• A norma propón  que os veciños poidan denunciarse entre eles, unha serie de multas, e varias cuestións de ética e legalidade discutibles, como a obriga de incluir nas denuncias particulares fotos das parcelas denunciadas.
• Dende Somos Ribadumia aportamos varias melloras e correccións ao documento.
• Propoñemos que o Concello dispoña un servizo municipal de xestión de biomasa.

  Este xoves terá lugar, se David Castro non volve meter a pata coa documentación e a convocatoria,  o Pleno Ordinario de novembro  no cal o goberno local ten previsto debater e aprobar unha ordeanza local para a xestión da biomasa.

  Vaia por diante que nós a priori non estamos en contra da aprobación deste regulamento, que de feito chega bastante tarde, pero non podemos pasar por alto certas cuestións que se recollen no borrador que para nós son mellorables, e nalgún caso inadmisible.

  O texto pretende establecer a obrigatoriedade manter limpas de maleza e especies pirófitas  as parcelas das zonas urbanas, núcleos rurais e faixas de seguridade, en consonancia coa normativa autonómica, pero inclúe medidas moi discutibles. A mais chamativa é a obrigatoriedade de que os veciños que consideren que unha parcela non cumpre a lexislación deben aportar coa correspondente denuncia e identificación da parcela fotos da mesma. David Castro pretende con esta obriga  ter un escudo cando un propietario dunha parcela denunciada lle proteste e poder cargarlle a responsabilidade da denuncia a outra persoa. Esta fórmula de descargo non é nova en David Castro, pero obrigar a unha persoa que  realice fotos da parcela doutra persoa ademais de que é algo ilegal, é unha medida que únicamente vai servir para crear e aumentar os conflitos entre a veciñanza, e ademáis resulta de todo excesivo e innecesario, pois a propia norma expón que deben ser os técnicos municipais os que se persoen  na parcela denunciada e comproben se efectivamente se cumpre a normativa ou non.

Como explica o noso concelleiro Sergio Soutelo  “David Castro  parece encirrado en buscar a división da veciñanza e favorecer enfrontamentos, e de paso escorrer as súas responsabilidades. O goberno local debe ser quen cada ano comprobe que dentro das zonas se seguridade se cumpren as normas , e non deixarlle a responsabilidade da denuncia á veciñanza, non digamos xa esixirlles fotos de propiedades privadas”.

  Hai máis incoherencias, como que mentres en toda Galicia o prazo límite para que as parcelas estean en condicións aceptables se establece a finais de maio, David Castro pretende alongado a finais de xuño, en pleno verán. Ou que logo de aberto un expediente por parte do Concello ante unha parcela sen limpar, pasados os quince días de prazo para a corrección da situación, non se estableza a obrigatoriedade de que os técnicos pasen por esa parcela a corroborar que se corrixira a situación. Neste aspecto consideramos que os expedientes que se abren deben pecharse, e os técnicos deberían pasar obrigatoriamente a corroborar que se corrixen está situacións que non esquezamos que teñen como obxectivo evitar incendios, as consecuencias derivadas dos mesmos, e en última instancia salvar vidas. Ademais, dicir que os técnicos  “poderán” pasar pola finca a comprobar se se corrixiu o que estaba mal, pode levar a un uso politizado da norma, con veciños aos que se lle mira con lupa e outros aos que non.

   Tampoco nos parece nada correcto que se fale de que o Concello poderá proceder ante un incumprimento á limpeza subsidiaria das parcelas, pero non establezca como corresponde nunha administración pública Unha tabla de prezos, deixando a porta aberta a que o Concello cobre o que considere, nin que non recolla a posibilidade ou alternativas para o caso de persoas que non poidan por algún motivo facerse cargo da xestión da súa parcela.

Traballar en positivo.

 Dende Somos Ribadumia analizamos debidamente todo o texto, e ademáis das cuestións que vimos de expor, topamos algún axuste máis que consideramos que debe realizarse e que melloraría unha norma que entendemos que pode ser necesaria, pero que non pode pensarse como un mecanismo de exención de responsabilidades políticas, e si debe aportar ferramentas que faciliten a sensibilización e participación da veciñanza na prevención de incendios. “Mais colaboración, máis recursos, menos denuncias e menos multas”. Por este motivo, presentamos unha serie de melloras ao documento que propón o goberno local, para corrixir incoherencias e as cuestións arriba mencionadas, e aportando algunha proposta que consideramos moi necesaria.

  Unha cuestión a remarcar que propoñemos é que o Concello saque a concurso -asumimos a incapacidade de David Castro para xestionalo directamente – un contrato para a limpeza de parcelas, creando así un servizo municipal de limpeza de parcelas. Esta medida  permitiría aportarlle á veciñanza unha alternativa pública, a prezos razoables, e facilitar e abreviar a xestión no caso de limpezas subsidiarias.  E dicimos isto sabendo que existe a posibilidade de que Seaga se faga cargo, pero é un servizo que non vemos que estea funcionando moi ben, de feito existen queixas por como xestionan a limpeza de montes – que é arrasando todo sen contemplacións –   ata o punto de que a norma proposta por David Castro nin sequera contempla a posibilidade de acudir a esa vía, e ademais nós apostamos por unha xestión mais próxima á veciñanza.

   Propoñemos outras cuestións como que cando se inicie a campaña de prevención se publique un listado de empresas locais e comarcais que dean servizos de limpeza de parcelas, pois non todo o mundo dispón dos recursos para manter as súas parcelas en  condicións e moitas veces o problema radica en encontrar empresas que fagan o traballo, ademais nuns meses, os de primavera, nos que para esas empresas hai moito traballo .

En todo caso, a nosa proposta fixémoslla chegar a todos os partidos con representación e agardamos que de aquí ao xoves sexa posible consensuar un documento que agardamos se aprobe por unanimidade

• A maioría dos clubs deportivos apenas presentaron candidaturas para recibir recoñecementos na Festa do Deporte.
• Exceso de politización do acto e con escasa presenza das entidades deportivas municipais.
• No canto de traballar pola unión e a posta en valor do deporte, David Castro traballa pola división entre as entidades deportivas e a veciñanza.

  O que debía ser un evento de posta en valor dos deportistas e do deporte no noso concello, nos últimos anos derivou nun acto de propaganda política e de competencia forzada  entre as entidades deportivas ata tal punto que os propios clubs están cada vez máis desconectados deste evento.

  Este pasado sábado tivo lugar a Festa do Deporte,  e o evento non fixo máis que poñer de relevancia os problemas dun acto pensado para ser unha cousa, pero que David Castro retorceu ata convertelo noutra, e as consecuencias desa maneira de facer.  Sen valorar o desenvolvemento do acto en si mesmo, con máis presenza de políticos que de deportistas e con ausencias moi notorias por parte das entidades deportivas, a realidade é que os clubs deportivos amosaron en todo o proceso, dende a presentación de candidaturas para os recoñecementos ata a  súa presenza na propia gala, o seu desapego deste evento, que debería ser unha festa para por en valor o deporte ribadumiense e aos deportistas do noso concello,  cun auditorio ateigado de deportistas, pero que rematou sendo un exercicio de propaganda e discurso político, e un intento de David Castro de quedar ben con todo o mundo – de cara a galería –  que tivo o resultado contrario.

   O noso concelleiro Sergio Soutelo mantén unha relación moi fluída con todas as entidades, polo que non se sorprendeu da escasa resposta dos clubs ante este evento “o problema está en como se xestiona todo isto, que é facendo todo ao revés de cómo se  debería facerse. Hai un exceso de intromisión política nas cuestións que deberían valorar as entidades, con xuntanzas para falar de temas deportivos ás que os directivos acoden e se encontran con todo xa decidido,  e ao tempo o goberno descarga nas entidades responsabilidades que debería decidir o goberno, que rematan creando conflito e discusións entre elas. O  propio  mecanismo de recoñecementos xera máis competencia que unidade no deporte local,  ademais de que algúns dos recoñecementos son bastante discutibles e producen máis friccións que consensos”. De feito, a maior parte dos clubs este ano apenas presentaron candidatos e candidatas, o cal tivo como correspondencia que os recoñecementos se concentraran en moi poucas entidades.

   Dende Somos Ribadumia temos moi claro que todo o mecanismo para premiar a deportistas, clubs, adestradores, medios e patrocinadores non tivo unha boa evolución no tempo e que o goberno de David Castro debe realizar cambios de calado.

   Por outra banda, non podemos deixar de por de manifesto que o feito de que David Castro manteña enfrontamentos con parte dos clubs do Concello e xere descontento no resto, xunto coa política de crear división que leva practicando nos últimos anos,  non axudan  en nada a que en Ribadumia poidamos ter unha festa do deporte que sirva para por de relevancia os seus  valores positivos,  nin moito menos amosar a potencia unificada do deporte local.  Por iso pedímoslle a David Castro que abandone a política da confrontación e opte polo diálogo e as boas prácticas, reconduza a relación con  todas as entidades deportivas, deixe de meter cizaña entre elas e entre a veciñanza, e que mude todo o funcionamento da Festa do Deporte para que sexa o  que debe ser, un escaparate da nosa potencia deportiva e unha xornada de convivencia entre entidades, deportistas e todo o que se move ao redor do mundo do deporte local.

  Por ultimo, dende Somos Ribadumia queremos parabenizar a todas  e todos os deportistas e clubs do noso concello, tanto a premiados e premiadas como a  finalistas na Festa do Deporte, pois o recoñecemento foi sen dúbida merecido,  pero tamén con independencia dese evento,  a todas as persoas que practican deporte no noso Concello e aos clubs que fan posible, gracias ao esforzo impagable das súas directivas ,  que sexamos un Concello con tanta forza no ámbito deportivo.

• A empresa concesionaria da xestión do saneamento propúxolle ao Concello unha suba dun 28,20% da taxa de saneamento.
• O recibo pasará de 48.4€ a 62,51€ (IVE endadido) para as vivendas, e con subas de 30€ a 300€ para as empresas, un auténtico sablazo.
• David Castro oculta a situación sen facer nada.
• David Castro oculta canto nos vai supor a suba de impostos nos próximos meses.

  Dende Somos Ribadumia vimos de ter constancia de que o pasado mes de setembro a empresa concesionaria da xestión do saneamento municipal realizou ao Concello de Ribadumia unha proposta de actualización das taxas de saneamento, tanto das de uso da rede, como do resto de taxas relacionadas con este servizo básico, acometidas, análises e inspeccións.

   A proposta de actualización, escudándose en que a última actualización foi no 2012, e en que dende entón o IPC subiu un 28,20%,  inclúe a solicitude expresa de que se aprobe nos termos propostos, o cal implicaría unha importante suba para a veciñanza e as empresas do noso Concello.  En concreto, esta suba suporía pasar dos 48.40 € actuais (ive engadido)  aos 62,51 € no caso das vivendas,  e dos 105,08 € aos 134,71 € para pequenos negocios,  escalando prezos en toda a táboa ata chegar ao máximo para as grandes empresas, que pasarían de pagar 1.155 a pagar 1480,71 €. A mesma porcentaxe de suba aplicaríase ao resto de servizos incluídos no contrato de xestión.

    Esta proposta de suba, que David Castro oculta aos grupos da oposición e á opinión pública, súmase a outras subas previstas como a do lixo, que no caso máis optimista suporá unha suba do 50%, , pero tamén as xa acontecidas como a da auga, ou o golpe que nos meteu Augas de Galicia polo uso da depuradora de preto de medio millón de euros, que xa foron asumidos ambos  polo Concello, cargándollos á caixa común da veciñanza.  En calquera caso,  David Castro, que mantén ao Concello sumido no caos económico, no vai poder aguantar moito sen repercutir estas subas  no recibo, ademais no caso da do lixo vaino ter que facer obrigatoriamente.

O silencio de David Castro.

Dende Somos Ribadumia esiximos en primeiro lugar explicacións públicas, pois no pleno da semana pasada, nun momento no que se falou de impostos ao fío dunha moción do PSOE, David Castro evitou intencionadamente falar da situación á que se enfronta o Concello, que pode supor unha suba no curto prazo da maior parte das taxas municipais, e ademais en porcentaxes importantes, que poden supor no seu conxunto ao redor – coas estimacións máis baixas – de 120 €/ano máis por vivenda, polo que estariamos falando dunha suba conxunta e de golpe do 50% das taxas municipais, unha autentica barbaridade.  Non só evitou falar da realidade do noso concello, senón que intentou arrastrar ao PSOE  –  que defendía nese punto  o que nós consideramos e por iso apoiamos  unha xusta rebaixa de IBI para quen aposte pola enerxía solar na súa casa –   e  de paso ao resto da oposición a “ convocar a comisión informativa de contas para falar e  tomar acordos en relación aos impostos municipais”, unha trampa  coa que pretendía,  ocultando a realidade do que ten enriba da mesa,  que a oposición lle validase unha suba de taxas. 

   No caso da suba do saneamento que nos ocupa, descoñecemos o motivo polo cal a empresa concesionaria pide agora unha actualización das taxas, polo que de partida, asumindo que como sempre David Castro non vai dar a cara e moito menos explicacións,   imos pedir copia do contrato de concesión e analizar ben a situación, antes de facer máis valoracións, pero a suba proposta, con IPC ou sen el, parécenos esaxerada e ademais non consta que David Castro presentara ningún tipo de alegación ou resposta ante a proposta da concesionaria, polo que nos tememos que vaia aceptar a proposta.

  O que si podemos adiantar é que dende a nosa formación non imos apoiar ningunha suba de taxas á veciñanza e ás empresas do noso Concello que non estea perfectamente xustificada, e que imos esixir a David Castro que cumpra os seus compromisos coa veciñanza e non suba impostos, nin de maneira directa nin, moito peor, cargándollos de maneira indirecta ao peto común, como xa fixo coa suba do recibo da auga e taxa da Xunta (gobernada polos amigos do señor Castro) sobre o uso da depuradora.

  Xa que David Castro presumiu de xestionar e de garantir que a veciñanza non ía sufrir subas de impostos, usando ademasi esa premisa, a de negarse a subir impostos, para xustificar todo tipo de recortes e a súa negativa a realizar investimentos importantes ou aumentarlle as axudas aos colectivos municipais,  que cumpra ese compromiso ou que dimita.

• O estado actual de varios parques é totalmente catastrófico.

• Xogos rotos, pezas e anacos de xogos tirados polo chan, ponlas de árbores sen retirar, óxidos, falta de proteccións,  estruturas en perigo de  derrube …

•  Completa inacción de David Castro, que tendo perfecto coñecemento da situación non se digna mandar operarios nin sequera  retirar o que está roto.

   A mala situación dos parques infantís do noso Concello non é nova.  Pero o grao de degradación e de abandono dos mesmos chegou a cotas que non se poden aceptar.

  Estes  días dende Somos Ribadumia achegámonos a comprobar novamente o estado dos parques, e so puidemos comprobar a situación de abandono completo na que se encontran. Pero ademais do estado de abandono e falta de mantemento e atención, temos que por de relevancia a situación de perigo provocada porque tampouco se están retirando os elementos de xogo rotos ou degradados, nin se reparan os buracos no caucho.

  Pezas rotas e tiradas polo chan, estruturas como tobogáns, que teñen certo tamaño e pensadas para que os nenos se suban e xoguen a case dous metros de altura, nun estado tan crítico que en calquera momento poden virse abaixo, moita podredume, os cestos e asentos dos columpios cheos de oxido e sen as gomas de seguridade,  falla de peches perimetrais de seguridade (obrigatorios por lei) … a lista é longa.

  Compre recordar  que en setembro de 2022 denunciamos a que xa era  unha moi mala situación dos parques infantís, e que se habían estragado 48.000 € dunha suposta intervención  “ para poñer ao día todos os parques infantís do Concello” sen que ninguén fora quen  de explicar o que se había feito nin en que parques. Dous anos despois, a degradación é completa, ata o punto de que hai pais que están optando por acudir a parques doutros concellos ou que evitan que os seus fillos e fillas usen os xogos porque son un perigo.

Unha vez máis pedímoslle a David Castro que compra as súas obrigas de alcalde, e arranxe os parques infantís do noso concello.