• Argumentos contraditorios, dando a entender que xa actuou en dúas ocasións para dar a volta a sentenzas da APLU pero negando o evidente.
• O máis claro argumento de David Castro “esta modificación busca adaptar á realidade a situación desa zona porque o que está no Plan Xeral non é o que se ve alí ”. Efectivamente.
• David Castro non aclara porque a documentación obvia a nave ao tempo admite a súa existencia.
• Un ano para corrixir os erros pero David Castro non corrixiu nada, o mesmo tempo que a APLU leva sen responder a un recurso de reposición posto polos propietarios desa nave. Casualidade?

David Castro está decidido a aprobar unha recalificación de terreos en Cabanelas para tentar legalizar a nave construída de xeito totalmente ilegal – co seu silencio cómplice – e que conta cunha orde de derribo por parte da APLU, neste momento pendente da resolución ante dun recurso de reposición dende febreiro do ano pasado.

Sergio Soutelo non puido acudir ao Pleno por cuestións de causa maior, pero si estiveron presentes varios membros da Comisión Executiva , como ven sendo habitual, e dende o noso punto de vista as declaracións de David Castro deixan ben claro que o alcalde actúa de parte. Vaia por diante, que no caso de participar, Somos Ribadumia non ia votar a favor desa modificación do PXOM.

No debate desa modificación do PXOM David Castro presumiu de terlle dado a volta a dúas ordes de derribo da APLU, ademais dixo en que lugares, faltoulle dar os nomes dos veciños afectados, xustificando que dende o Concello se fagan actuacións para evitar derrubes de construcións ilegais. Unhas declaracións que pretendían xustificar o inxustificable. O que David Castro non dixo é que neses casos onde se puido actuar, tivo que requirir aos infractores para repuxeran a legalidade, que non sempre implica derrubar as construcións, de feito nos casos que se referiu o que había eran cuestións administrativas menores.

David Castro foi máis aló, pois no propio pleno deu conta de edictos de alcaldía actuando noutros casos onde , en contra de cómo se actuou en Cabanelas, si se requiriu a reposición da legalidade aos infractores e mesmo se puxeron multas coercitivas. Desta maneira nun so pleno fíxose evidente que David Castro actúa dunha maneira cando se trata de determinados veciños, con expedientes da reposición da legalidade e multas, actuara a APLU ou non, e doutra moi distinta cando o que actúa fora da lei é un amigo empresario, deixando pasar sen tomar ningún tipo de medida e chegando a modificar o PXOM para favorecer a ese empresario.

As actuacións da APLU e as non actuacións de David Castro.
Hai que remarcar que a APLU, moi áxil nas súas actuacións noutras ocasións, ten pendente dende fai máis de un ano resolver un recurso de reposición interposto polos propietarios dos terreos e da nave e muros levantados de maneira totalmente ilegal. Ou cando menos tiñao a semana pasada, cando ese órgano nos trasladou copia do expediente.

En Somos Ribadumia non sentimos desconfianza ante os diferentes órganos públicos, pero resulta chamativo este retraso, cando a resolución anterior da propia APLU, resolta cunha rapidez que contrasta coa paralización posterior, resultou contundente, pois non deixa opción á legalización da nave nin sequera no caso de que se modificara o PXOM, como se pretende.

No que non creemos en Somos Ribadumia e nas casualidades en política. E hai que dicir que resultan tamén moi chamativas as datas. O recurso de reposición referido foi posto o 22 de febreiro de 2023. David Castro anunciou o seu paso ao Partido Popular o 25 de febreiro, tres días despois. E dende ese momento a APLU ten pendente o tramite final do expediente e David Castro intentou ata en catro ocasións levar a pleno esta modificación, retirando da Orde do Día tres das catro veces, pero sen cambiar unha soa liña na documentación da modificación do PXOM. Se non se modificou nada porque se retirou dos plenos anteriores – con escusas bastante peregrinas – e porque se aprobou onte e on antes? Que foi o que mudou nestes meses?

O que David Castro non fixo dende o ano 2020 foi actuar como lle obriga a lei, ordenando e tomando as medidas pertinentes para paralizar a obra de construcións desa nave e do muro perimetral e a posterior reposición da legalidade, algo independente do que faga a APLU, como moi ben sabe o señor Castro. E ademais, tendo meses para corrixir a documentación da modificación do PXOM, unha vez que se fixo público que estaba ocultando a construción desa nave, tirou para adiante ignorando todas as advertencias de que está saíndose dos procesos legais e posiblemente caendo nun delito de prevaricación, arrastrando con el aos seus compañeiros de partido que onte levantaron a man apoiando unha modificación do PXOM moi dubidosa, pero cuxo tramite, ademais, e hai que recalcalo, non éxime das obrigas do señor Castro de actuar ante unha ilegalidade manifesta.

• Na Orde do Día do Pleno inclúe tres puntos de “dar conta” referidos a Somos Ribadumia, pero oculta o contido deses puntos.
• David Castro intenta librarse das consecuencias xudiciais de ocultarlle documentación a Sergio Soutelo.
• Por que oculta David Castro as facturas do Xantar do Tinto, os contratos con un arquitecto externo, e outra documentación? .

   Dende Somos Ribadumia temos moi claro cales son os funcionamentos democráticos, e as normas que nos afectan a todos os concelleiros e concelleiras. David Castro parece que ou non o ten tan claro ou pretende estar por enriba desas normas e funcionamentos.

  No Pleno convocado para este xoves figuran tres puntos nos cales David Castro pretende “dar conta” de tres escritos presentados por Sergio Soutelo. Antes de entrar no contido deses escritos e dos motivos reais desta actuación do señor Castro,  hai que remarcar que Alcaldía usa o termo “dar conta”, pero a realidade é que non ten nada do que dar conta. Os escritos aos que se refire foron presentados por Sergio Soutelo en calidade de Concelleiro, e son peticións de documentación necesaria para a súa labor, algo que entra dentro do funcionamento normal en calquera Concello. Hai que remarcar que en ningún caso neses escritos se solicita dar conta de nada nin se propón nada para debater ou someter a consideración do pleno, e tampouco se trata de preguntas formuladas para ser respondidas no pleno, nin se solicita que  entregue a documentación no transcurso dun pleno. Polo tanto, non ten sentido ningún “dar conta” duns escritos presentados por un Concelleiro da oposición pedindo documentación, menos se ese concelleiro non especifica algo nese senso.

  Ademais resulta de todo ridículo que un alcalde renda contas dos traballos realizados por un concelleiro da oposición, e aínda que agradecemos a atención que David Castro pon no noso traballo, queremos deixarlle ben claro que a Somos Ribadumia no Pleno Municipal unicamente o representa Sergio Soutelo; o señor Castro non ten o noso permiso para falar no noso nome nin para facer exposicións do noso traballo.

  Compre remarcar que deses 3 escritos dos que se pretende dar conta, signifique iso o que signifique, dous deles están xa en vía xudicial por non terse entregado a documentación que neles se solicitaba. Queremos dicir con isto que logo de semanas agardando pola documentación, e recibindo escusas, optamos por acudir á vía xudicial. O primeiro resultado da nosa denuncia foi que o xulgado requiriu fai uns días ao Concello para  que aportara a documentación que considerase, e iso explica que David Castro pretenda meter con calzador eses escritos no Pleno Municipal, co obxectivo de xustificar o retraso na entrega de documentación ou quizais buscar algunha maneira de librarse de entregar esa documentación.  

Tamén hai que remarcar que estes non son os primeiros escritos que presenta Sergio Soutelo. No que levamos de mandato o noso Concelleiro leva presentados mais de 30 escritos, boa parte deles pedindo diversa documentación, que sempre se entrega tarde e logo de moitos atrancos, pero ata agora David Castro non fixo esta xogada do Pleno, que si fixo no mandato anterior en varias ocasións e sempre para xustificarse ante un terceiro, naqueles casos a Valedora do Pobo de Galicia e o Defensor del Pueblo de España.

Polo tanto, “branco e en botella”, David Castro usa o Pleno Municipal para tentar xustificar o inxustificable. A diferenza é que responder ante un xulgado non é o mesmo que responder ante a Valedora do Pobo.

  Ademais de todo isto, David Castro oculta a documentación da que supostamente vai dar conta no Pleno, e só figuran no expediente os escritos aos que fai referencia, pero non a documentación que entendemos se irá entregar neses “dar conta”. A documentación a tratar nos plenos, como temos xa expresado moitas veces, debe estar a disposición dos concelleiros de maneira integra dende o momento de convocarse o Pleno. Non facelo así supón ocultarlle aos concelleiros e concelleiras documentación que se vai tratar no Pleno, unha actuación irregular pola  cal solicitamos a retirada deses puntos da Orde do Dia, e que poderia supor a anulación do Pleno Municipal e calquera acordo que se tome nel, algo do que xa advertimos a David Castro.

   Con todo, o importante está no que David Castro pretendía  e pretende ocultar con tanta paixón. Nestes casos concretos as facturas do xantar do Tinto, os máis que probable inexistentes permisos e seguros para a realización do desfile de entroido, e diversos expedientes que van dende o contrato do alumeado e decoración de Nadal a memorias e proxectos  para realizar diferentes actuacións. Iso no relativo aos escritos dos que pretende dar conta neste Pleno, pero tamén está ocultando os contratos con determinado arquitecto externo, entre outras cousas.

   Dende o noso punto de vista só oculta algo quen non está facendo as cousas ben, pero se o obxectivo é poñernos paus nas rodas, xa lle advertimos ao señor Castro que imos defender os nosos dereitos e os do noso Concelleiro, e se temos que levar cada unha das solicitudes de documentación ao xulgado, levarémolas.

• Na Secretaría Municipal non constan os seguros nin os permisos necesarios para cortes de estradas e carrís realizados no desfile de entroido. Tampouco o Plan de Seguridade.
• En Pleno á concelleira de contas asegurou que todo se fixo en regra, pero agora os papeis non aparecen.
• O desfile transcorreu 2 km pola estrada principal de Ribadumia, cun carril cortado e outro con circulación normal, sen apenas seguridade.
• Os nenos e nenas correron riscos innecesarios debido a escaseza de medidas de seguridade e coa dúbida de que fose un evento sen seguros nin permisos, unha neglixencia absoluta.
• Esiximos explicacións e responsabilidades políticas se se confirma esta nefasta xestión do evento.

Dende Somos Ribadumia non saímos do noso asombro ante a que pode ser penúltima neglixencia de David Castro.

O pasado 12 de febreiro tiña lugar, co gaio do entroido, unha iniciativa que nos pareceu positiva, un desfile de entroido, cun bo nivel de asistencia, que incluíu grupos adultos e infantís, que tivo saída na casa de Cultura de Ribadumia e remate no centro de Barrantes, logo dun percorrido de dous quilómetros ocupando un carril da estrada EP-9305, con diferencia a maior e máis transitada das que pasan polo noso Concello.

No seu momento chamou a nosa atención a escaseza de medidas de seguridade dun desfile que ocupou na súa totalidade un carril da estrada entre Ribadumia en Barrantes, pero deixou o outro aberto ao tráfico con total normalidade, cos coches pasando moi preto dos nenos e adultos participantes, pois aínda que protección civil participou, acompañando o desfile e con presencia nos cruces, a Garda Civil non estivo presente, e non se estableceu nin desvíos nin ningún cordón de seguridade que evitara que un neno despistado se metera no carril contrario. O propio concello publicou fotos onde se pode comprobar o preto que pasaron os coches das persoas adultas e nenas que participaron no desfile, e a ausencia de medidas de seguridade.

No último pleno, o noso concelleiro Sergio Soutelo preguntou por esta cuestións, e a resposta foi que o evento contou con todos os permisos, seguros e o correspondente plan de seguridade. Días despois dese pleno, o 13 de marzo Soutelo solicitou copia do plan de seguridade, dos permisos de tráfico e doutras administracións e dos seguros pertinentes. Ademais pedimos o mesmo sobre a cabalgata de Reis.

Pois resulta que os documentos non aparecen. Case un mes despois de solicitalo, o concello non entregou ao noso concelleiro a documentación que pediu. Isto non é novidade, pois David sempre retrasa a entrega de documentos, que ten un prazo de cinco días, para obstaculizar o noso traballo. Pero este luns Soutelo presentouse no Concello a reclamar a documentación, esa e outra pedida que tamén estaba pendente, e ao non entregárselle solicitou á Secretaría Municipal que lle redactara un documento onde se deixara constancia tanto de que el se presentou no Concello nese día como de que non se lle entregou a documentación. No documento redactado pola Secretaría, esta deixa constancia de que esa documentación específica en relación ao desfile de entroido non se pode entregar porque non lle consta tela dispoñible ao non ser tramitadas pola propia secretaria.

En Ribadumia, cunha secretaria que tamén é interventora, que ten que validar toda a documentación incluída a contratación de seguros e que levanta acta de todos os acordos de goberno, sexan do Pleno, sexan da Xunta de Goberno ou doutros órganos colexiados de decisión, toda a documentación municipal pasa por ese despacho e por esa persoa. Polo tanto, que a Secretaria do Concello non teña constancia duns documentos, algúns dos cales ademais tiveron que aprobarse en Xunta de Goberno da que forma parte como se secretaria e redactora das actas, pon moi en dúbida a existencia deses documentos.

No desfile non pasou nada. Pero puido pasar, e non é aceptable que un goberno agarde a que haxa unha desgracia para que lle acorde cumprir coa lei é ter conta da seguridade nun evento. Polo tanto debemos pedir a David Castro que aclare a situación. Se o desfile de entroido contou con todos os permisos, tiña o plan de seguridade e seguros pertinentes que non os oculte e llos entregue a quen llos pediu que foi un representante da veciñanza. Se todo está correcto non teremos moito que dicir, salvo que con plan de seguridade ou sen el, ese evento puxo en risco a integridade física de adultos e sobre todo de nenos, e debería revisarse para seguintes ocasións.

Se ese evento NON contou cos permisos , cos seguros e co plan de seguridade pertinentes e obrigatorios entón David Castro debe dar explicacións públicas inmediatamente e debe haber responsabilidades políticas. Porque dende logo, confirmándose que o goberno local organizou un evento destas características sen contar cos permisos necesarios para cortar estradas de titularidade doutra administración, sen os permisos da Xefatura de Tráfico, sen os seguros que actúen en caso dunha eventualidade e ademais sen un Plan Seguridade que garantise que os perigos quedasen minimizados, e polo tanto que se actuou poñendo en risco a integridade física de nenos e adultos do noso Concello e de fora del, estaremos ante unha neglixencia totalmente inaceptable e con responsables políticos, alcaldía por suposto, pois estas cousas non pasan sen o coñecemento do alcalde, pero tamén a concellería de eventos, que no pleno só levantou a vista do seu teléfono para insultar ao noso concelleiro, cando o que debía facer era explicar a súa xestión.

Temos confianza en que esta a situación non se deu, estamos máis por pensar que David Castro sinxelamente dedícase aos seus xogos infantís ocultándonos a documentación, aínda que o declarado pola secretaria municipal xera moitas dúbidas, e dende logo sorprenderíanos moito que tivera pasado algo así e moito máis que a Cabalgata de Reis transcorrese nas mesmas condicións, por iso damos o beneficio da dúbida ao goberno local, pero debe haber transparencia.

• Pasamos as nosas xuntanzas de traballo a locais sociais do Concello.
• Cada xuntanza irémola realizando nun local social do Concello, xirando por todas as parroquias ao longo de todo o mandato.
• Os obxectivos son achegarnos á veciñanza, escoitar as súas problemáticas para poder aportar solucións e trasladar o noso traballo de primeira man.
• Comezamos este próximo martes 9 de abril, no centro social de Leiro, a partir das 20:30 horas.

Dende Somos Ribadumia decidimos ampliar os mecanismos a través dos cales nos achegamos á veciñanza, abrindo as nosas xuntanzas de traballo ao público e levándoas ás diferentes parroquias do noso concello.

A partir desta semana as nosas xuntanzas físicas, que adoitan ser semanais ou quincenais, dependendo do momento e da situación política, irémolas realizando nos diferentes locais sociais do Concello, comezando polo local social de Leiro, este próximo martes a partir das 20:30 horas. O resto de xuntanzas irémolo anunciando nas nosas redes e a través dos taboleiros de información municipal segundo vaian xurdindo. E non será unha ronda única, senón que imos manter esta formula como mínimo durante este mandato, de tal maneira que ao longo do ano pretendemos estar en cada local social do Concello varias veces.

Ata o de agora, ao non contar con local propio, estas xuntanzas realizámolas xeralmente nalgunha cafetería do Concello, ou na casa dalgunha compañeira ou compañeiro, e xa non son nada privado, ao contrario, sempre foron xuntanzas abertas. Pero con este paso de ir xirando polas parroquias do noso concello, pretendemos ser mais accesibles como formación política e mellorar o noso contacto coa veciñanza.

O contido das xuntanzas será o noso habitual, valorar as diferentes cuestións políticas que afectan ao concello , á veciñanza e aos colectivos locais, decidir posicións ante determinados temas, e organizar o traballo para os días seguintes. Pero ao levar isto á proximidade dos locais sociais nas diferentes parroquias buscamos tamén facilitar que a veciñanza poida achegarse a nós con calquera problemática que poida ter e na que nós poidamos aportar información, algunha solución, ou mesmo realizar algunha actuación pola nosa parte se fora necesario.

Así pois, animamos á veciñanza a achegarse e compartir con nos os problemas que poidan ter. Estas xuntanzas tamén servirán para trasladar funcionamentos municipais que moita xente descoñece, procesos para realizar diferentes trámites ante a administración, e en xeral para axudar a que a veciñanza coñeza algo mais en profundidade o funcionamento da administración local.