• David Castro fai oídos xordos ás queixas da veciñanza pola falta de espazo e intimidade no despacho do educador familiar.
• Vai gastar 20.000 €nun aire acondicionado que non lle pediu ninguén, mentes deixar outros problemas sen resolver.
• David Castro ameazou con chamar ao despacho da alcaldía a cada unha das persoas que puxo queixa, pero négase a cambiar o despacho.
• Para reducir as queixas, está traslandando xestións de servizos sociais  ao concello.

  No pasado pleno o noso concelleiro Sergio Soutelo puxo de manifesto a existencia de numerosas queixas polo despacho do educador familiar, situación que xa temos denunciado tanto nós como os propios sindicatos. “Están entrando queixas no rexistro cada semana, todas polos mesmos motivos: falta de espazo para acceder tanto con  carriños de nenos ou cadeiras de rodas como as persoas con mobilidade reducida, imposibilidade física de que estea nese despacho máis dunha persoa,  ausencia completa de intimidade,  espazo agobiante… A miña pregunta foi que resposta se lle estaba dando a esas queixas veciñais, xa sen valorar a situación do propio educador familiar .”

   A resposta foi cando menos curiosa. De partida David Castro “asegurou que a súa intención era chamar ao despacho de alcaldía a cada unha das persoas que cursou queixa no rexistro “para explicarlle a situación dese despacho”. Ante iso aclareille que esas persoas xa saben cal é a situación do despacho, por iso puxeron queixa”. O señor Castro non entrou en máis detalles , pero deu a entender que o que pretende facer é explicarlle a esas persoas que o problema non é o despacho, senón o educador familiar e de paso lerlle a cartilla.  Para nós estás actitudes ameazantes cara a veciñanza e de acoso e derribo a un traballador son totalmente inaceptables.

  Á vista da resposta “pedinlle ao señor Castro que concretara a solución ao problema do despacho, que é o que xera ás queixas”.  A resposta de David Castro foi para enmarcar. “Imos poñer un equipo de aire acondicionado de 20.000 €”, para seguidamente culpar da instalación dese aire acondicionado ao propio educador familiar. Cómpre remarcar que as condicións de falta de calefacción e aire acondicionado en todo o local de servizos sociais, non unicamente  no zulo onde atende o educador familiar, son deficientes dende fai tempo, e nós mesmos denunciamos a situación en numerosas ocasións. O que David Castro non dixo foi que quen deu orde de mellorar esas condicións foron os informes realizados pola Inspección de Traballo, xa no ano 2022, polo que o que está facendo David Castro é intentar librarse dunha multa.

  En todo caso, queremos recordarlle a David Castro que os equipos de aire acondicionado non fan aumentar o tamaño dos despachos, e no caso dos zulos como o que ten o Concello de Ribadumia para atender á veciñanza que acode a servizos sociais, poden ser ata problemáticos pola acumulación excesiva tanto de calor no inverno, como de frío no verán, ao non dispor ese zulo de ventilación. Neste aspecto insistimos en que as queixas están motivadas polo tamaño do despacho, non por outras causas nin motivos, e que ese é o problema que David Castro debe resolver con urxencia.

  Para rematar, temos constancia de que para evitar que sigan producíndose queixas, dende o Concello están desviando trámites que ata agora se realizaban, como corresponde, nas oficinas dos servizos sociais comunitarios ao edificio do Concello, unha actitude absurda que só sirve para sobrecargar ao persoal da casa consistorial.

Ampliamos.

  Logo de enviar o texto máis arriba aos medios, DavidCastro foi inquerido sobre está cuestión por un dos medios de prensa comarcais. E ante as declaracións feitas , onde se pretende dicir que a situación ven da época na que este partido formou parte do goberno e Enrique Oubiña levou entre outras a área de Servizos sociais, queremos facer as seguintes aclaracións:

• En primeiro lugar, no pleno da semana pasada Sergio Soutelo preguntou especificamente polas queixas da veciñanza, non pola situación do educador familiar. E o que  esiximos nese aspecto é que se atenda ao que xa é un clamor das persoas usuarias dos servizos sociais comunitarios, que é ser atendidas en condicións dignas. O señor Castro pretende desviar a atención falando de aires acondicionados e de cartos,  ( e sinalando a Somos Ribadumia, que xa nos parece caer no ridículo) pero nada diso era o obxecto do debate.

Pero vistas as declaracións,  compre apuntar:

• A reestruturación de Servizos Sociais, coa adecuación do edificio que antes  foi Concello e escola infantil,  entre outras cousas,  e o posterior traslado de todo o departamento dende o edificio do Concello,  fíxose efectivamente  por iniciativa de Somos Ribadumia, ao igual que a posterior ampliación para acoller o almacén de roupa e de alimentos deixando prevista unha terceira fase para aloxar a protección civil que non chegou a realizarse, pero en ningún caso se instalou ao educador familiar nun despacho inadecuado, nin moito menos no despacho que ocupa actualmente.
• O local de servizos sociais conta con dous despachos  perfectamente válidos, previstos para a traballadora social e para o educador familiar, estando un deles valeiro por orde de David Castro dende que fai meses endureceu a súa guerra particular contra ese traballador, ao que non lle permite usar ese despacho valeiro e obrigandoo a estar nun oco que non estaba previsto para ser usado de maneira continuada nin moito menos para ter un uso continuado por parte da veciñanza.
• En ningún caso Enrique Oubiña ou Somos Ribadumia dispuxo a ningún traballador ou traballadora de maneira permanente, toda a xornada e todos os días da semana,  no despacho no que  actualmente está o educador familiar, que se usaba unicamente  como apoio de maneira puntual para cousas moi concretas.
• No tempo que Oubiña foi Concelleiro de Servizos Sociais nin houbo ningún requirimento da oficina de Inspección de Traballo, nin houbo  queixas do persoal , nin  moito menos queixas veciñais .
• Insistimos nisto último: queixas con Enrique Oubiña de Concelleiro, cero. Coas concelleiras determinadas por David Castro, houbo queixas de todo tipo, a traballadora social e o educador estiveron de baixa psicolóxica por causas relacionadas coas presións as que os somete David Castro, hai denuncias xudiciais interpostas polo persoal administrativo,   e dende que se cambiou de despacho ao educador familiar, entra de media unha queixa semanal no rexistro do Concello por parte de veciños que piden que os atendan noutro lugar máis adecuado.
• A instalacións de equipos de climatización  é unha esixencia da Inspección de Traballo, e reclamada polos sindicatos, unha actuación que por certo leva preto dun ano e medio de retraso sobre o propio compromiso  de David Castro, que en xuño de 2023 anunciou que a obra estaría feita “en un mes”.

   David Castro debe asumir as súas responsabilidades, explicar porque motivo mantén un despacho valeiro dende fai meses, que problema ten co educador familiar e porque lle quere facer a vida imposible, e deixar de sinalar aos demais. Para o caso, recordámoslle a David Castro que leva con maioría absoluta cinco anos, e neste tempo non fixo máis que crear problemas en servizos sociais.

• A coincidencia de dúas problemáticas e ningunha solución poñen en evidencia a xestión da Consellería de Educación.
• Resulta indigno que unha nai e un pai deban facer garda diante da escola.
• Non é aceptable que se lle negue o mestre de apoio necesario alegando  unha cuestión burocrática.
• Esiximos actuacións e solucións inmediatas.
• Todo o noso apoio as familias afectadas.

   Dende que saiu à luz os problemas que acontecen a día de hoxe no colexio  de Ribadumia, onde coincide que na mesma aula de infantil conviven varios nenos con necesidades especiais superando a ratio establecida e sen o reforzo profesional que fai falla, e cunha desas nenas coa necesidade de contar coa presencia dunha enfermeira cuxa baixa non foi cuberta, estivemos agardando  contando que a gravidade da situación feita pública traería solucións inmediatas. Pero vemos que pasan os días e dende a Consellería só se aportan escusas.

  Dende a nosa formación, en primeiro lugar queremos amosar todo o noso apoio, tanto a esa nai e ese pai que se ven obrigados a facer garda diante do colexio polo único motivo de que o mesmo Conselleiro  que se pasa o día falando do moito que gasta en instalacións non é  capaz a dispor unha enfermeira e rematar cunha situación tan indigna para eses proxenitores, como aó resto de nais e pais que teñen que ver cómo os seus fillos e fillas non teñen a atención que lles corresponde  porque o mesmo Conselleiro non quere tampouco  desdobrar unha aula e poñer un mestre de apoio.

   Dende Somos Ribadumia non podemos aceptar que ante problemas de solución tan sinxela como básica – dotar os profesionais necesarios para que nenos e nenas poidan recibir a atención necesaria – só escoitemos escusas.  Non é aceptable que a Consellería non conte cunha lista de profesionais para cubrir baixas como a da enfermeira que atende á nena referida, e non é aceptable que coa escusa de que se entregou tarde un papel, a Consellería faga como que hai un neno que non existe. As aulas teñen estipulados  uns ratios por algo, e se superan, sexa a principio de curso ou pola metade do mesmo porque chegue algún neno ou nena novo, ou se se detecta nalgún dos nenos xa matriculados algún que teña necesidades especiais, a Conselleira non pode obviar as súas obrigas.

  Dende Somos Ribadumia poremos as queixas formais pertinentes e esixiremos que se actúe con celeridade.

   Por outra banda, do  goberno local, que no pasado pleno fixo moita declaración de intencións e asegurou que estaban seguindo o tema, cousa que agradecemos, agardamos algo máis que verbas bonitas e feitos vagos, e recordámoslle a David Castro que foi él o que declarou que se vendía ao PP porque así ese partido dende a Xunta beneficiaría a Ribadumia, cando de momento o que estamos notando é precisamente o contrario.

• Confirmou que a obra está sen licitar, e que posiblemente non se licite ata o ano próximo, sen concretar data.
•  Cunha partida orzamentaria aprobada de 267.000€, dixo que “non ten cartos” e que “está buscando financiamento”.
• Se di que non ten os cartos, que fixo con eles?
• As mentiras de David  Castro e de Miguel Castro  ao Umia C.F., que o céspede se cambiaría en outubro, e que o cambio leva meses licitado, ao descuberto.
• Esiximos responsabilidades políticas. Miguel Castro debe dimitir por mentir, por enganar  e por rirse na cara do Umia C.F., e David Castro  como mínimo debe desculparse e darlle xa a volta á esta situación.

   No Pleno Extraordinario do luns , celebrado logo dunha xogada de David Castro para gañar tempo e poder solventar certas cuestións expostas por Somos Ribadumia ás que debía dar resposta, topámonos cunha sorpresa maiúscula, que é que  David Castro gastou os cartos da renovación do céspede de A Bouza noutras cuestións, deixando esta actuación no aire.

  Preguntado varias veces por esta cuestión, David Castro declarou que o cambio de tepe do campo de fútbol de A Bouza non se pode licitar neste momento porque non conta con financiamento suficiente, declarando que se están buscando fondos para poder acometer a obra, pois  fáltanlle, supostamente,  178.000€.

  De partida, as declaracións de David Castro demostran que tanto él como os seus concelleiros e concelleiras, en particular Miguel Castro, Concelleiro de Urbanismo, levan meses enganando á directiva e a toda a familia do Umia C.F. ao decirlles primeiro que se lles ía mudar o céspede en outubro cando non era certo, e segundo fai semanas cando, despois de poñer dende a nosa formación de manifesto o retraso da obra, se lles dixo que “Somos Ribadumia minte, a obra leva licitada meses.” Tal como o noso Concelleiro Sergio Soutelo expresou no Pleno, as declaracións do señor Castro “quedou moi claro que dende Somos Ribadumia dicíamos a verdade ao facer público que a obra está sen licitar e que non se vai poder facer en outubro como estaba prometido,  e polo tanto  quenes mentiron  foron David e Miguel Castro, este último moi insistentemente, e aínda por enriba, non é que a obra estea sen licitar, é que David Castro xa gastou os cartos e agora non pode facer o cambio de céspede”.

  Porque o máis salientable non é o retraso na licitación, algo que neste goberno xa non sorprende, o salientable é que tres meses despois de aprobado o orzamento e dentro del a partida específica de 267.000 € para o cambio de céspede, David Castro gastou os cartos noutra cousa e agora non ten fondos para poder facer esta actuación, que por certo conta con parte de financiamento da Deputación, que se pode perder. O que non fixo David Castro foi explicar en que gastou os cartos, nin xustificou ningún tipo de urxencia que motivaran deixar esta actuación no aire, pois tampouco aportou o señor Castro unha data concreta de cando se vai realizar. “Dixo finais de 2024 ou no 2025. Isto nos parámetros nos que  normalmente se move David Castro significa que a ver se no 2025 se fai a obra”.

    Esta xestión dos recursos públicos, mentindo, enganando, e collendo cartos dunhas partidas e dunhas obras xa anunciadas e comprometidas  para tapar os buracos da súa incapacidade, resulta  totalmente lamentable  e inaceptable. Dende Somos Ribadumia entendemos que un alcalde que minte e que engana  á veciñanza e que non cumpre os seus  compromisos, non ten lexitimidade ética para seguir no seu cargo. E outro tanto o Concelleiro de Obras, que leva meses sendo o altofalante da alcaldía, mentindo descaradamente e ríndose da directiva e de toda a familia do Umia C.F. que queda condenado a manter a situación dos últimos meses, con lesións recorrentes, e con penalizacións da Federación Galega de Fútbol que poden rematar  no peche do campo e a imposibilidade de xogar nel. David debe, como mínimo, desculparse, e darlle a  volta á situación de maneira inmediata, porque o campo de A Bouza non pode estar nas condicións nas que está,  e senón quere facerse cargo das súas responsabilidades que dimita , e Miguel Castro  debe dimitir de maneira inmediata polas súas actitudes, declaracións falsas e enganos ao Umia e ao colectivo que o conforma, que non é pequeno.

• 2.501€ por non resolver uns arrastres de terras, en Leiro.
• Advertido a principios de 2023, David Castro non fixo nada, provocando así a chegada da multa .
• O problema que orixinou a multa, segue sen resolverse, provocando posiblemente novas multas.
• Esiximos responsabilidades políticas é que o alcalde e o Concelleiro de Urbanismo paguen do seu peto as multas.

Na contorna da rotonda da Fonte do Corvo, na parroquia de Leiro, existe unha pista que baixa dende unhas fincas forestais e que nos últimos anos nos días de choiva arrastra terra e maleza que a miúdo remata na propia rotonda, dentro da PO-300, estrada de titularidade autonómica, provocando unha lameira e supoñendo un perigo para a seguridade viaria. Pois ben, a Consellería de Infraestruturas ben de multar aó Concello con 2.501 € por non poñer solución a estes arrastres e ao problema de seguridade viaria.

O máis grave desta nova multa, que se suma a outras por non resolver outro tipo de problemas, como á de 1.500€ que lle impuxo Augas de Galicia en marzo deste mesmo ano por non actuar ante un verquido nun regato en Sisán, é a desidia que a motiva.

Porque hai que remarcar que a multa chega, e así o recolle a resolución da Xunta, por non actuar logo de que se lle comunicara a situación ao Concello de Ribadumia. E non foi por falta de tempo. A denuncia ao Concello de Ribadumia realizouse en xaneiro do ano pasado, ratificada en setembro nun escrito onde se expoñía o problema e como se debía resolver. Foi ante a desidia do señor Castro e a Consellería iniciaría o proceso de sanción, dando prazo ao Concello para que alegara o que considerase. David Castro fixo oídos sordos das advertencias, non se molestou en presentar alegacións nin en resolver o problema, co resultado de que dende o Servizo de Vixilancia de estradas provincial propuxeron a imposición da multa de 2.501€, a máis baixa posible, pero non necesariamente a última.

En maio do presente ano comunicóuselle ao Concello a multa e a obriga de resolver o problema, baixo ameaza de novas multas coercitivas se David Castro seguía pasando de todo, como así fixo. Finalmente este pasado 6 de setembro o Concello recibiu unha resolución, onde se lle advertía, ademais da multa, de que dispoñía dun mes para solucionar o problema. O mes pasou, e o problema segue sen resolverse, polo que debemos prever que a Consellería siga poñendo multas, de entre 100 € e 1.000 €, ata que David Castro cumpra as súas obrigas. De non facelo, a Xunta podería optar por solventar o problema e pasarlle o cargo aó Concello, pero seguindo os funcionamentos habituais, iso implicaría que o Concello antes pagase miles de euros en multas, co cal, s resolución dun problema menor rematará custando moitos cartos.

Para a nosa formación é totalmente inaceptable que se dean estas situacións, e que David Castro actúe con este grao de desidia, ata o punto de que nin se molesta e presentar alegacións , non digamos xa resolver o problema que, en última instancia, supón un perigo para a veciñanza e xente doutros concellos que circula por esa estrada. E dende logo é intolerable que a veciñanza de Ribadumia teña que pagar multas motivadas pola vagancia do señor Castro.

Esiximos a David Castro que, en primeiro lugar e de maneira urxente solucione o problema que motivou a multa evitando a chegada de novas penalizacións, e en segundo lugar que asuma responsabilidades políticas: que el e o Concelleiro responsable paguen do seu peto as multas motivadas pola súa inacción e desidia, pero ademais diso que se depuren responsabilidades, pois Ribadumia non pode permitirse ter concelleiros e un alcalde que non cumpran coas súas obrigas, e ademais eses comportamentos supoñen rirse da veciñanza na súa cara, e non se poden nin se debe tolerar.