• O Ministerio de Facenda mantén retidas as  transferencias de capital dende novembro por non presentar o orzamento do ano 2023.
• 93.076,78 € en novembro e outros tantos en decembro, en total 186.153,56 € retidos.
• Só 9 concellos en toda Galicia están nesta situación, e unicamente Ribadumia en toda a comarca do Salnés.
• O Concello abandonado, sen orzamento, coas facturas sen pagar e  as contas do sen pechar, os fondos do estado retidos por non facer ben as cousas, e David Castro enredando na Mancomunidade e de paseo por FITUR.
• A Concelleira de Contas, 1.900 € ao mes por saír nas fotos.

   Dende Somos Ribadumia queremos por de manifesto a situación económica que está vivindo o Concello de Ribadumia, cos fondos do estado retidos por que David Castro prefire andar de feira en feira e enredando na Mancomunidade no canto de facer o seu traballo.

[Toda a información e os datos deste comunicado son oficiais e de acceso público e poden consultarse na web do Ministerio de Facenda, no seguinte enlace: https://www.hacienda.gob.es/es-ES/CDI/Paginas/SistemasFinanciacionDeuda/InformacionEELLs/DatosFinanciacionEL.aspx  ]

 O Ministerio de Facenda leva dende o mes de novembro retendo as súas transferencias de capital, porque o Concello incumpre a lei , en concreto o artigo 36 da Lei 2/2011 do 4 de marzo de economía sostible e a DA 87ª da Lei 22/2021, ao incumprir  a obriga de remisión dos orzamentos  do exercicio 2023.

   E aínda podería ser peor. A lei marca que no caso de non presentarse o orzamento do ano en curso, neste caso aplicable ao 2023, antes do 1 de xullo do mesmo ano, aplicaranse retencións das entregas á conta da participación nos tributos do Estado a partir de setembro, polo que se non chega a ser polo retraso do Ministerio a hora de aplicar a lei, agora estariamos falando de preto de 400.000€ , case o 10% do orzamento total dun ano, por non mandar un papel, pois non esquezamos que no ano 2023 David Castro non quixo aprobar un orzamento e mantivo prorrogado o do 2022, polo que a comunicación ao Ministerio non requiría agardar a ter aprobado ese orzamento, e só se debía comunicar o estado de prórroga do orzamento anterior.

   Erros deste tipo teñen consecuencias. Non esquezamos que esas aportacións, que son adiantos dos fondos anuais  que lle corresponden ao Concello do Estado, entran cada mes de maneira líquida e libres para o seu uso directamente na conta do banco, e son usados para pagar dende nóminas ata facturas a empresas. 186.000€ dinse  moi pronto, pero esa retención complica moito a xestión directa e do día a día da economía local, e pode provocar retrasos nos pagos de todo tipo.

  David Castro pensa que como hai remanente o Concello ten cartos, pero o que non ten en conta  é que os cartos fan falla porque o Concello ten que realizar pagos. O período medio de pago a proveedores está, a falta de que se fagan públicos os datos do último trimestre de 2023 , xa en 50 días –  no terceiro trimestre de 2017 ese dato era de 8 días – que na práctica implica que as empresas están cobrando meses despois de dar o servizo, algo que ademais de non cumprir as obrigas legais, supón un prexuízo moi grande para esas empresas.

  Resulta totalmente inadmisible esta desidia e este abandono do control do funcionamento económico do noso Concello, que vai máis aló deste lance, que ao fin é un máis. Estamos sen orzamento dende o ano 2022, o resultado contable do ano 2022 está nestes momentos, xaneiro de 2024,  en exposición pública,un retraso desproporcionado que pon a Ribadumia tamén fora da lei e que pode traer consecuencias legais e problemas para acceder aos fondos do estado e da Xunta e Galicia, así como outras axudas que requiren cumprir coa lexislación económica. Non é a primeira vez  que o tribunal de contas apercibe a David Castro pola súa penosa xestión económica, enon será a última, visto o visto. Pero despois dos apercibimentos veñen as multas e as consecuencias, que como sempre van pagar os veciños e veciñas de Ribadumia.

 David Castro é alcalde, non está no Concello de vacacións. Conta cunha liberación de 1.500 € ao mes, un ingreso que non se retrasa un só día, pero con independencia disto un alcalde ten obrigas e responsabilidades, unha delas velar polo correcto cumprimento das obrigas legais do Concello. Cousa similar podemos dicir da Concelleira de Contas, que no caso de Ribadumia conta cunha liberación de 1.900 € ao mes, e ata o momento o único que se sabe da súa xestión é que sae nas fotos.

   Dende Somos Ribadumia estamos moi preocupados pola deriva económica do Concello e a lamentable e perigosa xestión que esta facendo David Castro. E dende logo non entendemos como unha persoa que é incapaz de atender ás súas obrigas no concello do que é alcalde ata o punto de ser un dos únicos nove concellos en toda Galicia nesta situación e o único na comarca, pode pretender xestionar unha mancomunidade de nove concellos.

• O Nadal, pobre e mal exemplo da xestión da conciliación familiar.
• David Casto presume de programas de conciliación mentres as nais e pais da metade dos nenos que nacen cada ano teñen que buscar gardería noutro concello.
• Ribadumia non mellorou nin un só servizo de conciliación familiar dende o ano 2018.

   David Castro pretendeu estes días presumir das súas políticas de conciliación familiar, pero os datos e a realidade desmenten todo canto di.

  As actividades de conciliación familiar deste Nadal, coa salvidade da xornada denominada Carnadal, que foi por conta das ANPAs, foron as mesmas que se levan realizando dende fai anos, e non supuxeron ningunha melloría con respecto a anos anteriores. De feito, resulta moi insuficientes e debemos lamentar que David Castro siga pensando que os pais e nais do noso concello teñen todos traballos de mañá, e só programe actividades deste tipo pola mañá, deixando aos pais sen alternativas de atención polas tardes. No que respecta ao Nadal, ademais disto, recibimos moitas queixas por cuestións como o racanismo a hora de tirar caramelos na cabalgata, escasos  ata o punto de que a ultima das cinco carrozas cruzou todo o centro de Barrantes sen tirar un só caramelo, ou polo trato desigual en determinadas actividades   como o recibimento do paxe real, onde se deron agasallos a uns nenos si e outros non, ademais cun descarado uso partidista por parte do goberno local deses detalles, algo que nos parece moi lamentable, máis tratándose de actividades  deste tipo.

  Fora das actividades do  Nadal, tampouco vemos motivo para que David Castro saque peito por outros  programas de conciliación.

 Se falamos da escola de verán, as únicas melloras, eliminación do límite de prazas, aumento de horario e calendario e servizo de comedor se realizaron nos anos nos que política social a levou Somos Ribadumia. Dende entón, ese servizo só tivo recortes que David Castro unicamente rectificou neste pasado 2023 logo de numerosas queixas. Ademais, hoxe por hoxe a maior parte dos concellos da contorna aportan servizos similares, nalgún caso incluso con mellores prezos, así que tampouco se pode dicir que Ribadumia actualmente sexa exemplar en nada.

   Peor situación temos na gardería, onde a mala xestión por parte do goberno de David Castro  provoca que as nais e pais da metade das nenas e nenos nacidos no noso concello  o ano pasado, tiveran que buscar gardería noutros concellos, mentres se lle dá praza a nenos de concellos veciños ou mesmo algúns máis lonxanos, pois na gardería  de Ribadumia hai hoxe cativos incluso de Vilagarcía, mentres que , remarcamos, nais e país do noso concello teñen que acudir a Cambados, Meaño ou Meis.

  Ademais do dito, están os datos. Ribadumia perdeu habitantes no ano 2022, cando se recolleu o último dato oficial, e co paso dos anos non logra asentar poboación. Pero sobre todo no noso concello están baixando os nacementos. Os datos do IGE indican que no ano 2022 tivemos en Ribadumia 29 nacementos, a cifra máis baixa dende o ano 2002, cando naceron 26 persoas, e o segundo dato máis baixo tamén dende que no ano 2001 a aprobación do PXOM dera inicio ao crecemento do núcleo de Barrantes, wue hoxe por hoxe concentra metade da poboación mentres o rural esmorece. En número de nacementos por habitante, é o dato máis baixo da serie histórica.

   Está baixando o índice de nacementos, morre máis xente da que nace -no 2022 finaron 49 persoas- , os servizos de conciliación xa non son punteiros nin exclusivos de Ribadumia e non hai vivenda dispoñible para que xente nova veña a vivir ao noso Concello. E a pregunta ante todo isto é “que esta facendo David Castro por promover o crecemento sostible do noso concello??” a resposta é:  nada de nada. As únicas cartas de valor de Ribadumia fai dez anos eran a dos servizos de conciliación e o acceso á vivenda. Agora non temos ningunha desas dúas cousas e David Castro mira para outro lado e só se preocupa polo seu futuro persoal.

   Os problemas de imaxe de David Castro.

  Dende o noso punto de vista, comunicados como ese e outros emitidos nos últimos días pretenden arranxar algo a moi prexudicada imaxe de David Castro, moi dado á meterse en líos innecesarios.

Por unha banda intenta aportar unha imaxe de xestor para facer ver que merece ser presidente da Mancomunidade e fuxir do inevitable por evidente, que é que a veciñanza o identifique como o monicreque de Gonzalo Durán, que anda a enredar na mancomunidade mentres ten sen atender ao seu Concello. Por outro lado, intenta apartar o foco dos desastres da súa máis que lamentable xestión e de escándalos como o do seu trato denigrante ao educador familiar, unha situación que xa nós denunciamos en maio do ano pasado, pero que agora foi xa, por insostible, posta de relevancia polos sindicatos.

  Dende Somos Ribadumia podemos entender a desesperación de David Castro por lograr unha boa imaxe que lle dea algo de peso no PP, un partido que xa o da por amortizado e cuxos dirixentes definen xa abertamente como fiasco, pero non podemos aceptar que no canto de traballar se dedique á propaganda, así que pedímoslle ao señor Castro que desinfle un pouco o peito falando duns logros que non son del, que deixe de participar nos enredos do Señor Durán e de intentar ser algo no PP e se centre nos problemas de Ribadumia.

   Dende a Comisión Executiva de Somos Ribadumia trasladamos a nosa posición ante o proceso de eleccións autonómicas.

   Como aconteceu en procesos anteriores, como formación política e atendendo ás nosas circunstancias actuais optamos por manter a nosa neutralidade ante este proceso, ao tempo que deixamos liberdade aos membros e militantes da nosa formación para que a título individual fagan o que consideren.

  Neste aspecto debemos reseñar que calquera posición pública neste proceso electoral de calquera das persoas que forman parte da dirección e militancia do noso partido, deberá ser entendida como unha posición persoal, nunca en nome de Somos Ribadumia nin en representación do noso partido.

   Somos Ribadumia como formación política non nos sentimos a día de hoxe representados por ningunha das alternativas que forman o taboleiro electoral na nosa provincia, e de feito lamentamos que os partidos políticos aposten tan pouco nas súas listas pola nosa comarca, unha comarca de máis de 110.000 habitantes, cantidade que se multiplica no verán, e cunhas casuísticas propias que requiren dunha representación no Parlamento que entenda esas particularidades.

  Non imos valorar as listas doutros partidos, sinxelamente consideramos que ningún dos  partidos que se presenta aposta con claridade polo Salnés, nin vemos unha aposta en canto a propostas concretas pola nosa veciñanza ata o punto de valorar darlle un apoio expreso, nalgún caso, máis ben ao contrario.  Dende o noso punto de vista, o único que parece interesar é colocar de deputados  e deputadas a persoas de interese por cuestións propias dos partidos, ou mesmo desas persoas, pero non polas súas capacidades ou compromiso coa cidadanía.

   E con todo o que está pasando a todos os niveis, xa vai sendo hora de que as formacións políticas se tomen o exercicio da política en favor do conxunto da sociedade algo máis en serio.

  Dito todo isto, queremos facer un chamamento á cidadanía para que acuda a  votar o próximo 18 de febreiro, e para que vote segundo o seu criterio, analizando ben a situación que temos en Galicia e se podemos seguir nesta senda ou se debemos mudar cousas e en calquera caso valorando ben as alternativas, sen casarse con ninguén, porque o voto fixo é o cancro da nosa democracia, do que se favorecen algúns partidos. Votar consiste en elixir o que consideramos mellor para nós e para o noso entorno, e en mudar o voto e apoiar outro partido se o que apoiamos fai catro anos non cumpriu co que dixo que ía facer ou se non gobernan acorde ao que nos consideramos correcto. O voto é o único mecanismo de decisión que ten a cidadanía, e só o voto ten validez real e sirve para mudar o país que temos.

• David Castro, cun despacho de 25 metros cadrados, tres ventás, calefacción e aire acondicionado, di que un buraco  sen ventás é un sitio correcto para traballar.
• Cun despacho sen ocupar no mesmo local, David Castro mantén ao educador familiar nun cubículo de menos de cinco metros cadrados.
• A veciñanza, sen intimidade cando vai a servizos sociais, e cos seus dereitos en cuestión de protección de datos vulnerados polas malas practicas de David Castro.
• Os cambios de comportamento comprometidos logo de defenestrar á concelleira Sofía Núñez sacándolle política social, tamén eran fume.

   Dende Somos Ribadumia non é a primeira vez que falamos das condicións de do departamento municipal de Servizos Sociais. Pero esta semana os sindicatos, cansos das mentiras e falacias de David Castro, levantaron a voz, porque a situación na que se encontra o educador familiar é totalmente inaceptable. Como o son as declaracións de David Castro, que outra vez fai gala dunha soberbia e abuso de autoridade lamentables.

   David Castro asegura, e non é a primeira vez, que un cubículo de menos de cinco metros, onde malamente colle unha mesa cunha cadeira a cada lado, sen espazo para nada máis, e onde o propio David Castro dificilmente podería ser atendido, é un espazo adecuado para traballar e para atender á veciñanza. E como xa dixemos, asegura tal cousa dende un despacho de  25 metros, tres ventás, calefacción e  aire acondicionado.

   Dende que no mes de maio puxemos de relevancia esta situación, mudaron cousas no departamento de servizos sociais, en concreto quedou un despacho libre ao rematar o seu contrato a segunda traballadora social, que David Castro non supliu porque a lei non lle permite contratar a dedo. Polo tanto, habendo un despacho libre,  e actualmente sen uso polo que o educador familiar podería volver a usar o seu despacho anterior, nin sequera ten o señor Castro a mala escusa de que non hai outros espazos, e mantén ao educador familiar nese cubículo unicamente como medida de presión contra un traballador que ao señor Castro parece sobrarlle.

  Compre remarcar que despois das eleccións de maio e de que de cara a galería David Castro defenestrara a anterior concelleira de política social, Sofía Núñez, sacándolle as competencias desta area na que resultaba moi problemática – aínda que parece ser que iso so aconteceu sobre o papel – , o señor Castro e a  nova concelleira Alba Oubiña comprometeron cambios e melloras na xestión do departamento, ademais de rematar coas persecucións ao persoal que forma parte del. Obviamente nada diso aconteceu, e unha vez máis demostrase que as promesas de David Castro son fume.

  Por desgraza, quen está pagando o capricho de David Castro, ademais obviamente dese traballador que ten dereito a unhas condicións dignas para desenvolver a súa labor, é a veciñanza. Porque o o señor Castro non conta é que nese cubiculo non ten que traballar unha persoa, hai que dar atención á veciñanza. Calquera persoa que queira acudir ao departamento de servizos sociais a realizar un dos numerosos trámites que realiza o educador familiar, debe reunir varios requisitos para poder ter un mínimo de intimidade nese “despacho”, un deles non ser moi grande, outro acudir en solitario. Dúas persoas non poden ser atendidas á vez nese cubículo, e se por exemplo a persoa usuaria vai en cadeira de rodas, xa non se pode atender alí, e ten que facerse no espazo público, e cousa similar se vai unha nai ou un pai cun bebe nun carro, que ou ten que deixar o carro e o bebe  fora dese cubículo, ou ser atendida fora. Quizais a David Castro, moi dado a ter listas de usuarios de servizos sociais e  a pedir datos das persoas usuarias do departamento de servizos sociais, está situación lle agrade, pero a nós non nos parece en absoluto aceptable.

   Como tampouco nos vai parecer aceptable que os sindicatos rematen por levar este asunto aos xulgados, porque quen paga os custes desas malas practicas do señor Castro é a veciñanza. Polo tanto agardamos que de maneira inmediata David Castro cese nos seus comportamentos e persecucións a traballadores do Concello, e que poña solución á situación do educador familiar, para que esa persoa poida traballar de maneira digna e para que a nosa veciñanza poida recibir a atención que precise tamén de maneira digna e cos seus dereitos debidamente protexidos.