• Inaudito! Contrata empresas para labores de desbroce sen incluír a maquinaria no contrato.
• Non contrata persoal dende o Concello, nin pide apoio á mancomunidade, pero paga a empresas externas por ceder persoal ao Concello que usen tractores municipais .
• Inseguridade xurídica e legal  e estrago de cartos.

Logo de que David Castro anunciara a bombo e platillo a contratación de tres empresas para supostamente adecentar o Concello de cara o AF7 , nun lamentable comunicado do que xa falamos a pasada semana, encontrámonos con algo que non sendo novidade resulta totalmente inaudito e increíble na xestión municipal.

  Resulta que vimos de ser informados de que  David Castro contratou os servizos de tres empresas externas para labouras de desbroces, pero non como podería pensar unha persoa normal. O que fixo foi contratar a cesión de persoal, que polas tardes está usando a maquinaria municipal para eses traballos, a mesma maquinaria que pola mañá usan os empregados do Concello.

 Esta situación que agardamos que David Castro aclare de inmediato, resulta por completo absurda . Como explica  Sergio Soutelo “ o normal se vas gastar 20.000 € en contratar  tres empresas, é que esas empresas dispoñan a maquinaria necesaria para realizar o traballo. Para contratar persoas sen ferramenta, un Concello o que debe facer é contratar  o persoal cualificado que precise polo tempo que sexa necesario”. Non ten ningún sentido tirar cartos en empresas que só aportan persoal  cando ese persoal se pode contratar directamente e, a parte de saír máis barato,  o traballo pódese organizar dende o Concello, que por algo Ribadumia ten liberados a parte do alcalde, a dous membros do seu goberno, entre eles o concelleiro de urbanismo. Ademais, a propia Mancomunidade que preside David Castro ten un parque de maquinaria compartido, que suporía un reforzo e un aforro económico importante, pero por algún motivo David Castro renunciou a facer uso dese servizo incluso de maneira puntual. Outro exemplo do desastre da súa xestión no Concello e na Mancomunidade.

  Dende Somos Ribadumia non podemos aceptar esta maneira de facer as cousas que nin sequera é novidosa. Xa tivemos constancia destas prácticas en ocasións anteriores pero neses casos de xente de empresas externas manexando maquinaria municipal dicíase que era algo moi  puntual para cubrir unha baixa e escusas similares. Agora vemos que non ten nada de puntual e que é a maneira que ten o señor Castro de xestionar o Concello. Unha irresponsabilidades enorme, por que no caso dun accidente grave eses traballadores, usando maquinaria que non é da súa empresa  e sobre a que non teñen ningunha responsabilidade quedan nunha situación xurídica moi delicada, e o propio Concello, que cede o uso de maquinaria a persoas alleas ao Concello,  tamén. E sen accidentes graves, preguntamonos se se dera o caso dun uso indebido dos tractores municipais ou outra maquinaria que derivará en danos a terceiros  – moi habituais son  as pedradas nos coches ou a ventas de vivendas  –  ou en avaria na maquinaria, quen se faría cargo? Porque esas persoas non teñen ningunha responsabilidade legal sobre maquinas que non son da súa empresa.

   E todo isto sen valorar os posibles favores políticos que o señor Castro poida estar  manexando con esa maneira de actuar.

  Pedimos a David Castro aclare as condicións das empresas contratadas e que persoal está usando a maquinaria municipal, e para o caso que   deixe de comportarse como se estivera “xogando as casitas” co Concello. A xestión dos recursos públicos é algo moi serio que se debe realizar con rigor, con moito sentido, moito coidado polas persoas que traballan para o Concello e polos propios recursos municipais  e con moito respecto pola veciñanza que é quen paga cos seus impostos todo o que se fai.

• Un auto desestimatorio feito público desvela que David Castro presentou denuncias  en calidade de alcalde.
• Queremos saber se David Castro está usando recursos públicos para as súas cuestións persoais.

Fai uns días a prensa  fíxose eco dun auto xudicial que desestimaba un recurso presentado por David Castro contra unha desestimatoria  a partir dunha denuncia interposta polo propio  Castro contra un veciño de Ribadumia por presunta inxurias.

  Tanto a sentenza como o auto do recurso, resultaron contrarios aos intereses de David Castro, que tivo a ocorrencia de denunciar a unha persoa como presunta propietaria dun perfil en redes sociais crítico coa súa persoa, sen aportar, segundo corroboran tanto a sentenza como o auto desestimatorio do recurso presentado contra esa sentenza que se fixo público.

  Dende Somos Ribadumia xa temos declarada a nosa postura contraria a calquera ataque persoal contra calquera persoa, e por suposto contra  as persoas que exercen na política, unha postura que por certo o señor Castro non ten. Polo tanto, se houbo un ataque  persoal debemos antes de nada condenalo. 

  Outra cuestión distinta é que David Castro se dedique a denunciar a  calquera que o critique, con acusacións graves, realizando sinalamentos públicos buscando “xuizos paralelos” na opinión pública, pero  sen aportar probas que fundamenten eses sinalamentos, como se mira neste caso,  que non foi o primeiro. Pendente está unha denuncia contra outro perfil nas redes do que pretende responsabilizar ao noso voceiro Enrique Oubiña, outro episodio en campaña que tamén denunciou e que rematou igual que o que hoxe nos ocupa,   ou a denuncia interposta no 2022 tamén contra Enrique Oubiña  e Somos Ribadumia por denunciar publicamente os problemas durante o verán coa auga pública e  que  foi arquivada sen admitirse a trámite por absurda.

  Neste último  caso feito público a semana pasada que pon fin a unha denuncia posta no 2023, en plena campaña electoral,  hai unha cuestión relevante que nos preocupa.  Ese auto feito público deixa constancia de que David Castro presentou a súa denuncia a titulo particular, e despois ampliouna  incluíndo a súa condición de alcalde.

 Así  que a primeira pregunta é “ quen paga o avogado?  Dende Somos Ribadumia temos moitas dubidas ante o que empeza a parecer un episodio de persecución apoiado en recursos municipais, polo que o que nos corresponde  como formación política é solicitar ao señor Castro que compareza publicamente e explique ben que anda facendo, e aclare se esa persecución legal contra quen lle leva a contraria a paga el ou a paga a veciñanza.

  Non é probable que David  Castro vaia a dar a cara, polo que sobre esta denuncia e todo o proceso xudicial que tivo imos solicitar toda a documentación que haxa no Concello sobre este tema, se o levou o servizo legal do Concello, e imos presentar unha serie de preguntas para que o señor Castro explique en Pleno  se certas informacións en relación con este tema son certas, e no seu caso saber canto lle están costando ao Concello as persecucións persoais do señor Castro. Non esquezamos que o Concello tivo que facer fronte aos custes dun proceso  contra unha extraballadora que ademais dunha indemnización de máis de 30.000 € costou miles de euros en avogados e costas xudiciais.

• Anuncia como un logro verse obrigado a contratar -a dedo- a tres empresas para “poñer ao día” os espazos verdes do Concello.
• Insólito: anuncia que está adecentando o Concello para o AF7! . Esiximos desculpas por esa falta de respecto á veciñanza.
• Cero novidade: levamos anos denunciando a privatización encuberta da xestión dos servizos municipais.
• Nunca tanta maquinaria tivo o Concello, nunca tan pouco se fixo.

    Esta semana David Castro confirmou algo do que levamos anos informando á veciñanza :  non ten capacidade para xestionar o Concello e vese obrigado a subcontratar os servizos municipais, unha medida  inédita en Ribadumia iniciada fai uns anos polo propio Castro logo de alcanzar a maioría absoluta, nun Concello que non destaca nin polo seu tamaño nin pola súa falta de medios materiais

  O goberno local emitiu un sorprendente comunicado esta semana poñendo de manifesto a realidade da xestión de David Castro. Unhas declaracións que chocan frontalmente co declarado polo propio  Castro  en Pleno o pasado mes de novembro, cando asegurou que o mantemento de todas as áreas verdes, viais e rueiros do Concello “están nun estado moi bo”. Esas  declaracións foron realizadas durante o debate dunha moción do noso partido onde precisamente propoñiamos a creación dunha mesa de traballo para organizar e coordinar o mantemento dos espazos públicos do noso Concello que o goberno non aceptou, e agora demóstrase, por boca do propio David Castro, que era unha proposta máis que razoable, e unha medida moi necesaria porque o seu equipo non ten capacidade de xestión.

   Sobre o lamentable  estado real dos espazos públicos municipais temos feito innumerables comunicados e amosadas fotos e videos abondo. Tamén temos informado sobre a subcontratación de empresas, amigas, para determinadas labouras de mantemento ao longo do ano. Para a nosa formación, tendo en conta que nos últimos dez anos o Concello fixo investimentos en maquinaria que rondará  no seu conxunto os 400.000€, é totalmente inaceptable que sexa necesario recorrer a empresas externas, e emnos gastar 20.000 €.  Recordemos que con moitos menos medios, e unicamente reforzando o apoio que recibimos de BATA, durante o período 2015/2019 o Concello estivo en perfectas condicións  de mantemento, e que nós sepamos, nin Ribadumia aumentou de tamaño, nin temos máis kilómetros de viais nin moito menos máis zonas verdes.

Posta a punto para eventos foráneos, non para dar servizo a veciñanza.

  Pero o máis sorprendente do comunicado esta semana por David Castro está nos motivos esgrimidos para acometer este reforzo e contratar ata tres empresas para o que antes se facía con persoal municipal. Resulta que non se fai porque haxa unha responsabilidade cara a veciñanza – que paga os seus impostos – de ter o Concello coidado. O comunicado emitido polo goberno do señor Castro explica literalmente que “esta acción enmárcase nun plan de posta a punto do municipio de cara á chegada da época estival, coincidindo ademais coa celebración de eventos deportivos como a Fase Final da AF7…”, poñendo este evento por diante como motivo fundamental desta acción.

  Dende Somos Ribadumia consideramos totalmente inaudito, pero ademais absurdo, que se diga que se están gastando miles de euros por que hai que ter o Concello bonito para o AF7, un evento foráneo.  En verbas do noso Concelleiro Sergio Soutelo “nin sequera puxo de escusa  a nosa festa máis importante, que será en dúas semanas,  tivo que meter o AF7 como xustificación de algo tan básico como atender ao Concello, como se a veciñanza de Ribadumia estiveramos á disposición do que ese evento mande. Non podemos aceptar isto”.

Tampouco aceptamos que se fale de ter o Concello adecentado “cara á chegada da época estival”. O Concello debe ter os seus espazos públicos, todos eles, en perfectas condicións todo o ano, non só unha parte. E dende logo, temos moi claro que os Concellos que se coidan todo o inverno, pouco reforzo precisan durante o verán.

Esiximos a David Castro que rectifique publicamente estas declaracións. Os espazos verdes do noso concello, os parques, os rueiros e os viais deben estar en correctas condicións prorque é un deber do goberno local cara a veciñanza. Lamentable é que o goberno limpe as contornas dos campos das festas parroquiais unicamente días antes de cada festa, e que o resto do ano deixe todo abandonado, pero este tipo de declaracións son unha tomadura de pelo inaceptable.

• Un informe de empresa que xestiona a EDAR de Lois destapa que está saturada e verquendo de xeito continuo.
• David Castro negou a existencia dun convenio con Meis para ocultar a situación.
• Propoñemos que se busque unha solución negociando unha actuación  conxunta con Meis, mesmo con outros concellos e outras administracións.

O Concello de Ribadumia ten un problema moi grande coa EDAR de Lois, e David Castro está máis preocupado de ocultar o problema que de darlle solución.

  O pasado 24 de maio de 2024 entrou por rexistro do Concello de Ribadumia un informe da empresa que xestiona a EDAR de Lois, elaborado ao fío dunhas obras que nese momento se estaban realizando no Concello de Meis, en concreto na rede de saneamento nos lugares de A Ponte Nova e As Portelas, que apuntaban a unha conexión con esa depuradora. Nós tivemos acceso a ese informe en setembro dese ano, logo doutro episodio de retraso na entrega de documentación tan habituais no goberno local. O informe resultou demoledor e ao tempo moi esclarecedor.

Demoledor porque puxo de relevancia unha realidade da que en ningún momento se informou á corporación, que é que a EDAR de Lois está completamente saturada, “ existindo un vertido por rebose do caudal que non pode asumir á instalación practicamente todo ano, agás os meses estivais (xullo-agosto-setembro).”  Está situación é totalmente inaceptable porque implica un verquido continuado ao río Cañón, que David Castro oculta e que máis aló do desastre ambiental, moi  importante pois o río Cañón  rega boa parte da parroquia de Lois e flúe ao río Umia,  a situación pode ter consecuencias legais moi graves con multas que piden superar o millón de euros e outras consecuencias como podería ser o peche da instalación.

 

  O informe resultou esclarecedor porque puxo de  manifesto a completa irresponsabilidade de David Castro, que  vai máis aló de ocultar unha situación e evitar buscarlle unha solución. O informe, insistimos que entrou por rexistro o 24 de maio, fai referencia a un convenio co Concello de Meis para conectar un grupo de vivendas da parroquia de Paradela a EDAR de Lois. David Castro negoulle ao PSOE no Pleno de Xullo a existencia dese convenio. Ante a discrepancia entre as declaracións do señor Castro e o informe da concesionaria da EDAR, o noso Concelleiro solicitou formalmente a Meis que confirmara a existencia ou non dese convenio, e en caso afirmativo solicitamos copia.

  Recibimos resposta do Concello de Meis o 14 de outubro de 2024, tanto a confirmación da existencia do convenio como unha copia do mesmo, perfectamente asinada polo alcalde de Ribadumia e pola alcaldesa de Meis con data do 30 de xullo de 2021. No mesmo día que recibimos copia dese informe tivo lugar un  Pleno Extraordinario, no cal David Castro non permitiu a Sergio Soutelo expor as súas preguntas na quenda correspondente, pero en calquera caso  dende a agrupación socialista confirmouse publicamente a existencia dese convenio con Meis, que David Castro insistía en negar, e  que recolle o seguinte:

“ Primeiro. Obxecto do Convenio. Este convenio ten por obxecto establecer a forma e condicións de colaboración entre as partes comparecentes para a prestación do servizo de sumidoiros de vivendas dos lugares de As Portelas e Pontenova (Paradela) que evacuarán as augas residuais cara á EDAR de Lois (Ribadumia) con obxecto de mellorar as condicións de salubridade de persoas que posúen vivenda no ditos lugares.

Para iso, o Concello de Ribadumia cederá o uso da EDAR de Lois para que se sirvan persoas que teñen vivenda no lugares de As Portelas e Pontenova (Paradela).

Segundo. Beneficiarios/as. As persoas beneficiarias deste acordo de colaboración son aquelas titulares de vivendas dos lugares de As Portelas e Pontenova (Paradela), que poderán conectarse á EDAR que dá servizo á Parroquia de Lois (Ribadumia)”.  

   Compre remarcar que no Pleno de Xullo de 2024 David Castro ademais de negar a existencia do convenio, declarou, citamos literalmente que “as augas residuais dunha zona concreta de Paradela, que non tiñan (esas vivendas) onde vertela, estanse vertendo na nosa depuradora ( a de Lois)” . Esta afirmación é rotundamente falsa, non hai ningunha conexión realizada á EDAR de Lois dende o Concello de Meis, e de feito David Castro a día de hoxe non respondeu ás solicitudes de conexión realizadas e posteriormente reiteradas polo Concello de Meis en virtude do acordo asinado. Tal é así que preguntado pola situación a nivel de execución do convenio no Pleno celebrado esta pasada semana, o señor Castro non foi quen de dar unha resposta clara. O que si fixo o señor Castro foi bloquear o acceso ao video do Pleno, nun intento de ocultar o que aconteceu nese Pleno.

  Sen entrar a valorar o feito que a David Castro se lle ocorrera asinar un acordo sen antes solicitar os pertinentes informes técnicos que corroboraran que a depuradora de Lois podía asumir as conexións que solicitaba Meis, ou o de que agora evite cumprir as súas obrigas, asinadas por el mesmo,  optando polo silencio e negándose a resolver as solicitudes presentadas polo Concello de Meis, atopámonos que temos unha  situación concreta moi grave que afecta á depuradora de Lois tanto no seu momento actual con verquidos continuados, como ás novas conexións á rede de saneamento que a veciñanza solicite  – obviando o convenio con Meis – dende a propia parroquia de Lois, e que non se van poder realizar. Un problema moi grave, do que a corporación non tiña constancia, e  que dende a nosa formación entendemos que deber recibir unha resposta acorde e, sobre todo, urxente.

  Dende Somos Ribadumia queremos por de manifesto o problema, pero tamén propoñer posibles solucións.

E para nós a mellor solución está no diálogo e en abandonar a dinámica de confrontación infantil que David Castro mantén coa alcaldesa de Meis. O Concello de Ribadumia ten que poñer unha solución ao problema que ten actualmente, incluso sen dar cabida ao caudal procedente de Meis. Pero tendo en conta que  Concello de Meis ten tamén problemas para poder dar conexión de saneamento a parte do seu concello nunha zona ou en varias  lindantes ou próximas a Ribadumia, existe a oportunidade de colaboración e polo tanto de asumir custes de maneira compartida.

  Polo tanto, ten todo o sentido do mundo valorar unha actuación conxunta dos dous Concellos para, ben ampliar a depuradora existente se iso fora posible e razoable, ben para dotar unha nova depuradora que dera servizo sobrado e cun planeamento previsor de cara  o futuro, e que incluso se podería, estudando ben a súa situación, facer extensiva a Vilanova de Arousa ou incluso Portas. Compre remarcar que o propio informe da xestora da EDAR , propón como solución para a situación actual e para poder recibir o caudal de Meis a ampliación desa EDAR sita en Lois. E compre remarcar que se varios Concellos van da man nunha actuación deste calado e importancia, resulta  máis sinxelo obter fondos de outras administracións.

   Por iso vimos de presentar unha moción que propón o seguinte acordo:

–         Instar ao Concello de Ribadumia ao seguinte:

a)  que solicite a Espina&Delfín un estudo en profundidade da situación da depuradora de Lois que inclúa tanto os problemas técnicos ou de capacidade como as consecuencias que están tendo eses problemas no funcionamento da depuradora e no medio ambiente, e as posibles solucións, no curto e no medio e longo prazo.

b) con independencia do anterior iniciar de maneira inmediata un proceso de diálogo e colaboración co Concello de Meis para buscar unha solución conxunta ao  problema de saturación que vive a depuradora de Lois e que resulte beneficiosa a ambos Concellos, sen descartar ampliar a colaboración a outros Concellos pero en calquera caso sempre poñendo o foco en resolver o problema da parroquia de Lois e a saturación que ten a depuradora que hai nesa parroquia.

c) que o goberno local compareza ante esta corporación no próximo  Pleno Ordinario a partir da aprobación desta moción ou, se se considera facelo con anterioridade,  nun Extraordinario, para dar conta do recollido nos puntos anteriores, do estudo referido da situación da depuradora de Lois,  das solucións posibles, tanto a curto prazo para minimizar o impacto ambiental como a medio e longo prazo para dar solución á falta de capacidade da depuradora de Lois, das actuacións realizadas polo Concello de Ribadumia e  da evolución ou resultado das conversas mantidas con Meis e no seu caso con outros Concellos.