A iniciativa tivo moi boa acollida por parte dos veciños, cun total de 101 participantes e 3 establecementos comerciais e de hostalería.

O Concello de Ribadumia, a través da concellería de Medio Ambiente, vén de solicitar a adhesión ó programa de Compostaxe Comunitario da Deputación de Pontevedra.

  Esta iniciativa xorde co obxectivo de iniciar ós veciños do núcleo urbano na práctica de compostar os restos orgánicos producidos nos domicilios, buscando  lograr unha redución do lixo que se remite a SOGAMA para a súa custosa e contaminante incineración. Para isto,  dotarase  ó núcleo urbano cun composteiro comunitario para o uso da veciñanza adherida ó Plan.

Para esta experiencia, o Departamento Técnico do Concello de Ribadumia sinalou a ubicación do Centro de Compostaxe Comunitario no núcleo urbano de Barrantes, por tratarse do núcleo urbano con máis poboación de todo o municipio.  A parcela elixida, situada na zona verde da praza do concello, conta con edificios de vivendas e baixos comerciais ó seu redor.

Experiencia piloto

  Este programa plantexase como unha experiencia piloto para o municipio, e o concelleiro de Medio Ambiente, José Ramón González Lede, agarda que “se consigan os dous obxectivos principais: a redución do impacto medioambiental que supón o transporte e posterior incineración dos residuos orgánicos, e a redución do elevado custe económico que isto supón para as arcas municipais, onde o Concello ven aportando o 50% do custe total da eliminación deste tipo de residuos. Ademais, o Concello pechará o círculo da compostaxe empregando o excedente do abono ecolóxico obtido neste proceso no mantemento das zonas verdes, parques e xardíns de Ribadumia.”

Pola súa banda, os veciños da zona, recibiron a iniciativa cunha moi boa acollida despois de que o concelleiro de Medio Ambiente se reunira cos interesados para explicarlles cómo vai ser o funcionamento do futuro composteiro comunitario. Un total de 101 veciños da zona comprometéronse a participar nesta experiencia piloto, cifra que supera amplamente o mínimo requirido por parte da Deputación para a implantación dos composteiros. Tamén se comprometeron tres establecementos comerciais e de hostalería.

Para o concelleiro José Ramón González “a intención é, sempre que os resultados obtidos sexan satisfactorios, potenciar este sistema e tratar de dispoñer máis Centros de Compostaxe Comunitario noutras zonas do termo municipal que cumpran cas características requiridas”.

  Dende Somos Ribadumia agardamos que Deputación de Pontevedra dea o visto bo e apoie este proxecto, e felicitamos o equipo de goberno e o concelleiro de medio ambiente por esta iniciativa.

O “Documento Organizativo e Carta Financeira” queda pendente dunha segunda asemblea.

   Na tarde de onte tivo lugar a asemblea programada para debater os documentos que deberían servir para asentar e organizar o funcionamento interno de Somos Ribadumia.

   Para o debate había propostos dous documentos, por una banda una carta fundacional, que expresara dalgún xeito os motivos que nos levaron a crear Somos Ribadumia e as pautas éticas e programáticas que a plataforma e as persoas que forman parte activa dela deberían seguir; e por outro lado un documento organizativo que ademais da carta financeira  establecera as bases de funcionamento interno, da asemblea, da Comisión Executiva, a figura do colaborador, etc.

   O debate, que transcorreu nun ambiente moi aberto e animado que favoreceu o contraste de ideas e posicións,  prolongouse durante mais de tres horas, e como resultado del aprobouse por consenso o Documento Fundacional, e deixouse moi avanzado o Documento Organizativo e Carta Financeira.

   Nunha próxima asemblea  pendente de concretar debaterase o que falta do documento organizativo e da carta financieira e, se procedera, elixirase a Comisión Executiva que deberá levar adiante o traballo do día a día e realizar os acordos que se tomen nas distintas asembleas.

   Hai que remarcar, ademais do respecto e carácter dialogante que mostraron todos os veciños e veciñas que se achegaron a asemblea, a capacidade mostrada para sacar adiante un documento desta importancia por consenso. Hai que recordar que todas as decisións que ata o día de hoxe tomou esta plataforma foron precisamente  “por consenso”, sen necesidade de votacións, e se algo quedou claro na asemblea de onte, é precisamente que un pilar fundamental do funcionamento de Somos Ribadumia debe ser a busca de acordos consensuados.

 

   O proceso organizativo de Somos Ribadumia segue o seu camiño.

  Logo de que o equipo de traballo redactara uns documentos de base e que estes estiveran a disposición dos veciños para que sobre eles puderades elaborar as vosas propostas, damos o seguinte paso que é convocar a Asemblea Organizativa.

Sera o xoves 21, as 20.30h no centro social de barrantes.

   Os documentos para o debate telos na pestaña de “Asemblea Organizativa”.

  Dende Somos Ribadumia animámoste como veciño e veciña do noso concello a participar nesta asemblea, que nos vai marcar as pautas para sacar adiante o noso traballo nos próximos anos.

Seguir lendo →