• Nunha enquisa mandada este pasado venres pídeselle a nais e pais  que valoren ás traballadoras  de xeito individual.
• A enquisa fala de valorar unha “PROPOSTA PEDAGÓXICA” que non existe.
• A enquisa que non se xestiona de maneira anónima, e é un ataque directo ás traballadoras e un mecanismo para crear confrontacións.
• É o segundo intento de mandar esta enquisa. En xaneiro, pretendeuse mandar, con outro formato, pero retirouse para evitar controversias antes das eleccións autonómicas.

Dende Somos Ribadumia queremos poñer de manifesto a nosa posición contraria ante  unha enquisa que o pasado venres se enviou ás nais e país usuarios da escola infantil municipal.

  Nesta  enquisa  cun enunciado enrevesado interesadamente para disimular a intención da mesma exponse que “co fin de ter a opinión das familias de cara a avaliar a programación didáctica do centro, valore de 1  a 10 a súa opinión  sobre a labor do profesorado do centro con respecto as ACTIVIDADES planificadas en relación á PROPOSTA PEDAGÓXICA ANUAL”.  Pero a realidade da enquisa é que o que se pide é unha valoración de cada unha das traballadoras da escola infantil de maneira específica, non so poñéndolle nota, senón ademais pedindo a explicación desa nota.

    Dende o noso punto de vista non podemos estar de acordo con esa maneira de actuar por varios motivos:

• A enquisa vai dirixida a que os pais e nais dean unha opinión, obviamente subxectiva, do traballo das profesionais da escola infantil, non das actividades organizadas polo centro, nin do Plan Escolar no seu conxunto, nin da calidade das instalacións nin de ningún aspecto que unha nai pai poida valorar cun mínimo de obxectividade. Hai que recordar que os proxenitores deixan aos nenos e nenas no recibidor da escola infantil e non teñen acceso ás aulas e polo tanto, non teñen acceso ao traballo das profesionais.

• As nais e pais non poden valorar a   suposta PROPOSTA PEDAGÓXICA, porque esta non existe. Existe un “Proxecto Educativo” da escola infantil, cuxa última edición coñecida é a do curso 2022/2023, que  xa é un corta pega do proxecto educativo do curso  anterior, realizado pola empresa que tiña a xestión da gardería, non pola dirección actual. Este “proxecto educativo”, para o caso de que fora actualizado,  non se entrega ás nais e pais coa documentación para a solicitude de praza, e tampouco se entregou no curso anterior, nin está publicado en ningún sitio. Se unha nai ou pais o quere ver ten que realizar unha solicitude por escrito ao Concello e agardar que dende alcaldía autoricen a entrega do documento. Así que dificilmente poden as nais e pais facer valoracións dun documento que descoñecen.

• Nin sequera se estableceron mecanismos de anonimato para a enquisa, de  tal maneira que as traballadoras poden saber que nai ou pai as valora e como. E os pais e nais que queiran cubrir esa enquisa deberan facelo sabendo que todo o persoal na escola infantil podería ter acceso a ela.

• A enquisa leva o encabezado do Concello de Ribadumia, pero non leva sinatura. Tampouco aclara quen a realiza, se o Concello, a dirección da escola infantil, ou alguén que pasaba por alí, nin quen a vai xestionar.

• A enquisa é un ataque ás traballadoras da escola infantil, e busca alimentar enfrontamentos coa escusa das  opinións favorables e desfavorables das nais e pais. Posiblemente tamén busque xustificar algún despedimento.

Segundo intento de realizar esta enquisa.   Ademais do exposto, esta enquisa resulta ser o segundo intento que fai o Concello de que as nais e pais valoren o traballo das profesionais da escola infantil. O primeiro aconteceu en xaneiro, cun documento, sen membrete do Concello nin da gardería, nin de ningún tipo, que contiña un texto moito máis claro sobre o obxectivo da mesma, pois pedía, literalmente “valore de 1 a 10 a súa opinión sobre o profesorado , sendo 1 DESCONTENTO e sendo 10 MOI CONTENTO coa súa labor”. Os recelos creados pola enquisa, ademais preto dunhas eleccións, provocou que o documento se retirara e que se retocara o encabezado e  o texto para confundir sobre a intención real da enquisa.

  Parécenos que David Castro actúa dun xeito denigrante, ademais de con moita falsidade, ao realizar accións como estas. O traballo das profesionais debe valoralo a dirección do centro e o Concello como responsable da escola infantil, e pode e debe recabar a valoración dos pais sobre as actividades, o Proxecto educativo ou as propias instalacións, pero non se pode acpetar que se enfronte a nais e pais coas profesionais da gardería.

  Non temos claro se David Castro pretende con esta pantomima  xustificar algún despedimento, ou algunha das contratacións realizadas nos últimos meses – envoltas na sospeita do trato de favor –  ou ambas cousas. Pero dende o noso punto de vista, unha escola infantil é unha entidade moi seria, e xa está ben destes comportamentos infantís por parte do señor Castro, e de rirse das nais e pais.

• O xulgado auspiciou un acordo entre alcaldía e  Sergio Soutelo para que este poida acceder ao rexistro municipal.
• A proposta realizouna David Castro, e aceptámola, pero despois de feita,  el pasou do acordo, forzando a situación ata o límite.
• David Castro tómalle o pelo ao xulgado, a Sergio Soutelo e a Somos Ribadumia.

  O que deberiamos anunciar como algo positivo, un acordo entre o goberno de David Castro e Somos Ribadumia para o acceso ordenado ao rexistro municipal, foi reventado polas actitudes de David Castro, que se dedica a enredar e a rirse de todo o mundo, dunha maneira infantil e absurda. Pola nosa banda, queremos deixar constancia do acontecido nestes últimos meses e das medidas que nos vemos na obriga de tomar ante algo que é inaceptable.

  A finais de novembro do ano pasado, Sergio Soutelo veuse na obriga de acudir ao xulgado ante o bloqueo ao que o tiña sometido David Castro, que  con todo tipo de escusas e argucias trataba de impedir que o noso concelleiro, cunha situación laboral que lle impide acudir presencialmente á casa consistorial dentro dos horarios de atención ao público, accedera telematicamente ao rexistro municipal, algo normal en calquera outro Concello.

  Este tema rematou cunha vista xudicial o 31 de xaneiro. Nela o propio xuíz indicou ao avogado do Concello moi claramente cales son os dereitos do noso  concelleiro, e “convidouno” a propoñer un acordo -con bastante concreción do que debería incluír – antes de rematar o período de conclusións, deixando así moi clara a súa postura e de paso a David Castro sen a razón por segunda vez en menos dun ano. Quedou patente que se o goberno non accedía a realizar a proposta indicada polo xuíz, o final do camiño xudicial sería  o mesmo, pero o Concello remataría pagando todas as costas. O  señor Castro colleu ben o recado, e ante o medo a outro revés xudicial, optou por aceptar a vía do medio que lle propuxo o xuíz, pero como se fose un neno que intenta facer trampa cos traballos escolares, andivo semanas mareando. Logo de realizarnos unha proposta inicial e de nos aceptarlla, alongou os prazos deixándoa sen asinar. Ao, final tivemos que dende a nosa parte enviarlle o acordo asinado xa fora dos prazos, quedando asinado por eles e presentado no xulgado o 29 de febreiro.

O 1 de marzo o xuíz, ditou un auto dando por válido o acordo quedando xa ratificado e en completa validez dende ese momento, o cal significa que o Concello  de maneira diaria debe subir ao espazo privado que Sergio Soutelo ten na sede electrónica, un espazo seguro e ao que só pode acceder el, os datos básicos de todas as entradas e saídas do rexistro municipal. Un acordo que garante todos os dereitos legais e é acorde a lexislación en cuestión de protección de datos, pois só se aportan datos moi básicos, non os expedientes completos, que se deben solicitar a parte e teñen outro proceso. Tampouco se inclúen cuestións que se presenten a través do portelo único e non vaian dirixidas ao Concello. Así pois, é o equivalente a consultar o antigo libro de rexistro de papel.

 Iso foi o 1 de marzo. Pois onte, quince días despois, logo de que o noso concelleiro se dirixira varias veces ao Concello para preguntar porque non se estaba executando o acordo impulsado polo propio alcalde, comunicóusenos que ao avogado non lle constaba o auto xudicial. Unha falsidade e unha tomadura de pelo en toda regra. O auto (este e todos) comunicaselle ás partes ao tempo, nós tivémolo o día 1 , eles por suposto que tamén. Ademais disto, dende Somos Ribadumia temos constancia, ademais de primeírisima man, de que o alcalde estivo ao tanto de todo o proceso e soubo o día 1 de marzo da confirmación vía auto xudicial do acordo, que ademais ten valor de sentenza firme.

  Á vista da situación, xa advertidos ao Concello de que estamos cansos da broma, e de que se o luns non se fai efectivo o acordo, nese mesmo día volveremos ao xulgado para que sexa o xuíz o que faga executar o acordo, con todas as consecuencias.

   Se xa é triste ter que chegar a un xulgado por algo tan básico, que despois de ter un acordo auspiciado por un xuíz pero proposto polo propio alcalde e aceptado por ambas partes, teñamos que tomar estas medidas por mor da irresponsabilidade o señor Castro, parécenos do máis lamentable.

   Esta é a segunda vez que dobramos o brazo de David Castro nun Xulgado, a anterior foi o ano pasado cando un xuíz obrigou ao  Alcalde a darlle acceso a Enrique Oubiña ao rexistro municipal, logo de tres ano e medio de loita pola vía pacífica que non deu froitos e nos obrigou a ir ante a xustiza.

Agora tivemos que volver, tamén pola terquedade dun alcalde que non ten reparos en tirar os cartos da veciñanza en avogados unicamente por mor dos seus caprichos. E agora, aínda non está contento con iso que se dedica a tomarnos o pelo, quizais pensando que non temos recursos para manter a loita, quizais pensando que nos imos render e pasar do tema, quizais porque lle fai gracia. Pois xa lle advertidos que nós somos un partido moi serio e rigoroso, e non nos rimos con segundo que cousas, e aínda que tamén sexamos un partido modesto, para defender os nosos dereitos temos recursos suficientes. Consideramos que non se debe xudicializar a vida política, porque non é a nosa función e porque ademais estas cousas van ao peto da veciñanza, polo que estamos forzando para evitar ir ao xulgado con outras cuestións, pero ante esta actitude do señor Castro, imos ter que reestudar a nosa liña de acción.

• Unha xuntanza dun suposto programa contra a violencia de xénero do que só se coñece o nome.
• Xuntanzas con Garda Civil, hostalería e taxistas sen presenza nin dos servizos sociais municipais, nin do CIM comarcal, nin de ESMAR.
• Nin rastro do programa pioneiro Conta Comigo, que incluía preto de medio cento de negocios locais e un grupo de apoio.
• Faltas de respecto institucional ao deixar fora dos actos do 8M a diversos colectivos municipais.

  Como en ocasións anteriores, dende Somos Ribadumia evitamos facer valoracións relativas ao 8M e ás accións de goberno local ao redor desa data para non crear polémicas que poidan desvíar a atención do importante, pero pasado o día e os actos centrais do mesmo, cómpre poñer de manifesto uns feitos que nos parecen bastante discutibles, cando menos.

  No medio das actividades organizadas ao redor do 8M, figuraba unha xuntanza que, segundo constaba no cartel, consistía nunha “ Reunión de coordinación e seguimento do programa contra a violencia de xénero punto violeta : -non violencia; -empoderamento”. O evento aparecía axendado para o día 4 de marzo, e o propio goberno local publicou nas súas redes unha foto  da suposta xuntanza co seguinte texto   “O pasado luns tiña lugar a reunión de coordinación e seguimento do programa contra a violencia de xénero “Punto Violeta: non a violencia e si ó empoderamento da muller”, que engloba diversos axentes como o departamento VIOGEN da Garda Civil, os taxis, ou os hostaleiros locais, que xunto ó concello forman un tecido engranado”.

   Dende Somos Ribadumia non saímos do noso asombro. Como pode ser que se faga unha reunión desas características e non estean presentes os profesionais que a nivel local atenden as vítimas de violencia cando acoden a esa institución a pedir axuda? Dende o noso punto de vista, e partindo do descoñecemento que temos dese suposto programa de loita contra a violencia de xénero, pois non se fixo público nin en que consiste, nin como se está xestionando nin cales son os seus obxectivos, temos claro que esa xuntanza servíndose de toda a boa intención dos asistentes non foi máis que un paripé para dar a imaxe de que se fai algo, cando en realidade pouco se está facendo, ou nada. De feito, a realidade é que o goberno de David Castro fulminou o pioneiro programa posto en marcha da man de Somos Ribadumia, unha rede de puntos seguros que contaba con preto de medio centenar de negocios locais e cun grupo de apoio formado por persoas voluntarias ás que se lle deu formación específica. De todo iso non queda nada  e agora David Castro sacase da manga un invento que non sabemos se é unha broma ou se realmente pretende poñer o foco da violencia machista nos locais de ocio,  deixando fóra dese foco todo o demais. En calquera caso, o limitado do plantexamento, tendo en conta o punto de partida que foi o traballo feito entre o 2017 e o 2019,parécenos pouco menos que unha tomadura de pelo, cun tema para nos da máxima seriedade.

   Non imos valorar o contido da xuntanza, que tampouco se fixo público, pero dende o noso punto de vista, por moi positivos que queiramos ser, sen a presenza da traballadora social e do educador familiar do Concello e do CIM comarcal, entendemos que pouco se puido falar. Por certo que tampouco estivo convidada ESMAR, a única entidade da comarca, con sede en Ribadumia, dedicada a dar apoio ás vítimas da violencia machista.

  De fondo, os problemas persoais de David Castro.

    Con todo o que si sabemos do que está acontecendo en Ribadumia, estamos en condicións de asegurar que as ausencias tanto dos técnicos municipais e do CIM, como de ESMAR, nunha xuntanza desas características, teñen moito que ver con problemas persoais do Señor Castro cara eses profesionais e ese colectivo, e están na liña doutras actuacións deste goberno que leva semanas, nalgún caso meses, intentando invisibilizar o traballo do departamento de servizos sociais do Concello, sobre todo logo de facerse pública a situación do educador familiar, castigado nun despacho minúsculo e sen ventás, tal como denunciaron os sindicatos, ademais da nosa formación.  Unhas actitudes personalistas a través das cales David Castro debe pensar que “castiga” a esas persoas ou colectivos, pero en realidade o que está é transmitindo unha imaxe moi infantil e prexudicando á veciñanza, neste caso ás vítimas, que queren ter un servizos de atención pública aos que acudir sabendo que serán perfectamente atendidas, non mirar fotos do alcalde ao carón da Garda Civil.

 Os erros (ou non tan erros) de protocolo, outra vez.

Dende varios colectivos municipais recibimos queixas porque resulta que contra do que ven sendo habitual, o Goberno non mandou convites a participar nas diferentes actividades programadas polo 8M. Comezando polos actos propios do 8M , que este ano tiveron lugar no colexio, e para os cales o convite cos detalles do mesmo aos concelleiros da oposición chegou no mesmo día, nun intento de evitar así a nosa presenza. Máis grave nos parece que se ignorara intencionadamente a ESMAR dos actos oficiais. Ese colectivo converteuse en fundamental para axudar a moitas mulleres a saír adiante logo de vivir situacións dramáticas, e fai un traballo silencioso, pero necesario que merece todo o recoñecemento público, tamén que se lles teña en conta nestas datas, polo que o mínimo e convidalos formalmente a estar presentes. Da moita pena ver como o mesmo alcalde que foi correndo a Santiago a facerse fotos cando ese colectivo tivo o recoñecemento do goberno central a través dos Premios Meninas, agora manteña actitudes de desprezo e mesmo mostre a súa alegría ante a posibilidade de que a Asociación mude a súa sede social a outro Concello.

Cuestión similar coa Gala do Día da Muller. Sobre esta última, o Concello enviou convites por correo postal aos colectivos do noso Concello, pero obviou facelo vía telemática, algo que ademais é obrigatorio pois fai anos que a lei obriga ácomunicación telemática coas entidades xuridicas, non digamos xa unha chamada de teléfono, que foi xusto o que se fixo o ano pasado para o mesmo acto.

  En conxunto, é evidente que a este goberno a celebración do Día da Muller só lle interesa de cara á galería fotográfica, e que  para David Castro o realmente importante é castigar a quen polo motivo que sexa o incomodou. E así vai Ribadumia, que de ser referente nas políticas de feminismo e de loita contra a violencia de xénero pasou a irrelevancia, e a saír nos medios por cuestións nefastas como o regalo de cortauñas no ano 2022 ou o maltrato a traballadores e colectivos do noso Concello.

• Unha obra por valor de 207.000 € realizada sen cumprir prazos ,a direción de obra  falseando documentación, e o alcalde asinando todo.
• A acta de replanteo da obra asinouse o mesmo día que a acta de final de obra.
• David Castro permitiu o inicio da obra sen estar toda a documentación e regra e autorizou o pago da mesma antes de que se rematase de executar dita obra.
• O arquitecto externo de man de David Castro, asinando documentos falsamente a cambio de 9.000€.

  No pleno celebrado onte o noso Concelleiro Sergio Soutelo puxo de manifesto, cos papeis na man,  a nefasta xestión no control de execución dunha obra de 207.000€. A denominación da obra é  “Mellora das instalacións térmicas en diversos edificios do Concello de Ribadumia ”, tivo un valor de 197.996,31 € subvencionados a través do Fondo de Cooperación Local para o ano 2023 da Xunta de Galicia, aos que hai que sumarlle os custes de redacción do proxecto e de dirección de obra, contratados ao arquitecto externo de man de David Castro a cambio de 8.954 € .

   No Pleno Sergio Soutelo puxo de manifesto varias irregularidades na documentación, irregularidades que supoñen falsidade documental entre outras cuestión e que son unhas actuacións da máxima gravidade:

• A acta de replanteo da obra, documento imprescindible sen o cal a empresa adxudicataria non pode comezar a obra, e que debe redactar a dirección de obra, neste caso o arquitecto externo contratado para ese traballo, figura como redactada o 10 de novembro de 2023. Pero foi asinada o 24 de novembro, dúas semanas despois, e así se pode comprobar no propio documento.

• O mesmo día, o 24 de novembro, o arquitecto asinou a acta de recepción da obra, dando por rematada, facéndose constar o seguinte : “las obras fueron bien ejecutadas, ajustándose sensiblemente al proyecto aprobado que sirvió de base para la ejecución de las mismas”.  Non só iso, ese mesmo día o arquitecto certificou a obra, dándoa como rematada por completo, e certificando que se había executado totalmente todo o que figuraba no contrato.

• Dáse a circunstancia de que ese día 24 de novembro as obras, que por certo tiñan data límite de execución no 12 de novembro,  estaban sen rematar, de feito temos fotos tomadas o 2 de decembro, onde se comproba que unha parte desta obra, a que afectaba ao edificio de servizos sociais do Concello, estaba aínda a medio facer.

• O 30 de novembro, David Castro deu autorización para o pago das obras, dando por valida toda a documentación, a pesar de que era evidente, e el tiña claro coñecemento pois as obras no edificio municipal de servizos sociais estaban ben á vista, que as obras estaban sen rematar, actuando así de maneira neglixente.

   David Castro, que se puxo moi nervioso ao ver os documentos que amosou Sergio Soutelo,  negouse onte a responder ás preguntas relativas as estas cuestións, alegando que as contestarían por escrito uns misteriosos técnicos, cousa que dubidamos bastante, pero non necesitamos esas respostas porque xa temos todos os documentos, que por certo son públicos. E temos pendente revisar varias contratacións máis, asinadas polo mesmo arquitecto, pois temos a sospeita de que esta  maneira de actuar non foi algo puntual.

   Dáse a circunstancia de que esta obra, como dixemos  foi levada por un arquitecto externo, que redactou o proxecto e exerceu a dirección da obra. Ese arquitecto non é para nada descoñecido no Concello de Ribadumia, nin é a primeira vez que sae a relocer nun pleno municipal. Resulta ser  o  mesmo “asesor misterioso” que saíu á luz nun pleno en setembro de 2022, cando  o noso concelleiro naquel momento, Enrique Oubiña, preguntou polo seu papel nunhas negociacións na sede da Deputación. Naquel momento David Castro declarou que a ese arquitecto había que estarlle moi agradecido, e que realizara os seus asesoramentos de maneira altruísta. A realidade é que e se arquitecto leva varios anos realizando traballos para o Concello, por valor de ducias de miles de euros, asi que o de altruista queda bastante en dúbida, quizais David Castro falaba dun “quid pro quo“.  

   Dende Somos Ribadumia non podemos aceptar esta maneira de facer as cousas, que xa non é vaia contra da lexislación vixente, senón que ademais pon en perigo centos de miles de euros en axudas económicas, e non sería a primeira vez que David Castro perdera importantes cantidades por non cumprir ben cos procesos ou por non ter a documentación en regra. E dende logo, ante as acusacións fora de tono que o señor castro expresou no pleno, pretendendo que nos queremos o mal para Ribadumia, que lle quede que ben claro que por suposto nós traballamos por e para Ribadumia, non para desenvolver carreiras persoais na política, e dende logo apoiamos todos os investimentos que sexan positivos para a nosa veciñanza. O que pasa é que para nós non vale todo, as cousas deben facerse , pero ademais deben facerse ben.

Un concello é unha institución pública, e como tal debe funcionar con escrupuloso respecto á legalidade, e o alcalde debe ser rigoroso co cumprimento desa legalidade. Se David Castro non é capaz de xestionar o Concello, nin de licitar as obras en tempo e forma, que deixe o cargo, pero non nos parece de recibo que se entre nestes xogos, asinando documentos falsamente e facendo todo tipo de trampas para ocultar a neglixencia da súa xestión.