparado o local adecuadamente, unicamente como medida de presión á ver se marchan do Concello. De pura vergoña.

• A obra rematouse en marzo, pero o punto limpo segue pechado meses despois.
• Disparouse o uso incorrecto dos contedores de lixo, e o abandono de enseres na rúa.
• O Concello tampouco actúa ante o que queda tirado na vía pública, dando unha imaxe lamentable.
• David Castro non da explicacións.

  O retraso sobre a reapertura do punto limpo municipal, sobre o que David Castro non quere dar explicacións, está motivando toda unha serie de inconvintes innecesarios, así como usos incorrectos dos contedores e en xeral un aumento da imaxe de suciedade no noso concello e das queixas veciñais.

  A obra do punto limpo, valorada en preto de 300.000€ ficou rematada no pasado mes de marzo, pero dende entón por alí non volveu ninguén, e o punto limpo, que se pechou o pasado novembro,  segue pechado.  A cuestión saíu a relocer nos dous últimos plenos, pero o señor Castro non deu nin explicacións do retraso nin data de reapertura.

   O resultado disto é un retroceso logo de anos de concienciación sobre a importancia de levar os materiais de obra domestica, mobles, enseres e en xeral todo o que non ten cabida nun dos contedores habituais ao punto limpo. A veciñanza que en principio gardaba ese material agardando unha pronta reapertura xa se cansou fai tempo, e levamos meses detectando un aumento de enseres e lixo de todo tipo que queda tirado na vía pública, en ocasións ao lado dos contedores, as veces dentro cando non corresponde, provocando incidencias de todo tipo, dende pequenos lumes ata a incapacitación  do contedor por estar cheo de restos de obra, por exemplo.

   Dende Somos Ribadumia temos claro que non podemos pedirlle a veciñanza que teña uns comportamentos cívicos sen dotarlle os mecanismos para actuar correctamente. Ademáis, aínda que o Concello dispón dun camión para a recollida de enseres voluminosos, nin se publicita o servizo correctamente, nin tampouco está xestionando de maneira eficiente, provocando que moitas veces enseres de maior volume estean días na rúa, precisamente por esa falta de eficiencia na recollida.

  Tampouco se están recollendo os materiais de todo tipo que a veciñanza deposita ao carón dos contedores, e temos detectado un caso dun contedor mediado de restos de obra, que os operarios do lixo non poden volcar no camión da recollida, tendo que facer o valeirado das bolsas manualmente dende fai semanas, pero o goberno local, que obviamente está ao tanto, non manda tampouco a ninguén a recoller eses restos e deixar o contedor operativo.

Así pois, ante un problema provocado polo propio Concello acometendo unha obra que ninguén lle pediu, o propio goberno local de David Castro actúa con completa desidia, deixando todo abandonado.

 E todo isto súmase a problemas anteriores, como a falta de contedores suficientes, sobre todo de recollida selectiva,  en varias zonas do concello que provocan que metade da semana o cartón e plástico se acumulen no chan e arredor deses contedores, dando unha imaxe moi lamentable, unha situación que se fai moi relevante no centro de Barrantes,  ante o pasotismo de David Castro, que xa denunciamos en anteriores ocasións xunto á absurda distribución das  xaulas postas para disimular a presenza dos contedores, que en varios lugares resultaron ser mais pequenas que o grupo de contedores que tiñan que tapar, quedando algúns contedores fora das mesmas.

  E resumo, a xestión do lixo, como acontece co resto, adoece do mesmo problema de desidia e abandono político que o resto de áreas do Concello. E é unha xestión que estamos pagando. Non debemos esquecer que toda a veciñanza, os locais hostalerios e as empresas pagamos unha taxa de recollida de lixo, que irremediablemente se vai ver afectada pola suba do canón de SOGAMA aprobada esta semana, polo que non é aceptable que a veciñanza pague por este servizo e o Concello estea dando unha imaxe tan lamentable dia si e dia tamen.

Pedimos a David Castro que se reabra o punto limpo de maneira inmediata, e se non é posible que dea a cara e aporte as explicacións necesarias de porque esta o punto limpo pechado a estas alturas e como vai repercutir o aumento da taxa de SOGAMA  na veciñanza,  e que  resolva os problemas que o noso concello ten na xestión do lixo, dote contedores onde sexa necesario e en xeral que  deixe de mirar para outro lado.

• 1.500 € por “desatención a un requirimento de Augas de Galicia en materia de verquidos”.
• David Castro non atende ás súas obrigas como alcalde, pero as multas páganse con cartos  da veciñanza.
• Outros imcumprimentos documentados: varias deficiencias da rede de saneamento e pluviais sen resolver.

  Outras cuestións ante as cales David Castro non quixo responder no pasado Pleno foron relativas a temas de verquidos e saneamento.

   Unha delas foi a multa posta por Augas de Galicia por, citamos literalmente, “desatención a un requirimento de Augas de Galicia en materia de verquidos”. Dita multa foi interposta porque ante a detección dun verquido a un regato na parroquía de Sisán, e posterior comunicación ao Concello, David Castro mirou para outro lado, caendo noutro episodio de deixadez de funcións.

  A cuantía da multa, 1.500€, quizais ao señor Castro non lle pareza moi alta, pero moito ou pouco, vaise pagar cos cartos de toda a veciñanza, unicamente pola súa desidia e abandono das súas obrigas como alcalde.

   De feito, no propio expediente de Augas de Galicia certifícase que o Concello nin sequera se molestou en presentar alegacións ante a interposición da multa, o cal demostra que David Castro preferiu pagar antes que traballar e resolver un problema.

As preguntas concretas que se presentaron por esta cuestión, foron as seguintes:

• Por que motivo alcaldía non actuou ante o requirimento de Augas de Galicia?
• Porque motivo o Goberno de Ribadumia non atende as súas obrigas na cuestión do control de vertidos?
• Porque motivo a veciñanza de Ribadumia ten que pagar cos seus impostos multas motivadas polo abandono da alcaldía das súas funcións?

É evidente que para respondelas non era necesario realizar ningunha consulta de documentación, e dende logo eran preguntas de fácil comprensión, ademais a data da comunicación  definitiva da multa é do 1 de marzo, así que tampouco é que o señor Castro non tivera tempo para pensar no asunto. David Castro non quixo respondelas para evitar dar a cara publicamente.

Deficiencias na rede de saneamento.

O verquido ante o cal David Castro non actuou rematando cunha multa non foi a única cuestión mediambiental ante a cal o alcalde non quixo dar explicacións no Pleno. Sergio Soutelo tamén presentou preguntas relativas a outra comunicación de Augas de Galicia, con data do 5 de maio, dous meses antes do pleno,  onde se informaba de varios problemas na rede de saneamento, e concreto un total de cinco incidencias  por entrada de augas pluviais á rede de fecais.

Desas cinco incidencias, catro tiñan a categoría de prioridade moi alta, ou sexa  que  debían resolverse de maneira inmediata, e unha de prioridade baixa que tamén requiría dunha solución, non tan inemediata pero si urxente. De feito no propio  informe urxíase á solución de todas estas incidencias. A David Castro Sergio Soutelo preguntoulle o seguinte:

• Están esas deficiencias solucionadas a día de hoxe? ( 4 de xullo)
• Se non fora así, cal é o motivo?

David Castro tampouco respondeu esta pregunta, sendo ben sinxelas de responder, polo que cabe supoñer que as deficiencias, cando menos no día no que se celebrou o Pleno, o 4 de xullo, estaban sen resolver. Esta falta de capacidade de actuación, ou máis ben desidia deliberada, podería carrexar máis multas ao Concello de Ribadumia, algo para nos inaceptable.

  E todo isto expoñémolo sen entrar na cuestión mediambiental, pero é evidente que permitir verquidos a un río, ou non resolver os problemas da rede de saneamento axudando así tanto a que se produzan verquidos da rede como á saturación das depuradoras de augas residuais, é un comportamento totalmente deplorable nun alcalde.

 Pedímoslle a David Castro que cumpra coas obrigas do seu cargo. Se non quere ou non é capaz, que dimita, pero mentres se decide cando menos que faga fronte ás multas cos seus propios cartos, pois a veciñanza non ten porque cargar con cuestións froito da súa irresponsabilidade e desidia.