• David Castro comprometeu que o estacionamento para os buses estaría operativo ao comezar o colexio, pero nin de lonxe.
• Rematar o aparcadoiro aínda pode demorar de tres semanas a un mes.
• David Castro, desaparecido, non aclara se vai prohibir o acceso ao Campo de A Bouza ao colexio.
• Nais e pais piden ao alcalde que dea a cara e explique como vai quedar a contorna do colexio e cal e como vai ser o uso dos diferentes espazos.

  David Castro declarou aos medios de prensa o pasado 2 de setembro que o aparcadoiro de buses que se esta realizando nunha finca da rúa condesa  estaría listo “se non nada máis comezar o curso escolar – 11 de setembro –,  si a primeira semana”.  Pois estamos a 20 de setembro, e o aparcadoiro está practicamente igual que estaba o día que David Castro sacou peito presumindo dunha rapidez que non é acorde á realidade. 

     Non é unicamente que o aparcadoiro estea sen rematar, cousa que visto o estado das obras, vai ser difícil que aconteza antes de que pasen tres semanas ou un mes, sendo optimistas. Porque o problema non reside no aparcadoiro, o problema está agora mesmo no caos de tráfico que temos en Barrantes a primeira hora, provocado por unha obra iniciada en maio  que se tería que ter completado no verán pero que avanzando setembro segue sen rematarse porque a empresa non parece ter moito apuro – a pesar do optimismo do presidente da Deputación – nin ten a ninguén que lle meta presa.

   Hai que ter en conta, que ademais dos problemas habituais dunhas obras destas características, ampliados neste caso pola súa localización nun punto complicado, na contorna do colexio reduciuse sensiblemente o espazo para aparcar, o cal está orixinando moitos problemas e unha grande situación de inseguridade para os nenos e nenas nas horas punta, á entrada e saída do colexio. E ata onte tivemos bo tempo, con choiva a situación empeora e moito.

   Dende Somos Ribadumia temos claro que as obras sempre supoñen un incomodo, pero tamén temos claro que con boa xestión o incomodo pode reducirse, pero fai falla un goberno que estea ao que ten que estar. De partida a obra deberíase ter planificado moito mellor, e con outros prazos;  iso non aconteceu, polo que se tiña que ter traballado para que a obra ao chegar o inicio de curso, en caso de non rematarse, non supuxera problemas; como tampouco pasou iso. Compre agora  dar alternativas ás nais e pais e ordear o tráfico de maneira que se poida na medida  do posible garantir a seguridade. Pero por desgraza temos  que lamentar unha vez máis a desidia dun alcalde que só aparece pola obra cando ven o presidente da Deputación, e que só aparece para facerse fotos e mentirlle a cidadanía con promesas que logo fican sen cumprir como que a inicio de curso os buses ían ter o aparcadoiro listo e os nenos un acceso algo máis seguro ao colexio ,

     E non só iso. David Castro debe aclarar, unha vez rematada a obra, que vai pasar coa explanada onde aparcan agora mesmo os buses, e  se é certo que pretende prohibir ao Colexio que faga uso do campo de A Bouza, e nese caso onde van realizar as actividades e os recreos os máis de 500 nenos e nenas do CPI Xulia Becerra Malvar, do mesmo xeito que debe explicar como vai garantir a seguridade de nenos e nenas no paso entre o colexio e o edifico onde esta o ximnasio e a aula onde se realizan as actividades de conciliación e o comedor escolar. Cónstanos que pais e nais solicitaron que o alcalde dera cara e explicara cal é o seu plan para a contorna do colexio unha vez rematada a obra en marcha, pero parece ser que o señor Castro non ten moitas ganas de reunirse coa comunidade escolar, algo que lamentamos pois un alcalde debe estar á disposición de todos os  colectivos do Concello, con mais razón cando se trata de temas desta importancia.

• A convocatoria do Pleno Ordinario non se realizou en prazo, e David Castro optou por suspendelo, pero non o volveu convocar correctamente.
• Culpou a Sergio Soutelo por presentar un escrito, pero nada lle impedía convocar o Pleno para os dias seguintes.
• A verdade: David Castro intenta evitar dar a cara e responder ás preguntas de Sergio Soutelo. Spoiler: non vai colar.

Dende Somos Ribadumia non saímos do noso asombro ante o último despropósito de David Castro. En verbas de Sergio Soutelo, “o resume sería que primeiro non convocou un pleno do que sabia a data dende fai dous anos, logo convocouno fora dos prazos legais, , logo de convocalo suspendeu a convocatoria sen avisar a ningún dos partidos da oposición, e por último, podendo convocar o Pleno para un día máis tarde, unha semana despois segue sen convocarse e non se ve intención de que o vaia facer”. Como ademais, non contento con facer o ridículo cunha moi burda estratexia para evitar realizar un Pleno que é obrigatorio por lei, aínda tivo a ben culpar a Somos Ribadumia, queremos deixar constancia dos feitos.

De partida compre remarcar que os Plenos Ordinarios, cuxa data está definida por acordo municipal, deben convocarse con un mínimo de dous días hábiles de antelación. Neste caso o Pleno tiña que terse convocado, como moi tarde, o martes día 3, antes das 21:00 horas. Non foi así. “Nin se convocou nin se nos comunicou que houbera ningún problema, e non será porque non teñan o noso número de teléfono”. Ese martes pola tarde, tamén forzando o prazo legal, tiveron lugar as Comisións Informativas previas. Nelas, ante preguntas dun concelleiro da oposición informouse “que ningún dos sete concelleiros e concelleiras do Partido Popular, tres deles con liberación, incluído o alcalde, “se dera conta” de que o Pleno estaba sen convocar. Isto di moito da preocupación polo traballo destas persoas para o caso de que iso fora certo, cousa que dubidamos”. A solución proposta pasaba por convocar o Pleno ese mércores pola mañá e poñer tamén ese mércores a documentación a disposición da corporación, deixando así á oposición sen tempo para consultar a documentación do Pleno. Por este motivo Soutelo presentou un escrito “ deixando claro que o alcalde é o único responsable de que se convoquen os Plenos e ten a obriga de velar porque o proceso se faga correctamente e dentro dos prazos, que as escusas postas non son aceptables, e que ademais me deixaba nunha situación de incapacidade para realizar correctamente o meu traballo como Concelleiro. Por suposto pedinlle que cumprira a lei e suspendera a celebración do Pleno, pero a responsabilidade sobre esa decisión, por moito que intente cargarma a min, foi unicamente del. Ademais nós somos coherentes coa nosa maneira de entender a política, os máis prexudicados coa suspensión deste Pleno somos nós, por diversos motivos, pero preferimos antepoñer os funcionamentos democráticos e a favor da veciñanza aos intereses partidistas”.

O señor Castro tiña a opción de facer o de todos os plenos, que é ignorar a lei e os escritos de Sergio Soutelo e seguir adiante coa convocatoria, ou no seu defecto, no canto de convocalo para o xoves, facelo para o venres, ou incluso para a semana seguinte, cumprindo así os prazos e evitando retrasar a celebración do Pleno,.

Pero no canto diso, o que fixo David Castro o mércores da semana pasada pola mañá non ten xeito nin dereito. Tendo o escrito de Sergio Soutelo pedindo que se suspendera o Pleno enriba da mesa dende que abriu o Concello, primeiro convocou o Pleno como se non pasara nada e ignorando ese escrito, como fai sempre, pero despois optou por suspender o Pleno, achacando a decisión ao noso Concelleiro, sinalando a Sergio Soutelo como responsable da súa propia ineptitude como alcalde. Non contento con iso, ocultou a comunicación da suspensión do Pleno aos concelleiros e concelleiras, evitando avisar e usando unha trampa xa vella a conta da sede electrónica, de tal maneira que ese mércores pola tarde a maior parte dos concelleiros e concelleiras da oposición descoñecían que o Pleno fora suspendido, ata o punto de que o xoves pola mañá, o propio día que inicialmente estaba convocado o Pleno, dende o Concello estiveron chamando aos concelleiros e concelleiras da oposición para avisarlles da suspensión do mesmo.

Parécenos importante recalcar que este non o primeiro escrito que presentamos por cuestións relativas a Plenos nos últimos meses, dende retiradas de puntos da Orde do Día, en base aos mesmos principios legais, á solicitude de aprazamento dun Pleno que realizamos en decembro pasado cun motivo moi xustificado, e que David Castro ignorou, para despois marchar de vacacións e non presentarse a ese mesmo Pleno, algo para nos indigno. E resulta importante porque todas as solicitudes foron sistematicamente rexeitadas, salvo unha relativa á modificación do PXOM, que aceptou por interese propio, e esta última a relativa ao Pleno que tiña que celebrarse este xoves.

Dende Somos Ribadumia non somos tan ilusos como para pensar que David Castro, que vive na confrontación continua, que non nos entrega a documentación que lle solicitamos en prazo nunca, e iso cando a entrega, e que se salta a legalidade vixente en cada Pleno, de repente suspenda un Pleno porque llo pedimos nós.

A realidade é que David Castro non quería realizar este Pleno, que tiña orquestada toda a procesión, dende o primeiro paso ata o último, e que unicamente se serviu do noso escrito para xustificar a suspensión dun Pleno que xa tiña previsto suspender, como resulta evidente polas formas e os feitos, bloqueando as comunicacións e enredando coa sede electrónica.

E se quedaban dúbidas, aquí están os feitos para confirmalo: unha semana despois o Pleno non foi convocado, nin se informou de cando se vai realizar. David Castro deberá explicar cal foi o motivo de fuxirlle á oposición desta maneira, e que pretendía ocultar ou evitar nese Pleno, aínda que nos temos claro que o que pretende evitar é enfrontarse a Sergio Soutelo e responder ás preguntas de Somos Ribadumia.

Esiximos a David Castro que convoque de maneira inmediata o Pleno que tiña que terse celebrado o pasado 5 de setembro, e por suposto coa mesma orde do día prevista.

• Este mes vai eliminar o posto de auxiliar administrativa nese departamento, prexudicando así a todas as persoas usuarias.
• David Castro non renova o contrato da persoa que ten ese posto como vinganza, e non o quere cubrir a vacante tamén por vinganza.
• De novo no xulgado por cuestións persoais e por non facer ben as cousas.
• Pretende contratar unha segunda traballadora social para saltar por enriba da actual.
• Queixas veciñais continuas polo despacho do educador familiar.

  Dende Somos Ribadumia queremos por de relevancia a situación á que David Casto pretende levar o departamento de servizos sociais, nas súas ansias por controlar politicamente a xestión de determinadas cuestións relacionadas coa emerxencia social e outras axudas municipais.

   Esta semana comunicóuselle á persoa que realiza as funcións de auxiliar administrativa dese departamento que non se lle vai renovar o contrato ao remate deste mes. Isto non sería nada relevante senón fora por dúas cuestións. A primeira que esa persoa ten precisamente xudicializado o seu contrato e a súa situación laboral no Concello de Ribadumia. Outra vez David Castro no xulgado por non facer ben as cousas e por cuestións personalistas, como é castigar a unha persoa por defender os seus dereitos laborais, por non entrar en máis fonduras. Nós non imos caer en xuízos de valor, pero dende o noso punto de vista os Concellos e os alcaldes  deben ser exemplares no trato igualitario e na aplicación do dereito laboral, polo tanto é moi preocupante ver como David Castro non sae dos xulgados con temas deste tipo, pois non esquezamos que mantén xudicializado o dereito á indemnización por accidente dunha traballadora xa xubilada á que primeiro quixo sacarlle parte da súa pensión. Por certo, un proceso xudicial que xa leva arrastrados uns cantos miles de euros en avogados que paga a veciñanza de Ribadumia.

   A segunda cuestión ten que ver coa atención á veciñanza. A vacante do posto desa auxiliar administrativa, tal como figura no orzamento e se lle comunicou aos sindicatos, non se vai cubrir, deixando a  Servizos Sociais sen ese apoio hoxe por hoxe imprescindible para poder facer fronte á cada vez maior burocracia nun departamento que xestiona todo tipo de situacións e axudas, como as axudas de dependencia, as de emerxencia social, ou a Tarxeta Benvida, ademais de dar tamén cabida aos servizos do CIM. E non o dicimos nós. O educador familiar e a traballadora social presentaron un escrito solicitando que se cubra ese posto por ser imprescindible precisamente debido ao volume de traballo que se xestiona, entre outras cuestións. Ademais o posto está cofinanciado pola Deputación, a través dunha liña que precisamente ten como obxectivo apoiar o reforzo dos servizos sociais comunitarios, polo que ao non cubrirse a praza o Concello perderá eses fondos e, en resumo, un posto de traballo necesario e que ao concello non lle está custando cartos, o cal implicaría perder por segunda vez un posto subvencionado para o departamento de servizos sociais, pois non esquezamos que fai tres anos renunciou a unha axuda económica de 115.000€ que permitirían, sen gastar un euro das arcas municipais, contar cunha persoa para programas de integración.

    Ademais de non renovarse ese posto, nos orzamentos tamén figura a incorporación dunha segunda traballadora social, e de feito así se comunicou aos sindicatos.  A este respecto en primeiro lugar recordarlle a David Castro a obriga de contratar seguindo a lista de emprego local existente, e que non pode contratar a dedo. Máis aló disto, dende Somos Ribadumia consideramos difícil de entender a necesidade de incorporar unha segunda traballadora social cando por outro lado se pretende recortar o persoal administrativo de apoio, porque o que vai acontecer é que o departamento vai caer, outra vez,  no caos máis absoluto. Recordemos que durante case dous anos o departamento estivo sen a traballadora social e sen o educador familiar, precisamente por cuestións relativas a presións políticas, e o caos foi completo, con numerosos problemas.

   Por outra banda, e isto posiblemente sexa o máis grave, a intención de David Castro é usar a esa segunda traballadora social para puentear á existente, coa que mantén o seu  enfrontamento, e deixala coas mínimas funcións, unha práctica que xa vimos con outros postos de traballo. Isto obedece as intencións de David Castro de manexar politicamente o departamento de servizos sociais, que precisamente está separado do Concello para favorecer a intimidade das persoas usuarias e evitar as inxerencias políticas, en particular as de David Castro e o seu equipo, moi dados a vender como favores ou intentar bloquear determinadas cuestións que non deixan de ser servizos que dan as administracións públicas para axudar as persoas ante situacións complicadas, e coas que non se debe andar a xogar nin moito menos usar politicamente.

  E no medio disto, case cada semana entran no Concello escritos da veciñanza solicitando que se cambie ao educador familiar de despacho porque onde está, como denunciaron os sindicatos e nós mesmos,  non cumpre cos requisitos mínimos necesarios nin para que esa persoa poida desenvolver o seu traballo en condicións minimamente dignas, nin para atender as persoas, en particular ás que teñen algunha discapacidade ou acoden ao departamento acompañadas de nenos en carriño, por certo, habendo un despacho baleiro no mesmo local. Outro dos castigos persoais de David Castro a un traballador cuxas consecuencias as paga a veciñanza.

   Dende Somos Ribadumia, non podemos admitir que se politicen os servizos sociais, nin que o alcalde pretenda decidir en base ao seu criterio persoal  a quen se lle dan ou non se lle dan determinadas axudas, e esixímoslle a David Castro que cese nesas actitudes, restaure o normal funcionamento do departamento de servizos sociais, e por suposto que manteña o  persoal necesario para que a veciñanza reciba a atención que precisa da maneira que precisa, e sen intrusionismo político.

• A Xunta anunciou obras en colexios de toda a Comarca, pero Ribadumia non figura.
• En Xaneiro o Conselleiro anunciou a redacción do proxecto de reforma integral do Colexio, da que nove meses despois ninguén sabe nada.
• David Castro, que segundo el vendeuse a cambio de supostos investimentos, cala.
• Agardamos que os investimentos anunciados hoxe si inclúan a reforma integral do CPI Xulia Becerra Malvar.

Estase a rir o PP de Ribadumia e da comunidade educativa – nenos e nenas, mestres e nais e pais – do CPI Xulia Becerra malvar? Ou só se está a rir de David Castro? Estas son algunhas das preguntas que nos facemos dende Somos Ribadumia logo de ver ao señor Alfonso Rueda este pasado luns anunciar investimentos en marcha para o Salnés e o Ullán que suman 5 millóns de euros, entre os cales figuran a ampliación do Colexio San Tome en Cambados, ( 850.000 €), do Rosalia de Castro de O Grove (2,6M €), e do Arealonga en Vilagarcia (650.000 €) , así como a reforma integral do Colexio Conmeniño tamén de O Grove (450.000€), e obras de actualización no Coirón-Dena de Meaño (300.000 €), e comprobar que entre eses investimentos non figura nin un so euro para o CPI Xulia Becerra Malvar.

Compre recordar que o pasado mes de xaneiro, o Conselleiro de Educación, Ciencia, Universidades e FP, Román Rodríguez, anunciou xunto a David Castro a posta en marcha da redacción do proxecto da reforma integral do CPI, da que non volvemos ter máis noticia, e da que nove meses despois non sabemos nin cando se vai acometer, se é que se acomete, nin o que se vai facer, nin o que vai custar.

E compre recordar tamén que o ultimo gran investimento realizado nese colexio, logo da insistencia por certo de Somos Ribadumia, converteuse na Gran Chapuza do CPI Xulia Becerra Malvar, logo de gastar 842.000€ en obras que supostamente deberían resolver diversos problemas estruturais, pero que ao final non pasaron dun simple e caro maquillaxe que non resolveu os problemas do centro, entre eles a substitución do tellado de primaria, ou o illamento do edificio de infantil, obras por certo incluídas no proxecto de reforma realizado no 2021 que inexplicablemente quedaron sen executar. De feito a chapuza foi tal un ano despois de rematada a obra, e gracias tamén á presión de Somos Ribadumia, a Xunta gastou enriba dos 842.000 € outros 40.000 € en repoñen unha cuberta para protexeraos nenos da choiva na entrada do colexio que fora retirada para as obras e que a empresa adxudicataria non volveu colocar.

Unha vez máis, dende Somos Ribadumia pedimos á Xunta de Galicia que deixe de mirar para outro lado coas necesidades de Ribadumia que son da súa competencia. Os nenos e nenas de Ribadumia teñen o mesmo dereito que os de calquera outro Concello a estudar e formarse nunhas instalación modernas e actualizadas. Estaremos moi atentos ao orzamento do 2025 e agardamos ver a partida para a redacción do proxecto da reforma integral do CPI comprometida, do mesmo xeito que agardamos ver entre os investimentos anunciados onte para os próximos catro anos unha para facer realidade esa reforma tan necesaria. De David Castro xa non agardamos nada, pero recordámoslle que non está unicamente para facerse fotos e que debe defender os dereitos da veciñanza de Ribadumia, algo que coa súa actitude compracente cara o goberno autonómico, está moi lonxe de facer.