• Sumámonos as reivindicacións de Cambados en materia de transporte público.
• Propoñemos que o goberno local actúe e tome as medidas necesarias orientadas a que a Xunta modifique o Plan de Transporte Público.
• A nosa veciñanza precisa ter conexións cos hospitais, coas universidades que cos centros da administración.  
• David Castro, de  votar en contra do Plan de Transporte da Xunta a gardar silencio para non molestar ao PP.

  Dende Somos Ribadumia consideramos, igual que os nosos compañeiros e compañeiras de Somos Cambados, que debemos poñer un foco no problema que ten a nosa comarca, pero especialmente Ribadumia, coa practica ausencia de transporte público que nos comunique co resto da comarca, cos hospitais e universidades e coas cidades de referencia.

  A situación actual do transporte público por estrada na nosa comarca é peor da que era hai décadas. Co paso dos anos foron eliminándose liñas e frecuencias, ata o punto de deixar practicamente sen utilidade boa parte das conexións entre algúns dos concellos máis poboados do Salnés. De maneira que a existencia de determinadas liñas interurbanas parece hoxe meramente simbólica. As conexións por estrada coas principais cidades galegas tamén empeoraron notablemente, sendo inexistentes nalgúns casos e con viaxes máis longas ou duradeiras noutros. Neste  aspecto, no Concello de  Ribadumia quedamos practicamente incomunicados, e de feito non temos nin tan sequera comunicación cos dous hospitais de referencia, o do Salnés e Montecelo,  nin coas universidades e centros da administración máis próximos.

   O Plan de Transporte Público de Galicia (PTPG), aprobado polo Consello da Xunta de Galicia o 29 de novembro de 2018, lonxe de axudar a mellorar, contribuíu decisivamente a empeorar a situación do transporte público por estrada na comarca do Salnés. No momento da súa publicación no Diario Oficial de Galicia (DOG), a Consellería de Infraestruturas e Mobilidade indicaba que o PTPG “marca as directrices para lograr un modelo sostible e eficiente que se adapte ás necesidades de mobilidade dos galegos do século XXI“. Unha afirmación que, cando menos, parece afastarse moito da realidade.

   Nun momento no que estamos a abordar o reto que supón acadar os obxectivos da Axenda 2030, a política de transporte público por estrada da Xunta, e particularmente o PTPG, non lle deixa outra opción á cidadanía do Salnés que seguir empregando vehículos particulares para dirixirse aos centros de traballo (polígonos industriais), hospitais (e centros de saúde), universidades, aeroportos, estacións de tren, centros comerciais ou de ocio, etc. E así resulta imposible ter unha mobilidade sostible, na que se dea prioridade ao transporte público para mellorar a seguridade vial e reducir a contaminación atmosférica e acústica.

   Para a cidadanía do Salnés, especialmente a que vive nos Concellos máis pequenos e afastados dos centros urbanos maiores onde se encontran as sedes administrativas, as universidades e centros formativos e os hospitais, dispoñer dunha boa rede de transporte público é unha prioridade indubidable. Xunto coa vivenda, a sanidade, o ensino ou o emprego representa unha das cuestións máis importantes para favorecer a economía e mellorar a calidade de vida na nosa comarca. Xa que logo, todos os concellos do Salnés, Ribadumia entre eles, deben prestar unha atención especial ao transporte público, expoñendo as súas demandas ao respecto ante a Xunta de Galicia e traballando na medida das súas posibilidades nesta materia tan importante para o noso futuro.

   Compre recordar que xa se debateu está cuestión en Pleno, cando David Castro era supostamente independente e gobernaba da man de Somos Ribadumia e do PSOE, dando como resultado a oposición da Corporación Municipal ao Plan  de Transporte da Xunta, sendo Ribadumia o primeiro Concello da comarca en presentar alegacións. Todo isto antes do 2019. En canto David Castro colleu a maioría absoluta, como con moitas cousas, gardou silencio cómplice coas políticas da Xunta.

Seguindo esta liña de pensamento, o noso Concelleiro Sergio Soutelo presentou esta semana unha moción no Concello coas seguintes propostas de acordo:

• A Corporación do Concello de Ribadumia acorda  requirir á Xunta de Galicia,  a través dunha comunicación formal, a aumentar o número de liñas e frecuencias do transporte público por estrada entre as vilas que conformamos a comarca do Salnés, entre o noso Concello co Hospital do Salnés e de Montecelo,  e coas cidades de Pontevedra, Santiago e Vigo.
• A Corporación do Concello de Ribadumia insta á Alcaldía, na súa calidade de Presidente da Corporación, a que se nos próximos seis meses a Xunta non atende a ese requirimento, poña en marcha todas as iniciativas e  as medidas pertinentes para que a Xunta de Galicia atenda a esta demanda tan importante para a nosa veciñanza, a convocar á  Xunta de Voceiros para coordinar as accións políticas que se deban levar a cabo dende a Corporación, a  convocar aos voceiros dos partidos con representación na Corporación para que participen nas xuntanzas que se poidan producir e a dar conta en cada Pleno Ordinario das accións realizadas e dos avances producidos.

• David Castro pasou de anunciar a declaración de Festa de Interese Turístico para este ano a silenciar esa posibilidade.
• Unha festa estabilizada, pero á baixa, con cada vez menos presencia dos panadeiros e con actuacións discutibles.
• Escándalo cos fogos de artifico nunha zona incendiable pola negativa a contratar actuacións locais.

   Pasou a Festa do Pan, e parecera que David Castro quixera obviar que aconteceu. Dende Somos Ribadumia, como sempre, optamos por agardar un tempo prudencial, antes de facer unha valoración, e evitar así afectar de ningunha maneira ao evento, pero a realidade é que David Castro vai de fracaso en fracaso.

  Queremos recordar que fai un ano, o propio David Castro sacaba peito falando de “xa se está entregando documentación” para obter a declaración de Festa de Interese Turístico de Galicia, e de feito, nun medio de radio chegou a declarar que a edición deste ano xa contaría con esa distinción. Unha pasada de freada que supoñemos está detrás do silencio este ano ao respecto desta cuestión.

  A realidade é que cando fai un ano falaba de que xa se estaba presentando documentación, David Castro mentía descaradamente. O primeiro paso, que é a aprobación polo Pleno Municipal do inicio do trámite, non se realizou ata o 5 de setembro, tres semanas despois de celebrarse o Pleno. E dende ese día nunca máis se soubo, por que a realidade é que  David Castro non moveu un papel.

  Dende Somos Ribadumia consideramos unha tremenda tomadura de pelo mentirlle a veciñanza e as persoas voluntarias que colaboran na organización e desenvolvemento dese evento dicindo que se estaban facendo trámites e que xa este ano íamos ter esa ansiada declaración, cando en realidade non se estaba facendo nada. David Castro e as Concelleiras de eventos e cultura, perfectamente ao tanto tamén deste fiasco froito en primeira estancia da vagancia do goberno local, deberían desfilar en fila pola porta dos dimitidos, pero como sabemos que David Castro non ten pensado asumir ningún tipo de responsabilidade, non digamos xa o seu equipo, asumimos que a veciñanza vai seguir sufrindo a este alcalde un pouco máis.

Sobre o desenvolvemento da Festa.

Por outra banda, a propia festa da síntomas de ter pasado a súa mellor época, e empeza a adoecer de certa falta de frescura que a levan a perder asistencia de maneira paulatina. Non axudan determinadas cuestións, como o apretado das mesas e cadeiras, ou o longo dalgúns actos. Dende Somos Ribadumia recollemos queixas de todo tipo, pero hai cuestións que debemos salientar. En primeiro lugar que a algunha cabeza pensante se lle ocorrera tirar fogos de artificio moi  preto da propia festa practicente enriba da Carballeira e nunha zona particularmente seca e cun piñeiral ao carón, algo que puido provocar un importante susto. A Carballeira de Ribadumia está situada nunha zona moi concreta que fan bastante inviables cousas como os lumes de artificio por non ter unha zona segura onde lanzalos, pero iso ano noso alcalde non parece preocuparlle moito. En todo caso debemos lamentar que na situación de especial seca deste ano e dese día concreto, o goberno se dedicara literalmente a xogar co lume.

   Unha cuestión que xerou moitas queixas e molestou a unha boa parte da nosa veciñanza foi a xestión do espazo para cear. A maioría da veciñanza informóuselle que a Carballeira permanecería pechada e non se poderían reservar mesas ata as 18:00 horas, pero a realidade foi moi distinta e a maior parte das mesas e cadeiras desa hora resultou que xa estaban reservadas, o cal xerou, a parte de enfados e xente que se foi, a sensación de que en Ribadumia hai veciños de primeira aos que se lle permite todo, e outros de segunda aos que se lle obriga a cumprir horarios. Dende logo non podemos compartir esta maneira de actuar favorecendo a uns e prexudicando a outros.

  Tampouco podemos valorar positivamente que tendo grupos musicais no noso Concello o goberno opte por contratar grupos de fora de Ribadumia, que ademais saen máis caros.

E dende logo, se algo botamos en falta nesa festa, é a presenza dos panadeiros, que venden o produto ao Concello pero fai tempo que non participan activamente do evento.

 O que si debemos por en valor e o traballo e Alecrin e de todo o corpo de persoas voluntarias que fan posible a realización da festa do Pan.

  Dende Somos Ribadumia temos moi claro que a Festa do Pan merece unha revisión a fondo, e tamén un goberno que traballe por poñer en valor a nosa tradición muiñeira e de elaboración deste produto, actualizando o evento, tendo coidado con certos detalles, e dándolle un valor engadido que permita manter unha boa afluencia de xente, pero que ese non sexa o único obxectivo, e que tampouco sexa tan alta que impida  á nosa veciñanza gozar dese evento con tranquilidade, isto é: sen ter que facer colas longas, andar as liortas por coller un par de cadeiras ou comer apertados, entre outras cousas.

• David Castro e algúns membros da Mancomunidade  culpabilizan a veciños e turistas, pero néganse  atopar medidas ou a resolver as fugas que teñen na rede, responsables de entre un 30% e un 50% do consumo de auga.
• Ameazar con cortes puntuais, sen antes resolver as fugas na rede ou pechar duchas nas praias e regos de parques e zonas verdes  parécenos un ataque á veciñanza e ás empresas.
• O presidente da  Mancomunidade prometeu  solucións que non chegan, e penaliza  ao Grove mentres axuda á Toxa a mellorar as súa captación en Cabanelas.
• Agora todo son urxencias, pero as solucións tiñan que terse posto en marcha antes, e diso teñen culpa uns e outros na Mancomunidade.
• David Castro pídelle á veciñanza  que peche a billa, pero mantén os regos nas zonas verdes do Concello. Lamentable.

   Dende Somos Ribadumia debemos expor a nosa preocupación pola xestión da auga que está levando a cabo o Presidente da Mancomunidade, con certo mutismo por parte do resto de gobernantes locais.

  Este que estamos vivindo non é o primeiro episodio de seca. Tampouco é a primeira vez que se fala dos problemas que ten a nosa comarca no verán debido ao aumento poboacional ou , no caso  do Grove, todo o ano debido á situación da canalización.

  De partida compre recordar as fotos do señor Castro e do resto do PP na ETAP de Treviscoso  cando montaron a moción de censura da Mancomunidade para segundo eles rematar cunha imaxinaria situación de ingobernabilidade e poñer solución precisamente as problemas como os da auga.

Pasaron os meses e, do mesmo xeito que pasou en Ribadumia todo era fume. Moitos anuncios de investimentos de cifras rechamantes pero sen poñer nun papel, non digamos xa nos orzamentos da Xunta, e tamén moita foto. Pero solucións cero. De feito, David  Castro da moitas largas e evita resolver o problema da conexión co grove ao mesmo tempo que favorece melloras na captación que hai en Cabanelas para dar servizo á Illa da Toxa, algo que nos parece moi lamentable.

  Polo tanto, de partida  consideramos que o señor Castro debería desculparse pola súa insostible  actitude e  dimitir do seu cargo por incompetente, o PP comarcal  pedirlle desculpas á veciñanza do Salnés poñer a un incompetente á fronte do ente comarcal, ademais pagando favores ou sexa que nin gratis saiu, e “animar” ao señor Castro a deixar o cargo poñendo a alguén máis competente, e o PP autonómico debería pedir desculpas e tamén forzar responsabilidades políticas por deixar a nosa comarca abandonada  ante un problema que afecta  a unha poboación de 113.000 persoas de maneira habitual pero que se aproxima ao millón nos meses de verán.

   Pero non toda a culpa é do PP dende o noso punto de vista. A Mancomunidade xestiona ben moitas cousas, pero hai un tremendo desaxuste, e non nos parece correcto que o seu obxectivo principal sexa únicamente o turismo. De feito, naceu precisamente co obxectivo de dar servizos como o da auga, sen os cales o turismo pasa de ser solución a ser un problema. Na situación actual ten moita culpa quen prometeu monte e moreas e non fixo nada, pero tamén ten parte de culpa quen deixa facer ou non facer sen moverse moito. Polo tanto consideramos que tanto os alcaldes e alcaldesa, como o resto de membros da mesa Plenaria da Mancomunidade tiñan que ter feito algo máis e deben facer algo máis do que están facendo. E falando máis en xeral, que no parlamento autonómico apenas se fale disto tamén nos deixa moi claro que as prioridades dos “grandes” partidos alá en Santiago son outras, sobre todo para a primeira forza da oposición, que como non ten alcaldías no Salnés non ten o moito  interese nestes temas.

Actuar sobre as fugas de auga.

Como dixemos fai uns días, a Xunta de Galicia dende 2019 obriga aos Concellos a ter auditadas as redes de distribución de auga. Somos conscientes de que varios Concellos da Comarca fixeron esas auditorías e traballaron e seguen traballando por eliminar cando menos as fugas máis importantes. Pero non todos os Concellos. Un deles Ribadumia, que  logo  de anos negándose a realizar esa auditoría tena agora en marcha , en pleno verán e plena seca, polo que calquera resultado chegará en outono, e as solucións con este alcalde quizais nunca. Parécenos moi lamentable que o alcalde que preside a Mancomunidade sexa dos poucos coa rede sen auditar, pero é o mesmo alcalde que lle pide á veciñanza que peche a billa e aínda a día de hoxe sigue regando as zonas verdes do Concello.

  Dende o noso punto de vista, tendo en conta que as fugas de auga  beben entre un 30% é un 50% da auga pública, o primeiro foco de atención debería ser poñer freo a esas fugas, algo do que non falou ningún alcalde.  E de David Castro non agardamos nada, pois ten fugas de auga a plena vista sen reparar,  como para reparar as que non se ven, a parte de non ter feita a auditoría, pero consideramos que en xeral, a Mancomunidade debería establecer pautas de actuación conxuntas  e establecer penalizacións para os Concellos que pasen de todo.

   Dende logo, na situación actual,  con tantas diferenzas entre o que fan uns Concellos e outros, parécenos un ataque á veciñanza e ás empresas da comarca, falar de cortes puntuais de auga habendo antes outras cousas que se poden facer, aínda que costen cartos. A veciñanza e ás empresas non pagan cos seus impostos unha rede para que despois esta non sexa eficiente. Menos para que pasen os anos sen que se aporten solucións. E dende logo, poñer enriba da mesa cortes de augas coa hostalería a pleno rendimento  nun ciclo que no verán  cubre as 24 horas os sete días da semana, non é razoable.

E entendemos que as situación é a que é e que compren solucións no moi curto prazo, pero seguramente se todos os Concellos puxeran da súa parte, antes de ter que facerlle pagar a toda a comarca a incompetencia duns poucos, poderíanse facer outras cousas e igual sería suficiente.

  Pedimos as persoas que ostentan cargos políticos máis responsabilidade, máis e mellor previsión, máis actuacións e menos descursos. E o señor Castro que se tape un pouquiño, e que cando menos xa que pretende ocultar en que estraga a auga no concello do que é Alclade,  cando menos que disimule e apague os regos das zonas verdes.

• David Castro oculta que a concesionaria da captación da Toxa logrou permiso de Augas de Galicia para realizar unha represa que afectara a 1.200 metros cadrados de río.
• O estado de abandono o río Umia provoca desbordes, complica a realización de probas deportivas e de actividades turísticas.
• Presentamos unha moción para instar a David Castro a actuar en beneficio da veciñanza.

   Dende Somos Ribadumia decidimos tomar a iniciativa logo de comprobar o pasotismo co que David Castro trata todo o que ten que ver co río Umia, o río que da nome ao noso Concello, que vertebra a nosa pasixase e é parte inseparable da nosa historia e do noso desenvolvemento rural e  social, como ben dan testemuño dende a Ponte dos Padriños, as fincas que se extenden ao seu carón, ou o Club O Muíño, que tantos logros leva anos logrando.

 Porén, a parte de para coller a auga para o subministro da nosa comarca, e de aportar un bonito acompañamento á senda que o percorre nalgún tramo, as administracións, tanto o Concello, o noso e outros río arriba, como Augas de Galicia e por extensión a propia Xunta de Galicia, non parecen ter demasiado interese no río Umia, nin nas oportunidades que pode supor.  Ao contrario, aínda se pretenden autorizar auténticos atentados ambientais a un río historicamente atacado polos  vertidos de moitas  fabricas, ou accidentes como o de Brenntag. 

  A día de hoxe, a falta de control das especies foráneas, en especial as vexetais, o completo abandono dos labores de coidado da canle do río, sumado ao maltrato que recibe do embalse de Caldas, provocan todo tipo de incidencias, dende derrubes a cambios no curso do río que pouco a pouco van comendo as fincas particulares e mudando a paisaxe, pasando por desbordes ás veces evitables ou con posibilidade de ser limitados. Dende Somos Ribadumia temos claro que as competencias son de Augas de Galicia, que leva anos desaparecida. Tal como explica “Sergio Soutelo, “Non actúa, non informa, non pon medios nin colabora coas administracións locais. A súa política real é a da inacción sistemática: só aparecen para poñer atrancos ou enviar informes cando xa é tarde. E mentres tanto, os ríos galegos énchense de lixo, ponlas, cando non arbores enteiras caídas,  e maleza. E cando a cidadanía ou os colectivos intentan actuar, topan cun muro de silencio, trabas administrativas ou unha burocracia inútil. Esta non é a xestión que Galicia merece”.  

  As competencias son de Augas, pero os Concellos, e no noso caso o Señor Castro, pode facer moito. Concretando, en toda a zona pola que transcorre a senda fluvial, e iso unha boa parte do tramo dentro dos limites do noso Concello, o goberno local  ten a capacidade para actuar logo dunha sinxela declaración responsable, tal como recolle a lexislación vixente, a Lei 9/2010 de Augas de Galicia, o Decreto 1/2015 e a Instrución 1/2019 de Augas de Galicia, que permite retirar árbores ou lixo do río sen autorización previa. E isto lévanos ao problema que ten nestes momentos o Club O Muíño coa organización do Descenso do Umia, previsto para o 6 de setembro, e que está en risco entre outras cousas polo abandono do río. A situación é repetida, pois dende O Muíño levan anos queixándose dos problemas do abandono das administracións a hora de axudar a organizar a proba  en base a dous eixes: o mal estado da canle do río, obstruída por arbores caídas ou nalgún tramo río totalmente bloqueado pola vexetación , e a imposibilidade de actuar a iniciativa propia  e facer labores mínimas para facilitar o paso das embarcacións. Esta situación xa provocou cambios na proba, que perdeu así boa parte do seu encanto, e a día de hoxe resulta insostible para os directivos do Club que xa trasladaron por activa e por pasiva, de maneira formal e informal, que se non se soluciona o problema deixaran de organizar a proba. E de feito a cuestión vai máis aló dun evento puntual, pois  o Club ten problemas mesmo para desenvolver os adestramentos diarios, pois hai árbores caídas que entorpecen as zonas de paso dos adestramentos, que ninguén retira nin permite retirar, e iso a pesar dos compromisos persoais do noso Alcalde, que mesmo acompañou a directivos do Umia a ver unha desas árbores fai xa meses, comprometendo unha solución que na dís de hoxe non chegou e que agardamos que chegue antes do Descenso do Umia, xunto a unha actuación completa cando menos no tramo polo que vai transcorrer, por que a realidade é que a celebración da 31ª edición desa proba, prevista para o 6 setembro, está a día de hoxe en perigo. 

  Compre dicir que en calquera caso o que non pode facer o Concello é mirar para outro lado, e moito menos ficar calado. Ten recursos e mecanismos para actuar e para facer que outros, como Augas de Galicia, actúen. Pero sobre todo, ten a responsabilidade de facelo, como administración local que debe velar polos intereses da veciñanza.

  Por outra banda, temos coñecemento de que Augas de Galicia, que prohibe á veciñanza servirse do río para regar os campos pero permitiu a unhas familias de A Toxa meter unha captación en Cabanelas, autorizou no 2024 a construción dun azud permanente na zona coñecida por toda a veciñanza como “O atranco”, precisamente para dar servizo a esa captación privada. A construción dese azud de xeito permanente, unha obra que afectaría a unha superficie de case 1.200 metros cadrados do propio río, non é algo novo, e xa houbo un intento no ano 2016. Naquel momento contou coa oposición frontal do goberno de Ribadumia, encabezado polo alcalde actual e daquela,  David Castro, unha oposición á que por certo se sumaron entidades ecoloxistas, pescadores e o Club O Muíño, o PSOE, e por suposto Somos Ribadumia, ademais doutras forzas a nivel de Parlamento. Porén parece que algo mudou no pensar  do señor Castro, pois nin presentou alegación ao proxecto cando se volveu expoñer ao público no 2022, nin se esforzou o máis mínimo en informar ao resto da corporación e colectivos afectados dun asunto de tamaña importancia, máis ben ocultou a situación.

   Dende Somos Ribadumia seguimos considerando que esa obra é un atentado innecesario a o noso río Umia que vai supor un grave prexuízo para o río, que vai afectar tanto a pescadores como as persoas que cada verán baixan a Cabanelas a gozar do nosa única praia fluvial e aos nenos e nenas de O Muíño, pois o recorte na capa de auga vai deixalos sen espazo diante das súas instalacións para poder practicar o seu deporte. Pero tamén vai danar a imaxe dende o punto de vista paisaxístico do propio río e polo tanto vai ser un freo para a boa imaxe turística do noso Concello.

   Dende Somos Ribadumia pensamos que o río Umia, e toda a veciñanza e visitantes que se relacionan dun xeito ou outro con el, merecen un trato mellor.

 Indo cara posibilidades positivas, existe a posibilidade de  promover e apoiar alternativas de carácter turístico no río Umia. De feito nos últimos anos foron varias as empresas, algunhas do noso Concello, que se interesaron ou que intentaron realizar actividades de kayak turístico, unha alternativa que ben xestionada e regulada non entra en competencia co desenvolvemento natural do río. Por desgraza, os problemas derivados da falta de apoio das administracións e da falta de coidado do propio río, tanto en Ribadumia como augas arriba, provocaron que todas esas iniciativas quedasen en nada, ou sexan moi minoritarias. Pola nosa banda consideramos que se está perdendo unha oportunidade de poñer en valor o noso río, pero tamén de promover iniciativas de carácter turístico e lúdico que xeren emprego e riqueza no noso Concello, e tamén noutros Concellos río arriba. A maneira de poñer en valor a nosa paisaxe e de facer que sexa motor económico  é coidándoa e dándoa a coñecer dun xeito ordenado.

Por todo o anteriormente exposto, Sergio Soutelo ven de presentar unha moción para ser levada a  Pleno propoñendo os seguintes acordos :

• A Corporación do Concello de Ribadumia acorda opoñerse á construción do azud permanente previsto no río Umia á altura de Cabanelas.

• Instar ao Concello de Ribadumia a tomar a iniciativa para facer todo o legalmente e socialmente posible para frear a construción do azud mencionado, e a informar ao Pleno da Corporación en cada Sesión Ordinaria das medidas tomadas e das iniciativas levadas a cabo neste aspecto, así como do resultado obtido.

• Instar ao Concello de Ribadumia a dirixirse a Augas de Galicia e  exercer as pertinentes medidas políticas, legais e de presión social, de maneira pública e notoria co obxectivo de lograr que Augas de Galicia atenda ás súas obrigas no relativo ao mantemento en correctas condicións da canle do río Umia,  e informando ao Pleno da Corporación en cada Pleno Ordinario do traballo realizado e dos avances conseguidos.

• Instar ao Concello de Ribadumia a dirixirse aos Concellos polos que transcorre o río Umia dende o encoro de A Baxe ata a súa desembocadura, e propoñerlles realizar accións conxuntas co mesmo obxectivo, aplicado a toda a canle do Umia dende o encoro ata a desembocadura.

• Instar ao Concello de Ribadumia a poñer en marcha medidas e axudas públicas, perfectamente reguladas e recollidas no orzamento anual, orientadas á promoción de actividades turísticas relacionadas co río Umia.

• Instar ao Concello de Ribadumia a poñer en marcha, coa correspondente consignación orzamentaria, programas de posta en valor do río Umia.
• lavado de cara mal feito ás farolas.