• Propoñemos unificar todos os alumeados decorativos que se colocan ao longo do ano nun lote.
• Aforrar cartos, e facilitar a xestión a través dun contrato por varios anos.
• Mellorar a relación calidade-prezo dos alumeados e axudar ás comisións de Festas.

  Dende Somos Ribadumia propoñemos seguir a estela doutros concellos, reunindo os diversos alumeados que se colocan ao longo do ano en Ribadumia nun único lote e sacar o seu alugueiro a concurso público.

  Os alumeados decorativos, con independencia de se falamos dos de Nadal ou das diferentes festas e eventos que un Concello acolle ao longo do ano, son un elemento case imprescindible por moitos motivos. Animan e convidan a saír a rúa e a participar do ambiente festivo, sexa no Nadal ou durante outras datas remarcadas. Serven para indicar que nun lugar ou parroquia están de celebración,  para orientar ás visitas  cara a zona central do evento, onde normalmente se desenvolven as verbenas e actos festivos e  para dar ambiente e para animar á participación.   Polo tanto, o alumeado é unha parte fixa do orzamento de calquera comisión de Festas e tamén dun Concello.

   Centrándonos no que afecta á administración local ribadumiense, o Concello leva anos colocando  o alumeado no Nadal, na Festa do Tinto e na Festa do Pan. As luces, como ven sabemos en Ribadumia, son un elemento decorativo que a veciñanza mira e valora, e polo tanto compre ser moi escrupuloso a hora de xestionar este tipo de decoracións. Dito doutro xeito, cos alumeados municipais hai que saber o que se fai, e  non se trata de gastar pouco ou moito, senón de gastar ben, e poñer unha decoración axeitada ao momento.

   En Ribadumia, segundo os datos que nós temos, aportados polo goberno local, o alumeado da Festa do Tinto do ano 2022 custou 7.139 €, o de Nadal segundo o último dato dispoñible – a Conta Xeral do ano 2023 –  no 2023 custou 28.690 €, neste caso debemos entender que ademais de alumado inclúense no gasto outros elementos decorativos colocados na Praza do Concello, e o alumeado da Festa do Pan  no 2022 tivo un custe de 2.420 €. En total podemos dicir que o Concello gasta cada ano ao redor de 40.000 € en alumeados decorativos.

  Con este dato, o Concello de Ribadumia é dos Concellos da comarca que máis cartos gasta por habitante neste concepto, ao redor de 7€/habitante. Outros Concellos gastan ao redor de 4-5€/habitante incluso menos. Pero neste caso queremos reseñar, por que nos parece que é  o exemplo que resulta interesante seguir, o caso de Vilagarcía. O seu goberno local saca a concurso de maneira anual  o alumeado para as súas Festas de Nadal, Santa Rita e San Roque, logrando no 2023 situar o contrato nos 95.000 €,  unha cifra a destacar tendo en conta o tamaño do Concello e a cantidade iluminación disposta, e que ten dous grandes eventos a parte do Nadal cubertos por ese contrato. En resumo no 2023 supuxo un esforzo de 22’5 €/habitante. Logo no 2024 o contrato subiu ata os 115.000 €, motivado maiormente por un aumento nos elementos contratados, pero con todo o custe por habitante mantívose nos 3€.

  Só con estes datos, estaría máis que xustificado instar ao Concello de Ribadumia a sacar a concurso o alumeado dos seus eventos nun único lote e buscando a mellor relación calidade e prezo. Pero dende a nosa formación pensamos que é unha boa oportunidade para ir algo máis aló.

   Cada ano ás comisións de festas parroquiais resúltalles máis difícil organizar as festas en cada lugar. Hai moitos motivos, pero os máis salientables son dous: burocráticos e económicos. Cada vez máis papeleo, máis seguros, máis autorizacións, e por outra banda cada vez as verbenas no seu conxunto saen máis caras, ao que hai que sumar o resto actividades que se organicen para cada ocasión, dende misas, alboradas, desfiles de bandas …

   Cómpre ter en conta que as  pequenas festas parroquiais forman parte da nosa identidade cultural como pobo e son un ben social a conservar. Son eventos que unen e que reúnen a familias e veciñanza, e ademais moven a economía local. Dende o noso punto de vista, sen ir máis aló, son moitos os motivos polos cales as administracións deberían facer un esforzo moito maior na preservacións destes eventos locais.

   Neste caso nós propoñemos algo moi sinxelo e economicamente perfectamente viable, que suporía unha axuda pequena, pero sen dúbida ben recibida polas comisións de festas do noso Concello. En Ribadumia actualmente contabilízanse un ano normal seis verbenas, sen contar Santa Marta nin a romaría da Carballeira de Ribadumia, e xa se perderon algunhas, como a de Besomaño. Se temos en conta que o custe dun alumeado pode chegar aos 1.000 € por verbena, máis incluso dependendo dos días de festa que sexan, estamos falando de que as verbenas e romarías que temos no concello  conlevan pouco máis de 5.000 € cada ano.  Dende Somos Ribadumia pensamos que nun contrato  sacado a concurso sería factible que polo que hoxe por hoxe gasta o Concello nos seus propios eventos, se puidera conseguir un contrato que incluíse o alumeado de todas  esas festas, e en último caso a diferenza económica é perfectamente asumible.

  Quedaríanos falar doutros eventos organizados por outros colectivos, como a concentración moteira ou algún evento local máis como a “ruada das gotas” ou algunha actuación de verán que puidera xurdir, que tamén se podería, cun correcto traballo de previsión,  ter en conta.

  Reunir todas estas necesidades de alumeado nun lote e sacalos a concurso público ao noso entender tería varias vantaxes. A primeira e máis evidente a posibilidade de conseguir mellor prezo, máis aínda negociando todo nun único lote. A segunda, polo mesmo motivo,  sería a posibilidade de lograr unha excelente relación calidade-prezo, e ter así acceso a uns alumeados de calidade durante o tempo que se estime oportuno sen necesidade andar negociando cada ano e para cada evento. Ademais a través das propias cláusulas e das melloras que se oferten sempre será posible obter melloras en canto cantidade de elementos ou aquelas cuestións que se consideren. Polo tanto, un concurso cunhas cláusulas ben elaboradas, dentro dunha lóxica razoable, permitirán ter durante anos solucionada a cuestión de todos eses alumeados, con garantías de calidade e cantidade e asumibles economicamente . Ademais diso estaríaselle dando unha axuda ás comisións de festas e entidades que organizan eventos máis aló do custe económico, pois tamén lles estariamos aforrando traballos e burocracia. 

   En resumo, dende Somos Ribadumia consideramos que sería moi positivo sacar a concurso nun único lote todo o alumeado de Nadal cos añadidos decorativos, o alumeados da Festa do Tinto e do Pan, e  o alumeado de todas as festas parroquiais, romarías e outros eventos que requiran deste tipo de iluminacións, e por este motivo vimos de presentar por rexistro unha proposta para o seu debate plenario que recolle este plantexamento.

·       Unicamente se adiantou o 25% inicial, e moi tarde.

·       O prazo para xustificar as axudas e poder cobralas rematou o 30 de novembro, e hai partida dende xullo,  pero os cartos seguen sen chegar.

·       David Castro castiga aos colectivos intencionadamente, e culpa a persoal municipal de non facer os pagos que el mesmo ten bloqueados.

·       A situación é inaceptable e completamente excesiva. Pedimos a David que pague de maneira inmediata  o que debe,  que dea a cara e explicacións ante a veciñanza, e que asuma as consecuencias políticas deste desastre de xestión.

 Dixémolo en decembro, tamén antes, pero temos que volver poñer o foco na situación de abandono intencionado na que o goberno do Señor Castro mantén aos colectivos do noso Concello.

   A día de hoxe, cando o goberno debería ter enriba da mesa a aprobación do 15% do último tramo das axudas do 2024 que se reserva para as actividades realizadas  en decembro, ten o resto sen pagar.  Unicamente, e xusto despois de que dende Somos Ribadumia fixeramos pública a situación o pasado decembro, David deu orde de pagar o 25% inicial, que segundo as bases se tería que ter pagado inmediatamente despois de aprobarse as axudas o 14 de outubro, pero non pagou o resto ata chegar ao 85% da partida, a pesar de que o 30 de novembro rematou o prazo para a xustificación das axudas.

  Así pois, con xaneiro de 2025,  os colectivos que realizaron actividades no 2024 aínda non cobraron as axudas que lles corresponden. E non falamos únicamente de clubs deportivos, colectivos  como  ESMAR,  unha entidade de axuda a mulleres víctimas de violencia de xénero, que precisa deses escasos recursos para poder atender as súas mulleres, tampouco recibieron a súa axuda. E o mesmo co resto de colectivos sociais, culturais, deportivos…

Isto está provocando que algunhas desas entidades valoren suspender as súa actividade ante a inseguridades económica que o goberno de David Castro  está provocando.

  O máis lamentable é que non hai nin escusa nin explicación posible que xustifique este retraso nos pagos aos colectivos do noso concello, David Castro retén estés fondos de maneira intencionada para castigar a todos estes colectivos, pois mantén enfrontamentos con todos eles, sexa por unhas cousas ou sexa por outras. David Castro, actúa ademais covardemente, pois temos constancia de que aos colectivos estáselle dicindo dende  o goberno local que non cobran “por culpa de persoal municipal que ten parados os pagos”, algo que é totalmente falso, pois quen aproba os pagos é o alcalde e a Xunta de Goberno Local.

  Por ese motivo, pedimos a David Castro o mesmo que lle pedimos en decembro,  que antes de nada e de xeito inmediato pague  todo o que ten atrasado, e despois que dea a cara e explique  publicamente por que motivo somete aos colectivos a este castigo. Se o motivo é a incompetencia política, que asuma responsabilidades, que por algo é alcalde, e cese á concelleira de Contas,  e se o motivo é interese político ou mesmo os seus odios persoais, que dimita el directamente. 

@somosribadumia

950.000 € despois, o bombeo de augas fecais de Cabanelas segue vertendo ao río Umia. E despois de anos de falsas promesas e de contarnos que a amplicación do bombebo ía resolver o problema de vertidos, o Partido Popular saénos con que iso non é así e que esa obra nunca se fixo pensando en resolver o problema e verquidos. Minten e enganan para non asumir responsabilidades. Pero a realidade está ben a vista e ao olfato. E mentres, David Castro desaprecido, como sempre que hai un problema. #Ribadumia #Ribadumiaabandonada #alcaldeausente#SomosRibadumia #Sergiosoutelo

♬ sonido original – somosribadumia – somosribadumia

• Fiasco monumental e estrago de case 1 Millón de Euros.
• Os verquidos seguen a  producirse igual que sempre, porque o problema de fondo está sen solucionar.
• A resposta da Xunta parécenos unha burla a toda a veciñanza.
• Esiximos explicacións públicas, da Xunta e de David Castro, e vendo que dende a Xunta confirman que a obra resulta inútil, responsabilidades políticas.
• Esiximos que se determine dunha vez quen é a industria responsable destes verquidos e se tomen medidas contundentes e efectivas.

 Nin dous meses tardou o bombeo de Cabanelas en demostrar o  que dende Somos Ribadumia levamos advertindo dende o  2022, incluso antes, que é que o problema de verquidos  nese punto non ten que ver coa capacidade do bombeo, senón coas deficiencias na rede se saneamento, en concreto na parte de Vilanova de Arousa, que meten máis auga da que ningún bombeo vai poder canalizar. E isto é algo que non dixemos nós, senón que consta nos informes que a concesionaria do saneamento fixo xa no ano 2016, e que deixaban moi claro que as actuacións a realizar para evitar desbordes neses punto deberían centrarse na revisión e reparación nas redes de saneamento para eliminar as entradas de augas pluviais.

  Cómpre recordar que estando Somos Ribadumia no goberno local, en Ribadumia, da man de Enrique Oubiña como Concelleiro de Urbanismo, actuouse  en base a esas recomendacións, grazas ao cal  o número de episodios de verquidos nese punto  reduciuse significativamente. Por desgracia, Gonzalo Durán ignorou eses informes, que poñían en entredito a súa xestión como alcalde, e optou, co aplauso entusiasta de David Castro, pola solución máis populista: anunciar unha obra  moi cara para ter un bombeo  máis grande e máis potente e máis de todo, pero que na práctica, nove anos e case  1 Millón de euros despois, resulta un completo fiasco.

   Dende Somos Ribadumia agardamos que de maneira inmediata se dean explicacións públicas, claras e transparentes e que se se confirma que o bombeo non  é suficiente nin sequera logo deste potente investimento, se depuren responsabilidades políticas.

 Sobre o traballo de prevención e control da Mancomunidade.

 Por outra banda, dende Somos Ribadumia non saímos do noso asombro ao comprobar que co desborde do bombeo saiu a relocer un verquido que é das mesmas características que verquidos anteriores que levan anos apuntando a  que proceden da mesma industria. Hai que recordar que a Mancomunidade, da man de Marta Giraldez,  puxo en marcha un departamento específico. Este departamento comunicaba o pasado novembro que realizara ata esa data 86 inspeccións en industrias, un traballo moi positivo sen dúbida que provocou melloras en todos os sentidos . Por iso resulta preocupante que logo de tantos anos de verquidos e agora con este departamento traballando, aínda non fóra posible localizar e tomar medidas contundentes  contra a empresa responsable destes verquidos concretos.

Inaceptable resposta de Augas de Galicia e da Consellería de Medio Ambiente.

  Dende Somos Ribadumia non podemos aceptar as explicacións aportadas por Augas de Galicia e pola Consellería de Medio Ambiente en relación aos verquidos no bombeo de Cabanelas. É máis, parecennos directamente unha tomadura de pelo cara a nosa veciñanza.

  Que a ampliación do bombeo tiña por obxectivo eliminar os verquidos en Cabanelas é algo que se dixo dende o primeiro minuto. Tanto Gonzalo Durán como David Castro como todos os responsables políticos que pasaron polo Salnés a falar deste asunto dende que no ano 2016 se propuxo esta solución, insistiron en que  esa ampliación  tiña como obxectivo  eliminar os verquidos nese bombeo. E así consta en innumerables comunicacións de prensa.

  Polo tanto, resulta de todo inaceptable que agora se diga que a obra non perseguía ese obxectivo. E dende logo falar dunha mellora da eficiencia enerxética  cando se veñen de gastar 950.000€ € nun bombeo que duplica ao anterior en potencia co correspondente sumento dos consumos enerxéticos, resulta indignante.

  Como resulta indignante que se pretenda cargar o morto ao polígono de Sete Pías. Para empezar, quizais dende a Consellería deban facer un cursiño de reciclaxe para que cando falen destes temas entendan de que están falando. O verquidos que se producen en Cabanelas non son verquidos producidos unicamente por unha fábrica, senón  que o que desborda é de toda a rede de fecais. O verquido prodúcese, e queremos insistir nisto, por que o bombeo colapsa, e colapsa  por que a rede de fecais está saturada de auga de choiva, que non debería viaxar por esas tuberías.  E ese é o problema, cuxa orixe está perfectamente identificado no Concello de Vilanova, moi dado  a ter este tipo de problemas porque non ten separada a rede de pluviais da de fecais. Se no canto  de gastar case 1 millón de euros nun bombeo que non soluciona nada, se dedicaran a resolver os problemas na rede de fecais en Vilanova como fixemos en Ribadumia e como fixo e segue facendo Cambados, hoxe, co mesmo bombeo que había, non estariamos falando deste tema.

Dende Somos Ribadumia volvemos insistir en pedir responsabilidades políticas, pois é evidente que esa obra de mellora do bombeo non cumpre o seu obxectivo de eliminar os verquidos en Cabanelas. Todo o que non sexa iso, é rirse da veciñanza. E por suposto, que se aporte unha solución a este problema.

 Onde está David Castro?

  E falando de responsabilidades políticas, dende  Sonos Ribadumia botamos en falta as explicacións ou opinións que sobre este tema poida aportar o alcalde de Ribadumia e tamén Presidente da Mancomunidade. O mesmo señor que antes das eleccións andaba a facerse fotos na ribeira do Umia anunciando a bombo e platillo esta mesma obra que se demostrou pouco menos que unha estafa.

   Seguramente en vez de estar atendendo aos problemas do noso Concello dedique estes días a pasearse por FITUR, pero dende a nosa formación entendemos que en base aos seus dous cargos debería comparecer publicamente e de maneira urxente, dar explicacións e esixirlle ao Concello de Vilanova que resolva os seus problemas na rede de saneamento e á Xunta de Galicia que deixe de rirse da veciñanza e de poñer escusas e actúe.

•   Nula campaña de apoio ao Comercio Local.
• Queixas pola organización da Cabalgata de Reis.
• Escaso e discreto alumeado.
• Fracaso do concurso de carrozas, cunha única presentada, e sen apenas repercusión e apoio social do resto de concursos.

  Unha vez pasado o Nadal compre facer unha valoración sosegada das diferentes actividades organizadas dende o Concello, e o primeiro que queremos pedir dende Somos Ribadumia é que David Castro siga o noso exemplo e analice ben como está desenvolvéndose o Nadal ribadumiense nos últimos anos, porque a deriva que leva é do máis preocupante.

   De partida debemos lamentar a completa falta de previsión e a sensación de continua improvisación. A campaña de actividades de Nadal foi presentada o 16 de decembro, días despois do encendido “oficial” do alumeado de nadal. Logo diso, á maior parte das actividades apenas se lle deu repercusión, algo que choca coa intensa campaña de promoción do AF7 indoor, un evento que tamén aconteceu en Nadal e que contou con todos os focos do goberno local, que lle deu toda a prioridade deixando os actos propios do Nadal en segundo plano.

Unha cuestión que consideramos moi grave é a desaparición das campañas municipais de apoio ao comercio e hostalería locais. Os feitos son indiscutibles: nin unha soa publicación nas redes do Concello en apoio ao comercio local nin ao longo do  Nadal nin nas semanas previas, e nin sequera este ano o Concello se fixo cargo de realizar o video promocional que se ten realizado en anos anteriores; a campaña de recollida de xoguetes organizada pola asociación de comerciantes supostamente co apoio do Concello,  anunciouse nas redes municipais catro días antes do seu remate, e apenas se lle deu repercusión. Un dato, a campaña de recollida de xoguetes foi publicitada no perfil de facebook do Concello con dúas publicacións, o AF7 indoor, só en decembro, antes de rematarse tivo quince publicacións distintas. Tamén foi perdendo peso o concurso de escaparates, pero diso  falamos máis adiante. A falta de diálogo e de apoio ao comercio é evidente. Cando se puxo en marcha o acto de encendido de luces, con Somos Ribadumia no goberno, os comerciantes eran a peza central do acto, dábaselles visibilidade e protagonismo e apoio a través doutras campañas, un apoio que sempre dixemos que era insuficiente, pero é que agora nin iso, e co paso dos anos o protagonismo que se lle daba ao comercio local en actos como o encendido do alumeado diluiuse polas ansias de 3 de figurar do señor Castro, ata o punto de que o comercio e a hostelería xa non estiveron presentes  neste último acto de encendido do alumeado, que por completo quedou convertido nun acto meramente político, para maior gloria do señor Castro, e con cada vez menos público asistente.

   Dende Somos Ribadumia debemos lamentar a falta de compromiso, de apoio e de dialogo do goberno do señor Castro co comercio local. Non botamos en falta á anterior concelleira de comercio, e temos criticado moito a súa escasa ambición e traballo de impulso ao comercio e á hostalería, pero cando menos con ela no cargo víase algo máis do que se  mira agora. É inaceptable que o Concello de Ribadumia sexa a única administración local que non realiza campañas de apoio ao comercio e hostalerías locais.

  Por outra banda, os diversos concursos de decoración que se organizan dende fai anos teñen o formato esgotado, algo que se nota moi especialmente no concurso de escaparates. Cada vez estes concursos contan con menos apoio social, e dende o noso punto de vista o problema está en que nin os premios resultan atractivos, nin hai unha implicación do Concello en facelos visibles e en impulsalos para que logren os seus obxectivos. Ao señor Castro chégalle con poñelo todo nun cartel e facerse a foto, pero este tipo de iniciativas non se realizan para que os alcaldes se fagan fotos, senón para dar vida aos Concellos. 

  Mención a parte o concurso de Carrozas de Reis. A iniciativa, posta en marcha por Salomé Peña, logo suspendida por decisión do señor Castro no ano 2016 e posteriormente recuperada polo propio Castro o Nadal pasado, resulta un completo fiasco. Nestas dúas últimas edicións unicamente se presentou a concurso unha carroza, a das ANPAs Ribadumienses, que xa participaban cando non había concurso. Resulta evidente que ese concurso, tal como xa dixemos o ano pasado, ten que organizarse doutro xeito, para lograr a implicación doutros colectivos, senon non ten ningún sentido.

   E falando da propia cabalgata de Reis, temos que dicir que se produciron moitas críticas da veciñanza pola mala xestión da alternativa ante o mal tempo. Todos e todas estamos de acordo con que suspender o desfile de carrozas foi unha decisión acertada. O que non se entende é que se organizase a presenza dos Reis no auditorio tendo tres pabillóns de deportes, amplos e con espazo suficiente para organizar unha alternativa acorde á importancia do que en cantidade de público é o terceiro evento máis importante que organiza o  Concello, logo da festa do Tinto e a do Pan. Pero a falta de espazo e o mal xeito do auditorio para un acto destas características, que ademais o goberno non se molestou en organizar minimamente provocando un caos absoluto, non foi o único problema. Coa xornada que estaba, ao goberno ocorréuselle poñer un posto de chocolate e churros, cousa que nos parece correcto, pero resultou que o puxeron á intemperie o no sitio menos abrigado que encontraron, obrigando aos pais e nais a facer cola ao frío, choiva e vento. Ademais o goberno non calculou ben a asistencia e o posto pechou xa a metade de acto, porque  dende o goberno local non quixeron pagar mais que un par de centos de racións cando nese acto menos de 300 nenos e nenas non se xuntan, aos que hai que sumar a nais, pais, avos e avoas … Como é lóxico, se facer cola á intemperie non gustou as persoas asistentes, menos que lle pecharan o posto antes de tempo e os deixaran con frío e sen o chocolate quente.

   Tampouco convence o alumeado de Nadal. E non convence por que a pesar da enorme melloría na calidade das luces, polas súas características este tipo de alumeado  resulta moi pouco vistoso se non se modifica a colocación do mesmo para adecualo aos parámetros actuais. Non esquezamos que o Concello de Ribadumia é dos Concellos da comarca  que dedica máis euros por habitante ao alumeado de Nadal, e iso debería verse reflectido no mesmo, máis non se mira. Ao final, a sensación de cutrez mantense a pesar, insistimos, da melloría notable. Instamos a David Castro a que en vez de ir aos Plenos a queixarse e bracear, se sente a analizar con calma os contratos de alumeado público e a distribución dese alumeado para lograr que sexa un alumeado que alegre o Nadal, pois esa é a súa función.

  En resumo, dende Somos Ribadumia consideramos que o goberno local ten moito que mellorar na xestión das diferentes actividades de Nadal. Dende Somos Ribadumia animamos a David Castro a analizar con ollo critico todo o acontecido este ano e a traballar para que o ano próximo a nosa veciñanza non sinta a necesidade de ir cos seus fillos e fillas a visitar os Concellos veciños en busca de alternativas con máis espírito navideño que as que teñan en Ribadumia, e a impulsar campañas a favor de que as compras en comercio e o gasto en hostalería se realice en Ribadumia.